Israernum
10 Muisais akupkámuka ukunam tí peṉker átatna núchaiti. Antsu aya nuna ajeta núnis nukuawai. Tuma asa ashí uwitin taṉku maar Yus sútai̱ji̱a̱i̱sha shuar yajauch túrukarma asakátrachminiaiti. 2 Kame asakátrar shuar nekas shiir awajsámniaitkiuiṉkia taṉku maar Yus súsatniun atsumachuk iniaisara̱a̱yi. Iis, mash tsaṉkuramuitkiuṉka ni tunaari̱ji̱a̱i̱ itit enentáimtumascharainti. 3 Antsu taṉkun maar ashí uwitin tuke suíniak nuja̱i̱ ni yajauch túrutairi̱n tuke enentáimtuiniawai. 4 Warí waakasha tura murik áishmaṉsha maar nuna numpe̱ja̱i̱ ii yajauch túrukarma peṉké asakárchamniaiti. 5 Nu asamtai Kristu jú̱ nuṉkanam taa Yusan chicharuk
“Taṉku maar sútai̱sha peṉké nakitrame.
Antsu aya̱sh iwiaram surusuitme.
6 Yajauch túrukarma asakáktin taṉku takamtsuk áesamusha tura taṉku susamusha wakeratsme.
7 Tuma asamtai ‘Ame pénuimiu papirumin Winia áatrurumna núnisnak ame wakeramurmin umiktajtsan táwitjiai Winia Yúsrun tímiajai’” tímiayi. 8 Emka Muisais akupkámu ai̱ṉ taṉku susamuncha yajauch túrukarman asakárat tusa taṉku maar susamuncha nuyá̱ taṉku áesamuncha Yus ashí nakitraiti tawai Kristu. 9 Nuyá̱ “Yusru, ame wakeramurmin umiktajtsan táwitjiai”* tawai. Nuna taku taṉku maar sútai̱n “asakáiniaiti” tawai. Tura chikichan ikiuawai. 10 Nuja̱i̱ Jesukrístu Yusan umiruk jákatniun chikichkí surumakmatai Yus iin tunaarincha shiir awajtámsaitji.
11 Tura Israer shuarnumia̱ Yúsnan pujurin ashí tsawantai̱ nú taṉkunnak máwar yajauchin asakáchunak Yusan ti suu áiniawai. 12 Antsu Jesukrístuka jákatniunam chikichkí surumak ashí shuara yajauchiri̱n asakár atakka peṉké jákashtiniaiti. Nuna tura Yusa untsuurí̱ni̱ nekas akupin pujutai̱nium pujusuiti. 13 Tura Yus ni nemasri̱n nupetak nin umirkarti tusa súsartatna nuna* nákawai. 14 Chikichkí jakamuja̱i̱ ni shuari̱n tuke tunaarincha awajsaruiti. 15 Yusa Wakaní̱sha núnisaṉ tawai. Emka tímiayi
16 “Yamaram chichaman najanattaj nuka jú̱nisaṉ átatui. Wi akupeaj nuna ni enentái̱n paant enentáimtikrartatjai.”
17 Nuya̱sha tawai
“Ni yajauch túrukmari̱n peṉké enentáimtuschattajai.”* 18 Tuma asamtai ii yajauchiri̱ tsaṉkuramu asamtai atak iin jarutramkatin atsumatsji.
Yus tuke enentáimtusar Yusai̱ jeartai
19 Tuma asar yatsuru, Jesukrístu numpe̱ja̱i̱ péṉker awajsamu asar sapijmiatsuk shiir enentáiji̱a̱i̱ Tí Shiir Tesamu imiá shiira nui̱ Yus nekas pujamunam waya̱mniaitji. 20 Kame Yamaram tura Iwiaaku jintianmaani̱ Kristu ímia niṉki Yusa Je̱e̱n Tí Shiir Tesamunam tarach ejamuncha ni aya̱shí̱n nakumeana nu áṉturma asakrin yamaikia páchitsuk waya̱mniaitji. 21 Jesus Yúsnan pujurniu uuntri̱ asa ashí Yus shuartin wáitmak pujurtamji. 22 Tuma asamtai tuke enentáiji̱a̱i̱ Yus imiá nekas enentáimtusar Yusai̱ jeartai. Ii enentái̱ Kristu numpe̱ja̱i̱ nijiarma asamtai nekas enentáimtakur Kristu nekas winia úuntruiti tiar ii yajauchiri̱ji̱a̱i̱ itit enentáimtumaschatniuitji. Tura ii aya̱shí̱sha saar entsaja̱i̱ imiantniuitji. 23 Yus tsaṉkatramkattajnia nu shiir enentáimtamu iniaitsuk kakaram ajasár tuke emetatniuitji. Yus tsaṉkatramkaitjinia nuna umiktatui. 24 Péṉker anenain tura péṉker túrin ajasártai tusar mai̱ yáiniaikiartiniaitji. 25 Yusa Je̱e̱n Yus shuarja̱i̱ tuke iruntratin iniaisashtiniaitji. Chíkich iniainiakuisha iikia tuke iruntratniuitji. Nui̱ irunkurkia ikiakánairtiniaitji. Tura Kristu tátintri̱ ishichik tsawant ajasu asamtai nú nukap túratniuitji.
Yusa asutkiari̱ tí tsuumainti. Anearta
26 Túrasha shuar nekas chichaman nékayat ní wakeramuri̱ji̱a̱i̱ṉ yajauchiniam wekaakka Kristu jakamun nakitia asamtai chíkich taṉkun numpe̱ja̱i̱ ni yajauch túramu asakátratin atsawai. 27 Áyatik ashamak tí tsuumai̱ sumamatin tsawantan nákasminiaiti. Nu tsawantai̱ Yus ni nemasri̱n ti kajerak asutiak mash emesrattawai.* 28 Shuar Muisais akupkámun umikchamtai tura jímiar shuar menaintiuksha etserkamtaikia waitnentsuk mátniuyayi. 29 Núnisaitkiuiṉkia shuar Yusa Uchirí̱n wishikiainiakka ni numpe̱ncha nakitiáiniakka tura waitnenkartutai̱ Wakaní̱ncha katsekainiakka nuna naṉkaamas asutniáchartatuak. Warí ni nakitiana nú numpaja̱i̱ yamaram chicham nekas umirkatin awajsámuyayi. Tura núja̱i̱sha ni tí peṉker awajnástiniuyayi. 30 Ii Uuntri̱ Yus jú̱nis chichaak “Wi yapajkiattajai tura Wi akikmaktatjai.” Nuya̱sha tímiayi “Wí shuara yajauchiri̱n ti paant nekarattajai.”* 31 Tí tsuumainti iwiaaku Yusa kakarmari̱ji̱a̱i̱ asutniátin.
32 Tura atumsha yámankamtaik Yusna nekaarum Krístunu ajasmiarmena nú enentáimsatarum. Nui̱ kakaram ajasrum ashí itiurchat katsuntramiarme. 33 Chikichtirmeka katseknakmarme tura ashí iimiainiamunam yajauch awajnásmarme. Chikitcha nu shuarnum páchitkia asarum itit awajnásmarme. 34 Atumsha sepunam pujuarmia nusha waitnentramarme. Tura shiir warasrum kuítrumin atantramainiakuisha katsuntramarme. Nayaimpiniam tuke amuukashtin ashiji̱a̱i̱ naṉkaamas írunna nu achiktin asarum túramarme. 35 Tuma asarum yawe̱tsuk Yus tuke enentáimtusrum kakaram ajastarum. Túrakrum naṉkaamas sunaschatniuitiajtai tiirap. 36 Atumsha esetra enentáimsarum Yus wakera nu túrakrum Yus atumín amastatjarme timia nu wainkiattarme. 37 Kame Yus Chichamnum áarmaiti
“Tátinia nu ishichik ajasái. Wárik tátatui.
38 Péṉkera túrinkia Yusan nekas péṉker enentáimta asa iwiaaku pujustatui.
Tura iniaiyakuiṉkia nin wararsashtatjai.”*
39 Tura iikia iniaisaar mesena nú shuarchaitji. Antsu Yus nekas enentáimtusar uwempraitji.