Muisais Ujakma
Umiktin chicham aarma Muisais ujuakma
6 Atumín jintintiáwarat tusa anaitiukuiti. Kame ju̱ nuṉkanam átum nupetmakrum jeattarmena nui̱ pujusrum atumí Uunt Yusri̱ asa umirtukat tusa tuke akupkámia nu ju̱i̱ti. 2 Tura Uunt Yus atumí Yusri̱ ashí Ni akupkámu chichame̱n jintintiájrumna nu atumsha umíakrum atumí uchirí̱sha tiraṉki̱sha umiktin jintintiatarum. Kame untsurí tsawant iwiaaku pujustaj tákurmeka Yus ashamakrum umirkatarum. 3 Wats Israer shuartiram ju̱ akupkámu nekas enentái̱ji̱a̱i̱ umiktarum. Túrakrumka atumí uuntri̱ Yusri̱ Uunt Yus tí peṉker nuṉkanam ashí árak tsapáu asamtai muntsu míshkiji̱a̱i̱ entsa núnis akamunmasha amasua nui̱ pujusrum Yus turamiarmena núnisrumek ti untsurí pampaṉtatrume.
4 Wats Israertiram antuktarum. Ii Úunt Yusri̱ṉkia chikichkiti. Aya Níṉkiti Uunt Yus.* 5 Ame Yúsrum nekas enentáimji̱a̱i̱ tura takamtsuk wakanmiji̱a̱i̱ núnismek ashí kakarmarmiji̱a̱i̱sha aneata. 6 Tura ju̱ chichaman yamái jintintiajmena nu péṉker enentáimtusam nekaata. 7 Túram tuke tsawant akupkámu chicham ame je̱e̱min pujakmesha jintiá wekaakmesha kánakmesha káshik nantakmesha yawe̱tsuk ame uchiram jintintiáwarta. 8 Ju̱ akupkámu ame nijia̱i̱mincha tura uwejmíncha áarar anujkamua nútiksam enentáimtusta. 9 Nútiksamek ame je̱e̱mi pauri̱ncha tura wáitiri̱ncha aartá.
Muisais Israer shuaran Yus umirkatarum timia
10 Tura Uunt Yus atumí we̱a̱trí̱n Aprajáman nuyá̱ Isakan núnisaṉ Jakupan ‘tí peṉker nuṉkan amastiniaitjiarme’ timia nui̱ ejetamtiniaitrume. Nú nuṉkanam uunt pepru ti shiir ainia nu atumsha takakmaschiatrum nérentin ajastatrume. 11 Tura nu je̱a̱nmasha warinkish átum ikiuschamu irunainia nusha átum táurchamu yumirmat irunainiasha tura átum takakmaschamu uwa aja nuyá̱ asuiti jutai̱ árak arakmamu irunainia nu ashí nérentin ajasrum núkap yurumárum nútsuakrumsha, 12 aneartarum. Atumín Ejiptunam takarin wait ajá pujuutirmin ji̱i̱rmakmiarum nú Uunt Yus kajinmátkirap. 13 Atumí Uunt Yusri̱ ashamakrum tikishmátratarum. Tura Niṉki umirkatarum. Tura ti nekas tajai tákurmesha aya ni náari̱ṉ pachisrum titiarum.* 14 Tura atumji̱a̱i̱ ápatnik pujuinia nuna najankamu yusri̱ tikishmáttrairap. 15 Warí atumí Uunt Yusri̱ atumji̱a̱i̱ pujana nuka akasmawiti tura kajekka ashí amutmakminiaitrume.
16 Tuma asamtai Masá nuṉkanam itiurkamarumna nútiksarum atumí Uunt Yusri̱ ‘nekapsataj’ tiirap.* 17 Antsu péṉker enentáimsarum atumí Uunt Yusri̱ ashí akupkámu chicham umiktinian akuptúrmakua nu umirkatarum. 18 Tura Uunt Yus íimmianum nekas péṉker tura naka nu túratarum. Túrakrumka péṉker pujustatrume. Núnisrumek Uunt Yus atumí úuntri̱n péṉker nuṉkan susattajai timia nui̱ jearmeka nu nuṉka ata̱i̱rum nérentin ajastatrume. 19 Núnisaṉ atumí nemasri̱nkia atumíiya̱ṉka Uunt Yus timia núnisaṉ ji̱i̱r aju̱i̱niartatui.
20 Tura ukunam atumí uchirí̱ chichainiak ‘Ashí akupkámu ainia ju̱nasha ¿urukamtai Uunt Yussha amasuitiaj?’ túramkurmincha 21 átum aya̱krum ‘Kame yaunchu Ejiptunam Parauṉ emetamu wáitkiatai pujuyaji. Túrasha Uunt Yus ni kakarmari̱ji̱a̱i̱ ji̱i̱rmarmiaji. 22 Kame iisha Ejiptunam pujarin Uunt Yus Ni kakarmari̱n Parauṉkan ashí ni írutramuri̱ji̱a̱i̱ iniaktuiniak nekaachminian tura aentsti túrachminian tí tsuumainian túramia nu nekas ii jí̱ji̱a̱i̱ṉ wáinkiaruitji. 23 Tura nuyá̱ yarurmak ii úuntri̱n nuṉkan anajmatuk nekas amastatjarme timia nui̱ matsatmasartaj tusa ji̱i̱rmaruitji’ títiniaitrume. 24 Nuna tura asa yamaikia ashí akupkámu chichaman unuimiátar nekáa umirtuiniak ashí tsawant péṉker wekainiak ni iwiaakmari̱ncha yamái pujuiniajnia jú̱nisar péṉker wáinmamkarat tusa Uunt Yus akuptúrmakmiaji. 25 Tuma asamtai ashí akupkámu chicham Ni umikta timia tímiatrusrik ashí umíakrikia Uunt Yus iismasha péṉker átatji.