Josías ni̱ ka̱si rá yoo xíʼín kaneʼe táʼan rá

¿Ndíki̱án káʼáún? ¿Á tu̱ndóʼó kée yó ña̱ kúni̱ Jeová?... Kuaʼa̱ na̱yivi káʼán ná ña̱ tu̱ndóʼó ndiva̱ʼa kée yó ña̱ sika ra nuu̱ yó. Jo Tu̱ʼun Ndio̱s kachian ña̱ o̱ju̱ú jaá kíán. Na̱kanian saʼa̱ iin ta̱lóʼo̱ ni̱ si̱naní Josías, ta̱lóʼo̱ yóʼo ni̱ ndúkúndeé rá já ni̱ si̱nukuáchí va̱ʼa ra nuu̱ Jeová. Ña̱ ni̱ chindeé rá kíán ña̱ ni̱ ka̱si va̱ʼa rá yoo kaneʼe táʼan va̱ʼa xíʼín rá. Ná kutu̱ʼva yó saʼa̱ Josías xíʼín saʼa̱ na̱ ni̱ si̱neʼe táʼan va̱ʼa xíʼín rá.

Tatá Josías ni̱ si̱naní Amón ta ni̱ si̱kúú rá rey ñuu Judá. Kini ndiva̱ʼa ini rá ta jaá ní ni̱ si̱kekáʼnu rá ndio̱s ko̱ó ndaa̱. Ta̱ ni̱ siʼi̱ Amón, jaá ni̱ nduu Josías rey nuu̱ na̱ ñuu Judá. ¿Á síni̱ún ndijaá kuia̱ na̱kaa̱ Josías tá ni̱ nduu ra rey? ¡Una̱ vá kuia̱ na̱kaa̱ rá! ¿Á jaá ní ni̱ kee ra ña̱ kini, tátu̱ʼun tatá rá?... Uu̱n, ko̱ ni̱ kee ra tátu̱ʼun tatá rá.

Nda̱á lóʼo̱ Josías, kúni̱ rá kunikua̱chi ra nuu̱ Jeová. Ña̱káa ni̱ ka̱si va̱ʼa ra yoo kaneʼe táʼan xíʼín rá. Ni̱ ka̱si rá na̱ kúni̱ Jeová, ta na̱yóʼo ni̱ chindeé ná rá já na̱ kée ra ña̱ kúni̱ Jeová. ¿Yoo ni̱ si̱neʼe táʼan va̱ʼa xíʼín Josías?

Iin ta̱ ni̱ si̱neʼe táʼan va̱ʼa xíʼín Josías ni̱ si̱naní Sofonías ni̱ si̱kúú rá iin profeta. Ta káni káʼa̱n rá xíʼín na̱yivi na̱ ñuu Judá ña̱yóʼo: “Tá o̱jándákoo ndo̱ ña̱ kekáʼnu ndo̱ ndio̱s ko̱ó ndaa̱, o̱kuʼu̱n va̱ʼa xíʼín ndo̱”. ¿Ndíki̱án ni̱ kee Josías? ¿Á ni̱ sinijo̱ʼo ra ña̱ ni̱ ka̱ʼa̱n profeta Sofonías? Jaa̱n. Ña̱káa, jaá kuití ni̱ si̱kekáʼnu ra Jeová, ta o̱ju̱ú ndio̱s ko̱ó ndaa̱.

Iinka̱ ta̱ ni̱ si̱neʼe táʼan va̱ʼa xíʼín Josías ni̱ si̱naní Jeremías. Nda inuu̱ vá kuia̱ rá, tá válí rá, yati ni̱ si̱ndoyi ra. Jaá kuití ni̱ chindeé táʼan rá já ná kunikua̱chi rá nuu̱ Jeová. Va̱ʼa ndiva̱ʼa ni̱ si̱neʼe táʼan ra ña̱káa, tá ni̱ siʼi̱ Josías, Jeremías ni̱ taa ra iin yaa ña̱ naʼa̱ rá ña̱ ku̱ndaʼví ini ra.

¿Á ko̱ ndaa̱ ña̱ ió kuaʼa̱ ña̱ kuu kutu̱ʼva yó saʼa̱ ña̱ ni̱ kee Josías?... Nda̱á lóʼo̱ rá kúni̱ rá kée ra ña̱ kúni̱ Jeová. Já ná kuu kée ra ña̱yóʼo, káni ka̱si va̱ʼa rá na̱ kaneʼe táʼan xíʼín rá, na̱ kúni̱ Jeová. ¿Á jaá ní yoʼo̱ kúni̱ún kunikua̱chiún nuu̱ Jeová? Ña̱káa kúni̱ʼi ndiva̱ʼa ná kaneʼe táʼan va̱ʼaún xíʼín na̱ kúni̱ Jeová.