Israernum

Yus nekas enentáimtustin

11 Yus nekas enentáimtakur “nákajnia nuna, Yus nekas suramsattaji” taji. Tura wáinchaitiatar “nekas wainkiattaji” taji. 2 Yaunchu ii uuntri̱ Yusan nekas enentáimtuiniakui Yus “péṉkeraitme” tiármiayi.

3 Aya Yus enentáimtakur ju̱ nékaji, Yus aya ni chichame̱ja̱i̱ṉ ashí nuṉkan najanamiayi. Túramtai ashí wainiainiaj nu wáinchataiji̱a̱i̱ najanamu áiniawai.

4 Apir Yusan nekas enentáimtak Kainji̱a̱i̱ naṉkaamas péṉkera nuna Yusan susamiayi. Túramtai Yus “péṉkeraitme” taku shiir yumiṉsamiayi. Tuma asamtai Apir jákaitiat tuke enentáimtikramji.

5 Enuksha Yusan nekas enentáimtak iwiaakuk nayaimpiniam junakmiayi. Yus jukimiu asamtai wáinkiacharmiayi. Tura Yus Chichamnum aarma “Enuk júnatsuk Yusan ti shiir enentáimtikniuyayi” tawai. 6 Tura Yus nekas enentáimtachkumka ¿itiurak Ni shiir enentáimtiksatam? Nekas enentáimji̱a̱i̱ Yusan weantúktaj tusam wakerakmeka emka Yus iwiaakuiti tu enentáimpratniuitme. Nuya̱sha Wi Yusan imiá nekas e̱a̱kuiṉkia Yus winia yaintkiattawai, tu enentáimsatniuitme. 7 Yus “ama̱a̱rkatniun akupkáttajai” tiniu asamtai Nuwaisha Yusan nekas enentáimtak ama̱a̱run wáinchaitiat “ama̱a̱rkattawai” tímiayi. Túrak Yus timiaja̱i̱ métek uunt kanun najana ni shuari̱ncha uwemtikramiayi. Tura Yusan nekas enentáimta asamtai Yus “péṉkeraitme” tímiayi. Tura ní umirkamuja̱i̱ chíkich shuar Yusan umircha áiniaṉka sumamtikiawarmiayi.

8 Tura Aprajámsha Yusan nekas enentáimtak “núṉkem ikiukim wetá” Yus tutai shiir umikmiayi. Yus tuke nin súsatniua nú nuṉkanam wémiayi. Túrasha ni nuṉke̱n ikiuak ni jeatniun nékatsuk jiinkimiayi. 9 Yusan shiir enentáimtak nú nuṉkanam Yus nin tsaṉkatkamuitiat írara áinis pujusmiayi. Nuap je̱a̱nam pujuyayi. Núnisaṉ ni uchirí̱ Isaksha tura ni tiraṉkí̱ Jakupsha nui̱ṉ tsaṉkatkamuitiataṉ írara núnisar pujuarmiayi. 10 Kame Aprajámka nayaimpinmaya̱ ashirchamin péprunam pujustinian nákasmiayi. Yus nu pepru péṉker iwiar je̱a̱mka asamtai umuchkiachminiaiti.

11 Aprajáma nuwé̱ Sarasha Yusan shiir enentáimta asa úuntach áyat ajaprukmiayi. Yus timia nuna umiktatui tau asa uchin takusmiayi. 12 Tura nuja̱i̱ Aprajám ti úuntchitiat ti pampaṉmiayi. Ni chikichkitiat ni pampaṉmári̱ ti untsurí ajasár yaaja̱i̱ métek tura náikmiji̱a̱i̱ métek nekapmarchamnia ajasármiayi.*

13 Ashí nu shuar Yus tsaṉkatkamun wáintsuk jákarmiayi. Túrasha Yusan nekas enentáimtuiniak arantia̱ wáinkiar warasar shiir enentáimtiarmiayi. Túrawar “ju̱ nuṉkanam nekas aya íraraitji” tiármiayi. 14 “Íraraitji” tu chichainiak chíkich nuṉka e̱a̱mun paant awajainiawai. 15 Nisha matsatu winíarmia nui̱ atak waketkitniun wakeruiniakka páchitsuk waketkiara̱a̱yi. 16 Tura antsu nisha nuna naṉkaamas péṉker nuṉkan nayaimpinmaya̱ nuna enentáimtiarmiayi. Túmainiakui Yuska péprun iwiartur susa asa “Wi ni Yúsri̱ntjiai” títinian natsantatsui.

17 Ataksha Aprajám Yusan nekas enentáimtak “Chikichik uchi amasmaj nu, taṉkua áitkiasmek maam surusta” takui̱ Aprajám Isakan ní uchirí̱n Yus súsatniun peṉké suritkiachmiayi. 18 Kame Yus “Isakja̱i̱ ti pampaṉtatme”* tau asamtai 19 Aprajám “mámtaisha Yus iniantkíttiawai” tu enentáimpramiayi. Tura Yus ukunam mátniun suritkiamtai Isakan máchiat nekas jákatniunmaya̱ uwempran nantakniua áintsaṉ wainkiamiayi.

20 Isaksha Yusan nekas enentáimtak ni uchirí̱n Jakupnasha Esauncha ukunam ni túrunattana nuna ujakármiayi. 21 Núnisaṉ Jakup Yusan nekas enentáimtak játsuk ni tiraṉki̱n, Jusé uchirí̱n shiir túrunattana nuna ujakármiayi. Tura ti úuntach asa wái̱ri̱n ushukruma Yusan shiir awajsámiayi. 22 Tura Jusesha jákatniuri̱ ishichik ajatésmatai Yusan nekas enentáimtak Yus ukunam Israer shuaran Ejiptu nuṉkanmaya̱ júkiartatna nuna ujakármiayi. Tura jiiniainiak ni ukunchi̱n júkiar Yus tsaṉkatkamu nuṉkanam iwiarsarat tusa akupkámiayi.

23 Muisaisa aparí̱sha nukurí̱sha Yusan nekas enentáimtuiniak Muisais tí shiirmach asamtai suntar máwara̱i̱ṉ tusa ákiiniamunmaya̱ṉ menaintiú nantu ú̱karmiayi. Tura úunt akupin akupkámun ashamkacharmiayi. 24 Muisaissha Yusan shiir enentáimtak uunt ajas Ejiptunmaya̱ úunt akupniu nawantrí̱ uchirí̱ ajastinian nakitrámiayi. 25 Antsu Ejiptu nuṉkanam ishichkisha yajauch túramun warartsuk Yusa shuari̱ji̱a̱i̱ métek wáitsatniun naṉkaamas wakerukmiayi. 26 Nuja̱i̱ Krístun yajauch awajsarmia núnisaṉ nisha wáitsatniuyi. Túrasha ashí Ejiptu nuṉkanam péṉker irunmia núna naṉkaamas Yus nin ukunam tsaṉkatkata nuna shiir enentáimtusmiayi. 27 Nisha Yusan shiir enentáimtak úunt akupin kajeramu ai̱ṉ ashamtsuk Ejiptu nuṉkanmaya̱ jiinkí̱ wémiayi. Yusan wáinchiat shiir enentáimtamuja̱i̱ wáinniua áinis kakaram ajas ashí katsuntramiayi.

28 Muisais Yusan shiir enentáimtak yámankamtaik Paskua namperan najaneak ashí Israer shuaran numpaja̱i̱ ni wáitiri̱n kuérat tusa akupkarmiayi. Nuja̱i̱ Yus timia núnisaṉ nayaimpinmaya̱ suntar nuna iis nu je̱a̱nam iwia̱i̱ri̱n máatsuk naṉkaikit tusa tímiayi.

29 Israer shuarsha Yusan shiir enentáimtuinia ásar Kapantin Entsa nakaakamtai ajapén tí peṉker kukarnum katiṉkiarmiayi. Ejiptunmaya̱ suntarsha núnisaṉ katiṉtai tukamá jakerarmiayi.

30 Israer shuarsha Yusan shiir enentáimtuinia ásar Yus timian umirkar siati tsawant Jirikiú péprun téntakarmatai a̱a̱ wénuk sa̱a̱nakmiayi. Nuja̱i̱ ti yúpichuch nupetkarmiayi. 31 Raapsha nu péprunam pujak^u Yusan nekas enentáimtak tsanirmatai áyat Israera suntari̱n mamikmak wekaan tí peṉker itiá asa chíkich shuar Jirikiúnam matsatua nuja̱i̱ jákachmiayi.

32 Nu arantcha Yusan shiir enentáimtin ti írunui. Jeteuncha, Paraksha, Sansuncha, Jeptisha, Tawitcha, Samuirsha, Yúsnan etserniusha nu shuar ármiayi. Mash ujaktinian jeatsjai. 33 Nisha ashí Yusan nekas enentáimtuinia ásar Yusa kakarmari̱n niisháa niisháa iniaktusarmiayi. Nuna túruiniak chíkich chíkich nuṉkanmaya̱ aentsun nupetkarmiayi, nui̱sha péṉker akupkarmiayi tura Yussha ni timia núnisaṉ yaiṉkiarmiayi. Úunt ya̱wa̱ncha kajechu awajsarmiayi. 34 Uunt jiniasha ikiajniákarmiayi, puya̱ja̱i̱ mantamnatniuncha uwemprarmiayi. Kakarmachusha kakaram ajasár mesetnumsha ni nemasri̱ncha nupetkarmiayi. 35 Nuwa̱sha ni uchirí̱ jakaan iniantkímiun wáinkiarmiayi.

Chikitcha wáitias mantamnawarmiayi. Ti shiir pujustinnium nantaktiai tusar nú tsawantai̱ uwempratniun nakitrarmiayi. 36 Chikitcha katseknakarmiayi, asutniáwarmiayi, jiruja̱i̱ jiṉkiawar sepunam eṉkenawarmiayi. 37 Kayaja̱i̱ tukú mantamnawarmiayi, jímiapetek tsupinkiarmiayi, Yusan iniaisarat tusa nekapnasarmiayi, puya̱ja̱i̱ mantamnawarmiayi. Aya wékainiarmiayi, kuítrincha ásar nuapen entsararmiayi, shuar nincha áintrar wáitnenmai awajiármiayi. 38 Atsamunmasha, naintcha, wá̱a̱nmasha, ashí nuṉkanam wekain ármiayi. Nú shuarja̱i̱ṉkia ju̱ nuṉkanmaya̱ shuar imiá yajauch ásar niji̱a̱i̱ pujumainchu áiniawai. 39 Nu shuar Yusan shiir enentáimtuiniakui Yus “péṉkeraitrume” tiármiayi. Túmaitiat ni tsaṉkatkamun wáinkiacharmiayi. 40 Yuska nuna naṉkaamas péṉkeran iwiarturaru asa tura iin yamái pujajnia ju̱na enentáimturma asa nisha iisha mái̱ metek tsaniṉkiar tí peṉker ajasárti tu enentáimsamiayi.