Muisais Ujakma
Israer Úkan Pasannumia̱ akupniun nupetkarma
3 3:1-2 Tura waketkir nuya̱ṉka Pasannumaani̱ wéarmiaji. Tura Uk Pasannumia̱ akupin ashí ni shuari̱ji̱a̱i̱ Itri nuṉkanam káunkarmatai mánikiartai tusar jiintiurarmiaji. Túrasha Uunt Yus chichartak ‘Ashamkairap yamaikia atumín íktusjarme. Tuma asarum yamaikia Amur aentsu akupniúri̱ Sejun Ishpunnum pujá itiurkamarum áitkiasrumek nisha amuktárum’ tímiayi.
3 3:3-7 Tura Pasannumia̱ akupin Úknasha ashí ní shuari̱ntiuk Uunt Yus íktusma asa ashí amukármiaji. Túrar sasaintia pepru nui̱ iruniarmia nuka ashí akintrukarmiaji. Tura Pasannumia̱ Úkan nuṉké̱ Arkupka ashí akinkiarmiaji. Nu péprusha ashí wenuke̱sha tura wá̱i̱ti̱a̱i̱ri̱sha tí peṉker iwiarkamu ármiayi. Tura chíkich pépruka ímiatrusar iwiarkachmash untsurí ármiayi. Túrawar Ishpunnumia̱ akupniun Sejunan túrawarmia nútiksaraṉ nu péprunmaṉka áishmaṉsha nuwa̱sha tura uchisha ashí kajeṉkármiaji. Antsu áyatik taṉku tura nui̱ ashí ni warirí̱ṉkish iruniarmia nuke emestukcharmiaji.
8 3:8-10 Túrar Arnunnumia̱ naṉkamar Irmun naintia tímianai núṉkaka atantiarmiaji. Nuka Jurtan entsa amaini̱ Amur aentsu akupniúri̱ jímiar armia nuna nuṉké̱ ármiayi. Pakanam pepru armia nuka ashí tura Karaatnaka takamtsuk núnisaṉ Pasannasha takamtsuk Sárkanmaya̱ naṉkama Ítriya̱ tímianai tura Pasannumia̱ Uka nuṉke̱ya̱ tímianaisha ashí nérentin ajasármiaji.
11 Tura Repa aentska aya Uk Pasannumia̱ akupniuk juákuyayi. Tura ni peakrí̱ṉkia aya jírukeyayi. Núnisaṉ esantí̱sha nuiwi kuntu tura wankantí̱ṉkia kuatru kuntu jeauyayi.
Etsa̱ tatainmaani̱ nuṉka nakarma
12 3:12-13 Tura ju̱ nuṉkanam péprun ata̱i̱niarmia núnaka Aruir nuṉka Arnun entsa nuyá̱ juarki̱ naintiar naintiar Karaat nuṉka nuna ajapéri̱ya̱ tímianai Ruwin tura Kaat shuaran súsarmiajai. Tura Karaat nuṉka juakua núnaka nuyá̱ Pasannasha takamtsuk Manasés shuaran amaini̱ pujuinia nuna súsarmiajai.
14 3:14-17 Antsu Manasésa uchirí̱ Jairka Arkup nuṉkan takamtsuk jukimiayi tura ni náari̱niak Pasannum Japut Jair anaikiamiayi. Tura Makirnaka Karaatan súsarmiajai. Tura Ruwin shuarnaka nuyá̱ Kaat shuarnasha Karaatnumia̱ juarki̱ Arnun entsa tímianai súsarmiajai tura nuna tesake̱ṉka éntsaiti. Núnisaṉ Arapásha tura Jurtan entsasha tesake̱ armai. Nu arant Kinirítnumia̱ juárkin Arapá nayantsa ímianai nuyá̱ etsa̱ tatainmaani̱ṉkia Piska naint táritkiamua tímianaiyayi.
18 3:18-20 Uunt Yus atumí Yusri̱ ju̱ nuṉkan nérentin ajasarat tusa suramsarume. Tuma asamtai ashí kakarmatiram atumí yachi̱ Israer shuar ashí iimiainiamunam meset iwiarnatkarum katia̱rtatrume. Antsu aya atumí nuwe̱n tura uchi nuyá̱ taṉku ainia nuke péprun amasmajrumna nui̱ṉkia juákartatui. Tura atumí yachi̱sha átum urukamarum núnisaraṉ nuṉke̱nawarmatai waketrattarme. Antsu nu ashí uminkiamtai wi tui̱ apujsaitjiarum nui̱ átumka kaunkattarme.
21 Núnisaṉ nu tsawantai̱ Jusuincha chicharká akupeakun ‘Uunt Yus atumí Yusri̱ jimiará úunt akupniun itiurkama nu ashí áme jí̱miji̱a̱i̱ṉ wáinkiaitrume. Tura ame tu nuṉkanmaani̱ naṉkaamaktiatam nui̱sha Uunt Yuska ashí akupniun núnisaṉ túrattawai. 22 Tuma asamtai sapijmiakairap. Warí átumka mániatsrumni̱ṉ Uunt Yus atumí Yusri̱ mánitramkattarme’ tímiajai.
Kanaannum waya̱tniun Yus Muisaisan tsaṉkatkachma
23 Nu tsawantai̱ Uunt Yusan seakun 24 ‘Uunt Yusá, tujintkiachu asam ame takarniúram kakarmaram iniaktut juárkiniaitme. Tura chíkich yus ¿ámiji̱a̱i̱ métek nayaimpinmasha nuṉkasha tí shiiran nekaachminian túrincha áwak? 25 Tura ti nekas seajme waitneasam Jurtan entsan katitkin tí peṉker nuṉka Ríwianu nainnium wisha jeataj tsaṉkatrukta’ tímiajai. 26 Túrasha Uunt Yus átum túramuja̱i̱ tí kajertuk wi seamun anturtutsuk ‘¡Máakete! Nuka atakka turutip. 27 Antsu Piska nainnium wakam arakaani̱ nuṉkaani̱sha tura etsa̱ jintiainmaani̱sha núnisaṉ etsa̱ akatainmaani̱sha ashí íimsata. Túrasha Jurtan entsaka katitkishtatme. 28 Warí Jusuí Israer shuara uuntri̱ ajas Jurtannumka ikiati̱á̱rtatui. Tuma asamtai Jusuí anaikiam jintintiam ikiaká̱rta. Kame nu nuṉka íistatmena nui̱ Jusuí ejewar núṉkentin awajsártatui’ Yus turutmiai. 29 Tura Pitpiur pepru naka íirkamunam pakanam matsamkamji.