Muisais Ujakma
Najankamu yus tikishmátrashtin
7 Tura nuṉka ata̱i̱rum nérentin ajastatrumna nui̱ Uunt Yus ejetammataisha nuyá̱ nui̱ siati pepru* Jet aents, Jírjis aents, Amur aents, Kanaan aents, Píris aents, Jep aents, tura Jípius aents ámiji̱a̱i̱ naṉkaamas uunt ti kakaram matsatainia nuna Uunt Yus ashí ji̱i̱rarmataisha 2 nuyá̱ Uunt Yus mash íkturmasmatai nupetkarmesha nú aentsja̱i̱ṉkia chichamsha najantsuk tura waitnentsuk ashí amuktiniaitrume. 3 Tuma asamtai ame nawantrum nuyá̱ áishmaṉja̱i̱ nuatmamtikiaip. Núnisrumek uchirmesha nuyá̱ nuwa̱ja̱i̱ nuatmamtikiaip. Nu túrakrum ni shuar ajasáirap. 4 Warí atumí uchirí̱n Úunt Yusai̱ya̱ akankiartatui. Túramka nuyá̱ shuara ántar yusri̱n enentáimtusartatui. Nui̱ṉkia Uunt Yus ti kajertamak wárik amutmaktatrume. 5 Antsu átumka ju̱ túratniuitrume. Najankamu yus áestakur enentáimtutai̱ya̱ nusha tura kayá yussha, numí yussha, núnisaṉ Asera yus nakumkamu shiir enentáimtutai̱ ainia nuka ashí tsairkarum áestuktiniaitrume.
Yus Israeran anenak tunaarincha awajsamu
6 Warí Uunt Yus atumniaka tunaarincha awajtámsaitrume. Ashí nuṉkanam aents pujuiniana núja̱i̱sha naṉkaamas aya Winiak enentáimturin árat tusa Uunt Yuska akantámkaitrume. 7 Túrasha atumniaka chíkich aentsja̱i̱ naṉkaamas untsurí asakrumin Uunt Yus wakerak akantámkachuitrume. Antsu chíkich aentsja̱i̱ íismaka átumka peṉké ishichik árumni̱ṉ Winia árat tusa anaitiamkaitrume. 8 Warí Uunt Yus atumín anenma asa tura nekas tajai tusa atumí úuntri̱ji̱a̱i̱ chichaman najana asa nuna umíak anaitiamkaitrume. Tura Ejiptu nuṉka úunt akupniuri̱ Parauṉ emeta wáitkiatai pujuutirmin Uunt Yus ni kakarmari̱ji̱a̱i̱ ji̱i̱rmar aṉkant awajtámsamarme. 9 Kame atumsha nekaatarum. Warí atumí Úunt Yusri̱ṉkia nekas Yúsaiti. Tura umin Yus asa atumji̱a̱i̱ chícham najanamun uminia núnaka uchirí̱ncha nuyá̱ ni tiraṉki̱ mir nekapmarmanum jeattana nunasha nekas enentáimtus umireamka waitnentrattawai. 10 Antsu Nin nakitia núnaka wárik asutniuiti tura Nin muí̱jiana nunasha árutsuk nincha máiniaiti.
Kanaannumia̱ áiniana nu asutniáwartin
11 7:11-15 Akupkámu umiktin chichaman Israer shuar shiir enentáimtus uminiakuiṉkia Uunt Yussha núnisaṉ niji̱a̱i̱ chichaman najanawarmia nunasha tura waitnentrattajrume tiarmia nunasha umíak ti untsurí awajtámsattarme. Nuyá̱ atumí taṉkuri̱sha tura yurumkari̱sha peṉké tátramsashtatrume. Chíkich nuṉkanmaya̱ shuarja̱i̱ṉkia naṉkaamas péṉker pujustatrume. Áishmaṉ yajutmachusha núja̱i̱nchuka nuwa̱ksha uchin takuchuka tura taṉkuksha túmaka peṉké atsuttawai. Núnisaṉ peṉké suṉkurmachu átatrume. Antsu íksaṉ Israer shuaran yajauch enentáimtin ainia nu aents suṉkurmamtikiamu ártatui.
16 Uunt Yus atumí Yusri̱ nú aents íktusarmaka peṉké waitnentsuk ashí amuktárum. Núnisrum ni yusri̱sha tikishmátrairap.
17 7:17-20 Nú nuṉka mátsatkamu ti untsurí áiniakuisha amú amustarum. Warí Ejiptunam tura nuyá̱ aentsun Uunt Yus Israer shuaran jíiniak itiurkarmia núnisaraṉ nincha túrawartatui. Warí etencha Uunt Yuska akuptúkartatui. 21 Nu tímiatmainiakui wainkiarum sapijmiakrum mayaim ashinkiairap. Warí atumí Yusri̱ Uunt Yuska atuminí̱ ajapén pujawai tura nú Yuska tí Uunt ashamainti. 22 7:22-24 Nu nuṉkanmaya̱ aentsnaka Uunt Yus yáitmataik ji̱i̱r akupratin asamtai wárikkia amukchattarme. Kame wárik amukákrumni̱ṉkia kampunniunmaya̱ yajasma ti pampaṉkar atumniasha itiurchat awajtámtiatrume. Uunt Yus íkturmasu ásarmatai ashí emeskatniuitrume túrasha atumniaka yaaksha nupettamkashtatrume. 25 Nu nuṉkanmaya̱ aentsu yusri̱ ainia nuna táritkiamuri̱ jinium áestuktarum. Túrarum kurirí̱sha kuít jiruri̱sha wakerukairap tura jutasha jukirap nuja̱i̱ atumín anaṉkramawa̱i̱rum. Warí Uunt Yus ame Yusrumji̱a̱i̱ṉkia nuka mui̱jmiai̱ áiniawai. 26 Ame je̱e̱minkia mui̱jmiai̱ ainia nuka peṉké jukirap kame nuja̱i̱ yajauchiniam yumiṉnarum makurmarara̱i̱. Ashí mui̱jmiai̱ asamtai muí̱jkiarum peṉké nakitratarum. Ashí emeskar amuktinnium yumiṉkramuiti.