Rúmanam
10 Yatsuru, Israer shuar uwemprarat tusan ti wakerakun Yusan áujtajai. 2 Maa, uwempratniun nékachiataṉ Yusan shiir awajsatniun ti wakeruiniawai. 3 Túmaitiat Yus shuaran péṉker awajsatniun nékachu ásar aya ni péṉker túramuja̱i̱ṉ péṉker ajastinian enentáimtuiniawai. Tuma ásar Yus péṉker enentáimtamuja̱i̱ nekas péṉker ajastinian jeacharai. 4 Kame aya Kristu enentáimtamuja̱i̱ nekas péṉker ajastin asamtai akupkámu umirkatniuja̱i̱ péṉker ajastinkia ántraiti.
5 Akupkámuja̱i̱ péṉker ajastinian pachis Muisais tímiayi “Nuna takamtsuk umirniuka nuja̱i̱ péṉker pujustatui.”* 6 Antsu Krístun enentáimtus péṉker pujustinian pachis shuar ju̱na tíminiaiti. “Ti itiurchata áinis ‘¿yaki nayaimpiniam waka Krístun itiarati?’ tiirap” tawai. 7 “Tura ‘¿yaki jakamunam we Krístun iniantkit?’ tiirap” tawai.* 8 Tura ju̱nasha tawai “Yus Chicham yúpichuch umirkamniaiti. Aya enentáimji̱a̱i̱ enentáimtakum wénumja̱i̱ ujaktiniaitme.”* Nu chicham “Yus enentáimtustiniaiti” tawai. Nu chicham tuke étsereaj núiti. 9 Yus Jesusan jakaan iniantkímia nu nekasaiti tu enentáimtakum tura wénumja̱i̱ “Jesus winia Úuntruiti” tákum uwemprattame. 10 Kame enentáimji̱a̱i̱ Kristu nekas Yusa uchirí̱nti tu nekas enentáimtakmin Yus péṉkeraitme turamtatui nuyá̱ wénumja̱i̱ “Jesukrístun enentáimtajai” tákumka uwempraitme.
11 Ataksha Yus Papinium tawai “Niin shiir enentáimtuinia nú shuar natsa̱a̱rchartatui.”* 12 Tuma asamtai ashí shuar, Israertisha Israerchasha, mái̱ metek Yusan shiir enentáimtuinia nuna Yus ti aneak ashí péṉkeran suawai. Tura ashí métek ni Úuntri̱nti. 13 Nu arantcha “Ashí shuar Úuntan enentáimtus áujea nuka uwemprattawai”* yaunchu Krístunu tu áatramuiti. 14 Tura Krístun enentáimtuiniachusha ¿itiurak Nin áujsarat? Tura Krístun nékainiachusha ¿itiurak Nin enentáimtusarat? Tura Yusa Chichame̱ ujaachmasha ¿itiurak nekaawarat? 15 Tura akupkachmasha ¿itiurak Yus Chichaman ujakárat? Tura shuar Yus Chichaman etserkataj tusa wéana nuna Yus Papinium tawai “Shuar uwempratin chichame̱n etserki̱ wéana nu ti shíirchakait.”*
16 Tura ashí shuar uwempratin chichaman ántuiniayataṉ umirainiatsui. Isayassha yaunchu aak tímiayi “Uuntá, ¿yaki ii étserman antukaruit?”* 17 Páantchakait. Yus Papiniumia̱ Kristu túramu ujakam antuktiniaiti. Tura antukar Kristu nekas Yusa uchirí̱nti nekas tiar tu enentáimtustiniaiti.
18 Tura ¿Israer shuar Yus Chichaman antukcharmakia? Warí, Yus Papí tawai
“Ashí nuṉkanam ni chichame̱ antukmaiti.”*
19 Tura Israer shuar nu chichaman antukariat ¿paant nekaawarmaashi? Ee, nekas nekaawarmai. Tuma asamtai Yus Muisaisan tawai
“Wisha yamaikia áitkiasnak náṉkamas aentsja̱i̱ netse ainia núja̱i̱sha akasmamtikian akajiartatjai.”*
20 Nuyá̱ Isayas ashamtsuk áarmiayi
“E̱a̱tkacharua nu wáitkiarmiayi.
Inintruiniatsa̱i̱ṉ wantintiukmiajai.”*
21 Tura Israer shuaran áujmatuk “Tuke iniaitsuk Wini̱ṉ winiarti tusan nu shuaran untsúajai. Tura nakitruiniak umirtuiniatsui” tímiayi.*