Apukarípsis

19 Nuyá̱ nayaimpinmaya̱ tí untsurí shuar kakantar untsumainian antukmajai.

“¡Naṉkamantuitme Uunt Yusá! Yuska uwempratniuncha, nekas shiir átinniasha, naṉkamantu átinniasha tura ashí kakarmancha nekas nérenniuiti. 2 Nisha aya nekas péṉker túratniua nuna túrin asa* tí nukap tsanirmaun ashí aentsun tsaniri̱ji̱a̱i̱ utsur ti asutiáyi. Nin ti wáitkias ashí ni shuari̱ máwarman yapajmiátkaiti”* tiarmai.

3 Ataksha kakantar untsumainiak tiarmai

“¡Naṉkamantuitme Uunt Yusá! Ni wáitsatin ji esaak tuke kajintsuk múkuint ajawai”* tiarmai.

4 Tuíniakui paintikuátru uunta nu tura kuatru taṉkusha nuṉká piniakumawar akupin pujutai̱nium Yus pujana nuna shiir awajsarmai. Túrawar

“¡Nuke atí! ¡Naṉkamantuitme Uunt Yusá!”

tiarmai. 5 Akupin pujutái̱nmaya̱ chícham jiinkimiai.

“Yusna takarniutirmesha tura ni umirniutirmesha, úuntaitkiurmesha úchitkiurmesha kapitiánitkiurmesha péejchachitkiurmesha, ii Yusri̱ tuke shiir awajsatarum” timiai.

Murik nuatnaikiatin namper

6 Nuyá̱ tí untsurí shuar chichainiak kanusa uuntri̱ nujaṉkrak téter ajá núnisaṉ antukmajai. Ti kakaram ipiamta núnis amai.

“¡Naṉkamantuitme Uunt Yusá! Ii Uuntri̱ Yus Ashí Tujintkiachu asa ashí akupkatniun naṉkamayi. 7 Tuma asamtai shiir enentáimsartai. Murikiu anajmarmari̱ shiir iwiarnarmatai ni nuatnaikiatin tsawantri̱ jeayi. Tuma asamtai ti shiir warasar nincha shiir awajsatai. 8 Murikiu anajmarmari̱ṉkia iwiarnarti tusa ti shiir pushí sunasmai. Nusha yamaram máatrachu asa tí pújuiti”

tiarmai. Nu pushí Yus shuar péṉker túramun nakumeawai.

9 Nuyá̱ nayaimpinmaya̱ suntar turutmiai “Ju̱ áatrarta ‘Murik nuatma nampernum ipiaamu ainia nuka ti shiir warasarti.’ Tu aartá, turutmiai. Ju̱ka Yus timia asa imiá nekasaiti.” 10 Takui̱ nu Yusa suntari̱n shiir awajsataj tusan tikishmátramjai. Túramtai chichartak “Íimsakia áinkiaip. Wisha ámiji̱a̱i̱ métek tura yatsumja̱i̱ métek Jesusa nekas chichame̱n tuke umirin ainia núnisan Yusa yáintri̱ntjiai. Yusak shiir awajsatniuiti” turutmiai.

Kame Jesus imiá nekas tiniua nuna ashí átatna nuna wakaní̱nti.

Kawái pújunam eketna nu

11 Nuyá̱ nayaimp uranniun wainkiamjai. Nui̱ kawái puju wantinkiamai. Nu kawainium ekema nuna naari̱ Tí Peṉker Umin tutaiyi. Núnisaṉ Ti Nekas Túrin tutaiyi. Tí peṉker Akupin asa aya nekas péṉker túrak mesetan najanaiti. 12 19:​12-13 Ni ji̱sha jiji̱a̱i̱ métek keearmai. Muuknumsha akuptai̱ tawaspan untsurí etseṉkrakuyi. Nui̱ ni naari̱ Yus Chicham áarmauyi. Túrasha tana nuna Niṉki takamtsuk nekaamai. Numpaja̱i̱ eṉkerman entsaruyi. 14 Ti untsurí nayaimpinmaya̱ suntar mesetnum weena áintsar kawainium ekemkar ti shiir pújun entsaru Nin nemariarmai.* 15 Nu suntara Uuntri̱ wene̱ya̱ ashí nuṉkanmaya̱ yajauch aentsun mátin, puyá̱ mái̱ ere tsakatskatin jiinmiai.* Tura jiruja̱i̱ asutiátniua áintsaṉ ti kakaram akupkáttawai. Túrak Ashí Tujintkiachu Yusa kajetáiri̱ ti kakarma nuja̱i̱ aentsun asutiáttawai. Uwa nekeṉkar ijiuratniua áitkiasaṉ wáitkiasartatui. 16 Ni pushiri̱ncha makui̱ncha ni naari̱ áarmauyi, ASHÍ AKUPNIUN AKUPIN tura ASHÍ UUNTA UUNTRI̱.

17 Nuyá̱ tsawái̱ nantunam suntaran eketun wainkiamjai. Nusha nayaimpiniam nanamtin nanamainian kakantar untsúak timiai “Yusa uunt namperi̱n yurumáitiarum. 18 Akupniu namaṉké̱sha yuítiarum. Suntara uuntri̱ namaṉké̱sha, kakaram suntara namaṉké̱sha, kawái namaṉké̱sha tura eketainia nuna namaṉké̱sha, kame ashí aentsu namaṉké̱sha naṉkamantu ainia nunasha tura peṉké aents ainia nunasha yuítiarum” untsukmai.

19 Tura nuyá̱ Entsaya̱ Yajasmancha tura jú̱ nuṉkanam akupin ainia nunasha ashí ni suntari̱ji̱a̱i̱ wainkiamjai. Nisha kawainium eketka nuja̱i̱ tura nuna suntari̱ji̱a̱i̱ mesetan najanatai tusar iruntrarmai. 20 Tura nu mesetnum Yajasmasha tura Kukaria̱ Yajasmasha, peṉké ántar yúsnan etserniua nu, mái̱ achintkiarmai. Nuikkia Entsaya̱ Yajasma ni kakarmari̱n súam nu Kukaria̱ Yajasmaka aents tujintiamun tí turak shuaran anaṉkawarmai. Túramtai nu aents Entsaya̱ Yajasma náari̱n apujmamsar ni nakumkamuri̱n shiir awajsarmai. Tuma asamtai Entsaya̱ Yajasmancha tura Kukaria̱ Yajasmancha íwiaakuk asupriji̱a̱i̱ ti keá nu ji antumiaṉnum apeáwarmai. 21 Chíkichkia kawainium eketkanumia̱ puyá̱ tsakatskatin wene̱ya̱ jiinmia nuja̱i̱ mantamnawarmai. Túramtai nanamtin ni aya̱shi̱n yuáwar ejemakarmai.