Isekiár
1 1:1-3 Isekiárka chíkich Jutanmaya̱ shuarja̱i̱ achikiar yaruakma nuja̱i̱ irunar matsamiayi. Tura tsawant seṉku ámanum tura nántuka kuatru taka eketmanum tura uwisha traintia ai̱ tura úunt akupin Juakin achikiar yajá nuṉkanam jukimiu seṉku uwí naṉkaamasu ai̱ Yúsnan pujurniun Pusi uchirí̱ Isekiáran Kartía nuṉkanam tura Képar entsa ayamach pujan Uunt Yusa chichame̱ tarimiayi. Kame Uunt Yus nui̱ Ni uwejé̱ awantrusu asamtai nayaim uranmianum Yusan ímiaja̱i̱k wainkiamjai.
Yusa winchari̱ ímiaja̱i̱k wainma
4 Tura íimkiamán araki̱a̱ ti kakaram násenki̱ winian wainkiamjai. Tura uunt yuraṉminmaya̱ ji keamunam peem ajaan wainkiamjai. Nuyá̱ ni yantamén jíitsumir amai. Tura ji keamunmasha ajapén jiru kapantakua núnin wínchar ajamai. 5 Tura ji keamunam ajapén kuatru aentsua aya̱shi̱ya̱ nuní̱ iira wajarmai. 6 1:6-7 Nuka aṉkant aṉkant kuatru yápintin tura kuatru nanaptin armai. Ni makui̱sha aya nakak armai tura nawe̱sha waaka uchichi nawe̱ya núnin armai tura jiru yaṉkutaku wincharpáta núnis kearmai. 8 1:8-9 Nanape̱n nuṉkaani̱ kuatru paen aentsu uwejé̱ya̱ núninian takaku armai. Kuatru arma nuka yápintin tura nanaptin armai. Tura nanape̱nka nuiṉ áchitra armai. Núnisaṉ nanamainiaksha antiniaitsuk aṉkant aṉkant eem wéarmai.
10 Nu aents kuatru yápintin arma nuka ju̱ní̱ iira armai. Tura eem íimkiaka shuara yapi̱ya nuní̱ iira, tura untsurnumaani̱ṉkia úunt ya̱wa̱ nuní̱ iira, menanmaani̱ṉkia waaka áishmaṉka nuní̱ iira, tura úkuka churuwia nuní̱ iirasha armai. 11 Ni yapi̱ṉkia nuní̱ iirka armai. Jimiará nanape̱ncha yakini̱ ayapá̱rar chikicha nanape̱ja̱i̱ antiniainiak iṉkiunais armai. Nuyá̱ chíkich jimiará nanape̱ja̱i̱ṉkia aya̱shí̱n nukuaku armai. 12 Tura wénaksha naka íimsar ni wakaní̱ wétinian enentáimia nuní̱ ayantátsuk nú yapiji̱a̱i̱ṉ wéarmai.
13 Kame aentsua nuní̱ iira wajarma nui̱ jinia kaí̱ri̱ kapa̱a̱k ji keá núnin we tura taa wémiayi. Tura shirikip keemia nuka jíitsumir wínchar ajarma nuyá̱ peemsha ajamai. 14 Tura aentsua nuní̱ iira arma nusha peemja̱i̱ métek ti warik wear ataksha mai̱ waket ajarmai.
15 Aentsua nuní̱ iira arma nuna ii wajasan nui̱ ayamach kuatru yantamen tenté ayantáin nuṉká tepenan wainkiamjai.* 16 Tenté ayantáinia íirkamuri̱sha tura najanamuri̱sha krisuritiu kaya núnin wínchar ajarmai. Tura kuatru tenté ayantáin arma nuna íirkamuri̱sha nuyá̱ najanamuri̱sha métek armai. Tu najanamu ásar tenté ayantáinium initiaani̱sha núniniak eṉketrar najanamua núniniauyi. 17 Kame wénaksha kuatru yantame̱n ju̱ní̱ we atuní̱ we ajainiayataṉ wénaka ayantátsuk nákak wéarmai. 18 Kame tenté init eṉketámu ti uunt ásar tsuumai̱ armai tuma ásar kuatru tenteri̱nkia ji̱ téntakma armai. 19 Núnisaraṉ aentsua nuní̱ iira wénakuiṉkia nu tentesha núnisaṉ wéarmai. Aentsua nuní̱ iira nuṉkaya̱ takunainiakuiṉkia nu tentesha núnisaṉ takuniarmai. 20 Itiur wétinnia ni wakaní̱ enentáimtikiarmia nuní̱ we wéarmiayi. Núnisaṉ itiur wétinnia ni wakaní̱ enentáimtikiarmia nuní̱ wénakui tentesha núni̱ṉ ashiniarmiayi. Warí, aentsua nuní̱ iira armia nuna wakaní̱ṉkia nu tenté ayantáinnium pujumiayi. 21 Núnisaṉ ni wénakuiṉkia nisha wéarmai. Ni wajainiakuiṉkia nisha wajarmai tura nuṉkaya̱ takunkuiṉkia niji̱a̱i̱ métek nisha takun wéarmai. Warí, aentsua nuní̱ iira wakaní̱ nú tentenum pujurma asa túmarmai.
22 Kame aentsua nuní̱ iira wajarma nuna muuke̱n yakiní̱ṉkia áṉkantniuk ámanum saar jíitsumir ti shiira nu amai. 23 Tura áṉkantniuk ama nuna wakenmari̱nkia aentsua nuní̱ iira yapa̱a̱r chikicha nanape̱ja̱i̱ iṉkiumtiknaisar nuyá̱ chíkich jimiará nanape̱ja̱i̱ṉkia ni aya̱shi̱n nukuaku armai. 24 Nanamainiakuiṉkia ni nanape̱nka entsa ti nujaṉkrua téter ajana tura Ashí Tujintkiachu Yus chichana tura untsurí aents tétete ajainia núninian núnisaṉ untsurí suntar charaatum ajainia núninian antukmajai. Tura nanaaktinian iniaisarka nanape̱nka wijiuimtikiarmai.
25 Tura ni muuke̱n yakini̱ nayaimpiniam téter ajamai. Tura nanaaktinian iniaisarka ni nanape̱nka wijiuimtikiarmai. 26 Nuya̱ṉka ni muuke̱n yakini̱ nayaimpinmaṉka akupkur pujutai̱ shíirmach kaya sapiruja̱i̱ najanamu núninian wainkiamjai. Tura akupkur pujutái̱nmaṉka aentsua núnin pujan wáinmiajai. 27 Nuya̱ṉka emenmamkari̱n yakiní̱ṉkia ji keá núnin téntakma asa jírua núnin jíitsumir wínchar ajamai. Tura nuṉkaani̱ṉkia ji keá núnin téntakma asa jíitsumir 28 yumi yútakui tuntíak wajáa ániun wáinmiajai. Yusa winchari̱ nuní̱ íiran wainkian tikishmaran tsuntsuman nijia̱i̱ruja̱i̱ nuṉká antiṉkian piniakum tepesan aentsu chichame̱n antukmajai.