Muisais Ujakma
Muap nuṉkanam chícham najanamu
29 Kame Uunt Yus Israer shuarja̱i̱ Urep nainnium chichaman najanamia nuyá̱ Muápnumsha Uunt Yus Muisaisan ataksha chícham najanata tusa akupkámia nuka ju̱i̱ti. 2 Tura Muisais ashí Israer shuaran irur chicharainiak “Átumka Ejiptu nuṉkanam Parauṉkan ashí iniamin armia núurtiuk núnisaṉ núṉke̱ntuk Uunt Yus túramu wáinkiaitrume. 3 Warí aentsti túrachmin tí tsuumai̱ iniaktusar nekapsamu atumí jí̱ji̱a̱i̱ṉ wáinkiaitrume. 4 Túrasha Uunt Yus yamaiya̱ ju̱i̱sha ashí enentáimsar nekaatniun wáinkiatniuncha tura antuktinniasha tsaṉkatramkachuitrume. 5 Wi, atumín kuaraintia uwí kampuntin atsunum ewekámsan itiamjarmena nui̱sha atumí sapatrí̱sha pushirí̱sha imiamkachmarme. 6 Áintsarmek apatkusha yúachmarme tura wíniusha nuyá̱ chíkich umutai̱ ikiariámusha umarchamarme. Kame ‘Wíkitjiai atumí Uunt Yusri̱ nekaratarum’ tusa núnaka túrutmamarme. 7 Tura ju̱i̱ káunkarin Ishpuna akupniúri̱ Sejun tura Pasannumia̱ akupin Ukja̱i̱ mesetan najatramataj tusa jiintiurmarmaji. Túmaitkiuisha ii nupetmakarmaji. 8 Túrar nuna nuṉké̱ atankir ni nérentin ajasarat tusar Ruwin tura Kaat aents súsarmaji. Kame Manasés shuarka kanakar jimiará írutramu ajasármatai chikichik írutramu jú̱ nuṉkaka súsarmaji. 9 Kame ju̱ chícham najanamu enentáimtusrum umirkatarum. Túrakrumka ashí túrittiarmena nu péṉker arutrámtiatrume.
10 Yamái Uunt Yus atumí Yusri̱ íimmianum tura atumí úuntri̱sha tura chichaman iwiarniusha nuyá̱ peṉkeri̱ ainia nusha núnisaṉ ashí Israernumia̱ shuartiram 11 nuyá̱ atumí uchirí̱sha nuwe̱sha tura írar jinia jirumniusha yumí shikincha átum matsamkamunam iruntrarum pujarmena jú̱tiram 12 atumí Uunt Yusri̱ chichaman nájanuk nekas umiktatjai timia nui̱ yamaikia iisha pachinkiar nekas umiktatji titiái tusar iruntraji. 13 Kame Ni yaunchu atumí úuntri̱n Aprajáman, Isakan nuyá̱ Jakupun nekas umiktatjai timia nútiksaṉ átumka yamaikia nekas Ní shuaraitrume tura Nisha nekas atumí Yúsri̱nti.
14 Tura Uunt Yus chícham aentsja̱i̱ najanamu nekas umiktinia ju̱ka aya atumji̱a̱i̱ṉchaiti. 15 Antsu Uunt Yus ii Yusri̱ íimmianum yamái iiji̱a̱i̱ pujuiniana tura yamái iiji̱a̱i̱ pujuiniatsna núnasha najanamuiti. 16 Tura átumka Ejiptunam itiura matsamsamiaj tura chíkich nuṉkanmaani̱sha itiura naṉkaamararmiaj nusha nékarme. 17 Núnisrumek nu aentsu túrutairi̱ mui̱jmiai̱ áiniana nusha nuyá̱ numiji̱a̱i̱ kayaja̱i̱sha tura kuít jiruja̱i̱ núnisaṉ kuriji̱a̱i̱ nakumkar najankamun takarainia nusha wáinkiaitrume. 18 Kame atumíya̱ áishmaṉ núja̱i̱nchuka nuwa̱ksha túrutskesha aents ní shuari̱miak Uunt Yusan ni Yusri̱n iniais nu nuṉkanmaya̱ aentsu yusri̱n enentáimtaka atsutí. Túmakka tséas kaṉkap* tura yapá nupa̱ núkap tsapá núnis yajauchin atumín wárik ipiampártatui. 19 Tura ju̱ chichaman yajauch pujutnum yumiṉkramun antuk niṉki shiir enentáimtumas ‘Enentái̱rui̱ itiurchat ákuisha wikia wakeraj nuna túrakun itit nekaprashtatjai’ tu chichaakuisha ni túramun ashí iisar jumamkiarmatai ashí emesnarartatui.* 20 Nuyá̱ Uunt Yuska ni kajetáiri̱ tura akasmatairi̱nti, ji keak mukuintiana núninia nuja̱i̱ tsaṉkuratniun peṉké nakitrattawai. Tura ashí yajauch yumiṉ jú̱ papinium aarma nu jeartiatui. Nuyá̱ ju̱ nuṉkanmaya̱ṉka Uunt Yus ni náari̱n japirattawai. 21 Tura yajauch pujutnum yumiṉkratin tama aentsja̱i̱ chícham najanamu jú̱ akupkámu papinium aarma ana nuja̱i̱ métek túrunati tusa Uunt Yus ashí Israer shuarnumia̱ṉka akankattawai.
22 Tura ukunam atumí uchirí̱ pampaṉkartatna nusha nuyá̱ chíkich nuṉkanmaya̱ írar káunkartatna nusha Uunt Yus asutkian nuyá̱ náṉkamas suṉkurnasha nu nuṉkanam akupeamun wáinkiar chichainiak 23 ‘Yaunchu Sutuma, Kumura, Atma, tura Sepuim péprun Uunt Yus ti kajerak suira kaje̱ntuk asupriji̱a̱i̱ tura weeja̱i̱ nuyá̱ jiji̱a̱i̱ amukmiayi. Tuma asa nu nuṉkanmaṉka nupa̱sha tsapaichmin araksha arakmachmin ajasuíti. Kame nuja̱i̱ métek atumí nuṉke̱sha ajasuíti’ tiártatui. 24 Nuyá̱ ashí nuṉkanmaya̱ aents inintruiniak ‘¿Urukamtai Uunt Yus nu nuṉkan nuní̱ tura amukuit? ¿Urukamtai imiá katsuntrachmincha kajerkámia?’ tiártatui. 25 Tuíniakui aimiainiak ‘Ju̱ka Yus Ejiptu nuṉkanmaya̱ jí̱i̱kiar juíniak Uunt Yusja̱i̱ chichaman ni we̱a̱trí̱ji̱a̱i̱ najanawarmia nuna umitsuk iniaisar 26 najanamu yusan nékashtai̱n Uunt Yus tsaṉkatkachmaitiat shiir awajainiak tikishmátraruiti. 27 Tuma asamtai Uunt Yus nu nuṉkan ti kajerak ju̱ umiktin chichamnum ashí yajauch yumiṉ aarma ana ímiatrusaṉ umiktaj tusa áitkiaiti. 28 Tura asa Uunt Yus ti kajerak suira kaje̱ntuk ni nuṉke̱ya̱ṉka ji̱i̱r yajá nuṉkanam ishiakma yamaiya̱ ju̱i̱sha ímianai̱ṉ matsatainiawai’ tiártatui.
29 Nuyá̱ chícham nékachmasha aya Yusak nékamu irunainiawai. Antsu chíkichkia iiniu tura ii uchirí̱niusha akupkámu chicham ju̱i̱ aarma ana nuna tuke umiriarat tusa paant awajsamu áiniawai.