LECCIÓN 19
¿Á kúú na̱ testigo Jeová cristiano ndaa̱ ndísa?
Nduʼu̱ na̱ testigo Jeová kandísandu̱ ña̱ kúúndu̱ cristiano ndaa̱ ndísa. ¿Ndiva̱ʼa? Ná kande̱ʼéyó ndeí va̱xi ndijaá ña̱ kandísandu̱ ta ndiva̱ʼa naníndu̱ testigo Jeová, ta janí ná kande̱ʼéyó ndiki̱ʼoví naʼa̱ndu̱ ña̱ kíʼvi̱ ini saʼa̱ táʼanndu̱.
1. ¿Ndeí va̱xi ndijaá ña̱ kandísa na̱ testigo Jeová?
Jesús ni̱kachi xíʼín Ndio̱s: “To̱ꞌon mií ní kúú ña̱ ndaa̱” (Juan 17:17). Nduʼu̱ na̱ testigo Jeová kéendu̱ tátu̱ʼun ki̱ʼa ni̱sakee Jesús: ndijaá ña̱ kandísandu̱ va̱xiña nuu̱ Tu̱ʼun Ndio̱s. Kande̱ʼéní ndixi ni̱kuu ni̱kusáʼá ndóyi na̱ testigo Jeová kivi̱ víti. Tein kuia̱ 1870, iin grupo na̱ jákuáʼa Tu̱ʼun Ndio̱s ni̱kusáʼána jákuáʼa va̱ʼa chááka̱na ña̱ jánaʼa̱ Tu̱ʼun Ndio̱s. Ta ni̱kusáʼána kandísana ndijaá ña̱ ndaa̱ va̱xi nuu̱ Tu̱ʼun Ndio̱s, va̱árá ndijaá ña̱yóʼo ko̱ na̱kitáʼanña xíʼín ña̱ jánaʼa̱ javaka̱ na̱ kuendá Veʼeñu̱ʼu. Tá ni̱ndiʼi ni̱kusáʼána jánaʼa̱na ndijaá ña̱ ndaa̱ yóʼo nuu̱ javaka̱ na̱yivi.a
2. ¿Ndiva̱ʼa naní nduʼu̱ na̱ testigo Jeová?
Mií Jeová káchi ña̱ ndijaá na̱yivi kekáʼnoña kúúna testigo na jáchi̱ jánaʼa̱na ña̱ ndaa̱ saʼa̱ Jeová (Hebreos 11:4-12:1, TNM). Tátu̱ʼun ni̱kuu, tá tiempo sata̱, Ndio̱s ni̱kachina xíʼín na̱ kúú kuendá ñuuna: “Miíndó kúú testigoi” (kaʼviní Isaías 43:10). Ta nuu̱ Tu̱ʼun Ndio̱s chinaníña Jesús “iin Testigo Ndaa̱” (Apocalipsis 1:5, TNM). Sa̱ʼá ña̱yóʼo, nda̱ kuia̱ 1931 ni̱ka̱xindu̱ kivi̱ testigo Jeová kananíndu̱. Ta iin ña̱ñúʼú káʼno ndiva̱ʼo kúúña nuu̱ndu̱ ña̱ néʼendu̱ kivi̱ Ndio̱s.
3. ¿Ndixi kée na̱ testigo Jeová naʼa̱na ña̱ kíʼvi̱ ini saʼa̱ táʼanna tátu̱ʼun ki̱ʼa ni̱kee Jesús?
Jesús ni̱sakiʼvi̱ ndiva̱ʼo inina saʼa̱ na̱ kúú discípulo na ni̱sakuu na̱yóʼo tátu̱ʼun kuendá na̱veʼena (kaʼviní Marcos 3:35). Janí nduʼu̱ na̱ testigo Jeová inu̱úvá ió inindu̱, iin túʼún na̱veʼe kúúvándu̱ inííkúú ñuyíví. Sa̱ʼá ña̱yóʼo káʼa̱nndu̱ xíʼín na̱ kúú ñani táʼanndu̱ “ñani” o “ki̱ʼa” (Filemón 1, 2). Ta janí, xinijo̱ʼondu̱ chúun saʼndá Tu̱ʼun Ndio̱s: “Ta kuꞌu̱ ini ndo̱ sa̱ꞌá na̱ kúú kuendá Jesús” (1 Pedro 2:17). Kuaʼa̱ ña̱ʼa kéendu̱ na̱ testigo Jeová jaá naʼa̱ndu̱ ña̱ kíʼvi̱ ini saʼa̱ táʼanndu̱; iin ña̱ʼa kéendu̱ kían chindeéndu̱ na̱ ñanindu̱ inííkúú ñuyíví tá ndóʼona tu̱ndóʼó.
NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO
Ná jákuáʼa va̱ʼa chááka̱yó saʼa̱ na̱ testigo Jeová ta ná kande̱ʼéyó chááka̱ ña̱ naʼa̱ ña̱ kúúyó cristiano ndaa̱ ndísa.
Na̱ kúú cristiano ndaa̱ ndísa kandísana ña̱ ndaa̱ va̱xi nuu̱ Tu̱ʼun Ndio̱s ta jánaʼa̱na ña̱yóʼo nuu̱ javaka̱ na̱yivi.
4. Ndijaá ña̱ kandísandu̱ va̱xiña nuu̱ Tu̱ʼun Ndio̱s
Jeová ni̱kachina tá sata̱ ña̱ saa̱ iin kivi̱ ña̱ kundaa̱ va̱ʼa chááka̱ ini na̱yivi saʼa̱ ña̱ ndaa̱ va̱xi nuu̱ Biblia. Kaʼvindó Daniel 12:4 ta kanatúʼúnndó saʼa̱ ña̱ va̱xi yóʼo:
¿Ndiku̱ú ña̱ “nduu kuaʼa̱ chááka̱” tein na̱ kuchúun nuu̱ Ndio̱s tá ki̱ʼa jákuáʼa va̱ʼa chááka̱na Biblia kuaʼa̱nna?
Kande̱ʼéní ndixi ni̱sakee iin grupo na̱ ni̱saja̱kuáʼa va̱ʼa Tu̱ʼun Ndio̱s, ta tein na̱yóʼo ni̱sakaa̱ Charles Russell. Kande̱ʼéndó VIDEO ta kanatúʼúnndó saʼa̱ ña̱ va̱xi yóʼo:
Tátu̱ʼun va̱xi nuu̱ video, ¿ndixi ni̱sakeena sa̱nandukúna ña̱ ndaa̱ nuu̱ Tu̱ʼun Ndio̱s Charles Russell xíʼín javaka̱ na̱ ni̱saja̱kuáʼa Tu̱ʼun Ndio̱s?
¿Á náʼání?
Ió java íchi̱, nája̱ma nduʼu̱ java ña̱ kandísandu̱. ¿Ndiva̱ʼa? Jáchi̱ mií Ndio̱s cháá cháá sonóna kundaa̱ va̱ʼa chááka̱ inindu̱ saʼa̱ Tu̱ʼunna, tátu̱ʼun ki̱ʼa ndóʼoyó xíʼín ndíka̱ndii tá kuaʼa̱n ti̱vi nuu kueé kueé nati̱vi va̱ʼa chááka̱ kuaʼa̱n (kaʼvindó Proverbios 4:18). Sa̱ʼá ña̱yóʼo, va̱árá Tu̱ʼun Ndio̱s ko̱ nája̱maña, jo tátu̱ʼun ki̱ʼa kundaa̱ va̱ʼa chááka̱ iniyó kuaʼa̱nyó, ki̱ʼa jaá ndundaa̱ chááka̱yó ña̱ kandísayó.
5. Naʼa̱ndu̱ ña̱ ió ña̱ñúʼúndu̱ nuu̱ kivi̱ Ndio̱s néʼendu̱
¿Ndiva̱ʼa ni̱ka̱xindu̱ kananíndu̱ testigo Jeová? Kande̱ʼéndó VIDEO ta kanatúʼúnndó saʼa̱ ña̱ va̱xi yóʼo:
¿Ndiva̱ʼa kando̱o va̱ʼa kivi̱ yóʼo ña̱ naníndu̱ testigo Jeová?
¿Ndiva̱ʼa ni̱ka̱xi Jeová na̱yivi kakuu testigo na? Jáchi̱, kuaʼa̱ ndiva̱ʼo ña̱to̱ʼón káʼa̱nna saʼa̱ Ndio̱s, sa̱ʼá ña̱yóʼo na̱ testigo Jeová kástu̱ʼunna ña̱ ndaa̱ saʼa̱ Jeová, ña̱ kúúna Ndio̱s ndaa̱ ndísa. Ná kande̱ʼéyó java ña̱to̱ʼón káʼa̱nna.
Java na̱ kuendá religión jánaʼa̱na ña̱ Ndio̱s kúni̱na ña̱ ná kuchúun na̱yivi toʼó jaá kekáʼnona Ndio̱s. Jo ¿á ña̱ ndaa̱ kúú ña̱yóʼo? Kaʼvindó Levítico 26:1 ta kanatúʼúnndó saʼa̱ ña̱ va̱xi yóʼo:
Tátu̱ʼun káchi versículo yóʼo, ¿ndiku̱ú ña̱ ndaa̱? ¿Ndixi káʼán Ndio̱s saʼa̱ ña̱ kúú toʼó?
Java ta̱ ndíta nu̱ú nuu̱ javaka̱ religión káchira ña̱ Jesús kúúna Ndio̱s. ¿Á ña̱ ndaa̱ kúú ña̱yóʼo? Kaʼvindó Juan 20:17 ta kanatúʼúnndó saʼa̱ ña̱ va̱xi yóʼo:
Tátu̱ʼun káchi versículo yóʼo, ¿ndíki̱án kúú ña̱ ndaa̱? ¿Á inu̱ú kúú Ndio̱s xíʼín Jesús?
¿Ndixi kuu ini miíní viti ña̱ ni̱kundaa̱ ininí ña̱ Jeová saʼndána chúun nuu̱ na̱ kúú testigo na, ña̱ ná jánaʼa̱na ña̱ ndaa̱ saʼa̱ miína ta saʼa̱ De̱ʼena?
6. Naʼa̱ndu̱ ña̱ kíʼvi̱ ini saʼa̱ táʼan ndísandu̱
Tu̱ʼun Ndio̱s chitáʼan na̱ cristiano ña̱ kúúna tátu̱ʼun iin yikí ko̱ño na̱yivi. Kaʼvindó 1 Corintios 12:25, 26 ta kanatúʼúnndó saʼa̱ ña̱ va̱xi yóʼo:
¿Ndíki̱án ndátiyó kee na̱ kúú cristiano ndaa̱ ndísa tá javaka̱ na̱ cristiano ndóʼona tu̱ndóʼó?
Tátu̱ʼun ndéʼé miíní, ¿ndixi naʼa̱ na̱ testigo Jeová ña̱ kíʼvi̱ ini saʼa̱ táʼanna?
Tá ió iin ñuu nuu̱ ndóyi na̱ testigo Jeová ndóʼona tu̱ndóʼó javaka̱ na̱ kúú testigo Jeová ndóyi inííkúú ñuyíví kama ndukúna chindeéna na̱yóʼo. Tá kúni̱ndó kande̱ʼéndó saʼa̱ iin ña̱yóʼo, kande̱ʼéndó VIDEO. Tá ni̱ndiʼi kanatúʼúnndó saʼa̱ ña̱ va̱xi yóʼo:
¿Á kuu káchiní ña̱ tátu̱ʼun ki̱ʼa chindeé táʼan na̱ testigo Jeová naʼa̱ ña̱ kíʼvi̱ ini saʼa̱ táʼanna? Ta ¿ndiva̱ʼa?
Na̱ cristiano ndaa̱ ndísa naʼa̱na ña̱ kíʼvi̱ ini saʼa̱ táʼanna ta chindeé táʼanna tá yáʼana nuu̱ tu̱ndóʼó.
ÑA̱ KÁʼA̱N INGA NA̱YIVI: “Na̱ testigo Jeová iin religión sa̱ává kúúna”.
¿Ndá ama ni̱kusáʼá Jeová chinanína “testigo” na̱yivi kekáʼnoña?
ÑA̱ NI̱KATI̱ʼAYÓ
Na̱ testigo Jeová kúúna cristiano ndaa̱ ndísa. Iin túʼún na̱veʼe kúúna inííkúú ñuyíví ta kekáʼnona Ndio̱s, ta kandísana ña̱ ndaa̱ va̱xi nuu̱ Tu̱ʼun Ndio̱s ta janí jánaʼa̱na ña̱ ndaa̱ saʼa̱ Jeová.
¿Á naku̱ʼun inión?
¿Ndiva̱ʼa ni̱ka̱xindu̱ kananíndu̱ testigo Jeová?
¿Ndixi naʼa̱ndu̱ ña̱ kíʼvi̱ ini saʼa̱ táʼan ndísandu̱?
¿Á káʼán miíní ña̱ na̱ testigo Jeová kúúna cristiano ndaa̱ ndísa?
KUU NANDUKÚNÍ JAVAKA̱ ÑA̱ʼA
Kundaa̱ va̱ʼa chááka̱ ininí saʼa̱ na̱ testigo Jeová.
Kande̱ʼéní ndixi ni̱kee na̱ testigo Jeová jaá ni̱naʼa̱na iin ña̱to̱ʼón jánaʼa̱ javaka̱ religión.
Nandukúní ña̱ kúni̱ní kundaa̱ ininí saʼa̱ na̱ testigo Jeová.
“Ña̱ jaá ndakatu̱ʼúnna saʼa̱ na̱ testigo Jeová” (Sección nuu̱ jw.org)
Ña̱ xiní iʼvi̱ ni̱kee xíʼín Stephen jaá ni̱ya̱ʼara ni̱keera kuaʼa̱ kua̱chi náʼno. Kande̱ʼéní ndiku̱ú ña̱ ni̱sande̱ʼéra kée na̱ testigo Jeová ni̱chindeéña jaá ni̱naja̱mara tátu̱ʼun nákani inira.
“Kivi̱ ta kivi̱ sa̱ndukuaʼa̱ka̱ tu̱ndóʼó sa̱ndoʼoi” (La Atalaya, 1 de julio de 2015)
a Atalaya, ña̱ kúú publicación tavá chááka̱ na̱ testigo Jeová, ni̱kusáʼá kánaña nda̱ kuia̱ 1879 ta nda̱ kivi̱ víti kánaña.