Yus Kanta

mash tsaṉkurnarainia nui̱ warasminiaiti.

 2 Shuar anaṉkartichua nu

Uunt Yussha makuchmin asa warasminiaiti.*

 3 Tsawant takamtsuk winia tunaarun etsertumatsuk pujumiaj nuiṉkia

uttsa pujakun ukunchtiuk jaa ajasmajai.

 4 Warí, tsawai̱sha tura káshisha ame asuttiakmin kuku̱j esatái̱ ja̱ja̱tea áitkiarawakmin peṉké jata nekapmiajai. (Séraj)

 5 Tura nuiṉkia winia tunaarun

nuyá̱ yajauch túramun ishichkisha ú̱rtsuk ujakmajme.

Nekas tunaarun Uunt Yusan ujaktájai tu enentáimsan

ujakmajmena nui̱ winia ashí tunaar tsaṉkurturmame. (Séraj)

 6 Tuma asamtai ámin enentáimturmainia nuka ti itiurchatnum pujuiniaksha tsaṉkurturai tusa seatmartatui.

Tura nu itiurchatcha entsa ama̱a̱rak metsá ímiatmaksha warí itiurkashtatui.

 7 Kame Ámetme winia ejamtair. Tuma asam tí waitias kúntuts pujusa̱i̱ṉ tusam waitkiattame.

Tura aṉkant awajtúsam shiir waratáirmiji̱a̱i̱ tuke waramtikrustatme. (Séraj)

 8 Péṉker pujustinian enentáimtikrattajme.

Tura tuke íisnak péṉker wekasatniun jintintiáttajme.

 9 Amesha yajasma ánin ántichu aip.

Kame kawaisha nuíchuka umpurusha nawamkatai tusar kuntujnum jiṉkiar wenunam jiru ápchataiṉkiait.

Warí nu túrachmaka áminkia weantúrmakchattawai.

Ámeka tíiniuka aip.

10 Warí Yusan enentáimtichu ainia nuka ti wáitsartatui.

Antsu Uunt Yusai̱ enentáimias pujuinia núnaka waitnentak péṉker wainiainiawai.

11 Naka enentáimin asarum péṉker túrintirmeka

atumí Uunt Yusri̱ wararkuram shiir enentáimtusrum kakaram kantampruátarum.