Jusuí

Jusuí jimiará aentsun Jirikiúnam mamikmat tusa akupeamu

2 Nuuna uchirí̱ Jusuí Setim nuṉkanam pujusár jimiará aentsun ú̱saṉ nuṉka urukukit tura Jirikiú péprusha itiurak aa mamikmá ikiutarum tusa akupkarmiayi. Tutai wéar Jirikiú péprunam tsanirmatai nuwa̱ Raapa je̱e̱n jeawar kanararmiayi. 2 Tura aents Jirikiúnmaya̱ akupniun tarí ujaak “Ju̱ kashi Israernumia̱ shuar ii mátsatkamuri̱n nekartamatai tusar taarai” tu ujakmiayi.

3 Tutai Jirikiú akupniúri̱ Raapa chichaman akuptak aents ni je̱e̱n tácharaik nuka ii nuṉke̱n mamikmak yujainiawai. Tuma asamtai núnaka ji̱i̱rtí tawai titiá tusa suntaran akuptúkmiayi.

4 Tutai nuwa̱sha jimiará aentsun u̱u̱k apujsar chichaak “Ee, nekas nú aishmaṉka winí̱ taarai. Túrasha tuya̱ntsuk ainia nekaachjai.

5 Tura waiti epennittiawai tusar kirit ajatémsa nui̱ jimiará aentska jiinkí̱ wéarai. Túrasha nekaachjai tútsuk weara pee ajatkitiarum túrakrumka amayá̱ṉtatrume” tímiayi.

6 Tura Raap je̱á̱ yakí̱ iwiakar riniu nupa̱ útsaimiunam ukarmiayi. 7 Nuya̱ṉka úunt akupniu suntarí̱sha péprunmaya̱ jíinkiar patatuiniak Jurtan entsanam wajá katitiainmaani̱ weriarmiayi. Tura wésara̱i̱ṉ pepru wáitiri̱sha epennimiayi. 8 Nuya̱ṉka mamikmau kánuiniatsa̱i̱ṉ Raap je̱á̱ yakí̱ waruk chicharainiak 9 “Ti nekas nékajai ii nuṉké̱ ataṉtinian atumí Uunt Yusri̱ tsaṉkatramkaitrume. Átum ashamkatniun ii enentái̱n Yus ikiurtámsaitji. Tuma asamtai atumí chichame̱ ántakur ti sapijmiainiaji. 10 Núnisaṉ Ejiptunmaya̱ jiinkimiarum nuyá̱ átum katiṉtinian Uunt Yus Kapantin Nayantsan uku̱yámusha tura Jurtan entsa amaini̱ pujuarmia nuna Amur aentsu jimiará akupniuri̱ Sejunan Ukja̱i̱ mash amukaru tama ántiniaitji. 11 Nu antuku asar ti sapijmiakuitji. Atumji̱a̱i̱ṉkia meset peṉké jurunaikchamniaitji. Warí atumí Úunt Yusri̱ṉkia nayaimpinmasha tura ju̱ nuṉkanmasha ashí naṉkaamas kakarmachukait. 12 Tuma asamtai waitneasrum atumín waitnentrajrumna núnisrumek amé aentsnaka amukchattajai tusarum yamaik Uunt Yus íimmianum nekas umiktatji turuttiarum. 13 Winia aparsha, nukursha, umarusha, kairsha, ashí wariri̱ntiuk jákatniunmaya̱ aṉkant ikiukratkitiarum” tímiayi. 14 Tutai nisha chichainiak “Iiji̱a̱i̱ áujmattsajnia nu etserkachakminkia Uunt Yus atumí nuṉke̱n suramsattajnia nui̱ ii tájinia nu umíakur áminkia amé shuarumji̱a̱i̱ nekas waitnentrattaji. Antsu ii tájinia nu umikcharkia átum jákatniunam ii jakattaji” tiármiayi.

15 Tura nu nuwá̱ je̱e̱ṉkia pepru wenuke̱n ekeni̱ je̱a̱mma asamtai asa̱a̱sar iimtai̱ áṉkamunam chapikian nená akakiármiayi. 16 Nuyá̱ wénakui chicharainiak “Kampunniunmaani̱ werum menaintiú tsawant ú̱mkatarum, tura e̱a̱tmainia nu waketramtai atumsha waketkitiarum” tímiayi. 17 Tura nisha chicharainiak “Nekas umiktatjai tau asakmin iisha nútiksarik ii chichame̱sha umiktatji. 18 Chápik kapantin nenawakmin akaikitiaj nu chapikiak ju̱ nuṉkanam wáitiajnia nui̱ ame je̱e̱mi tanishri̱ áṉkamuri̱n nenaata. Tura ámiji̱a̱i̱ ame je̱e̱min, apasha, ame nukusha, nuyá̱ umai̱misha, tura ame apa shuari̱sha irurta. 19 Nui̱ṉkia yaaksha ame je̱e̱minia̱ jíinkiuṉka nuka ní makunmiaja̱i̱ṉ jakattawai. Tura nuja̱i̱ iikia makunchattaji. Antsu ame je̱e̱min pujan máiniakuiṉkia ii sumamattaji. 20 Tura ii nekas umiktatji tájinia ju̱ etserkakminkia iikia aṉkant ajastatji” tiármiayi.

21 Nui̱ṉkia nuwa̱sha aya̱k “Átum tárumna núnis atí” tímiayi. Nuyá̱ nuwa̱ncha pujutá tiar wéarmiayi. Wéarmatai nuwa̱sha chápik kapanniun je̱á̱ asa̱a̱sa íimtai̱niam nená iniaisámiayi.

22 Nuyá̱ mamikmausha kampunniunam wéar nui̱ menaintiú tsawant ú̱mkar apapétmainiajnia nu waketmam tusar pujuiniai̱ suntarsha ashí jintianam e̱a̱karsha peṉké wáinkiacharmiayi. 23 Nuya̱ṉka mamikmausha kampunniunmaya̱ jíinkiar Jurtan katiṉkiar Nuuna uchirí̱ Jusuí pujamunam jeawar túrunawarmia nuna ashí ujakármiayi. 24 Tura Jusuin ujainiak “Uunt Yus nu nuṉkan ashí shuari̱ntiuk íkturmasuitji. Túramu asar sapijmiak ajainiawai” tú ujakármiayi.