1 Samuir

Samuir akiiniamu

1 Kame áishmaṉ Eprain weanmaya̱ Jirujáma uchirí̱ Irkana naintiar naintiar Eprain nuṉkanam Ramatáim Sujimnium pujumiayi. Ni apachrí̱ṉkia Suja uchirí̱ Tuju uchirí̱ Iríuyayi. 2 Irkanaka jímiaran apatkauyayi. Emka nuwe̱ṉka Ánauyayi nuyá̱ chíkich nuwe̱ṉka Pininia náartiniuyayi. Pininiaka uchin takuyayi tura Ánaka takuchuyayi. 3 Tura Irkanasha ni pujamunmaya̱ Siru péprunam ashí uwitin waketniuyayi Ashí Akupin Uunt Yusan taṉkun maa aestua shiir enentáimtustaj tusa. Nui̱ Yúsnan pujurin Irí uchirí̱ jímiar pujuarmiayi ni náari̱sha Upni tura Pinias. Nisha Uunt Yúsnan pujurin ármiayi.

4 Tura taṉku maar Yus enentáimtakur áestuatin tsawant jearmiaka Irkanaka nuya̱nak akanák ni nua̱ri̱ Pininiancha tura uchirí̱ncha núnisaṉ nawantri̱ncha métekrak suármiayi. 5 Túrasha Uunt Yus Anan uchi takustinian tsaṉkatkachuyayi. Tuma áunak Irkana ti anea asa péṉkeri̱n iis núkap súyayi. 6 Tura Uunt Yus Ananka kaa awajsa asamtai Pininia tuke itit awajsam pujurtai asa Ánaka itiurchat kúntuts enentáimias pujuyayi.

7 Kame tuke uwitin Uunt Yusa Je̱e̱n wénak Pininiaka Ananka tuke yajauch chicharas wishikniuyayi. Túram útuk yurumchauyayi. 8 Túmakui̱ ni aishri̱ Irkana chicharuk “Anáa, ¿urukamtai kúntuts nekapeakum yurumtsuksha áyasha útam. Kame wikia tias uchiji̱a̱i̱ naṉkaamaska péṉkerchakaitiaj?” tímiayi.

9 Tura Yúsnan pujurin Irikia Uunt Yusa Je̱e̱n wá̱i̱ti̱a̱i̱ri̱ pauri̱n ayaam kutaṉkri̱n pujái̱ nui̱ Siru nuṉkanam Anasha yurumá umar umik wajakmiayi. 10 Tura Ánaka tí kuntuts enentáimias útkamaikia Uunt Yusan seamiayi. 11 Tura aya Yúsnak atí tusa “Ashí Akupin Uunt Yusá, Ame takartámniu wáitiamuri̱ iisam kajinmátrutsuk waitnentruram uchi áishmaṉ surusákminkia ju̱ nuṉkanam pujuttana nui̱ṉkia Ámin takartámin atí tura Ame íktusma asa intiashí̱sha tsupirchatai atí tusan amastatjai” tu Uunt Yusan seamiayi.

12 Kame Ánaka Uunt Yusan seak núkap arakui̱ Irikia wene̱n iiru ajamiayi. 13 Ánaka ní enentái̱ni̱ṉ seá asa aya wéne̱nak umuchmiayi. Tuma asa chichame̱nka antuichamiayi. Túmakui̱ Irikia nampekuiti tu enentáimtusmiayi. 14 Tura chicharuk “Nampetcha ¿urutái iniaisattam? Yamaikia winiu iniaisata” tímiayi. 15 Túrasha Ana aya̱k “Núchaiti uuntá. Winiuncha tura awartiuncha nampekchaitjiai antsu wikia wait ajá pujú nuwa̱itjiai. Tuma asan Uunt Yusan tí kuntuts enentáiji̱a̱i̱ seajai. 16 Amesha Yusan enentáimtichu nuwa̱ núnin enentáimtursaip. Antsu tí waitiakun kúntuts enentáimsan yamaiya̱ ju̱i̱sha nuna seajai” tímiayi. 17 Tutai Irisha “Yamaikia péṉker enentáimsam wetá. Israera Yusri̱ ame seamna nuna amasti” tímiayi. 18 Tura Irin chicharuk “Ame takartámniuka ámiji̱a̱i̱sha péṉker iisma atí” ti ikiukmiayi. Nuya̱ṉka waketki̱ yurumá atakka kúntutska pujuschamiayi. 19 Nuyá̱ kashin káshik Uunt Yusan shiir awajsar ni je̱e̱n Ramanam waketkiarmiayi. Tura Irkana ni nuwe̱ja̱i̱ tsaniṉmatai Uunt Yus Anan enentáimturmiayi. 20 Nuya̱ṉka Anasha ajapruk tsawantri̱ jeamtai uchin áishmaṉkan takusmiayi. Nu uchincha Yusan seachmakaj tusa Samuir anaikiamiayi.

21 Nu túruna ai̱ nú aishmaṉ Irkanaka uwí jeakui tuke túrin asa núwe̱ntuk tura uchirtiuk Uunt Yusna nuna susa nuyá̱ taṉkun maa aestua shiir awajás umiktajtsa Sírunam wémiayi. 22 Tura Ánaka pujak áishri̱n chicharuk “Uchi tsuramam pujuttajai. Yus íimmianum tuke pujusat tusan ejé ikiuwákun winimíj” tímiayi. 23 Tutai Irkanasha ni nuwe̱n aya̱k “Uchi tsuramam pujá asam ame wakeramna nuja̱i̱ métek túrata. Áyatik Uunt Yus ame seamna nuna umirtamkati” tímiayi. Tura Ana tu tiniu asa uchi úuntmar tsuramam pujumiayi. 24 Nuyá̱ uchi tsurakmatai úchichiniak Sírunam Uunt Yusa Je̱e̱n apujuttsa wéak turu menaintiú uwí takakun núnisaṉ paintitús ritru jeá trikiu nekeṉman nuyá̱ uwa yumiri̱n muítsnum jukimiayi. 25 Tura waakan máwar nuyá̱ uchin Irí pujamunam itiarmiayi. 26 Tura Anasha arantúk chicharuk “Winia uuntru, imiá nekas tájame. Uuntru, yaunchu amesha ju̱i̱ pujamni̱ṉ wajasan Uunt Yusan seamiaj nú nuwa̱ketjai. 27 Uchin surusat tusan Uunt Yusan seamiaj nui̱ ju̱ uchin surusuiti. 28 Tuma asamtai wikia Uunt Yusan ju̱ uchin súajai tura iwiaaku pujuttana nui̱ṉkia Yusna atí tusa íktusma átatui” tímiayi. Nuna tusa Uunt Yusan shiir awajsar tikishmátrarmiayi.