Jirimías

Jerusaréṉ emeskamu

39 Setekías Jutanmaya̱ úunt akupin ajasmaka uwisha nuiwi ámanum tura nántuka tias ámanum Napukutunusúr Papirúnianmaya̱ úunt akupin suntari̱ji̱a̱i̱ Jerusaréṉja̱i̱ mániktaj tusa tarí matsamtúkmiayi. 2 Tura Setekías úunt akupin ajas aunse uwí pujái̱ tura nántuka kuatru ámanum tura nantu nuiwi tsawant ajasu ai̱ pepru tanishri̱n sá̱a̱rkiar chiṉkiawarmiayi. 3 Tura Papirúnianmaya̱ úunt akupniu uuntri̱ armia nu ashí utsantuawarmiayi túrawar waiti ajapéri̱n pujursarmiayi. Nerkarsaresér, Samkarnépu, Rapsaris Sarsekím, Rapmak Nerkarsaresér tura nuyá̱ Papirúnianmaya̱ úunt akupniu uuntri̱ ashí armia nui̱m ármiayi. 4 Setekías Jutanmaya̱ úunt akupniu wáinkiar áishmaṉ mesetnum mánin armia nuka péprunmaya̱ pisarar kashi jíintrarmiayi úunt akupniu ajari̱ jintia wéamunmaani̱ jimiará tanish waiti Arapá jintianmaani̱ wéarmiayi. 5 Tura Kartíu suntari̱ pataatukiar Jirikiú pakarin Setekíasan amayá̱ṉkarmiayi tura Amata nuṉke̱n Rípranam júkiarmiayi. Nui̱ Napukutunusúr Papirúnianmaya̱ úunt akupin achik eṉkea apujsamiayi. 6 Nuya̱ṉka Rípranam Setekíasa uchirí̱n nisha íimmianum Papirúnianmaya̱ úunt akupin sue̱n tsupirkarmiayi. Tura Papirúnianmaya̱ úunt akupniuka ashí shuar Jutanmaya̱ náakam armia nunasha nútiksaraṉ sue̱n tsupimtikiarmiayi. 7 Nuyá̱ Setekíasnaka ji̱n ukuitkiarmiayi. Túrawar yaṉkú jiruja̱i̱ jiṉkiá Papirúnianam júkiarmiayi. 8 Tura Kartíu aents armia nu úunt akupniu je̱e̱n ekemátkarmiayi tura péprunam je̱a̱ iruniarmia núnaka tura núnisaṉ Jerusaréṉka tanishri̱ncha sá̱a̱kiarmiayi. 9 Tura aents juákaru péprunam matsamia nunasha núnisaṉ aents pisakár nin naṉkaamararmia nunasha jintiá iin armia nuna kapitiántri̱ Napusaratánka achirar Papirúnianam yaruakarmiayi. Nuna tura péprunam aents juákarunka achirar Papirúnianam ashí yaruakarmiayi. 10 Túmaitkiusha Napusaratán jintiá iin awajsámuya nuna uuntri̱ aents peṉké kuítrincha armia núnaka tura peṉké takurmakcha armia nunasha Jutanmaṉ ujukarmiayi tura nu tsawantin nuṉkancha tura uwa ajan susamiayi.

Napusaratán Jirimíasan aṉkant awajma

11 Napukutunusúr Papirúnianmaya̱ úunt akupin Napusaratán jintiá iin awajsámuya nu Jirimíasnan chicharuk 12 “Achikta túram péṉker wáinkiata. Yajauch peṉké awajsaip antsu nuka túrutsuk ni túramtiatna núnismek túrata” tímiayi. 13 Nuya̱ṉka jintiá iinia kapitiántri̱ Napusaratán tura Rapsaris Napusaspánja̱i̱ núnisaṉ Rapmak Nerkarsaresérja̱i̱ nuyá̱ Papirúnianam chíkich uuntri̱ armia nuja̱i̱ ashí iruntrar akupkarmiayi. 14 Akupénak jintiá iin matsamtai̱ á̱a̱ri̱n Jirimías itiatárum tusa akupkarmiayi. Túrawar itiarmatai Sapana uchirí̱ Ajikiama uchirí̱n Jetaríasan ni je̱e̱ní̱ jukit tusar súsarmiayi. Túruna péprunam pujusmiayi. 15 Jirimíaska sepunam jintiá iin awajsámuya nuna á̱a̱ri̱n pujái̱ Uunt Yusa chichame̱ tarí chicharuk 16 “Wetá túram Itiupíanmaya̱ Ewitmirík chichasta ‘tura Ashí Akupin Uunt Yus Israera Yusri̱ jú̱nis túramui titiá. “Nekaata Winia chichamprun umíajai ju̱ pepru yajauchiji̱a̱i̱ tura nu tsawantini̱ṉ ame pujamunam uminkiattawai. 17 Nu tsawantinkia Wi aṉkant awajsattajme tura ame ashamamna nuna uwejé̱nkia surunkashtatme” tawai Uunt Yus. 18 “Warí ti nekas Wi aṉkant awajsattajme. Tura Winia nekas enentáimtursa asam ame iwiaakmarmeka nupetmakar ata̱i̱miua núnis arutrámtiatui” tawai Uunt Yus’ titiá” tímiayi.