Yus Kanta
Aya Yusak enentáimtusar pujustin
Ju̱ kanta Tawit áaruiti.
37 Yajauchin túrin ainia nu iisam suir enentáimtusairap.
Núnisaṉ yajauchin túruinia nunasha “wisha túranka maak” tiirap.
2 Kame nu aentska núpa̱ya núnis wárik tsupintrartatui
tura árak tsapaiyat kaa núnis amuukartatui.
3 Uunt Yus nekas enentáimtusam péṉkera nuke túrata.
Tura ju̱ nuṉkanmasha péṉker pujusta tura nekasa nuke nekaska eteṉmasam enentáimtusta.
4 Kame Uunt Yus ti aneakum warastinkia Niini̱ weankata.
Nuiṉkia ame wakeram nuna amastatui.
5 Ame wekaamuram Uunt Yus íktusta.
Tura Ni túrattawai tusam aya Niṉki enentáimtusta.
Warí ju̱na túrattawai.
6 Etsa̱ tsáapnin awajna nútiksaṉ ame naka enentáimmiarmincha
tura etsa̱ tutupin ajas tsáapin awajna nútikias péṉker túramurmincha Yuska paant awajtúrmasartatui.
7 Uunt Yusai̱ mijiat pujusam shiir enentáiji̱a̱i̱ nákasta.
Núnisaṉ aents yajauch túramuja̱i̱ páantin ajainia nu wainkiam itiurchat enentáimsaip.
8 Kajektincha tura suirsha ajapa iniaisarta.
Chíkich yajauch túramusha suir enentáimtusaip.
Kame suir enentáimkium amesha yajauchikia túramniaitme.
9 Warí, yajauch ainia nuka ashí emesnarartatui.
Antsu Nin umirkaru ainia núnaka Uunt Yus nuṉkan súsartatui.
10 Yusan umircha ainia nuka ishichik tsawant pujus amuukartatui.
Ni pujutái̱ri̱n iyamsha nui̱sha atsuartatui.
11 Túrasha waantu enentáimtumachu ainia nuka nuṉka susamu ártatui
tura tí peṉker aṉkant matsatu ásar warasartatui.
12 Yusan umircha ainia nuka péṉker nákak túrin ainia nuna yajauch awajsatai tusar chichaman juruiniawai.
Tura kajerainiak nain kátetete awajénawai.
13 Túrasha nuna tsawantri̱ emesnarartatna nuna Jiuwaka neka asa wíshikiawai.
14 Yusan umircha ainia nuka kuítrincha tura atsumainia nunasha mátaj tusar tíshimkiun iwiar wewe nenak, puya̱n jusa aya awajsarai.
Núnisaṉ naka enentáiji̱a̱i̱ túruinia nunasha matai tusar iwiarnatainiawai.
15 Túrasha ní puya̱ri̱ ainia nuke ni enentái̱n ijiú pana jí̱niartatui.
Tura tishimkiuri̱nkia kupí kupí awajnásartatui.
16 Yusan umircha kuítian núkap takakainia nuja̱i̱ apatka íismaka
Yusan umirniuka ishichik takakkusha péṉkeraiti.
17 Warí Yusan umircha ainia nuna kakarmari̱nkia emestur amukártatui.
Tura péṉker enentáimkia ainia núnaka Jiuwá emeta achíakui.
18 Péṉker aents ainia nuna tsawantri̱nkia Jiuwá nékawai.
Tura ni sunasartatna nuka péṉke amukashtiniaiti.
19 Warí, itiurchat tsawant winiakuisha natsa̱a̱rchartatui.
Tura tsukatíncha nuna arant taramkartatui.
20 Yusan enentáimtichu ainia nuka amuukartatui.
Núnisaṉ Jiuwá nemasri̱ṉkia murikiu machari̱ amuwana
tura mukuint aya méṉkana núnikiartatui.
21 Yusan enentáimtichuka kuítian ikiamsash awakechuiti.
Antsu naka túrinkia waitnenkartur ántar súawai.
22 Tura Ni aentsun shiir enentáimtamun nuṉkan súsartatui.
Tura Ni yajauch yumiṉji̱a̱i̱ yumiṉkramuka amukártatui.
23 Shuara wekaamuri̱nkia Uunt Yus aetak iwiartawai.
Nisha nu shuara wekaamuri̱n waraarui.
24 Tura akaikí̱ iniarsha nuṉká tepeschattui
antsu Uunt Yus uwejnum achíakma asa wárik nantaktiatui.
25 Natsa ámajai túrasha yamaikia weamprájai
antsu Yusan enentáimtin ainia nuna ajapa iniaisámun wáinkiachuitjiai.
Núnisan ní shuari̱sha yurumkan surusat tusa uwejé̱n iniakmá wekaanka wáinkiachuitjiai.
26 Tuke tsawant waitnenkartutai̱ji̱a̱i̱ suawai. Túmakui̱ ni uchirí̱ṉkia Yusai̱ya̱ shiir pujutan wáinkiartatui.
27 Yajauchinmaya̱ kanakim péṉker túrata túram tuke iwiaaku pujustatme.
28 Warí Jiuwaka naka wekaana núnaka anenaiti.
Tura niniu péṉker ainia núnaka ajapanka iniaisashtatui.
Niṉkia tuke péṉker apujsa wainkiamu ártatui.
Antsu Yusan enentáimtichu wea ainia nuka emesnakartatui.
29 Yusan enentáimtinkia nuṉka sunasartatui.
Túram nui tuke pujusártatui.*
30 Nákakea nuna túrinkia nekatai̱ji̱a̱i̱ chichaawai.
Tura ni iniai̱ji̱a̱i̱sha aya péṉker túratniunak áujmatui.
31 Ni Yusri̱ akupkámuka ni enentái̱n pujawai.
Tuma asamtai ni wekaamuri̱ya̱ṉka atajkintrasha iniarchattui.
32 Yusan enentáimtichuka péṉker túrinia nuna mátin enentáiji̱a̱i̱ náwa̱mui.
33 Túrasha Jiuwaka péṉker enentáimkia ainia núnaka Yusan enentáimtichu ainia nu
nekapes íisarsha sumamtikiawarat tusaṉka tsaṉkatkashtatui.
34 Jiuwá nákasta túram ame wekaamuram péṉker wáinmamkata.
Túrakminkia nuṉke̱mi̱i̱n pujusminiam tusa náakam awajtámsattawai.
Tura Yusan enentáimtichu ainia nu emeskarma áme jí̱miji̱a̱i̱ wainkiattame.
35 Yusan enentáimtichu náakam awajsar numi uunt ukat ukat ajasua núninian wi wainkiamjai.
36 Túrasha tsawant naṉkaamasmatai nusha amuuk atakka wantinkiachmai.
Nuna e̱a̱kmajai túrasha wáinkiachmajai.
37 Aya Áminiak enentáimturmas tura naka wekain ainia nu iistá.
Warí aya péṉkernak aṉkant pujustinian túrin ainia nuna amúamuri̱ṉkia timiá shiir átatui.
38 Tura Yus akupkámun umircha ainia nuka ashí emeskar
núnisaṉ Yusan enentáimtichu ainia nuna uchirí̱sha tiraṉki̱sha ashí amú amutú awajtúsma ártatui.
39 Nákak túrin ainia nuna uwempratniuri̱nkia Jiuwai̱ya̱ winiawai.
Tura Niṉkia jakamnia nekapeamu tsawantinkia ejak ápujui.
40 Jiuwá niṉkia yaiṉ aṉkant awajsattawai.
Yusan enentáimtichu ainia nuyá̱ uwemttikiar aṉkant awajsattawai.
Nunasha aya Niin enentáimias nákasaru asamtai túrattawai.