Juup

Yus Júupan wáitsatniuja̱i̱ nekapsama

1 Wats Us nuṉkanam áishmaṉ Juup náartin pujuyayi. Tura nisha péṉker enentáimin péṉkera túrin asa Yusan ashamak ímiatrusaṉ umíak ashí yajauchinmaya̱ kanakniuyayi. 2 Nisha siati áishmaṉkan nuyá̱ menaintiú nuwa̱n yajutmakuyayi. 3 Tura ni nuṉke̱e̱nka 7.000 murikiun núnisaṉ 3.000 kamiyun tura jimiará waaka apateaku nuṉka pukutaiṉkia 500 nuyá̱ 500 umpuru takakuyayi. Núnisaṉ ni takarniúri̱sha ti untsurí ármiayi. Tuma asa etsa̱ jintiainmaani̱ matsamármia núja̱i̱ṉkia nú aishmaṉka páantin tí kuitrinniuyayi. 4 Tura Juupa uchirí̱sha chikichkimsar ni je̱e̱ni̱ṉ ni tsawantri̱n nampermainiak yurumár umarmi tusar menaintiú umai̱n ipiá ármiayi. 5 Nuyá̱ Juup káshik tuke túrin asa ni uchirí̱ namperan najantsua umikiarmatai Yusan yajauch enentáimtuiniak yajauchin túrachariash tu enentáimias mash untsukar ni tunaarí̱ tsaṉkurnararat tusa taṉkun maa áestak uchirí̱n chikichkimias Yusan seatniuyayi.

6 Kame chíkich tsawantin Yusa suntari̱ Uunt Yus pujamunam káunkarmiayi. Tura nui̱ Satanássha páchitkia támiayi. 7 Nui̱ Uunt Yus Satanásan anintrak “¿Tuyá̱ winiam?” tutai Satanás Uunt Yusan aya̱k “Nuṉkan wekatusan téntakan iyasuan winiajai” tímiayi. 8 Nuna takui̱ Uunt Yus Satanásan chicharuk “¿Winia takartin Juup wáinkiachumek? Nuṉkaṉka chíkich áishmaṉ niji̱a̱i̱ métek péṉker enentáimin péṉkera túrin Yusan ashamak ímiatrusaṉ umíak yajauchinmaya̱ kanakniuka peṉké atsawai” tímiayi. 9 Uunt Yus takui̱ Satanás aya̱k “¿Antsu Juup peṉké antraṉ Uunt Yusan ímiatrus umira? 10 ¿Yaaksha itiurchat awajsara̱i̱ṉ tusam nisha ni shuari̱sha tura takatrí̱sha ashí ni warirí̱sha Ame péṉker wáitiatsmek? Nuyá̱ ni takatrí̱sha Ame ti shiir awajtamu asa ni nuṉke̱n írunna nu tí nukap pampaṉkaiti. 11 Wats ashí takakna nu emestukam nekapsata túramka Ámin peṉké yajauch chichartamkattawai” tímiayi. 12 Tutai Uunt Yus Satanásan chicharuk “Wats nekapsata. Ashí niniu ainia nu ame iistá antsu ni aya̱shí̱ṉkia emesturaip.” Tutai Satanás Yusai̱ya̱ jiinkí̱ wémiayi.

13 Chíkich tsawant Juupa uchirí̱ tura nawantri̱ ni yachi̱ iwiá̱i̱ je̱e̱n namperan pujurainiai̱ 14 áishmaṉ Júupai̱n taa chichaman étseruk “Umpuruka sá̱a̱knium tíjiu̱ch matsasar waakaja̱i̱ takakmakur pujurin 15 aya aneachma Sapíu aents taar ame takartámniun puya̱ja̱i̱ mash máwar waakancha ashí kasamak yaruakarai. Túrawarmatai aya wiki ata̱a̱makin etserkattsan winiajai” tímiayi. 16 Nuna étserak umíatsa̱i̱ṉ chíkich takarniúri̱ taa chichaak “Yusa jiri̱ nayaimpinmaya̱ iniar murikrumin tura wáinniuncha ashí áesak amukarai antsu aya wíchik juákan ujaktájam tusan winijiai” tímiayi. 17 Tura nusha chicháa wajai̱ṉ chikicha taa chicharuk “Kartíu aents menaint^iu iruntraru ámin takartámniun puya̱ja̱i̱ máwar kamiyurmincha ashí jurutrámkiarai. Túrawarmatai wiki uwempran ámin ujaktájam tusan winiajai” tímiayi. 18 Nusha chichaman étserak umíatsa̱i̱ṉ chíkich iniatairi̱ tarí “Uchirmi iwia̱i̱ri̱ je̱e̱n uchiram ni umai̱ji̱a̱i̱ ashí iruntrar yurumuk tura ú̱mak pujuinian 19 atsú nuṉkanmaani̱ya̱ nase ti kakaram iniantar je̱a̱ pukuwak ame uchirminkia mash amukái. Túrunamtai aya wiki uwempran chichaman ujaijme” tímiayi. 20 Tura Juupsha nu ashí ujakam tí kuntuts jakamnia nekapeak wajaataki̱ pushiri̱n achik ja̱a̱k piniu awaamar nuṉká tikishmar Yusan shiir awajuk

tímiayi. 22 Kame ashí nu túrutamsha Juupka yajauchin peṉké túrachmiayi. Núnisaṉ Yus yajauch asa jú̱tikruayi tíchamiayi.