Yus Kanta

 2 Antsu wíji̱a̱i̱ṉkia nawer atajkinninkramai.

Wi wekaaj tukamán atajkininkramjai.

 3 Warí naṉkamantu enentáimtuma ainia nuna iisan

tura Yusan enentáimtichu ainia nu kuítrintin ajakí̱ wénakui suir enentáimtusarmajai.

 4 Kame najaimiar jákatniun enentáimiainiatsui

antsu ni aya̱shi̱nkia kakaram péṉker áiniawai.

 5 Aents kúntuts pujak wáittiain wáitiainiatsui.

Chíkich aents urukainia núnis wáitsar pujuiniatsui.

 6 Tura waantu enentáimtumatairi̱ṉkia ni nuṉkutairi̱nti

tura ní yajauch awajkartutairi̱n pushí entsarua núnis nukuaku áiniawai.

 7 Tí nuerar ni ji̱sha pusapsatin ajasárai.

Tura ni enentái̱ji̱a̱i̱ ashí wainiainia núna naṉkaamas takustinian wakeruiniawai.

 8 Chíkich ainia nunasha wishikiainiak tí waantu enentáimtumasar chichainiak

yajauch awajsatniun chichaman juruiniawai.

 9 Nayaimpiniam írunna nuna ni wene̱ja̱i̱ pachisar

núnisaṉ ashí nuṉkanam írunna nunasha ni iniai̱ji̱a̱i̱ jiá pujuráiniawai.

10 Tuma asamtai Ni shuari̱ ainia nusha nu nuṉkanam wénawai

tura entsaja̱i̱ métek ni chichame̱nka núkap úmuiniawai.

11 Tura chichainiak “¿Yussha itiur nekaatiṉ

tura Naṉkamantu Yuska nekatairi̱ takakuak?” tu chichainiawai.

12 Maa, Yusan umircha ainia nuka

tuke itit awajsachma pujuinia ásar ni kuítri̱n wárik ikiauntumainiawai.

13 Ti nekas peṉké antran winia enentái̱rnaka yajauch enentáimcha awajsaitjiai

tura winia uwejrun nijiaran maṉkartichu ajasuitjiai.

14 Túrasha ashí tsawant káshik naṉkamar asutiámuitjiai.

15 Kame wi chichaakun ni chichainia núnisnak chichastájai

tíniuitkiunka nekaata ame uchirmin anaṉkawaraintjiai.

16 Ju̱na nekaataj tusan enentáimsataj tukamán tí itiurchatauyi.

17 Yus Shiir Awajtai̱ Je̱e̱n waya̱maj

nui̱ ukunam túrunawartatna nuna nekaamjai.

18 Ti nekas tameṉmánum iniarminium apujsarume

túram emeskamunam ajapawarume.

19 ¡Aya aneachmanum jú̱nik juákaru áiniawai!

Tura tí sapijmiakaru ajasár amukaru armai.

20 Mesekramu tepá shintiá núnisam Uuntá,

nantaktiatmena nuiṉkia nu shuar péṉker matsatáiniakuisha iisam peṉké antraiti tu enentáimturtatme.

21 Ti nekas winia wakantrui̱ tí kuntuts enentáimkiun wáitsan pujumjai

tura winia enentái̱rui̱ ji̱i̱riarmai.

22 Wikia enentáimchauyajai tuma asan nekaatniun jeachuyajai.

Warí Ame íimmianumka wikia yajasma núniniauyajai.

23 Túmaitiatnak tuke Ámiji̱a̱i̱ wikia pujumjai

tura winia untsuurui̱ni̱ achirkámame.

24 Chichartasúam jurukmiame

túram ukunam ame tsáapnintrumi̱i̱n péṉker apujtustatme.

25 Nayaimpinmaṉka aya Áminiak takakjame.

Núnisaṉ ju̱ nuṉkaya̱nka Amiya̱ṉka chikichnaka peṉké atsumatsjai.

26 Winia aya̱shruka tura winia enentái̱rsha jakamnia nekapenawai.

Antsu winia uunt kayarua núniska tura winia puukma tuke átinia nuka Yúsaiti.

27 Maa, Amiiya̱ kanainia nuka amuukartatui.

Warí, Ámin ikiurmainia nuka Ame emesrartatme.

28 Antsu wikia Yusai̱ tíjiu̱ch pujakun tí peṉker pujajai.

Tuma asan Ashí Uuntri̱ Uunt Yusai̱ péṉker átinian nákakun

Ame túramunka áujmatjai.