Yus Kanta
Nupetmak Yusan yumiṉsamu
(2 Sam. 22)
Tawit kantamámu
18 Maa Uunt Yusá winia kakarmar asakmin aneajme.
2 Úunt Yusruka uunt kaya núnisaiti. Wenuke péṉker iwiartukma asa nupetkachminia núnin asamtai winia Yúsruka aṉkant awajtiniaiti.
Winia Yúsruka uunt kaya núnis asamtai Niin ejamkattajai.
Níyaiti winia tantaruka kakarmari̱ji̱a̱i̱ uwemtikrana nuka tura tí yakí̱ iwiarak winia u̱u̱k apujtawai.
3 Uunt Yusan untsuktatjai yaki shiir awajcha árat.
Túran winia nemasrui̱ya̱ aṉkant awajtawai.
4 Jakattsa pujutai̱ eṉketámai
tura entsa weekar emeskartin winia ti ashamkartikruamai.
5 Jakaa matsamtai̱ jiṉkiata téntatrukmai.
Túruta jatai̱ nekan eem aepruttsarmai.
6 Jakamnia enentáimkiun Uunt Yusan untsukmajai
túran winia Yúsrun seamjai.
Túram Ni Uunt Je̱e̱ya winia chichamprun anturtukmai.
Wi seamma Ni antutai̱ri̱n antumtikiamjai.
7 Nuṉkasha muchitrar peantrarmai.
Naint tépakmari̱ya̱ ímianai muchitrarmai.
Uunt Yus kajekmatai peantrarmai.
8 Ni nuji̱ya̱ mukuint jiinmiai.
Ni wene̱ya̱ ji keá áeskartua amukratkatin jiinmiai.
Tura jinia kaí̱ri̱ keá Niya̱ naṉkimnarmai.
9 Nayaimpisha núnisaṉ tsuntsumawar akaikímiai.
Tura ni nawe̱ni̱ṉkia kirit amai.
10 Kirupínnium ekemak nanakmiai.
Nasenam nanaprurmai.
11 Ni ú̱mtairi̱nkia kiritniunam najanamai. Ni ú̱mkar pujutai̱ je̱a̱ núniniauyi. Ni nukurke̱nka yuraṉkim téeyayi.
12 Ni pujamu winchari̱nkia yuraṉkim winiantrukmauyi.
Michasha jinia kaí̱ri̱sha jíiniarmai.
13 Uunt Yus nayaimpinmaya̱ṉ ipiamtarkamai.
Ashí Naṉkamantu untsumkamai
túrunamtai micha jinia kaí̱ri̱ kapá̱a̱ jíiniarmai.
14 Ni naṉkiri̱n akupkámai tura tsakiṉmakmai.
Cháarpin aju̱a̱rmai tura sapijmiamtikiarmai.
15 Uunt Yusá ame chicharkam iwiaaku mayai̱
Ame nuji̱mini̱a̱ umpuntim entsasha wainkiamnia ajasármai.
Túruna nuṉká tépakmari̱sha paant ajasármai.
16 Uwején yakiya̱ iwiaintiurak achirkámai.
Tura nayants ti waṉkaram ámunmaya̱ jurusmai.
17 Winia nemasru kakarmari̱nia̱ tura winia nakitriarmia nuya̱ṉka aṉkant awajtúsmai.
Kame nuka wíji̱a̱i̱sha naṉkaamas kakaram armai.
18 Kakarmachu nekapran pujumiaj nui̱ wajatrurarmai.
Túrasha Uunt Yus kakarman surusmai.
19 Ni wíniaka ti aṉkant ámanum ji̱i̱rkimiai.
Tura winia wakeruta asa aṉkant awajtúsmai.
20 Uunt Yus nekasa nuja̱i̱ métek túrutairja̱i̱ wíniaka métek akikmatrukmai.
Winia uwejruka umitmákcha péṉker asamtai wíniaka surusuiti.
21 Uunt Yusa jinti̱nkia wekasaitjiai.
Tura Yusan enentáimtichua núnisnaka winia Yusrui̱ya̱ṉka kanakchaitjiai.
22 Wi pujamunmaṉka ashí nekasa nuja̱i̱ métek sumamtiktairmeka wini̱n pujuiniawai.
Ame akupkámurmeka wini̱ya̱ṉka kanakchaiti.
23 Níji̱a̱i̱ṉkia esetran wekainiuyajai.
Túran yajauch wakeruktinniasha túrachmiajai.
24 Ni íimmiaja̱i̱ métek winia uwejrunka japiru asamtai
nekasa nuja̱i̱ métek túrutairja̱i̱ Uunt Yus wíniaka akirkaiti.
25 Waitnenkartinji̱a̱i̱ waitnenkartutai̱ aniakmame.
Núnismek esetar wekain áishmaṉja̱i̱ esetra wekainiaitme.
26 Wapikchaja̱i̱ wapikcha aniakmame.
Tura tí yajauch ainia núja̱i̱sha imiá neka núnin enentáimtikiainiame.
27 Aents péejchach ainia nuka uwemtikiainiame.
Ame antsu waantu enentáimtumainiana nuka natsanmai̱ péejchach awajáiniame.
28 Ti nekas winia shirikpir keek tsáapin awajturme.
Uunt Yus winia Yusur wini̱n kirit ana nuna tsáapin awajturui.
29 Ámiji̱a̱i̱ṉkia untsurí suntarnasha emeskartatjai.
Tura winia Yúsruja̱i̱ṉkia nant ajakin wenuknasha naṉkaikiniaitjiai.
30 Yusa jinti̱ṉkia tuke imiatkinchaiti.
Tura Uunt Yusa chichame̱ṉka nekapsamuiti.
Niin ejamainia nuna Niṉkia tantari̱nti.
31 Kame Uunt Yuska Níṉkichukait.
Wari, chíkich kátsuram kaya tímianu ii Yusri̱ji̱a̱i̱ méteksha áwak.
32 Kakarman surana nuka Yúsaiti.
Tura winia wekaamurnasha tí peṉker naka awajturui.
33 Japa nawe̱ya̱ imianú kakaram winia nawernaka awajturui.
Tura yakisha nekas tímiatrusaṉ naka ewekátui.
34 Mesetnan uwejruka iwiarnatui.
Núnisaṉ winia kuntursha yaṉkú jiru tíshimiuk najanamun té nenakminiaiti.
35 Ame uwemtikkiartutai tantarum surusume.
Untsuur uwejmiji̱a̱i̱ emetruame.
Túram ashí péṉker jintiukit tusam yaintkiame.
36 Wakenmarui̱ṉkia winia jintiarka Ame iwiaṉkátrame.
Túramu asamtai winia nawerka atajkintrachartatui.
37 Winia nemasruncha apapékarmajai.
Túran amayá̱ṉkan amuka ikiuakun waketkimjiai.
38 Awatiármajai tura nantaktinian tujintkiarmai.
Winia nawerui̱ nuṉká iniararmai.
39 Yusru Ame kaka̱rtin mesetnum surame.
Winia nemasrusha wini̱ni̱ taket tikishmaki̱ ajarmai.
40 Winia nemasruka tuntupmamtikruam ikiurmamtikiarmiame.
Túrakmin nakitriarmia núnaka emeskarmajai.
41 Untsumiármai túrasha yaki uwemtikrat atsumai.
Úunt Yusnasha untsúarmai túrasha Nisha ái̱kcharmai.
42 Nuṉká ju̱yu̱ri̱ya̱ nútikiwarmajai.
Túran kucha páasanam ana nútikiawaran amutúrarmajai.
43 Aents kajen ainia nuyá̱ Ame uwemtikrurmame.
Túram uunt nuṉka mátsatka úuntri̱ya̱ núnisam atá tusam apujtusmame.
Wi nékashtai̱ aents winia umirtuiniawai.
44 Winia anturainiak wárichik umirtuiniawai.
Iraruka winí̱ naka wajainiak kurainiawai.
45 Iraruka sapijmiainiawai.
Túrawar ni utúachmin wenukeya̱ tákeer ajakiar jiiniainiawai.
46 Uunt Yus iwiaakui. Winia kátsuram Kayar* asa shiir atí.
Winia uwemtikrin Yus asa uunt awajsamu atí.
47 Winia yapajmiátrinkia Yúsaiti.
Tura Ame wáinkiarta tusa apujturui.*
48 Tura winia nemasrui̱ya̱ aṉkant awajtawai.
Tura ayamprutak yajauch shuar ainia nuyá̱ naṉkaamas páantin awajtúsume.
Kame Yusru tí warik kajen ainia nuya̱sha Amek aṉkant awajtúsuitme.
49 Maa Uunt Yusá uunt nuṉka mátsatkana nui̱sha shiir awajsattajme.
Túran ame náarmin pachisan kantaman shiir awajsattajme.*
50 Kame Uunt Yuska ni úunt akupniuri̱n nemasri̱ya̱ nupetmaku ajastinian súsaiti.
Tura ni anaikiamuri̱ Tawitniasha* tura ni shuari̱ncha tuke waitnentawai.