Muisais Ujakma
Muisais Israer shuaran umiktarum tusa chicharkarma
4 Yamaikia Israer shuartiram Yus akupkámu umiktin chichaman jintintiajrumna ju̱ péṉker esetra antukrum umiktarum atumí we̱a̱tri̱ Uunt Yusri̱ nuṉkan amarmena nu akinkiarum pujusmintrum. 2 Tura ju̱ akupkámu chicham patatsuk núnisaṉ ementsuk atumí Uunt Yusri̱ akupkámu chichamja̱i̱ akupeajrumna nu umiktarum. 3 Kame Israer shuartiram atumí shuari̱ najanamu yus Paarpiuran enentáimtuiniaṉka Uunt Yus átum íimmianum ashí amukcharmaka. 4 Antsu Uunt Yus atumí Yusri̱ nekas péṉker enentáimtusrum wekaatirmeka yamaisha ashí tuke iwiaaktsurmek. 5 Wats ju̱ nekaatarum. Átum péṉker nuṉkanam jeattarmena nui̱ pujusrumsha akupkámu chicham umiktinia nu umikmintrum tusa winia Uunt Yusur jintintiáwarta tusa wíniaka ataktusuiti. 6 Tuma asamtai ju̱ péṉker enentáimsarum umíakrumni̱ṉkia chíkich nuṉkanmaya̱ aents iismasha ti neka tura enentáimin átatrume. Núnisaṉ ju̱ akupkámu chichaman antukar ‘¡Nekas nú aentska neka tura ti enentáimin ásar uunt naṉkamantu pépruiti!’ turamartatui. 7 Kame ii Uunt Yusri̱ iiji̱a̱i̱ pujá asa seamka tuke anturtamji. Túrasha ¿tu uunt naṉkamantu pépruk ni yusri̱ írunkusha anturkar yaiṉkiaruit? 8 Núnisaṉ wi atumín yamái akupkámu chichaman nekas péṉker túratniun jintintiajrumna nuna ¿tu uunt naṉkamantu pépruk nuja̱i̱ métek umiktinian takakainia? 9 Tura ju̱nasha tájame. Anearta. Amek esettsam íimiasam nekaamam ame enentáim péṉker wáinkiata. Ame iwiaaku pujuttam nuiṉkia ashí wáinkiaitmena nuka peṉké kajinmáttsuk nekas enentáimji̱a̱i̱ tuke enentáimtitia. Tura ame uchirmesha núnisaṉ tiraṉmisha jintintiáwarta.
10 Tura Urep nainnium atumí Uunt Yusri̱n tíjiu̱ch pujumiarmena nu tsawantin Uunt Yus chichartak ‘Israer shuar irutrurta. Winia chichamprun antumtikiartaj tura nuna nekaawar nuṉká iwiaaku pujuartatna nui̱sha ashí tsawant ashampruiniak umirtukarmi núnisaṉ ni uchirí̱sha ashamprukar umirtukartinian jintintiáwarmi’ tímiayi. 11 Takui̱ naint wájakma pakarí̱n átum nui̱ kaunkarum iruntramiarme. Tura yuraṉkim náintian takamtsuk amúa tee ajasmiayi. Tura naint keak ji nayaimpin antimiayi. 12 Nui̱ ji keamunmaya̱ Uunt Yus atumín chichartamkamiarme. Ni chichaamusha anturkamiarme túrasha chichaamu ánturiatrumek Nisha urukuit nusha peṉké wáinkiachmarme. 13 Nisha átum umíakrum túratniun atumji̱a̱i̱ chichaman nájanuk tias Akupkámu Umiktin Chichaman jimiará kaya iwiaramunam áarmiayi. 14 Nu arant nu tsawantin Uunt Yus ashí akupkámu umiktin chicham unuiniararta turutmiayi. Kame atumsha katiṉkrum nuṉka ata̱i̱rum pujustatrumna nui̱sha péṉker umikmintrum tusa ataktusmiayi.
Najankamu yus enentáimtusairap
15 Warí nu tsawantai̱ Uunt Yus Urepnum ji keamunam ajapén chichama nui̱sha nakumkar najamua núninkesha peṉké wáinkiachmarme. Tuma asamtai ti aneartarum. 16 Tura ti yajauch ajasrum enentáimtsuk aents áishmaṉ tura nuwa̱ núninkesha nakumkarum najanawairap. 17 Núnisrumek nuṉkaya̱ yajasma tura nanamtin ainia nusha nakumkarum najanawairap. 18 Nu arant nuṉká japinias yujá ainia nusha tura entsá namak írunna nusha nakumkarum najanawairap. 19 Tura yakí̱ nayaimpiniam etsa̱sha kashí nantusha yaasha núnisaṉ ashí yakí̱ irunainia nu wáinkiuram atumí enentái̱ wakeramuja̱i̱ṉ shiir awajeakrum tikishmátrairap. Warí yakí̱ nayaimpiniam irunainia núnaka atumí Uunt Yusri̱ ashí aents nuṉká pujuinia nuna najatkaiti. 20 Túrasha yamái pujarmena áitkiarma Niniu ajasrum pujusmintrum tusa jiru inimpiáimiunam eṉketua núnisrum Ejiptunam wait ajá matsatrumin atumniaka Uunt Yus ji̱i̱rmarmiarme. 21 Túrasha atumíin Uunt Yus winia kajertukmai. Tura chichartak ‘Nekas tajai tusa ámeka Jurtancha katitkishtatme. Núnismek péṉker nuṉkan Wi atumí Uunt Yusri̱ amasuítjiarmena nui̱sha peṉké waya̱shtiniaitme’ turutmiayi. 22 Nu asamtai wikia ju̱i̱ṉ jakattajai. Wikia Jurtan entsanka katitkishtatjai. Túrasha átumka katiṉkrum péṉker nuṉka akinkiarum nérentin ajastatrume. 23 Tuma asamtai aneartarum atumí Uunt Yusri̱ chichaman atumji̱a̱i̱ najanamia nu kajinmátkirum ántar yus nakumkarum atumí Uunt Yusri̱ suritramkamarumna nu najankairap. 24 Kame atumí Uunt Yusri̱ṉkia akasmawiti tura áeskartua amukratin jiya núniniaiti.*
25 Tuma asamtai uchirmakam núnismek tiraṉkrumkam úuntach ajasam pujusam wariṉkish nakumkam nájankum mui̱jmiai̱ ajasam Uunt Yus íimmianum yajauch túrakrum ákajeakrumni̱ṉkia 26 wi yamái nayaimpisha tura nuṉkasha ántuiniamunam Jurtan katitkirum pujustatrumna nui̱sha núkap tsawant pujuschattarme. Antsu tarimiat ajasrum matsamtsuk ishichik tsawant pujusrum ashí amukáttarme tájarme. 27 Nuyá̱ Uunt Yus tsakiṉmamtikramkakrumin ashí nuṉkanam wétatrume. Túrunarum ishichik juákrum Uunt Yus tui̱ apujtamsattarum nui̱ pujustatrume. 28 Nui̱ pujusrum numiji̱a̱i̱ tura kayaja̱i̱ aents najankamu yus ántichu tura wáinmachu, yurumcha núnisaṉ iwiaakcha yus ainia nu enentáimtustatrume. 29 Túrasha nui̱ pujusrum atumí Yusri̱ Uunt Yus nekas enentáiji̱a̱i̱ tura ashí wakanmiji̱a̱i̱ e̱a̱krumka wainkiattarme. 30 Nuyá̱ ukunam ashí ju̱na tájarmena nu wáinkiuram tura ti waitsa pujakrum atumí Uunt Yusri̱ enentáimtustatrume. Túrakrum ni chichame̱ umirkattarme. 31 Kame Uunt Yus atumí Yusri̱ṉkia ti waitnenkartiniaiti. Tuma asa ajapa iniaitiámsashtatrume. Núnisaṉ máshikia amutmakchattarme. Antsu atumí úuntri̱ji̱a̱i̱ nekas tajai tusa yaunchu chichaman najanamia nuna enentáimturtatui.
32 Wats yaunchu ámeka atsaamin pujú armia nu tura Yus nuṉkan najana aentsnasha najanamia nuyá̱ juárkirum ashí nuṉkanmasha werum inintrústarum ¿chikichkisha túrachminian túramu wainkiashit? Nuíchuka ju̱naksha ¿antukuashit? 33 Tura chíkich nuṉkanmaya̱ aents ji keamunam ajapén Yus chichaamun átum antukmarum núnis antukariat ¿jákacharusha áiniawak? 34 Wats Uunt Yus Ejiptunmaya̱n awakkamuja̱i̱ ti nekapsamuja̱i̱ iniaktusmaja̱i̱ tura mesetja̱i̱ núnisaṉ túrachminian túramuja̱i̱ Israer shuartirmin íimprumin juramsamarmena núnis chíkich yusash chíkich nuṉkanam ¿túrasha áwak? 35 Kame nekas Uunt Yus ju̱i̱ti. Antsu chíkich Yuska atsawai turuttiarat tusa iniakturmasmarme. 36 Tura Niṉkia atumín jintintramataj tusa nayaimpinmaya̱ṉ chichartamkamarme. Nuyá̱ nuṉkaṉka ji keamunam ajapén páchitkia chichame̱sha anturkamarme. 37 Kame Niṉkia atumí we̱a̱trí̱ncha aneamai nuyá̱ ni tiraṉkitirmi̱ṉkia Ejiptu nuṉkanam wait ajá pujutirmin timiá niṉki ni kakarmari̱ja̱i̱ uwemtikrampramarme. 38 Tura untsurí mátsatka aents atumji̱a̱i̱ naṉkaamas kakaram áinianak yamái átum wáintrumna jú̱nis ni nuṉké̱ akinkiarum núṉkentin ajasmintrum tusa amukármiayi. 39 Warí nayaimpinmasha tura chíkich nuṉkanmasha chíkichkia atsawai. Tuma asamtai yamaikia Uunt Yus nekaarum nekas enentáimtustarum. 40 Tura Ni akupkámu aarma chichaman wi yamái atumín ju̱ tsawantin ujajrumna ju̱ka umiktarum. Nu péṉker umíakrumka atumsha tura atumí tiraṉki̱sha Uunt Yus atumín nuṉke̱n tuke pujustinian amastatna nui̱ núkap uwí pujustatrume.” Muisais tu chicharkarmiayi.
Jurtan amaini̱ menaint pepru uwemtai̱
41 4:41-43 Nuya̱ṉka Muisais menaintiú pepru Jurtan entsa amaini̱ áinian akankámiayi. Aents áya aneachma maṉkartua nú peprunam u̱mainiaka uwemin ármiayi. Ruwin shuarnaka Pisir péprun akankarmiayi. Tura Karaatnum Ramut péprunka Kaat shuaran akankarmiayi. Nuyá̱ Pasannumia̱ Kuran péprunka Manasés shuaran akankarmiayi.
Muisais ataksha chichaktin juarma
44 4:44-49 Ju̱i̱ti akupkámu umiktin chichaman Ejiptunmaya̱ jíintrarmatai akupin Sejun Ishpunnum pujuya nuna nuṉke̱e̱n Pitpiurnum íṉkiuasmak paka ana nui̱ Jurtan entsa amaini̱ matsatainian Israer shuaran akupkámu chichaman Muisais súsarmia nu.
Tura Amur aentsu akupniúri̱ Sejunnasha núnisaṉ Pasannumia̱ akupin Úknasha Israer shuar Muisaisja̱i̱ máwarmiayi tura nuṉke̱nka atantrarmiayi. Nuyá̱ Aruirnum Arnun entsa kaanmatkari̱ya̱ juárkim Seun naint Irmun tutaiya̱ tímianai núnisaṉ Arapáka takamtsuk Jurtan entsa amainia̱ juarki̱ Piska wájakmari̱n Arapá nayantsa tímianai nérentin ajasármiayi.