Matéu
Pariséusha Satuséusha iniakmamuri̱n Jesusan seawarma
(Mar. 8:11-13; Ruk. 12:54-56)
16 Pariséusha tura Satuséusha Jesusan nekapsatai tusar tariarmiayi. Túrawar “Ame Yusai̱ya̱itkiumka kakarmarmiji̱a̱i̱ nayaimpinmaya̱ iniakmasta, iisha wáinkiatai” tiármiayi. 2 Tutai Jesus chichaak “Átumka ‘Kapa̱a̱ku peetar kíntiamkui kashin esatrurtatui’ tíniuitrume. 3 Túrasha ‘Tee ajas kapa̱a̱ku peetar tsawa̱a̱kui yumi yajauch átatui’ tíniuitrume. Tura nekasaiti. Maa, átumka nayaim íisrum ju̱ nuṉkanam túrunattana nu nékarme. Antsu Yus yamái jú̱ nuṉkanam tura nuka nékatsrume. Ántraitrume.4 Aents yajauch ásar tura Yusan enentáimtachu ásar kakarmaja̱i̱ iniakmamun wakeruiniawai. Túrasha áyatik Junas túrunamia nuke iniakmastiniaiti” tímiayi. Tinia ikiuak wémiayi.
Pariséu Satuséuja̱i̱ jintíamu anearta
(Mar. 8:14-21)
5 Tura entsá amaini̱ katiṉkiar ni unuiniamuri̱ páṉkan júkitniun kajinmatkiarmiayi. 6 Nuyá̱ Jesus chicharainiak “Nekaatarum Pariséusha wakaprutairi̱sha tura Satuséu wakaprutairi̱sha takakainia núja̱i̱sha aneartarum.”* 7 Tutai ni unuiniamuri̱ tunaiyak “Paṉ ii itiachakrin tátsuk” tiármiayi. 8 Jesus nuna antuk chichaak “¿Urukamtai paṉ itiachji tunaiyarum. Yusa kakarmari̱ kajinmátkintrumek. 9 Seṉku paṉja̱i̱ túramiaj nu kajinmátkintrumek. Seṉku míran ayurkamamtai núkap chaṉkinnium tiarmia nu nékatsrumek. 10 Núnisaṉ siati paṉja̱i̱ kuatru míran ayurawarmatai nuna ishichik chaṉkinnium tiarmia nu kajinmátkintrumek.11 Itiurak imiá nékatsrum? Wi Pariséu wakaprutairi̱sha tura Satuséu wakaprutairi̱sha aneartarum tákun peṉké páṉkan tátsujai” tímiayi. 12 Nuna Jesus takui̱ ni unuiniamuri̱sha nekaawarmiayi. Peṉké páṉkan wakaprutairi̱n tíchamiayi antsu Pariséu tura Satuséu unuiniatairi̱n tímiayi.
Pítiur Jesusan Yus anaikiamun paant ujakma
(Mar. 8:27-30; Ruk. 9:18-21)
13 Tura Sesaria Jiripiunam jeawar Jesus ni unuiniamuri̱n aniasarmiayi “Aents Ajasuitjiana ju̱na ¿yaiti turutainiawa Winia?” 14 Tutai nisha aya̱k “Chíkichkia imiakratin Juáṉkaiti. Tura chíkich Iríasaiti turamainiawai. Chikitcha Jirimíasaiti, chikitcha chíkich aents Yúsnan etserniuiti turamainiawai” tiármiayi. 15 Tutai nincha aniniak “¿Atumsha yaiti túrutrum?” tímiayi. 16 Semuṉ Pítrusha “Ámetme Kristu,Yus Anaikiamu. Nekas iwiaaku Yusa Uchirí̱nme” tímiayi. 17 Tutai Jesus chichaak “Shíiraitme Junasa uchirí̱ Semuṉká. Núnaka aents ujatmákchaiti antsu winia Apar nayaimpiniam pujana nu ujatmákmatai nekaam tame. 18 Tura Wisha tájame, ámeka Pítruitme. Nu kayanam je̱a̱ je̱a̱mtinia áintsaṉ Yus shuaran ekenin tsakatmartatjai. Túramtai jákatniusha tura Yusa nemasri̱sha nu je̱a̱mman pukukchattawai. 19 Yus akupeamu yawincha amastatjai. Ju̱ nuṉkanam jiṉkiatniusha atíatniusha amasmaiti. Tuma asamtai ame ju̱ nuṉkanam suritiam nu nayaimpinmasha suritniáktatui. Tura ju̱ nuṉkanam tsaṉkateam nu nayaimpinmasha tsaṉkatnaktatui” tímiayi. 20 Nuna tinia Jesus ni unuiniamuri̱n Krístuitiaj nu etserkairap tinia akupkarmiayi.
Jesus Ni mantamnatniun etsertumakma
(Mar. 8:31–9:1; Ruk. 9:22-27)
21 Nuyá̱ Jesus ju̱na unuiniataṉ naṉkammiayi. “Wi Jerusaréṉnum wétiniaitjiai. Nui̱ Israer shuara úuntri̱sha, Yúsnan pujurniu úuntri̱sha, Israer shuara jintinniuri̱sha ti wáitkiarsartatui. Nuyá̱ mantuawartatui túrasha menaintiú tsawantai̱ nantaktiatjai.” 22 Takui̱ Pítiur akaṉkí̱ jukí̱ chicharuk “Uuntá, nuka peṉké túrunashtatui. Áminkia túrutmacharminiaiti” tímiayi. 23 Tutai Jesus apajá̱s iis Pítrun chicharuk “Werumta, Satanásá. Yajauch awajtame. Ámeka Yus wakeramu enentáimtsume. Antsu jú̱ nuṉkanam enentáimiainia áinis enentáimme” tímiayi. 24 Nuyá̱ Jesus ashí ni unuiniamuri̱n chicharainiak “Shuar Winia nemartustaj tusa wakerakka ni wakeramuri̱n iniais ni krúsri̱n yanakí̱ Winia nemartusti. 25 Shuar áyatik péṉker pujustaj tákuṉka nú shuar uwemtsuk jakattawai. Antsu Winia enentáimturuk nemartus pachimiattsuk jaakka nú shuar nekaska iwiaakmanka wainkiattawai.* 26 Wats, shuar ashí jú̱ nuṉkanam írunna nuna sumakka tura nuja̱i̱ ni wakaní̱ émeseak ¿itiurak péṉker pujustiṉ? Shuara wakaní̱ emesramu ¿ashí jú̱ nuṉkanam írunna nuja̱i̱ iwiaramniakait? 27 Wi Aents Ajasu asan, winia Aparu kakarmari̱ji̱a̱i̱ tura ni suntari̱ji̱a̱i̱ tana ashí shuaran ni takakmasmaja̱i̱ métek akiktatjai.* 28 Imiá nekas tájarme, Wi Aents Ajasu asan Winia akuptáirui̱ winiái̱ shuar ju̱i̱ wajainia ju̱ játsuk wáitkiartatui” tímiayi.