Marakías
Yusa takatrí̱n Yúsnan pujurin emesainian
2 Uunt Yus chichaak “Yamaikia Yúsnan pujurniutirmin ju̱ chichamja̱i̱ anemtikjiarme. 2 Núnisaṉ anturtutsuk tura nekas enentáiji̱a̱i̱ Winia naar shiir awajeachkurminkia yajauchiji̱a̱i̱ yumiṉkrattajrume. Warí nekas enentáiji̱a̱i̱ túrattajai ticha asakrumin péṉkernum yumiṉkrarmena nuna Wikia íksanak yajauchiniam yumiṉkramu awajsattajai. Kame núnaka nekas túraitjiai” tawai Ashí Akupin Uunt Yus. 3 “Maa, Wiki atumí tiraṉki̱ncha chicharkartatjai. Tura átum taṉku máarum surusmarumna nuna iji̱ji̱a̱i̱ṉ yapimíin tukurtatjarme. Túramtai atumniaka surarmena nuna iji̱ji̱a̱i̱ṉ tukurmar nuya̱sha ijiaja̱i̱ métek irurar ajapnattarme. 4 Nuní̱ túramtai Wi Riwiji̱a̱i̱ akupkámu umiktin chichaman najanamiaj nuna iniyatsjana nu nekaatarum tusan tájarme” tawai Ashí Akupin Uunt Yus.
5 “Wi Riwiji̱a̱i̱ chichaman najanamiaj nuka iwiaakma tura shiir pujustin chichamauyayi tura ashamprukarmi tusan susamiajai. Tura niṉkia ashamprak aranturak umirtimiayi. 6 Riwikia nekas umiktin chichaman jintinmiayi. Tura yajauch chichatsuk antsu péṉkeran túrak núkap aentsun ni tunaari̱n iniaisarat tusa tí yaiṉmiayi. 7 Yúsnan pujurniuka nekas Yus wakera nuna nekau átiniaiti. Tuma asamtai ashí aents péṉkera nuna nekaatniun wakeruiniakka nin inintruiniawai. Warí Ashí Akupin Uunt Yus akupkámu áiniawai. 8 Túrasha átumka péṉker wekasatniunmaya̱ awajirurme. Túrarum umiktin chichamnum untsurí aents tukumtikiarme. Nu arantcha Wi Riwiji̱a̱i̱ chichaman najanamiaj nusha ti yajauch awajsámarme” tawai Ashí Akupin Uunt Yus. 9 “Warí átumka Wi akupkámu umirniuchuitrume tura nu arantcha akupkámuja̱i̱ métekrak sumamtiktsuk antsu átum wakerarmena núnis sumamtikniuitrume. Tuma asakrumin atumín ashí aents iimiainiamunam natsanmai̱ awajkámajrume.”
Nuatnaikiariat chícham najanamun emesainian
10 “¿Warí nú Apak ashí takakainiatsjik. Tura nu Yusak najatmakchakaitiaji? Tuma ai̱sha ¿urukamtai nuamtak mai̱ kájernai ajainiakrisha ii úuntri̱ji̱a̱i̱ chícham najanamusha emesainiaji? 11 Tura Israernumsha núnisaṉ Jerusaréṉnumsha mui̱jmiainian túruiniawai tuma asa Jutaka anaṉkartiniaiti. Warí Jutaka Uunt Yus Shiir Awajtai̱ Je̱a̱n Ni anea nuna mui̱jmiai̱ awajak yajaya̱ yusa nawantri̱ji̱a̱i̱ nuatnaikiaiti. 12 Tuma asamtai Jakupa nuṉke̱n yaaksha nuna túraṉka ántsaṉ nuna ayamprancha núnisaṉ Ashí Akupin Uunt Yus susamun yaiṉtí tusa áestancha Uunt Yus ashí amuktatui.
13 Warí átum surarmena núnaka péṉkesha iyatsjai tura wakerutnasha wakeratsjai. Tuma asamtai yamaisha núnisrumek úteakrum suká sukattsarum Uunt Yus áestutai̱ṉkia áya nea̱jkik awajsarme. 14 Túrasha átumka ‘¿urukamtai ii súajnia nunasha nakitia?’ tárume. Tura amesha nuyá̱ nuwa̱sha natsa asarum nuatnaikiamiarmena núnaka Uunt Yus ¿wáinkiachukait? Túrayatmek nuwa̱ja̱i̱ tsaniṉkiar pujustai tusam chíchamka najanayatam tsanirmakum ame ai̱m anaṉkaitme. 15 Warí ¿Yúskechuk nuwa̱ aya̱shí̱ncha tura wakaní̱ncha najatait. Túrasha Yussha warinia wakera? Enta, atumí uchirí̱ṉkia Yusna árat tusa Yuska wakerawai. Tuma asamtai natsa asan nuatkamiaj nuna tsanirmakun nua̱run anaṉkawa̱i̱j tusarum atumí enentái̱sha péṉker wáinkiatarum.” 16 Warí Uunt Yus Israera Yusri̱ chichaak “Ajapnaiyatniuncha tura kajen netse ainia nunasha peṉké mui̱jmiai̱ iyajai” tawai. “Tuma asamtai ajapnaiyawa̱i̱j tusarum atumí enentái̱sha péṉker wáinkiatarum” tawai Ashí Akupin Uunt Yus.
Sumamtikiatin tsawant
17 Atumí chichame̱ja̱i̱ Uunt Yuska ipimkiniaitrume túrasha átumka “Iisha wariji̱a̱i̱ ipimkiniaitiaji” tárume. Kame átumka chichaakrum “Yajauch túrakrincha Yuska waraawai tura shiir enentáimturmaji” tú takuram nú arantcha “¿Nekasa nuja̱i̱ métek túrin Yussha tui̱ pujá?” tárume.