ÑA̱ SÁNAʼA̱ ÑA̱ 2

Ña̱ va̱ʼa cháá ga̱ ví kú ña̱ ná kaneʼe táʼan va̱ʼa yó síʼín ndióxi̱

Ña̱ va̱ʼa ntsiva̱ʼa kíá ña̱ ná kaneʼe táʼan va̱ʼa ní síʼín Ndióxi̱. Ndióxi̱ sánaʼa̱ ra̱ nuu̱ ní ñixi kuvi koo sii̱ iñi ní tsa ñi iin ña̱ʼa e̱sátáuʼvi̱ miíní; sáka̱ku ra miíní nuu̱ ntsiʼi ña̱ kiñi ña̱ kántsísia na̱ ñuyíví yóʼo tsa ntsiʼi ña̱ sátáuʼvi̱ miío. Ndióxi̱ tsasóʼó rá ña̱ síka̱ta̱ʼví ní nuu̱ ra̱. Koo vivií iñi ní tsa koo tundeé iñi ní (Salmo 71:5; 73:​28). Ndióxi̱ chindeé rá miíní tá ná ya̱ʼa ní nuu̱ tu̱ndóʼó káʼnu (Salmo 18:​18). Ndióxi̱ ku̱aʼa ra iin ña̱ va̱ʼa ntsiva̱ʼa nuu̱ ní, ña̱ kutsaku ní ntsisaá kivi̱ nuu̱ Ñúʼu̱ ntseʼei̱ yóʼo (Romanos 6:​23).

Tá kúyatsi yó nuu̱ Ndióxi̱, kúyatsi yó nuu̱ na̱ néʼe táʼan va̱ʼa síʼín Ndióxi̱. Na̱ néʼe táʼan va̱ʼa síʼín Ndióxi̱ kaneʼe táʼan va̱ʼa na síʼín ní. Kunde̱ʼé ní na̱ tatún ñani táʼan ní. Na̱ yóʼo kusii̱ iñi na sánaʼa̱ na̱ nuu̱ ní siaʼa̱ Ndióxi̱, chindeé ná miíní tsa ku̱aʼa na tundeé iñi nuu̱ ní.

Ko̱ kúú yó tatún Ndióxi̱. Ña̱ ná ndandukú yó Ndióxi̱, siñiñúʼú yó kundaa̱ va̱ʼa iñi yó ña̱yóʼo: ña̱ ná ndandukú yó Ndióxi̱ ko̱ kúñi̱a̱ kachia ña̱ iin kú yó síʼín Ndióxi̱. Tsa ­káʼnu ntsiva̱ʼa kú Ndióxi̱ tsa̱ ndi̱chí cháá ga̱ tsa̱ kúvi kée ntsikuií va ña̱ʼa. Iin túʼún mií va Ndióxi̱ kú tsa̱ kuvi kaʼntsa chuun nuu̱ ñuyíví yóʼo. Ña̱kán, tú kúñi̱ yó kaneʼe táʼan va̱ʼa yó síʼín Ndióxi̱, siñiñúʼú yó tsásóʼo yó ña̱ kaʼa̱n Ndióxi̱ tsa kee yó ña̱ kúñi̱ ra̱. Ña̱ ná tsásóʼo yó ña̱ kaʼa̱n Ndióxi̱ ña̱ va̱ʼa mií vá yó kíá (Isaías 48:​18).