Isayas
Jerusaréṉkan matsamtúkarmatai e̱a̱rma
29 Anearta Arierá, Tawit pujutai̱ péprusha Arierá urukatiṉ. Kame tuke uwitin námperka najankim uwir uwir wetá. 2 Túrasha Ariernaka Wi wáitkiastatjai. Tura wáitiakur uttai̱ pepru awajsattajai. Nuiṉkia nisha Wí íismaka nekas Arier* ajastatui. 3 Nuya̱ṉka téntakan matsamtúktatjarme tura wenuí éṉkekan jíinkichmin awajsattajrume. 4 Túrunamka natsanmai̱ ajakam nuṉká iniantatme. Tura tui̱ iniantum nui̱ṉ tikishmaram nuṉka ju̱yú̱ ju̱yu̱nnum yajauch wakan urukainia núnismek ishishmasam chichattame.
Yus Jerusaréṉkan aṉkant awajsatta nu
5 Tura ame nemasrumka ti untsurí áiniayataṉ amuuk nuṉká ju̱yu̱mpri̱ya̱ núnikiartatui. Kame peṉké netse ti untsurí áiniayat aya aneachma nase tsuátan umpuí aya emeṉkána nútiknawartatui. 6 Núnisaṉ Ashí Akupin Uunt Yusa nu ipiamtaja̱i̱, u̱u̱ja̱i̱, wainchi naseja̱i̱ tura téter ajamuja̱i̱ núnisaṉ kakaram nase yumiji̱a̱i̱ tura wárik áeskartin jiji̱a̱i̱ asuttiáwartatui. 7 Nuya̱ṉka ti untsurí ashí nuṉkanmaya̱ aents Arierja̱i̱ mániniak téntakar matsatainiasha tura wenui̱ éṉkekmasha kashi ímiaja̱i̱k wainma tura mesekranma núnis nekaprartatui. 8 Tuma asa ashí nuṉkanmaya̱ aents Seunja̱i̱ mániartatna nuka shuar kitiamsua kanar mesekranam úmaksha kitiakri̱ntiuk shintiatsuk núnisaṉ tsukamsua kának mesekranam yurumásha tsukartiuk shintiá núniartatui.
Israer shuar nekas túratniua ímiatrus túruiniatsui
9 Túrasha enentáimpratarum núnisaṉ nekaschaiti tákurmesha titiarum. Tura kusurúmsha kúsuruk juaktarum. Wíniusha úmachiatrumek nampektarum. Núnisrumek awartiusha umarchiatrumek pemperaktak ajá wekaitiárum. 10 Warí Uunt Yus atumí nekatairi̱n kanarua áitkiartamaitrume. Tura atumí Yúsnan etserniuri̱n ji̱ncha epetka nútikiaiti tura nekamin ainia nunasha nekamtai̱ri̱n emenkátkaiti. 11 Kame ashí ímiaja̱i̱k wainkiamusha papí aarma ipijrar asakamu urakchamnia asakamu átatui. Tura áujsatniun neka nuna “waitneasam ju̱ áujsata” tusa susamsha “Warí urakchamnia asamtai áujsatniun tujintiajai” títiatui. 12 Tura áujsatniun nékatsna nunasha “waitneasam ju̱ áujsata” tusa susattawai. Túramsha chichaak “áujsatniun nékatsjai” títiatui.
13 Kame Uunt Yus chichaak “Warí ju̱ shuar ainia ju̱ka nekas enentáiji̱a̱i̱nchu aya chichame̱ja̱i̱ shiir awajtuiniawai. Túrasha ni enentái̱ji̱a̱i̱ṉkia nekas enentáimturainiatsui. Tura Wíniaka ashampruk umirtutsuk antsu shuar akupkámu umiktinia nunak umirainiawai.* 14 Tuma asamtai jú̱ shuarnumka ataksha aents túrachminian túrakun tsuumainian iniaktusartatjai. Túran niniu neka ainia nuna nekatairi̱ncha ikiajtiúkaran emeṉkátkartatjai” tímiayi.
15 Kame átum ju̱ túratai timia túrakrum init kiritniunam Uunt Yus u̱mprukrum ¿yaki waitmaktaj tura yaki nekarmataj? tárumna nútiram ¡aneartarum! 16 ¿Urukakrumtsuk tíniusha ajasuram? Nuwé najanniusha nuwea núnin ¿enentáimtusminkiait? Núnisaṉ nuwe najanamusha najanniua nuna chicharuk “Niṉkia najatachmai” ¿tíminkiait? ¿Tura najankamusha najanniun chicharuk “Auka nékachuiti” títiatuak?
Péejchach ainia nu wáitiamunmaya̱ aṉkant ajasártin
17 Kame ishichik tsawant naṉkaamasmatai Ríwianu nuṉkaka péṉker nuṉka ajastatui tura nu nuṉkaka péṉker asa ti shiir arakmatai kampunniua ¿núnikchattuak? 18 Tura empekáru ainia nusha nu tsawantinkia nu papiniumia̱ chichamnasha antukartatui. Tura kusurúsha kirit tee íimmianumia̱ paant íimiartatui. 19 Núnisaṉ péejchach ainia nuka ataksha Uunt Yusai̱ waketkiar warasartatui tura aents peṉké kuítrincha ainia nusha Israer shuara Tunaarincha Yusri̱n wararsartatui. 20 Kame peṉké yajauchiji̱a̱i̱ útsuk takamtikin ainia nuka tura wishikiartincha nuyá̱ ashí yajauchin túrataj tusa naká pujú ainia nuka ashí amukártatui. 21 Núnisaṉ chichame̱ja̱i̱ aentsun ántar makú ainia nusha tura pepru wá̱i̱ti̱a̱i̱ri̱n chichama iwiarin pujuinia nui̱ yajauch shuara nu tunamkachua nuna yáinian tsanumprinkia nuyá̱ péṉkera túrinian ántar chichamja̱i̱ anaṉkin ainia nuka mash amuukma ártatui. 22 Tuma asamtai Aprajáman aṉkant awajsámia nu Uunt Yus, Jakupa shuari̱n chicharuk “Yamaikia Jakupka iniatsá̱ntrashtatui tura atakka putsú putsuka awajnáschattawai. 23 Warí ni shuari̱sha ni iimiainiamunam Wi túramun wáinkiar Winia náarun ti shiir awajsártatui. Núnisaṉ Jakupa Yusri̱ Tunaarincha Yusan ti shiir awajsártatui túrawar Israera Yusri̱n ashamkartatui. 24 Tura awajirar páchim enentáimpraruka neka ajasártatui nuyá̱ áujmatkartin ainia nusha nekas chichaman nekaawar unuimiárartatui” tawai Uunt Yus.*