Jusuí

Israer shuar Jurtannum katia̱rma

3 Nui̱ tsawa̱a̱k ti káshik Jusuí tura Israer shuarja̱i̱ Setimnumia̱ jíinkiar Jurtan entsanam taar katittsuk áakmakar matsamkarmiayi. 2 Túrunawar menaintiú tsawant naṉkaamasmatai uunt anaikiamu armia nu, matsamkamunam wéar 3 Israer shuaran chicharainiak “Riwí shuar Yúsnan pujurin ainia nu Uunt Yus atumí Yusri̱ Aentsja̱i̱ Chícham Najanamu Eṉketáin jukí̱ wénakui átum pujarum nuyá̱ jiintiurum atumesh pataatukrum 4 itiura wétiniaitrum nu nekaattarme. Warí yáunchusha ju̱ jintianam peṉké wekaichaitrume. Túrasha Uunt Yusna Eṉketáin ti weantsuk mir kuntu jeá íkiaṉ wetarum” tiármiayi.

5 Tura Jusuí ni shuari̱n chicharainiak “Átumka imiatkincha ajasrum iwiarnaktarum. Kashin Uunt Yus aentstikia túrachminian iniakmamu wainkiattarme” tímiayi. 6 Nuya̱sha Yúsnan takarniuncha chicharainiak “Uunt Yusna Eṉketai̱ jukirum aents iimmiainiamunam entsa katitkitiarum” takui̱ Yusna Eṉketáin júkiar eem wénakui ashí peprunmaya̱ uku wéarmiayi. 7 Nui̱ṉkia Uunt Yus Jusuin chicharuk “Yaunchu Muisaisja̱i̱ pujumiaj núnisnak ashí Israer shuar nekarmawarat tusan yamaiya̱ ju̱yá̱ juárkin naṉkamantu awajsattajme. 8 Nui̱ ámeka Yúsnan pujurin Yusna Eṉketai̱ juinia nu chicharainiakum ‘Jurtannum jearum yantamén wajastarum. Nuyá̱ ajapén wajasrum nákastarum’ tiartá” tímiayi. 9 Tura Jusuí Israer shuaran chicharainiak “Winirum atumí Uunt Yusri̱ chicháa nu antuitiarum. 10 Ju̱ja̱i̱ nekas nekaattarme iwiaaku Yus atumji̱a̱i̱ pujá asa Kanaannumia̱ aentsun, Jet aentsun, Jep aentsun, Píris aentsun, Jírjis aentsun, Amur aentsun tura Jípius aentsnasha átum íimmianum mash amuktatui. 11 Tura yamaikia iistarum. Ashí nuṉka Uunt Yusna Eṉketáin átum íimmianum Jurtan entsanam ikiankiartatui. 12 Tuma asamtai yamaik tuse Israer weanmaya̱ chikichkimsam tuse áishmaṉ juurta. 13 Nuyá̱ Yúsnan pujurin ashí nuṉka Uunt Yusna Eṉketai̱ jukí̱ wénakui atumsha entsá wajatarum. Nui̱ wajawakrumin entsa tsuriniattawai. Túrunamtai arakaani̱ṉkia pajanaak juáktatui” tímiayi.

14 Nuyá̱ Israer shuarsha nuap je̱a̱ je̱a̱mak matsatmanumia̱ jíinkiar Jurtan katitkitiai tusar wéarmiayi. Tura wénakui Yúsnan pujurin armia nu Yusna Eṉketáin júkiar eem wéarmiayi. 15 Kame árak juutai̱ tsawantinkia Jurtanka naṉkantairi̱niash naṉká naṉkas árak júuktin amuumam ama̱a̱rak awamniuyayi. Tuma asamtai Yúsnan pujurin Yusna Eṉketáin juarmia nu entsa naṉkanamunam amuwáwarmatai 16 éntsaka epenkámua núnisaṉ nui̱ṉ naṉkanamiayi. Túruna arakaani̱ṉkia éntsaka tí arant pajanaak Atam pepru Saretán pepru ayamchia tímianai jeakmiayi. Antsu nuṉkaani̱ṉkia Arapá Nayants Jeákú tutaiya nui̱ entsa ayakuya nuka peṉké kukach ajasmiayi. Túrunamtai Israer shuarka Jirikiú íṉkiuasmak katia̱rarmiayi. 17 Tura Yúsnan pujurniusha Yus Aentsja̱i̱ Chícham Najanamu Eṉketáin jukí̱ wénasha Jurtan ajapéri̱n ju̱ju̱ptinnium wajainiai̱ ashí Israer shuarsha jiniatsuk katia̱rarmiayi.