Matéu
Yusa Uunt Je̱e̱ sa̱a̱naktinian Jesus ujakma
(Mar. 13:1-2; Ruk. 21:5-6)
24 Jesus Yusa Uunt Je̱e̱ya̱ jiinkí̱ weai̱ ni unuiniamuri̱ nin tariar Je̱a̱n iniaktusar áujmatsarmiayi. 2 Tura Jesus chichaak “Nu yamái mash wáintrume. Tura nekasan tájarme ukunmaṉka mash sa̱a̱naktiatui. Chikichík kayaksha ekentramuri̱ atsuttawai” tímiayi.
Amúamu tsawant nekaatin
(Mar. 13:3-23; Ruk. 21:7-24; 17:22-24)
3 Nuyá̱ Uriwiu nainnium wéar niṉki nui̱ pujusár ni unuiniamuri̱ Jesusan aniasarmiayi “¿Nusha urutáik túrunati. Tura ame tátincha tura nuṉka amuukatin tsawant jeakuisha wariji̱a̱i̱ṉ nekaataji? Nu ujatkratkata” tiármiayi. 4 Tuíniakui Jesus chichaak “Aneartarum, anaṉkramawairap. 5 Untsurí aents winia náarun pachisar ‘wi Krístuitjiai’ tiar untsurí shuaran anaṉkawartatui. 6 Ti untsurí meset chicham antuktatrume túrasha sapijmiakairap. Núnisaṉ átiniaiti nuṉka amúatsa̱i̱ṉ. 7 Uunt nuṉka mátsatkamu ainia nusha chíkich nuṉka mátsatkamuja̱i̱ tura akupáinia nusha chíkich akupáinia nuja̱i̱ mániawartatui. Tura ti tsukasha átatui. Suṉkursha ti pampartatui. U̱u̱sha tí u̱u̱rkattawai. Nuka untsurí nuṉkanam túrunawartatui. 8 Nuja̱i̱ tí waitsatin yama naṉkamuk juármaiti” tímiayi.
9 “Nuyá̱ atumniasha yajauch awajsarat tusa surutmakartatui. Tura mantamawartatui. Tura winia naar pachia asakrumin ashí shuar muí̱jramkartatui. 10 Nu tsawantai̱ untsurí shuar Yusan iniaisartatui. Túrawar nuamtak muí̱jniainiak surunairartatui. 11 Untsurí shuar wáitruiniak ‘wi Yúsnan etserniuitjiai’ tiártatui. Túrawar untsurí shuaran nusháa enentáimtikrartatui. 12 Túmainiak yajauch túrutai̱ ti pamparmatai Yusja̱i̱ nawamnaikiatin michatáttawai. 13 Tura shuar ashí nuna katsuntea nu uwemprattawai. 14 Ashí aents nekaawarat tusa Yus Chicham ashí nuṉkanam etsernaktatui. Túramtai amuukatin tsawant jeattawai” tímiayi.
15 “Yus Shiir Awajtai̱niam muí̱jmiamtik tuke emesratin ana nu wainkiarum Yúsnan etserin Taniar aarmia nunasha (ju̱na áujea nuka enentáimprati),* 16 ashí shuar Jutanam írunna nu muranam pisarárti. 17 24:17-18 Ti wárik pisartin asamtai shuar je̱a̱ yakí̱ pujaksha tura shuar ajanam wekaaksha je̱á̱ waketki̱ wariri̱ jukitiaj tíchati. Antsu nuya̱ṉ wárik pisarti. 19 Nu tsawantai̱ nuwa̱ ajamtincha tura kuírchin takaku ainia nusha ti wáitsartatui. 20 Ayampratin tsawantai̱sha tura michá nantutíncha nu pisartin tsawant áchati tusarum Yus seatarum. 21 Maa, nu tsawantai̱ tí waitsatin* átatui. Tí yaunchusha núnisaṉ wáitsatin atsuyayi. Ukunmasha atsuttawai. 22 Nu wáitsatin ti esarmaitkiuiṉkia chikichkisha uwemprachainti. Tura Yus nu wáitsatniun wárik amumtikiattawai. Shuar Niniu ajasarat tusa achikma ainia nu uwemprarat tusa wárik amumtikiattawai” tímiayi.
23 “Tura atumín ‘Ju̱i̱ti Kristu’ turamainiakuisha tura ‘Nui̱ pujawai’ tuíniakuisha anturkairap. 24 Untsurí shuar Krístuitjiai tuinia nu wantinkiartatui. Untsurí ‘Yúsnan etserniuitjiai’ tiártatui. Tura shuaran anaṉkataj tusar aents tujintiamun iniakmasartatui. Tura ti kakarman túruiniak Yus shuarnasha anaṉkamin áiniakuiṉkia anaṉkawarainti. 25 Túmatsa̱i̱ṉ nuna emka ujajrume. 26 Tuma asamtai ‘Iis, Kristu nui̱ aents atsamunam pujawai’ turamainiakuisha nui̱ weerap. ‘Ju̱i̱ ú̱mak pujawai’ tuíniakuisha anturkairap. 27 Núnisaṉ ú̱mkan táchattajai. Peem péetuk ti wárik ashí nuṉkanam wáinkiachminkiait. Núnisnak wi Aents Ajasuka winiakun paant wantinkiattajai. 28 Wats, jaka tepana nui̱ chuaṉ káutkachartatuak” tímiayi.
Kristu tátintri̱
(Mar. 13:24-37; Ruk. 21:25-33; 17:26-30, 34-36)
29 “Tí waitsatin naṉkaamasmatai tí warik tsawái̱ nantu kajinkiattawai. Tura kashí nantusha etsantrashtatui. Yaasha ashí muchitrattawai.* Nayaimpiniam kakaram ainia nusha peantrartatui. 30 Nui̱kia Wi Aents Ajasuka tátiniur paant átatui. Tura ashí nuṉkanmaya̱ aents Wi winiái̱ wáitkiar asuttiámattaji tusar úttiartatui. Wisha ti kakaram tura Yusa winchari̱ji̱a̱i̱ yuraṉminiam winiái̱ wáitkiartatui.* 31 Yusa suntari̱n kachu kakaram umpuartarum* tinia akupkámtai nu suntar ashí nuṉkanmaya̱ ashí Yus shuaran, Yus achikma ásarmatai irurartatui.*
32 Ikiu numiri̱ nakumea nu nekaatarum. Ni nuke̱n eteakui esat nantu jeatémayi tátsurmek. 33 Núnisaṉ ashí ju̱ wáinkiurmeka amuukatin tsawant nekas jeatémayi títiniaitrume. 34 Nekasan tájarme yamái aents pujuinia nu amúatsa̱i̱ṉ ashí túrunattawai. 35 Nuṉkasha nayaimpisha amuukartatui antsu winia chichamur amuukashtatui. 36 Tura nu túrunatin tsawant nekanachminiaiti. Yusa suntarí̱sha nékainiatsui. Wisha Yusa Uchirí̱ntiatnak nékatsjai. Antsu aya winia Aparuk nékawai” tímiayi.
37 “Tura Aentsu Uchirí̱ tátin tsawant jeamtai yaunchu Nuwái pujumia núnisaṉ átatui. 38 Nu tsawantin tuke ama̱a̱rtsa̱i̱ṉ, aya jú̱nisaṉ aa asamtai yúrumtanak úmutnak pujuriarmiayi. Nuatnainiarmiayi. Ni nawantri̱ncha nuatmamtikiarmiayi. Tura tumá pujuiniai̱ Nuwái uunt kanunam eṉkemámtai 39 aya aneachma ama̱a̱ ama̱a̱rak nú aentsun mash amuukarmiayi. Kame Wi Aentsu Uchirí̱ atak taakui núnisaṉ átatui. 40 Nu tsawantai̱k jimiará shuar ajanam pujuttawai. Chikichik junaktiatui tura chíkichkia ikiunkittiawai. 41 Núnisaṉ jimiará nuwa̱ shana nekeak pujuttawai. Chikichik junaktiatui chíkichkia ikiunkittiawai. 42 Nu asamtai atumsha iwiarnarum pujustarum. Nekaachminiaiti uruk áintsuk taritjiarum. 43 24:43-44 Tuma asamtai aneara pujustarum. Wi nekaachmanum tátin jú̱nisaṉ enentáimpramniaiti. Shuar ju̱ kashi kasa tátinian nekaaṉka kánutsuk kasa taawai tusa iwiarnar nákasainti. Núnisrum aneara pujutarum.
Péṉker tura yajauch takamtikniuncha Jesus áujmatsamu
(Ruk. 12:41-48)
45 Shuar péṉker uminian tura péṉker enentáimniun áujmatsattajai. Nuna uuntri̱ yajá irauweak ‘Yurumátin jeamtai winia takartin ayuratarum’ tíchanpiash. 46 Nu takamtikniuncha ni uuntri̱ taa takatrí̱n tímiatrusaṉ túran tariṉkia shiir enentáimtusainti. 47 Nekasan tájame umin asamtai ni uuntri̱ ashí ni warirí̱n waitrukat tusa takatan susattawai. 48 24:48-49 Antsu úuntur wau táchattawai tusa takamtikin ni uuntri̱ yáintri̱n yajauch awajeak tura takatsuk aya yurumátniun tura nampektinian wararkuṉka nu takamtikin yajauchiti. 50 Turú pujan ni uuntri̱ aya aneachma taa nu takamtikniun, yajauch asamtai, 51 ti kakaram asutiáttawai. Yajauch shuar pujuinia nui̱ akupkáttawai. Nui̱sha ti wáitiak ti úttiatui” tímiayi Jesus.