Yus Kanta
Aents anaṉkamu yáiṉtin
Tawit kantamámu
55 Winia Yusá, wi seajme nu anturtukta.
Wi untsúajmena nuya̱ṉka anturtutsuk u̱mprutkaip.
2 55:2-3 Antukam ái̱rkata.
Winia nemasru chichame̱ja̱i̱ wáitiajai
tura Yusan enentáimtichu wáitkiarainia nuja̱i̱ kúntuts nekapeajai.
Warí, yajauchiniam makurainiawai
túrawar suir iirainia ásar nakitruiniawai.
4 Winia enentái̱rka sapijmiak kurawai,
sapijmiakun jakamnia enentáimjiai.
5 Sapijmiaktin amuta asamtai
ashamakun núna naṉkaamas kura̱a̱jai.
6 Nuna túmakun wi chichaakun “Nanamtin awajtusa̱a̱ya nanakan wi ayampratniun wáinkiaj.
7 Túran yajá pisaran atsunum pujusa̱a̱j. (Séraj)
8 Itiursanak wáurtusa e̱a̱kan ú̱mkatniun
tí kakaram nasenmaya̱ pisara̱a̱j” tímiajai.
9 Maa Uunt Yusá, ni chichame̱sha pachimprukaram emestukarta.
Warí péprunam ti yajauch awajkartuinian tura suírintniun wáinkiarjai.
10 Tsawai̱sha tura káshisha pepru wenuke̱n tentá yujainiawai
túmainiak nú peprunam yajauchin túrin tura itiurchat najanin áiniawai.
11 Niṉkia emeskartin írunui núnisaṉ aentsun wáitkiainia nusha
tura anaṉkartinkia pepru á̱a̱ri̱nia̱ṉka kanainiatsui.
12 Winia wáitkiarsama nu nemasruitkiuiṉkia katsuntra̱a̱jai
tura winia nakitrasha kajertukaruitkiuiṉkia níiya̱ṉka úmka̱a̱jai.
13 Tura amesha wiji̱a̱i̱ métekeyame.
Winia tsaniakmar tí peṉker amikruyame.
14 Kame iikia chíkich aents nékachma tí peṉker métek chichachukiaji
tura Yusa Je̱e̱ncha untsurí aentsja̱i̱ shiir enentáimtunaisar wekaichukiaji.
15 Jatai̱ aneachma achikti
tura jaka matsamtai̱niam iwiaakunak akaki̱ aju̱a̱ti.
Warí ni pujuinia nui̱sha ti yajauch túrutai̱ji̱a̱i̱ piákuiti.
16 Antsu wikia Yusan untsuktatjai
túram Uunt Yus wíniaka uwemtikrurtatui.
17 Kí̱arai̱sha, káshiksha tutupnisha Yusan sean untsuktatjai
túram winia chichamprun Ni anturtuktatui.
18 Winia nemasrusha untsurí ai̱ṉ Yus uwemtikrurtatui
tura mesetnumia̱sha aṉkant awajtúsartatui.
19 Tí yaunchu pujuya nú Yus nemasrun anturkattawai
tura ukunmaṉka imianchach awajsártatui.
Warí ni túrutairi̱n yapaji̱átniun nékainiatsui
ántsaṉ Yúsnasha ashamainiatsui. (Séraj)
20 Antsu ni nekas amikrí̱ncha jatenawai.
Túrawar chichaman najanawarmia nunasha uminiatsui.
21 Ni chichame̱ṉka machaja̱i̱ naṉkaamas ti miniarchiti
túrasha ni enentái̱nkia maṉkartuatniun enentáimiui.
Ni chichame̱ṉka asuitiji̱a̱i̱ naṉkaamas miniarach awajui
túmaitiat puyá̱ éreka núnisaiti.
22 Ame itiurchatrumsha tura itit nekapeamurmesha Uunt Yusai̱ íktumasam iniaisata.
Túrawakminkia Ni péṉker waitmaktatui.
Shuar péṉker enentáimkia núnaka tuke iniar pujusti tusa peṉké iniaisashtatui.*
23 Tura Yusá tí yajauch ainia nuka wa̱a̱ mesertin tá̱i̱miunam akaki̱ aju̱a̱m emesrartatme.
Maṉkartin ainia nu tura anaṉkartin ainia nusha ni tsawantri̱nkia ajapénkisha ejechartatui
antsu wikia Ámin tuke enentáimtustatjame.