Shiir nawamnairar iruntrar pujustiniaitji

Kristu aentsjai iruntrar pujakur David enentaimmia ainis enentaimiaji. David junis timiayi: “Íiskuana, urutmá péṉkerait tura wakerú ajamainchukait nuamtak yachi̱ji̱a̱i̱ iruntrar chikichik enentáiji̱a̱i̱ pujusártinkia” (Yus Kanta [Salmo] 133:1). Iruntrar matsamsattsar kakartiniaitji.

1. Yuusa iruntramuri pachitkiainia uruku ainia?

Chikich nunkanam testigo de Jehová iruntramuri weakmeka chikich chichaman chichainiakuisha nijiai pujuiniakum penker enentaimtiatme. Testigos de Jehovaka ashi nunkanam Yuusa chichame unuimiainiak nu papiijiai mash unuimiau ainiawai. Mai anenai ajattsar kakaji. Testigos de Jehovatikia tuinsha pujakrisha Jehová naari pachiaji nuya metekrak enentaimsar ni enentaimtaji (Supunías 3:9).

2. Chikich Kristu aentsjai shiir nawamnairam pujustasam wari itiurkatniuitiam?

Nekas mai anenai ajatniuitji tawai Yuus papii (1 Pítiur 1:22). Yuusa chichame tana nu itiurkamek umikminiaitiam? Chikich Kristu aents awajiamuri iirtsuk penkeri iirsata. Aya amikrumjai shiir amajnaitsuk mashiniu shiir amajsarta. Chikich aents penker nekachiatam yajauch enentaimtusaip (1 Pítiur 2:17 aujsata).a

3. Chikich Kristu aentsjai itiurchat wainkiam wari turatniuitiam?

Shiir nawamnaiyakrisha tunaartin asar chikich Kristu aentsjai itiurchat wainkiamniaitji. Tuma asamtai Yuusa chichame junis tawai: “Antsu shiir awajkartin ajasrum waitnennairarum Kristu jakamuja̱i̱ Yus atumí tunaari̱n tsaṉkurtampra nútiksarmek tsaṉkurnáiratarum” (Ipisiunam [Efesios] 4:32 aujsata). Ti nukap unuwakrincha Jehovaka tsankukratniuiti. Tuma asa tsankurnairarat tusa wakerawai. Chikich aentsjai itiurchat wainkiaitkiumka iwiaratjai tu enentaimsata (Matéu 5:23, 24 aujsata).b

PENKER NEKAATAI

4. Penker nekachiatam yaksha yajauch enentaimtusaip

Ashi nunkanmaya testigos de Jehová aneastiniaitji. Nu turatin itiurchat aminiaiti. Iijiai metekcha ainia nu aneastin itiurchat aminiaiti. Ashi nunkanmaya testigos de Jehová aneastinniash wari yainmakminiaitiaj? Túramuri̱ [Hechos] 10:34, 35 aujsarum juna aujmattsatarum:

• Jehovaka ashi nunkanmaya aents winia enentaimtursarat tusa wakerawai. Amesha chikich aentscha itiura enentaimtustiniaitiam?

• Ame pujamna nuisha aentscha chikich aentsnasha penker nekainiachiat itiur enentaimtin ainia? Amesha urukamtai ainis enentaimtuschartiniaitiam?

2 Kurintiunam 6:11-13 aujsarum juna aujmattsatarum:

• Ashi nunkanmaya testigos de Jehová aneasartasam wari itiurkatniuitiam?

5. Tsankurnaikiam chikich aentsjai nawamnaikiam pujusta

Jehovaka tuke tsankurtamniuitji. Isayas 55:7 aujsarum juna aujmattsatarum:

• Jui aujsajnia nui tana aintsan Jehová tsankurkartutairisha urukuiti ta?

• Jehová tsankurkartin asamtai itiur enentaimiam? Urukamtai tu enentaimiam?

• Urukamtai chikichjai shiir amajnaisatin itiurchat aminiait?

Jehová aintsan tsankurkartin atasar tura chikich Kristu aentsjai shiir nawamnaikiar pujuttsar wari itiurkatniuitiaj? Nekatai̱n Jintinkiartin [Proverbios] 19:11 aujsarum juna aujmattsatarum:

• Kajekminian yaksha najankui kajekaij tusam wari turamniaitiam?

Urutainsha ii najanmajai chikich aents itiurchat enentaimsarminiaiti. Nu nankaamakui wari itiurkatniuitiaj? VIDEO iisrum juna aujmattsatarum:

VIDEO: Tsankurnairar shiir enentaimsar pujuttaji (6:01)

• Video iisajnia nui ni kaijiai tsankurnairattsa warinia itiurka?

6. Chikich aentsu penkeri iirsata

Chikich Kristu aentsjai nukape tsawan warinkish najaneakrikia aya penkerik nekarashtatji antsu awajiamurisha nekarattaji. Aya penkeri iirsattsar itiurkatniuitiaj? VIDEO iisrum juna aujmattsatarum:

VIDEO: Ti shiir ajau ata (5:10)

• Chikich Kristu aentsu penker najanmari iirsattsam itiurkamniaitiam?

Jehovaka ii penker najanman iiniaiti. 1 Pítiur 3:10-12 aujsarum juna aujmattsatarum:

• Jehovaka ame penker najaneamna nuna iiniaiti, nu nekakum itiur enentaimiam?

WARI NEKAAM

Chikich Kristu aents tsankureakmeka nuya anenakmeka shiir amajnaisam pujuttame.

Awakeasrik nekaatin

• Chikich aents yajauch enentaimtusaij tusam itiurkatniuitiam?

• Chikich Kristu aentsjai kajernaikiam itiurkattam?

• Jehová tsankukrateana aitkiasmek tsankurkartin atasam wakeramek? Urukamtai ainis atasam wakeram?

NUKAP NEKAATA

Jesuska chikich aents yajauch enentaimtuschatniuitji tusa apatak jintinkratamiayi.

Jiimiin numi enketna nu jusata (7:01)

Wikia awajirchajai tu enentaimiakrisha tsankurturta titiniashitiaj?

Tsankurnaiyakrikia shiir amajnaisar pujuttaji (La Atalaya, 1 de noviembre 2002)

Chikich aentsun metekrak enentaimtustinian itiura unuimiatrarmia nu iista.

Aentsu iirkari aya nuke iirsachartai (5:06)

Kajernaikiarsha itiurchat warik iwiarattsar wari itiurkatniuitiaj nu nekaata.

Anenkratmajai chicham iwiaratai (La Atalaya, mayo 2016)