Jehovaka nekas anentawai tuke ainis enentaimsata

1. Urukamtai Jehová enentaimtustinsha wakerukmiam? (Nakumkamusha iista).

Jehová ni urukuit nu penker nekaam tura ti anea asam yamaikia ame wakeramuram najanattajai, kakarmarjaisha tura enentaimtairjaisha enentaimtustatjame timiamna nui enentaimniukaitiam? (Ruk. 10:27). Nui enentaimsam Jehová ti aneatsmeash?

2, 3. a) Jehovasha waritia enentaimtursarat tusa wakera? (Jirimías 31:3) b) Ju unuimiatmanumsha wari nekaattaj?

² Amincha Jehová anenmawak yaksha aninmainiakui cha nekasash Jehovasha winiash anentawash tu enentaimminiaitme. Ii umai waitias tsakaru junis timiayi: Wikia Jehovan enentaimtiniaitjiai tumaitkiusha winisha enentaimiawash tu enentaimniuitjiai. Jehovash amini enentaimniuashit?

³ Jehovaka ninkia winisha enentaimiawai tu enentaimsarat tusa wakeriniaiti (Jirimías 31:3 aujsata). Jehovaka anenma asa ni iruntramurin pachitkia ati tusa yainmakuiti. Aminiu ajajai tusam imiannin asakmin Jehovaka tuke anenmastatui tura penkesha iniaitiamsashtatui (Mks. 3:17). Jehovaka ninkia nekas winiasha enentaimtureawai tu enentaimsarat tusa wakerawai. Apóstol Pablosha nisha aini enentaimiu asa junis timiayi: “Jákatniusha, iwiaakmasha, nayaimpinmaya̱ suntarsha, ashí nayaimpinmasha tura nuṉkanmasha akupin ainia nusha, yamái írunna nusha, ukunam átatna nusha, yakí̱ írunna nusha, nuṉká írunna nusha, kame ashí Yus najanamu írunna nusha Yusa aneṉkrattairi̱ya̱ peṉké akantámkichminiaitji” tu timiayi (Rum. 8:​38, 39). Jehovaka nekas anentawai urukamtai tuke ainis enentaimsatniuitiaj nu nekaattaji.

JEHOVAKA NEKAS ANENTAWAI URUKAMTAI TUKE AINIS ENENTAIMSATNIUITIAJ?

4. a) Iwiancha waritia enentaimsarat tusa wakeriniait? b) Iwianch taritrattsar wari turamniaitiaj?

⁴ Jehová anentawai tu enentaimkiurkia iwianch taritrattaji (Ipi. 6:11). Iwianchkia Jehovainia aran ajasarat tusa wakera asa ninkia anenmatsji tu enentaimtusarat tusa wakeriniaiti. Yuus papiikia iwianchkia uunt yawa aniuiti tawai (1 Pit. 5:​8, 9). Uunt yawaka ninki pujan nuna yuwiti. Iwiancha aintsan kakarmachu nekapeakrin turutskesha majat enentaimiakrin nui itiurchat amajtamsamniaitji (Neka. 24:10). Jehovaka nekas anentawai tu enentaimkiurkia iwianch itiurchat amajtamkurnincha taritrattaji (San. 4:7).

5. Jehová nekas anentawai urukamtai tu enentaimsatniuitiaj?

⁵ Nekas Jehová anentawai tu enentaimkiurkia ni ti anettaji. Yaksha anenmakrin iisha anetainti. Jehová ainis najatmaitji. Jehovaka nekas ti anentawai ainis enentaimkiurkia iisha ni tuke anettaji (1 Juaṉ 4:19). Yuus papiikia junis tawai: “Yusai̱ni̱ weamkata tura Ni atumín wearmáktatrume” (San. 4:8). Jehová nekas anentawai chikichkimsar tu enentaimsattsar wari turatniuitiaj nu nekaawartai.

NEKAS JEHOVÁ ANENTAWAPI TU ENENTAIMSATTSAR WARI TURATNIUITIAJ?

6. Jehovaka anentatsui tu enentaimkiumka wari turamniaitiam?

⁶ Wari urukamtai Jehová anenma nu nekaamattsam seata (Ruk. 18:1; Rum. 12:12). Jehová anentamna nuna kajinmatkij tusam yainkiata tuke ainis seata (1 Juan 3:​19, 20 TNM). Jehovaka anentatsui tu enentaimkiumka Yuus iin chikichkimias penker nekarmajnia nui enentaimsata (1 Sa. 16:7; 2 Crón. 6:30 TNM). Ame itiur nekapeam nu mash ujakta tura seamna nu aitkiasam turata (YKan. 62:8).

7, 8. Jehovaka nekas anenmaji tusa Salmos papiiniumsha warintia aarma irunea?

⁷ Yuusa chichame tana nuka nekasaiti tu enentaimsata. Jehovaka ni urukuit nuna timiatrusan aararat tusa Yuus papiin aararmiania nuna ni kakarmarijiai yainkiarmiayi. David junis timiayi: “Jehová ti kuntuts pujuinia nuna ikiuchuiti. Tura majat pujuiniancha uwemtikniuiti” (Sal. 34:18 TNM). David nekapmiania ainis majat nekapeakminkia wi itiur nekapeaj nunaka yaksha nekatsui tu enentaimminiaitme. Tumaitkiusha Jehovaka ikiakatmartatui. David junasha timiayi: “Winia wekaamurka Ame nekapmarume. Túram winia nea̱jkirka Ame mutirumin ikiurtusta” tu timiayi (YKan. 56:8). Yuus papiinium odre tana nuka mutiya aniuiti nuinkia yaja wenak entsan uwa ju wearmiayi. Itiurchat nankaamakur waitiakrin Jehovasha najaimiawiti. David Jehovan junis timiayi: “Wi tui̱ wekaaj nui̱sha ashí waitme” tu timiayi (YKan. 139:3). Jehovaka ame najaneamna nuna mash iiyawai. Tumaitkiusha ame penkera nu najaneamna nuna imiankaska iiyawai (Isr. 6:10). Jehovaka ni umirkattsam kakamna nuna iiniaiti.a

⁸ Jehovaka anenkrata asa ni chichamejai ikiakatmaji. Yamai nekaajnia aintsan iwianchkia Jehovaka anentatsui tu enentaimsarat tusa wakerawai. Yuus anentawash tu enentaimiakmeka iwianchkia waitriniana nui enentaimsata. Antsu Jehovaka waitrichu tuma asa aneajrume turameajnia nuka nekasaiti tu enentaimsata (Juaṉ 8:44; Sal. 31:5 TNM).

9. Nin umirainiana nunasha Jehovasha itiur enentaimtiniait? (Jíinkiarma 20:6).

⁹ Nin umirainiana nunaka Jehovaka anenana nui enentaimsata. Jehová Moisesan tura Israel aentsun timiania nui enentaimsata (Jíinkiarma 20:6 aujsata). Tura Jehovaka anettajme turameajnia nuisha enentaimsata. Ninkia tuke anenmattaji (Nee. 1:5). Jehová anea asam ni umirkattsam kakakminkia nisha tuke anenmastatna nui enentaimsata (Dan. 9:4 TNM; 1 Kur. 8:3). Ninkia anenma asa penke ikiurmakchattawai.

10, 11. Jehovasha Jesús ii tumashrin akikmakuana nuna itiur enentaimtiarat tusa wakera? (Gálatas 2:20 TNM).

¹⁰ Jesús ii tumashrin akikmakmiania nui enentaimsata. Jehová iin anenkrata asa ni uchirin chikichkiniak akupturmakmiaji (Juan 3:16 TNM). Apóstol Pablo Kristu aents ajatsuk yajauchia nuna turamiayi tura arum Kristu aents ajasmataisha yajauchia nuna turawaij tusa kakainiuyayi (Rum. 7:​24, 25; 1 Ti. 1:​12-14). Apóstol Pabloka Jesús ii tumashrin akikmakmiania nui enentaimniuyayi (Gálatas 2:20 TNM aujsata). Apóstol Pabloka Yuusa kakarmari utsuamu asa Kristu wini surumakmiayi tu timiania nuka Yuus papiinium aarma awai. Pablo timiania nuna Jehová urukamtai aamtikramia? Jesuska iin jarutramkamiajnia nui enentaimsarat tusa Jehová Pablon aamtikramiayi tura nu neka asam Jehovaka nekas anenta asa ni uchirin akupturkamiayi tu enentaimsattame (Rum. 15:4).

¹¹ Jehová ni uchirin ii tumashrin akikmakat tusa akupturmaku asakrin ti yuminkiaji. Jesuska aya ii tumashriniak akikmaktasa tachamiayi antsu ni apari chichamen etserkattsa tamiayi nuyasha ni aparinkia aentsun anenana nuna nekamtikiattsa tamiayi (Juaṉ 18:37).

JEHOVAKA ANENKRATNIUITI JESÚS TU TIMIAYI

12. Jesús Jehovanun timiania nuka nekasaiti urukamtai tu taji?

¹² Jesús ju nunkanam pujus ni apari urukuya nuna wakerusmajai aujmatniuyayi (Ruk. 10:22). Jesuska ni aparijiai nukape uwi pujusu asa Jehová nekaska ni urukuit nuna penker nekawai (Kurs. 1:15). Nin umirin ainiana nunaka Jehová ti anenana nuna Jesuska nekamiayi. Jehovaka nekas anenmaji tusa Jesussha waritia unuikiarturmia nu nekaatai.

13. Jesussha warinia nekaawarat tusa wakera?

¹³ Jesuska ni apari Jehová anenkratniuana nuna nekaawarat tusa wakerawai. Jesús ju nunkanam pujumia nui ni unuiniamurijiai Jehovanu aujmatuk atumi apari tu ti jintinniuyayi (Mat. 5:16; 6:26). Jesús ju nunkanam taatsain Jehovan umirin armiania nuka Jehovan junis tu wearmiayi ti kakaram Yuus, nankaamantu tura ashi najanka tu wearmiayi. Antsu Jesuska ii apari tuke tiniuyayi nuna takunka Jehová amikri ajasminiaitji tusa timiayi. Jesús Jehovanun aujmatuk ii apari timiania nuna nekaatai.

14. Jehovaka chikichkimias shiir enentaimturmarme tusa Jesús waritmia? (Matéu 10:​29-31; nakumkamusha iista).

¹⁴ Emkaka Jesús timiania nuna nekaatai (Matéu 10:​29-31 aujsata). Jehovaka chinki nunka iniantuncha nekawiti. Chinkikia Jehovan enentaimtuschamniaiti tumaitkiusha aentstinkia anenkrata asa chinkijiaisha nankaamas penker waitmaitji. Nuyasha ii intiashincha Jehová nekapmar takakeana nuna Jesús timiayi. Iiniun warinkisha mash neka asamtai iinkia nekas yainkratkattsa wakerawai tu taji. Jesús timiania aintsan Jehovaka chikichkimias shiir enentaimturmaji.

15. Juaṉ 6:44 nuisha Jehová itiurtamkaitji ta?

¹⁵ (Juaṉ 6:44 aujsata) Tura Jesús junisha timiayi, Jehovaka penker enentai achiaku asakmin penker nekarat tusa yainmakuiti (Hech. 13:48 TNM). Juaṉ 6:44 nui Jesús timiania nunaka Jirimías 31:3 nunian timiayash tumainti. Nuinkia Jehová nin enentaimtin armiania nuna timiayi: “Winia aneṉkrattair náṉkatkachua nuja̱i̱ tuke aneemjame tuma asan Winia waitneṉkratairnaka iniaṉnatkachuitjiame” tu timiayi (Useas 11:4 nui tana nujai apatkam iista). Jehovaka anenmawai tuma asa penker najanmena nuna iiyawai.

16. a) Jehová anenmaji tusa Jesús waritmia? b) Jehovaka nekas ii aparinti urukamtai ainis taji? (Jehovaka ii aparinti tana nui iista).

¹⁶ Jehovaka ii apariyaiti Jesús tu timiayi. Jehovaka anenmawai tura amini enentaimias pujawai tusa Jesús ainis unuikiarturmiayi. Jehová nekas anentawash tu enentaimkiumka Jesús timiania nui enentaimsata. Jesuska ni aparin penker neka asa Jehová anenmajnia nuna nekas timiayi (1 Pit. 2:22).

JEHOVAKA NEKAS ANENTAWAI TUKE AINIS ENENTAIMSATA

17. Jehovaka anenmaji urukamtai tuke ainis enentaimsatniuitiaj?

¹⁷ Iwianchkia ti anankartiniaiti tuma asa Jehovan enentaimtamun iniaisarat tusa warinkisha turamniaiti. Iwianchkia Jehovaka anenmatsji tu enentaimsarat tusa wakerawai (Juup 27:5). Tuma asamtai Jehovaka anentawai tuke ainis enentaimsatniuitji.

18. Jehovaka nekas anentawai tu enentaimsattsam wari turamniaitiam?

¹⁸ Ju unuimiateamunmanka Jehová nekas anentawai tu enentaimsattsam wari turatniuitiam nu nekaaji. Urukamtai Jehová anenmaj nu nekaamattsam ni seata tura nin umirainiana nunaka Jehovaka anenana nuisha enentaimsata nuya Yuus papiinium Jehovaka anenmaji tana nuish enentaimsata. Jehovaka nin anenana nunaka tuke anenaiti. Jehovaka Jesús ame tumashrumin akikmakat tusa akupkamiania nu kajinmatkip. Jehovaka ii aparinti. Yamai unuimiarajnia nui tana aitkiasan turakmeka Jehová nekas anentawai tu enentaimsattame.