Jeremías ko̱ ni̱ ja̱ndákoo ra ka̱ʼa̱n rá saʼa̱ Jeová

Tá káʼa̱n yó saʼa̱ Jeová xíʼín na̱yivi, java na̱ ndukueʼe ná á saku̱ndaa na miíyó. Ta ko̱ va̱ʼa kúu ini yó, ¿á ko̱ ndaa̱? Nda̱ kuu kukáʼán yó: “O̱káʼa̱n ga̱i̱ saʼa̱ Jeová”. ¿Á jaá ní ió tein ña̱ káʼáún jaá?... Tu̱ʼun Ndio̱s na̱kanian saʼa̱ iin ta̱ ta̱a ña̱ kúni̱ ndiva̱ʼa rá Jeová, jo ni̱ saa̱ iin kivi̱ ña̱ ko̱ kúni̱ ga̱ rá káʼa̱n rá saʼa̱ Jeová. Ta̱yóʼo ni̱ si̱naní Jeremías. Na̱ kunde̱ʼé yó ndíki̱án ni̱ ndóʼo rá.

Tá lóʼo̱ Jeremías, Jeová ni̱ ka̱ʼa̱n rá xíʼín rá ña̱ ió iin ña̱ kúni̱ʼi ndiva̱ʼa kástu̱ʼun ra xíʼín na̱yivi. Káni káʼa̱n rá xíʼín na̱ ña̱ ná jándákoo ná ña̱ kini kée na̱. Jo tu̱ndóʼó ndiva̱ʼa chúun yóʼo, ta ña̱káa ni̱ yu̱ʼú vá rá. Tá ni̱ kachi ra xíʼín Jeová: “Ta̱lóʼo̱ vá kúúi̱ ko̱ síni̱i̱ ndíki̱án kachi”. Ni̱ kachi Jeová xíʼín rá: “O̱yu̱ʼún, jáchi̱ chindeéi̱ yoʼo̱”.

Jeremías ni̱ ka̱sáʼá vá rá ka̱ʼa̱n rá xíʼín na̱ ñuu, ta kachi rá xíʼín ná: “Tá o̱jándákoo ndo̱ ña̱ kini kée ndo̱, koo tu̱ndóʼó nuu̱ ndo̱”. ¿Á ni̱ sinijo̱ʼo na ña̱ ni̱ ka̱ʼa̱n rá?... Ko̱, ni̱ ndukueʼe na xíʼín rá ta java na saku̱ndaa̱ na rá. ¡Nda̱ ni̱ kúni̱ ná kaʼní ná rá! ¿Ndixi káʼáún ña̱ ni̱ kúu ini Jeremías?... Ni̱ yu̱ʼú ndiva̱ʼa rá ta ni̱ kachi ra: “O̱káʼa̱n ga̱i̱ saʼa̱ Jeová”. Jo ¿á káʼa̱n ndisaʼnu ra? ¿O̱káʼa̱n ga̱ rá saʼa̱ Jeová?... Ko̱. Jeremías ni̱ si̱kúni̱ ndiva̱ʼa rá Jeová, ta ña̱káa, ko̱ ni̱ jándákoo mií vá rá káʼa̱n ra saʼa̱ Jeová, ta saʼa̱ ña̱yóʼo ni̱ si̱ndaa Jeová rá nuu̱ na̱ sikandají ñaʼá.

Iin kivi̱ jee, na̱yivi na̱ kandají Jeremías ni̱ jake̱ta na ra ini pozo, jo ko̱ó ti̱kui̱í ñúʼun ndinuʼu ndeiʼi̱ ñuʼun. Ta jaá ní, ko̱ó ti̱kui̱í koʼo ra ta ña̱ kásáʼán rá. ¡Jáchi̱ kúni̱ na̱ ná kivi rá! Jo ¿á ni̱ siʼi̱ rá? Ko̱, Jeová ni̱ kee ña̱ ná tavá ná rá.

Tátu̱ʼun kíán ni̱ síni̱ yó ni̱ ndóʼo ta̱yóʼo, ió tein ni̱ yu̱ʼú Jeremías, jo ko̱ ni̱ jándákoo ra ka̱ʼa̱n rá saʼa̱ Jeová. ¿Ndíki̱án kutu̱ʼvaún saʼa̱ ña̱ ni̱ ndóʼo Jeremías?... Ña̱ koo tein ña̱ java na̱yivi jaá ní kuáku̱ndaa̱ na̱ yoʼo̱ ta ndukueʼe na xíʼíún tá ná káʼa̱ún xíʼín na saʼa̱ Ndio̱s. Nda kukáʼán nuu̱n ta yu̱ʼún káʼa̱ún xíʼín ná. Jo o̱jándákoo míí váún káʼa̱ún saʼa̱ Jeová. O̱na̱ndojóún ña̱ tátu̱ʼun ni̱ chindeé rá Jeremías, jaá ní chindeé rá yoʼo̱.