Yus Kanta
Ejiptunmaya̱ jiinkimiu enentáimtamu
Asap kantamámu
77 Wikia tí kuntuts enentáimpran Yusan seamjai.
Tura Yus seam anturtuktatui tu enentáimpramjai.
2 Núnisnak kúntuts pujaknasha Yusan untsukmajai
tura káshikia Yusan uwejrun takurtanka ayamchamiajai,
túran winia atsaṉturtaj tuíniakuisha nakitmiajai.
3 Maa, wikia Yúsnan enentáimtusan utjai,
tura winia wakantruka kakarmachu nekapea nuní̱ enentáimjiai. (Séraj)
4 Winia jí̱ruka epettrukmame,
túrutawakmin kúntuts enentáimpramjai, túrunan chichakchamnia nekapeajai.
5 Tura yaunchu péṉker pujutai̱ naṉkaamasu ainia nu,
tura yaunchu uwí péṉker matsamtai̱ naṉkaamasu ainia nunasha yamái pujajnia ju̱ja̱i̱ apatkan enentáimtajai.
6 Tura núnisnak yaunchu kantamniuyajna nuna
winia enentái̱rji̱a̱i̱ enentáimtajai,
tura winia wakaniur nuna paant awajturui.
7 ¿Kame Uunt Yuska iinkia peṉké nakitrámprash initiamsaitiaj?
¿Tura atak awaiṉkinkia tsaṉkurtámprachminiashitiaj?
8 ¿Kame ni waitnenkartutairi̱nkia áiṉkiash náṉkatka?
¿Kame niji̱a̱i̱ chícham najanatniuka yamaisha tura ukunma ímianai túratniuka peṉkeash amuukait?
9 Maa, Yusan waitnenkartutairi̱nkia ni kajetáiri̱ntsuk akirtuitia.
Tura ni waitnenkartiniu núnaka kajinmátkiniashit. (Séraj)
10 Kame winia enentáimmiarka ju̱i̱ti winia kúntutsrunka
Ashí Naṉkamantu pujuwa nú yapajtiúramniaiti tajai.
11 Wikia Uunt Yus najankamia nuna enentáimtajai,
aents túrachmin túramu naṉkaamasua nuna enentáimtajai.
12 Ashí ni najankarma ainia nui̱ enentáimtustatjai
túran ni túramuri̱n pachisan chichastatjai.
13 Maa Yusá, kame Ame jintimkia tunaarincha wekatai̱ jíntiaiti.
¿Ii Yúsri̱ji̱a̱i̱ naṉkaamas warí yusak Ámiji̱a̱i̱ méteksha aa?
14 Ameketme Uunt Yus aentsti túrachmin túriniaitmena nuka.
Núnismek Ame kakarmaram shuar pujuinia nui̱ nekamtikiainiame.
15 Jakup tura Jusé uchirí̱
núnismek ame shuarumka ame kakarmarmiji̱a̱i̱ júsarmiame. (Séraj)
16 Maa Yusá, nayants waitmakarmai tura waitmakar ashampramkarmai.
Tura núnisaṉ uunt wa̱a̱ armia nusha muchitrarmiayi.
17 Yuraṉmisha kakirka tee ajas yúmisha ti yutak
peemsha chárpish ajamai.
Nayaimpinmasha chárpikia pujut pujut ajak
peemka newarat newarat ajak nuṉká kakemai.
18 Ame ipiamtaja̱i̱ métek chichakmiam nuka uunt naseya nui̱ ámiayi.
Tura peemsha newaat ajak nuṉká tsáapin awajmiayi
tura núṉkaka muchitrarmai tura peantrarmai.
19 Kame Ame jintimkia nayantsanmaṉ katiuyayi.
Ame jintimkia entsanmaṉkete.
Tura Ame najamkamurmin wáinkiachmauyi.
20 Muisaisai̱ni̱ tura Araunai̱ni̱
ame shuarumka murik yaruaktinia áitkiasam ji̱i̱ram yaruakmiame.