Muisais Ujakma

Muisais Jusuin anaiyamu

31 Tura Muisais ashí Israer shuaran irur 2 chicharuk “Yamaikia wisha siantu painti uwí takakjai. Tuma asan jú̱ shuaran akupeakun ju̱ wena ajachminiaitjiai. Núnisaṉ Uunt Yussha chichartak ‘Jurtan entsa katitkishtatme’ turutmiai. 3 Túrasha atumí Úunt Yusri̱ṉkia atumíya̱ eem wéak átum íimmianum nu nuṉkanmaya̱ aentsnaka Niṉki nupetturmaktatrume túramtai átum ji̱i̱rá ishiaktatrume. Tura Uunt Yus timia núnisaṉ Jusuí atumín juramkittiarme. 4 Tura Uunt Yus Sejunan tura Úkan, Amur aentsun úunt akupniuri̱ armia nuna ashí ni aentsri̱n amukar tura nuṉke̱ncha ataṉkiarmia nútiksaṉ nincha túrawartatui. 5 Tura Uunt Yus atumí nemasri̱n tsaṉkatramkattarme. Nuya̱ṉka atumsha wi tímiajrumna tímiatrusrumek nisha túratniuitrume. 6 Tura atumí Úunt Yusri̱ji̱a̱i̱ tuke kakaram ajastarum. Núnisaṉ mániakrum sapijmiakairap. Warí Uunt Yus atumí Yusri̱ atumji̱a̱i̱ pujuttawai. Tura atumniakka peṉké ikiurmakchattarme” tímiayi.

7 Nuya̱ṉka Muisais Jusuin untsuk ashí Israer shuar ántuiniamunam chicharuk “Amesha sapijmiatsuk kakaram ajasta. Warí ame ju̱ aents yaruakam yaunchu Uunt Yus ame úuntrumin nuṉkan nekas amastiniaitjiai timia nui̱ ejewaram núṉkentin awajsartatme. 8 Tura Uunt Yus amiiya̱ eem wea asamtai sapijmiakaip. Niṉkia ámiji̱a̱i̱ pujuttawai. Ayamprutmatsuk aminkikia ikiurmakchattawai. Sapijmiakum kaka̱rchaip.” Muisais Jusuin tu ikiaká̱rmiayi.

9 Tura Yúsnan pujurin Riwí shuar, Yusna Eṉketai̱ juarmia nuna núnisaṉ Israer shuara uuntri̱ armia nunasha ju̱ akupkámu umiktin chichaman Muisais aar súsarmiayi. 10 Tura ju̱ umiktarum tusa chicharainiak “Tuke siati uwí jeamtai tumash asakártin átatna nú uwitin tura Yusa namperi̱ aak áakmaktinia nu tsawantinkia 11 Uunt Yus atumí Yusri̱ íimmianum Ni ju̱i̱ iruntratarum títiatna nui̱ irunturakrumin ashí Israer shuar ántuiniamunam umiktin chicham áujtiatrume. 12 Túrawakrumin ashí nu akupkámu umiktin chichaman antukar núnisaṉ Uunt Yusan atumí Yusri̱n ashamkatniun nekaawar ni tana nuja̱i̱ métek túrawarat tusarum áishmaṉsha nuwa̱sha uchisha tura yajaya̱ aents atumí pépruri̱n pujuartatna nusha irurtarum. 13 Tura Jurtan entsa amaini̱ katiṉkrum nu nuṉkanam matsamkattsa wéarmena nui̱ pujusár ni uchirí̱sha nekaacharuitkiusha átum pujuttarmena nuiṉkia nisha antukar Uunt Yusan atumí Yusri̱n ashamkatniun nekaawartatui” tímiayi Muisais.

Muisais jatak ajasmatai Uunt Yus jintintramu

14 31:​14-18 Yus Muisaisan wárik jakattame tusa ujakmiayi. Tuma asamtai Yus Shiir Awajtai̱ Je̱e̱n Jusuiji̱a̱i̱ weankata tímiayi. Nui̱ yuraṉkim utsantramunam Yuska wantintiukarmiayi. Tura Uunt Yus Muisaisan chicharuk “Ame jakakminkia Israer shuarka Kanaannumia̱ aentsu yusri̱ ainia nuna tikishmátrartatui tura Wisha núnisnak nincha iniaisartatjai. Tí yajauch tura kúntuts pujusártatui. Yusan iniaisaru ásar wáitiainiana nunasha nekaawartatui tura Winia seatainiakuisha ái̱kchartatjai” tímiayi.

19 31:​19-21 Yus Muisaisan Jusuiji̱a̱i̱ chicharainiak “Kanta aartarum. Túrarum Israer shuar jintintiatarum” tímiayi. Nuyá̱ ataksha awaiṉki̱ Uunt Yuska chichaak “Péṉker nuṉkan Wi súsartatjana nui̱ péṉker pujuiniak yurumá ejemar nuérar chíkich yus ainia nuna tikishmátrartatui. Tura itiurchatan wáinkiar núnisaṉ kúntuts pujuiniak tsawant jeamtai jú̱ kantan kantamáiniak Yus nin tiarmia nuna enentáimturartatui. Wi nuṉkan amastatjarme tímiajrumna nui̱ wá̱i̱tskesha yamái urukarmea nuna nékajai. Tuma ásar Wíniaka anturtutsuk iniaitiusartatui” tímiayi Yus.

22 Nu tsawantini̱ṉ Muisais jú̱ kantan aar Israer shuaran jintintiáwarmiayi.

23 Nuyá̱ Yus Nuuna uchirí̱ Jusuin akupeak chicharuk “Sapijmiatsuk kakaram ajasta. Warí Israer shuaran nuṉkan nekas amastiniaitjiarme Wi tiármiajna nui̱ṉkia ame awayá̱wartatme. Tuma asamtai ámiji̱a̱i̱ṉkia Wi pujuttajai” tímiayi.

Umiktin chicham aarma Yusna Eṉketai̱ ayaam ikiuamu

24 Nuyá̱ Muisais Yus akupkámu chichaman papinium aar umik 25 Yusna Eṉketai̱ júkitniun Yus anaikiamun Riwí shuaran chicharainiak 26 “Yamaikia Yus akupkámu chichaman áaran amaajrume. Jukirum atumí Uunt Yusri̱ Eṉketáin ayamach awa̱starum. Ju̱ja̱i̱ átum yajauch túramu paant atí tusarum túratarum. 27 Warí atumí kajetáiri̱n tura umishtai̱ri̱ncha wikia nékajai. Kame wi iwiaaku atumji̱a̱i̱ pujai̱sha Uunt Yus umirkatin nakitiarme. ¿Ániatirmesha wi jakamtaisha urukattarmek? 28 Tuma asamtai ashí Israer shuara uuntri̱ tura yaintri̱ ainia nusha irutrurtarum. Tura nisha ántuiniamunmaṉ ju̱na tiártatjai. Nayaimpinmaya̱sha tura nuṉkaya̱sha nekasaiti tiar makurmararat tusan untsuiniajai. 29 Warí wikia nékajai. Wi jakamtai̱ṉkia átumka ti yajauch túrakrum péṉker wekasatniun jintintiáitjiarmena nuka iniaisattarme. Túmakrum Uunt Yus íimmianum yajauch tura asarum ukunmaṉka ti yajauch matsamtiatrume. Núnisrumek atumí túramuri̱ji̱a̱i̱ Uunt Yus akajtiatrume” tímiayi Muisais.

Muisais kantamámu

30 Nuya̱ṉka ashí Israer shuar ántuiniamunam Muisais amuumam jú̱ kantan áujsamiayi.