Yus Kanta
Yuska ii ejamtainti.
Jú̱ kantan Tawit Jetutúnan áatraiti.
62 Winia wakantruka aya Yusai̱ni̱ṉki ayampratniunka takakui.
Winia uwempratniurka Niiya̱ winiawai.
2 Warí aya Niṉki winia uunt muchiṉkruiti tura uwemtikriniaiti.
Niṉkia winia ejamtairuiti nuya̱ṉka ti núkap umuchnakchattajai.
3 ¿Urutmá tsawanta jatetkírum wétatrum?
Emestuktaj tusarum wakerarme, jatettsuk initiustarum.
Warí, tanish iniantaj tusa tsuntsumá ana áitkiararme. Tura wénuk mamur sa̱a̱naktiaj tana nútikrarme.
4 Ju̱ aents emesturtaj tusa wakerutainiawai túruta akupkur pujutái̱nmaya̱ ajapruattsa wakerutainiawai.
Waitruawar warainiawai. Iruntramunmaṉka ni wene̱ja̱i̱ṉkia péṉker chichartuiniawai túmaitiat ni enentái̱ji̱a̱i̱ṉkia yajauchiji̱a̱i̱ yumiṉkruiniawai. (Séraj)
5 Aya Yusai̱ni̱ṉki wikia áyamjai,
wi nákasar pujurmaka aya Níṉkiti.
6 Aya Níṉkiti winia muchiṉkruka tura winia uwemtikrinkia.
Ni winia ejamtai̱r asamtai peṉké umuchnakchattajai.
7 Yúsaiti winia uwemtikrinkia tura wi páantin ajastinkia Yusai̱ya̱ winiawai.
Yuska uunt muchiṉkia núnis asa winia ikiakátui tuma asa winia u̱mtairuiti.
8 Maa, aentstiram ashí tsawant Ni enentáimtusrum nákastarum
túrarum atumí itiurchatri̱ ujaktarum.
Warí Yuska ii u̱mtairi̱nti. (Séraj)
9 Ti nekas aentska peṉké ántar áiniawai.
Áishmaṉka peṉkeri̱ ainia nu wait áiniawai.
Kijin nekapmatai̱niam irurar nekapmamka máyai̱ya̱ núnis wampuch ántar áiniawai.
10 Ti yajauch awajkartustin enentáimtusairap.
Núnisaṉ ti yajauch awajkar kakarmaja̱i̱ warirí̱ṉsha atankin enentáimtusairap.
Tura naṉkamantu tímianu nekaprairap.
Warí kuítrinniatniuitkiuish aya nuke enentáimtusairap.
11 Yuska chikichkí chichakuiti núnaka jimiará antukuitjiai.
Warí kakaram ajastinkia Yusai̱ya̱inti.
12 Núnisaṉ Uuntá, waitnenkartutai̱ṉkia aya Amiini̱ṉki awai.
Tura aentska ni takatrí̱ji̱a̱i̱ métek aṉkant aṉkant akikiártatme.