Apukarípsis
7. Yamaram Jerusaréṉ
Yamaram nayaim tura yamá nuṉka
21 Nuyá̱ nayaimpisha tura nuṉkasha meṉkarámtai yamaram nayaimpin tura yamaram nuṉkancha wainkiamjai. Tura nayantsasha atsúarmai. 2 Wi Juaṉ, ti shiir péprun Yusai̱ya̱ yamaram Jerusaréṉkan nayaimpinmaya̱ táarun wainkiamjai. Anajmarma ni áishri̱n iṉkiuṉtaj tusa ti shiir iwiarmampra áintsaṉ tí peṉker iwiaramuyi. 3 Nayaimpinmaya̱ ti kakantar chichaamun antukmajai. “Iisiá, Yus yamaikia aentsja̱i̱ pujawai. Tuke niji̱a̱i̱ pujakui ashí ni shuari̱ ártatui. Tura niji̱a̱i̱ tuke pujak nekas tuke ni Yusri̱ átatui. 4 Yus ni nea̱jkin u̱ju̱jturartatui. Tura nuik amia nuka ashí amuukarmatai jákatniusha, úttincha, wáitsatniusha tura najaimiatniusha atsuttawai” timiai.
5 Tura akupin pujutai̱nium ekema nu “Iistá, Wi ashí peṉké yamarman nájanjai” timiai. Nuyá̱ nu arantcha turutmiai “Ju̱ka imiá nekas asamtai aartá. Nekas enentáimtustiniaiti.” 6 Ataksha chichartak “Yamaikia mash uminkiayi. Witjiai ashí juármari̱ tura amúamuri̱sha. Kame A rétranmaya̱ Y rétranam ashí retra áintsaṉketjai. Ashí kitiama núnaka tuke iwiaaku pujutai̱ entsan peṉké kuítchaja̱i̱ áartatjai. 7 Nupetmakunka ashí yamarma ju̱na mash susattajai. Wisha ni Yusri̱ átatjai. Núnisaṉ nisha winia uchir átatui. 8 Antsu sápijkia Yusan enentáimtichusha, yajauchin máatrasha, maṉkartincha, tsanirmatan pujurniusha, wawekratniusha, najankamu yusan tikishmátniusha tura ashí wáitrincha ji asupriji̱a̱i̱ keá antumiaṉnum apenáwartatui. Nuka jimiará jákatin tutainti” timiai.
Yamaram Jerusaréṉ
9 Nuyá̱ siati suntar piniṉ amúamunam wáitkiastinji̱a̱i̱ piákun takakua nuyá̱ chikichik taruti turutmiai “Winitiá. Murikiu anajmarmari̱n iniaktustatjame.” 10 Taku mesekranam naint yakí̱ jurukí̱ Yusai̱ya̱ ti shiir Jerusaréṉ pepru nayaimpinmaya̱ táarun iniaktursamai. 11 Nu péprusha Yusa winchari̱ji̱a̱i̱ tsáapniniuyi. Nu tsáapnincha kaya tí shiirmachia núnis jaspi kaya nuní̱ saar asa tí tsaapniniuyi. 12 Pepru yantamesha ti yakí̱ péṉkramuyi tura wáitiri̱ tuse amai. Tura nu wáitinium suntar wajatiarmai. Nu wáitinmasha Israer shuara uuntri̱ tuse armia nuna naari̱ áarmauyi. 13 Nantu tatainmaani̱ menaintiú waiti amai. Nantu akatainmaani̱sha menaintiú waiti amai. Nuṉkaani̱sha menaintiú waiti amai. Arakaani̱sha menaintiú waiti amai. 14 Ti uunt kaya tuse apujsamu armai. Tura nui̱ ekenir péṉkramuyi. Nu tuse kayanam Murikiu akatrámuri̱ tuse armia nuna naari̱ áarmauyi.
15 Suntar wiji̱a̱i̱ chichaua nu, nekapmatai̱n kurin takakuyi. Nuja̱i̱ pépruncha, wáitiri̱ncha tura péṉkramuri̱ncha nekapmartiniuyi. 16 Pepru esantí̱sha waṉkantí̱sha yakiri̱sha mash métekrak armai. Suntarsha péprun nekapmatai̱ji̱a̱i̱ nekapmaram esantí̱sha waṉkantí̱sha tura núnisaṉ je̱a̱mkamu yakiri̱sha tus mir tusiantu kirumitru amai. 17 Nuyá̱ péṉkri̱ncha nekapmarmai. Suntar aents nekapmatai̱ji̱a̱i̱ nekapmaram sasaintikuátru mitru amai. 18 Nu péṉkramusha jaspi kayaja̱i̱ najanamuyi. Péprusha aya kúrikiyi. Nu kuri tí peṉker sáarauyi. 19 Peṉ apujtukma kayasha ti shiir kaya ainia nuja̱i̱ najanamu asa ti shiir iwiaramuyi. Emka nu jaspi káyauyi. Jímiara nusha sapiru káyauyi. Menaintiua nusha ákata káyauyi. Kuatrua nusha ismirártauyi. 20 Seṉkua nusha únise káyauyi. Saisa nusha kurnarínia káyauyi. Siatia nusha krisuritiu káyauyi. Uchua nusha periru káyauyi. Nuiwia nusha tupasiu káyauyi. Tiasa nusha krisuprasa káyauyi. Áunsea nusha jasentu káyauyi. Tusea nusha amatísta káyauyi. Ti kayaim apujsamu asamtai tí shiirmachiyi. 21 Pepru wáitiri̱ tuse ainia nu ti shiir nayantsanmaya̱ shaukja̱i̱ chikichik najanamu armai. Pepru jinti̱sha aya kúrikiyi. Nu kuri tí peṉker sáarauyi.
22 Yusa Uunt Je̱e̱ncha wáinkiachmajai. Antsu nú peprunam Uunt Yus Ashí Tujintkiachua nu tura núnisaṉ Muriksha nú peprun pímiutkui takamtsuk Níniuyi. 23 Nú peprunmasha tsawái̱ nantusha kashí nantusha atsumchamai. Antsu Yusa winchari̱ tsáapin awajmiai. Núnisaṉ Muriksha tsáapin awajmiai. 24 Nu tsáapniji̱a̱i̱sha ashí nuṉkanmaya̱ shuar wekasartatui. Tura ashí nuṉkanam akupin ainia nusha nui̱ yujainiak ni péṉkeri̱ji̱a̱i̱ nuna shiir awajtuiniawai. 25 Tura kashi atsá asamtai tuke tsawai̱ti. Tuma asamtai wáitiri̱ tuke epenchamu ártatui. 26 Tura ashí nuṉkanam péṉker ana nuna nui̱ itiaartatui. 27 Antsu yajauchikia peṉké waya̱shtatui. Mui̱jmiainian túrincha tura wáitrincha peṉké waya̱chartatui. Antsu áyatik shuar tuke iwiaaku pujutai̱ papinium naari̱ aarma ainia nuke waya̱wartatui. Nu papincha Murik takakui.