Aentstikia mashikia nekatsji tu enentaimsatniuitji

1. Jehová aentstincha urukamtain najakratait?

Jehovaka enentaimin arat tusa najakrataiti. Tuma asa enentaimsar warinsha nekaawar umikiarat tusa wakerawai. Ni urukuit nuna nekarawarat tusa tura warinsha najanainiak esetrar enentaimsar turawarat tusa wakerawai (Neka. 2:​1-5; Rom. 12:1 TNM).

2. Warintia enentaimsashtiniaitiaj? (Rúmanam 11:​33, 34; nakumkamusha iista).

² Jehovaka enentaimin arat tusa najakrataitkiuisha warinsha mashikia nekatsji (Rúmanam 11:​33, 34 aujsata). Job Jehovajai aujmatas mashikia nekachmia nuna nekaamamiayi. Nuna nekaama Yuus imia nekawai timiayi. Iisha Job mashikia nekatsjai tu enentaimsamnia nunisrik enentaimsatniuitji (Juup 42:​3-6). Mashikia nekatsjapi tu enentaimiakrikia nankaamantuka enentaimsashtatji. Nuyasha warinkish najanataj takursha Jehovapi yainkiattawa tu enentaimsattaji (Neka. 2:6).

3. Ju unuimiateamunmasha wari nekaattaj?

³ Ju akankamunmanka mashi nekajai tu enentaimsar itiurchat enentaimminiaitiajnia nu nekaattaji. Tura mashi nekachmasha nusha penkeraiti nusha nekaattaji. Nuyasha Jehovaka ti neka asa ii nekaattsa wakeramuncha nekamtikramattaji nusha nekaattaji (Job 37:16 TNM).

YAJAUCH IRUNEANA NU URUTAIN AMUKAT NUKA NEKATSJI

4. Matéu 24:36 tana aintsan warimpia nekatsuj?

⁴ (Matéu 24:36 aujsata). Ju nunkanam yajauch iruneana nu urutain amukat nuka nekatsji. Jesussha ju nunkanam pujumia nui nisha urutain turunat nunasha nekachmiayi.a Jesús ni unuiniamurin chicharainiak nunaka “Apar Niṉki neka asa ni kakarmari̱ji̱a̱i̱ṉ túrattawai” timiayi (Tur. 1:​6, 7). Jehovaka ju nunkanam yajauch irunna nuna urutain amuktata nunaka ninki nekawai. Iikia nuka nekaachminiaitji.

5. Itiurchatcha urutain amukat nu nekachu asar itiur enentaimminiaitiaj?

⁵ Ju nunkanam yajauch irunna nu urutain amukat nuka iikia nekatsji. Tuma asar yaunchuk testigo de Jehová ajasuitkiurkia nusha urutma uwik nakastaj tu enentaimsar majat nekapminiaitji. Turutskesha ii shuarkesha nuya yaksha nekasash turunat turamainiakrin katsuntrashmin enentaimminiaitji (2 Pit. 3:​3, 4). Yajauch irunna nu urutain amukat nuna nekaknaka warinsha katsuntramniaitjiai tu enentaimsamniaitji.

6. Jehovaka urutain itiurchatnash amukat nunasha urukamtai turamtsuj?

⁶ Jehovaka urutain itiurchatcha amukat nuna nekainiachkusha nekas enentaijiai enentaimtursarat nuya nekas turunattawai tu enentaimsarat tusa wakerawai. Aya itiurchat amunman Jehová umirkattsar wakeratsji antsu tuke umirkattsar wakeraji. Jehová nunasha urutain turat tu enentaimia pujutsuk penker pujuttajnia nui enentaimsatniuitji. Nu turakur Jehová nekas enentaijiai umirkir wetatji (2 Pit. 3:​11, 12).

7. Warimpia nekaji taji?

⁷ Nekajnia nui enentaimsatniuitji. Yajauchia nu amukatin nuntumsamuka 1914 uwitinia juarnakniuiti. Amukatin nuntumsamunam wari turunatniuya nuna Yuus papii aujmatui tura nuka yamai uminki weawai. Tuma asamtai nu tsawan ishichik ajasu nekaji (Sup. 1:14). Nuyasha Jehová ashi aentsun ni chichame ujakarat tusa wakerana nusha nekaji (Mat. 24:14). Tuma asar 240 nunkanam etsereaji nuyasha chikich chichamjaisha nukap etserji. Urutain turunat nu nekachkursha Yuusa chichamenka asumprusar etserkir wetiniaitji.

JEHOVÁ ITIUR YAINMAKTATAJ NUKA NEKATSJI

8. Eclesiastés 11:5 TNM nui wari nekaachminiaitji ta?

⁸ Jehovaka ni chichakman uminkiat tusa warinkisha najanamniaiti. Yuusa chichamenka junis tawai: Aentstikia Yuusa najantairi nekaachminiaitji (Eclesiastés 11:5 TNM aujsata). Jehová warinkisha najaneakui urukamtai ainis aitkia nuka nekaachminiaitji. Ukunmatai iincha itiura yainmaktataj nuka timiatrusrikia nekatsji (Sal. 37:5 TNM). Ti unuimiarusha uchi ni nukuri tantane enkemas itiura tsakaki wea nunaka timiatrusan nekainiatsui iisha aintsarik Jehová ukunmatai warinia turata nuka nekatsji.

9. Jehová yainkiatpiash tu enentaimiakrikia wari najanatniua itiurchat aminiait?

⁹ Jehová yainkiatpiash tu enentaimia asar Jehovanu takakmastaj tayatar iniaisamniaitji. Iiniu najanma iniaisarik Yuusa chichame nu nukap etserkatin itiurchat aminiaiti turutskesha tuinsha weri Yuusa chichame etserkatin yaimkiatin itiurchat iimniaitji. Watskea jui enentaimsatai: Yuusa chichame etsereakur yaksha Yuusna nekaattsa wakera wainchamniaitji turutskesha Yuusa jeen jeammanum yaimkiatjai tu enentaimiarin warinsha nankaamasmatai urukamtai Yuuska yaimtsu tu enentaimsamniaitji.

10. Jehová itiurkan yainkratkat nu nekachkursha itiur enentaimsatniuitiaj?

¹⁰ Jehová itiurka yainkratkat nu nekachkursha nankaamantu enentaimtsuk nekaska Jehová ti nekaiti tu enentaimsatniuitji (Isa. 55:​8, 9). Nuyasha Jehová jintinkratma umiakrikia nekas penker pujuttaji. Yuus etserkatniun yainkiamtai penker nankaamasjai turutskesha Yuusnancha penker takakmajai tu enentaimtainti (YKan. 127:1; 1 Kur. 3:7). Warinmansha itiurchat wainkiur Jehovaka mashi wainiawai tu enentaimsatniuitji (Isa. 26:12). Nuyasha Jehová uwejen iniaisar ii jeamuk najaneaji. Yaunchuka Jehovaka ni aentsrin warinkisha tura yainiuyayi. Yamaisha aintsan tuke yainmaji (Tur. 16:​6-10).

11. Jehová urukuit?

¹¹ Jehová urukuit nu nekaji. Ninkia anenkratniuiti, penkeraiti, ti nekaiti nuyasha ni takatrin yaimiakur tura chikitcha yayainiakur Jehová shiir enentaimtikiaji. Nu turakrin iincha yainmaktatji (Isr. 11:6).

UKUNMATAI WARIN NANKAAMASAT NUKA NEKATSJI

12. Sántiak 4:​13, 14 tana nunisan warimpia nekatsuj?

¹² (Sántiak 4:​13, 14 aujsata). Iikia nekatsji kashincha wari nankaamatramsattaj. Kashin warinsha najanattsa enentaimmiarin neachma warinsha nankaamasminiaiti. Ii najanattsar enentaimmia ejetukchamniaitji turutskesha jatash jakamniaitji (Ecl. 9:11 TNM).

13. Itiur nankaamakriya itiurchat enentaimminiaitiaj?

¹³ Kashincha wariniak turattaj tu enentaimsar itiurchat nekapminiaitji. Turutskesha neachma itiurchat nankaamasmatai kuntuts enentaimpramniaitji. Nuyasha ii najanattsar wakeramu tujinkiar majat enentaimminiaitji (Neka. 13:12).

14. Wari turakria warasar pujumniaitiaj? (Nakumkamusha iista).

¹⁴ Jehová aneakrikia itiurchat wainkiursha katsuntrattaji. Yaunchuksha Yuusa umirin itiurchatan wainkiarmiayi tawai Yuusa chichame. Yamaisha tuke itiurchatka wainkiattaji. Jehová enentaimtin asan itiurchatnaka wainkiashtatjai tuka enentaimsashtiniaitji. Nuyasha warinsha nankaamakuisha Jehová ainis aitkiayi tuka enentaimsashtiniaiti. Ukunmatai atatna nu nekakur warasar pujusminiaitji tu enentaimsashtiniaitji antsu nekaska Jehová jintinkratma umiakur penker pujuttaji tu enentaimsatniuitji (Jrm. 10:23). Yuusa chichame tawai: “Yus wakerakuiṉkia iwiaaku pujakrikia nusha túrattaji” tu tawai. Warinkish najankursha Yuus wakeramu najanatniuitji (San. 4:15).

15. Warimpia ukunam atatna nu nekaj?

¹⁵ Kashin wari nankaamasat nuka nekaachminiaitji tumaitkiusha Jehovaka tuke iwiaku pujuttarme nayaimpinmansha turutskesha nunkancha turamniuitiajnia nuka nekaji. Yuuska waitrichua nu tura ni chichakmarinkia umitskeka nankaamaschamnia nusha nekaji (Tit. 1:2). Aya Yuusak junis timiniaiti: “Tura ukunam túrunattana nunasha tí yaunchuya̱ṉ yama naṉkammanumia̱ṉ juárkin etserkin winiajai”. Jehová chichakmaka timiatrusan uminkiaiti nuyasha uminki wetatui (Isa. 46:10). Tura aintsan warinkish nankaamakuisha Jehovaka tuke anenmattaji (Rum. 8:​35-39). Itiurchat nankaamakrisha katsuntratniun ni nekatairi amastatji tura ikiakatmartatji. Jehová nekas yainmaktatajnia nusha nekaji (Jrm. 17:​7, 8).

JEHOVAKA IMIA PENKER NEKARMAJI URUKAMTAI TAJI

16. Jehovasha warinia nekartameaj? (Yus Kanta 139:​1-6).

¹⁶ (Yus Kanta 139:​1-6 aujsata). Jehovaka iinkia mash nekarmaji. Urukamtai aintsarsha enentaimiaj tura itiur nekapeaj nunasha Yuuska nekawai. Ii chichajnia nuna nuya ii enentain wari aa nunasha nekawai, urukamtai najanaj nunasha nekawai. David timiayi Jehovaka warik yainkratniuiti. Jehovaka ti kakarmaitiat nunka tura nayaimpin irunna nuna najankaitiat amin shiir enentaimturmak yainmakui warintia enentaimiam? David junis timiayi: “Nu nekaatniusha wíji̱a̱i̱ṉkia naṉkamakuiti. Ti uunt asamtai peṉké nekaachminiaitjiai” (YKan. 139:6).

17. Warintia enentaimsamniaitiaj?

¹⁷ Waittsar tsakaru asar turutskesha Yuus urukuit nu penker jintiachma asar Jehovaka anentatsuapi tu enentaimsamniaitji. Yaunchuk yajauch najana asar Yuuska ajapa iniaitiusuapitia tu enentaimminiaitji. Davidsha ainis enentaimmiayi (YKan. 38:​18, 21). Yaksha junis enentaimsamniaiti: Yuuska yajauch najanman ikiukchamnia nekapeamu nekariatsha urukamtai yapajniamniaitme turuta.

18. Jehová nekarma asakrin itiur enentaimiaj? (Nakumkamusha iista).

¹⁸ Ii urukuitiaj nuka iikkia nekaamachminiaitji antsu Jehovaka penker nekarmaji nuya ii penker najaneajnia nunasha waitmaji. Jehovaka anenkrata asa unukakrincha urukamtai turaj nuna nekawai (Rum. 7:15). Jehovaka warinsha najanamniaitiajnia nuna nekarmaji tuma asamtai niniu takakmakrisha wara wara takakmastiniaitji.

19. Jehovaka anenkrata asa warinia turiniait?

¹⁹ Jehovaka anenkrata asa penker pujusarat tusa ni chichamejai jintinkratniuiti (1 Juaṉ 4:8). Nuyasha Yuuska tuke iwiaku pujusarat tusa wakerawai tuma asa ni uchirin iini jarutramkat tusa akupturmakuitji. Nuna tura asamtai tunaartiniaitkiursha Yuus umirkamniaitji (Rum. 7:​24, 25). Yuusa chichame tawai: “Yuus ii enentaijiaisha nankaamas uuntaiti tura mash nekawai” (1 Juan 3:​19, 20 TNM). Jehovaka iin nekarma asa ni wakeramu umikminiaitiajnia nunasha nekawai.

20. Urukamtai ii nekachmanum enentaimia pujushtiniaitiaj?

²⁰ Ii nekachmanka Jehová mashi nekamtikramattaji. Nuyasha Jehová imia nekawai tu enentaimiakrikia ii nekachmanum enentaimia pujushtatji antsu aya nekaj nuin enentaimsattaji nuyasha Jehová ti nekaiti tu enentaimsattaji (Job 36:4 TNM). Yamai mashi nekachkursha uruma nuinkia Yuusnaka tuke nukap nekaki wetatji (Ecl. 3:11 TNM).