Apukarípsis
Israer shuarnumia̱ áarar asakawarma
7 Nu naṉkaamasmatai kuatru nayaimpinmaya̱ suntar, nuṉká kuatru yantamén wajan wainkiamjai. Nusha kuatru nase kukarsha, nayantsanmasha tura kampunniunmasha nasenkacharat tusar wajatiarmai. 2 Kame kukarsha tura nayantsanmasha yajauch awajsatniun akupkámu armai. Tura chíkich suntarnasha etsa̱ tatainmaani̱ya̱ winian wainkiamjai. Tuke iwiaaku Yusa anujtutairi̱n takakuyi. Nusha kuatru suntaran kakantar untsúak timiai 3 “Ii Yusri̱ takarin ainia nu nijia̱i̱nium áarar ásaktsarni̱ṉ kukarsha, nayantsasha tura kampunniusha naseja̱i̱ yajauch awajsairap” timiai.
4 Tura timiajní untsurí áarar asakamun antukmajai. Ashí Israera uchirí̱ tuse wea ainia nuyá̱ siantu kuaraintikuátru mir armai.* 5 Jutá weanmaya̱ tuse mir asakamu armai. Ruwin weanmaya̱sha tuse mir asakamu armai. Kaat weanmaya̱sha tuse mir asakamu armai. 6 Aser weanmaya̱sha tuse mir asakamu armai. Neptarí weanmaya̱sha tuse mir asakamu armai. Manasés weanmaya̱sha tuse mir asakamu armai. 7 Semiun weanmaya̱sha tuse mir asakamu armai. Riwí weanmaya̱sha tuse mir asakamu armai. Isakár weanmaya̱sha tuse mir asakamu armai. 8 Sapurún weanmaya̱sha tuse mir asakamu armai. Jusé weanmaya̱sha tuse mir asakamu armai. Piṉjiamín weanmaya̱sha tuse mir asakamu armai.
Ti untsurí shuar pújun entsararu
9 Nuyá̱ ti untsurí shuaran wainkiamjai. Ashí nuṉkanmaya̱ nusháa shuaraim iruntraru ásar nekapmarchamnia armai. Tura nusha úunt akupin pujutai̱nium tura Muriknium naka wajaarmai. Tintiuki nuke̱a ániun takaku armai. Tura ashí pújun entsaru armai. 10 Ashí kakantar untsumainiak tiarmai
“Ii Yusri̱ úunt akupin pujutai̱nium eketna au tura Muriksha imia Niṉki Uwemtikin áiniawai” tiarmai.
11 Tura nayaimpinmaya̱ suntarsha úunt akupin pujutaincha, kuatru taṉkuncha, tura úuntnasha téntatkar armia nu piniakum nuṉká tepersar Yusan shiir awajsar 12 tiarmai
“Nekasaiti. Tuke iniaitsuk ii Yusri̱ ti shiir awajsatniuiti. Niṉki ti neka, ti kakaram, ti akupin tura tí peṉker asamtai tuke yumiṉsatniuiti. Núnisaṉ atí.”
13 Nuyá̱ chikichik uunt inintsamai “Pújun entsaru ainia ju̱sha ¿ya ainia tura tuyá̱ ainia?” 14 Túrutkui “Uuntá, amek nékame” tímiajai. Tutai “Ju̱ shuar tí waitsaru áiniawai. Túrawar Murikiu numpe̱ja̱i̱ ni pushiri̱ nijiamawar puju awajsaru áiniawai. 15 Nuna túrawaru ásar yamaikia Yusai̱ naka pujusár tsawai̱sha káshisha Yúsnan ni Je̱e̱n takainiawai. Tura akupin pujutai̱nium eketna au tuke wáinkiartatui. 16 Yamaikia tsukaja̱i̱sha kitiakja̱i̱sha wáitsachartatui. Tura etsa̱sha sukuiniak yajauch awajsachartatui. 17 Muriksha akupin pujutai̱nium naka wajana au, ni murikrí̱nkia péṉker wáiniuk áyureak tí peṉker púkuni entsa waana nuí̱ apujsartatui. Tura Yus ni nea̱jkirtincha ukuitiurartatui” turutmiai.