¿Ndixi chindeé na̱ néʼe kuéntá circuito miíyó?

Nu̱ú tutu Escrituras Griegas Cristianas si̱jaá káʼa̱n vá saʼa̱ Bernabé xíʼín saʼa̱ apóstol Pablo. Na̱yóʼo kúú ná ni̱ si̱ kaniʼni iin iin congregación ta yachi̱. ¿Ndiva̱ʼa ni̱ si̱kee na ña̱yóʼo? Ni̱ kée ná saʼa̱ ña̱ ndiʼi ini ná saʼa̱ ñani̱ táʼan ná já ná koo va̱ʼa na̱yóʼo xíʼín Ndio̱s. Apóstol Pablo ni̱ kúu ini rá kuʼu̱n rá kaniʼni tuku rá na̱ ñani táʼan rá já kunde̱ʼé rá a ndóyi va̱ʼa na. Va̱árá ciento kilómetro kanian kaka ra jo ña̱ kúni̱ʼi chááka̱ nuu̱ miírá kíán ña̱ chindeé ra na̱ ñani táʼan ra (Hechos 15:36). Tá kivi̱ víti jaá ní na̱ kaniʼni iin iin congregación kée na tátu̱ʼun ni̱ kée Pablo.

Naki̱ʼa na tu̱ndeé ini nuu̱ yo̱. Ta̱ néʼe kuéntá circuito kaniʼni rá iin kuaʼa̱ oko̱ káa congregación, ta iin semana kaniʼni rá iin iin congregación ta uvi̱ taʼndá nasiokoo rá nu̱ú kuia̱. Ndijaá ña̱ yáʼa na̱ ñani yó ña̱yóʼo kuu nakani ná nuu̱ yó ta ña̱yóʼo chindeéán miíyó ta tá ió ñajiʼí ná jaá ní kuu chindeé ná miíyó. Na̱yóʼo kúu ini ná kasini na na̱ ñani táʼan yó na̱ si̱va̱ʼa ta na̱ va̱lí, ta kútoó na kuʼu̱n na xíʼín yó jánaʼa̱ ná saʼa̱ Tu̱ʼun Ndio̱s nuu̱ na̱yivi na̱ jákuáʼa xíʼín yó. Na̱yóʼo saʼa̱n na xíʼín na̱ kuaʼa̱ nuu̱ tein congregación kaniʼni ná na̱ ñani táʼan yó; ta jaá ní yáʼa ná káʼa̱n ndojó ná ta nátaka yó, ta tá nátaka kuaʼa̱ yo̱ jaá ní yáʼa na káʼa̱n ndojó ná, ta ndiʼi ña̱ yóʼo si̱ʼa ña̱ tu̱ndeé ini yó (Hechos 15:35).

Ndiʼi ini ná saʼa̱ ndiʼi yó. Na̱ néʼe kuéntá circuito ndiʼi ini ná saʼa̱ na̱ congregación ña̱ na̱ koo va̱ʼa ná xíʼín Ndio̱s. Nátaka ná xíʼín ná kuaʼa̱n nuu̱ ta xíʼín na̱ chindeé congregación, ndatu̱ʼun ná saʼa̱ ña̱ va̱ʼa ni̱ kée congregación na ta yóʼo kúú nuu̱ si̱ʼa ná consejo nuu̱ ná ndixi kanian kée na chúun kumi̱ na. Tá chindeé ná na̱ prekursor já na̱ kée va̱ʼa ná tá kuaʼa̱n ná káʼa̱n ná saʼa̱ Tu̱ʼun Ndio̱s, ta kujii̱ ini na ndatu̱ʼun ná xíʼín na̱yivi ná kasáʼá nátaka xíʼín yó, ta jaá ní kujii̱ ini na ña̱ si̱ sini chááka̱ na̱yóʼo saʼa̱ Tu̱ʼun Ndio̱s. Ta na̱ ñani táʼan yó yóʼo kée na ña̱yóʼo xíʼín ndinuʼu ini ná tá ‘kája chúun na xíʼín yó chindeé na miíyóʼ (2 Corintios 8:23). Na̱ kée yó tátu̱ʼun na̱yóʼo ña̱ kandeé ini ná Ndio̱s ta ña̱ sinukuachi ná nuu̱ si (Hebreos 13:7).

• ¿Ndiva̱ʼa kaniʼni na̱ néʼe kuéntá circuito iin iin congregación?

• ¿Ndixi chindeéán miíní ta kaniʼni ná congregación ní?