Kuu kanetáʼan va̱ʼa miíní xíʼín Jeová

Jeová kúni̱na ña̱ kanaʼá chááka̱ña miíní. ¿Ndiva̱ʼa? Jáchi̱ Jeová ndáti ña̱ tá chááka̱ ná kanaʼá miíní saʼa̱na —saʼa̱ ndijaá ña̱ va̱ʼa ió nuu̱na, tátu̱ʼun kéena iin ta iin ña̱ʼa ta ña̱ va̱xina kéena— jaá kían kutoó chááka̱ní kanetáʼan va̱ʼaní xíʼínna. Jo ¿á miía̱ndaa̱ ndísa kuu kanetáʼan va̱ʼayó xíʼín Ndio̱s? (Kaʼviní Salmo 25:14). ¿Ndíki̱án kée miíní jaá kandeéní niʼi̱ní ña̱? Tu̱ʼun Ndio̱s xíʼo respuesta nuu̱ pregunta yóʼo ta kástu̱ʼunña̱ xíʼínyó ndiva̱ʼa ña̱ kanetáʼan va̱ʼaní xíʼín Jeová kúú ña̱ ndayaʼvi chááka̱ kuu kéení.

1. ¿Ndíki̱án xíka̱ Jeová nuu̱ miíní?

“Ta koo ini ndo̱ nandukú ndó Ndios ndidaá kuu̱ [kivi̱], dá ná kuyati cháá ka̱ na̱ koo na xíʼín ndó” (Santiago 4:8). ¿Ndíki̱án kúni̱ kachi tu̱ʼun yóʼo? Jeová xíka̱na nuu̱ní ña̱ kanetáʼan va̱ʼaní xíʼínna. Javana kuu nákani inina ña̱ kuáchi̱vá kían ña̱ nákani iniyó kanetáʼan va̱ʼayó xíʼín iin na̱ ko̱ xiníyó, viʼikavi Ndio̱s. Jo miína ni̱ja̱ndákoona nuu̱ Tu̱ʼun na, Biblia, ndijaá ña̱ xiniñúʼúnyó kundaa̱ iniyó saʼa̱ tátu̱ʼun ió inina jaá ná kuu natuyati chááka̱yó nuu̱na. Tá kaʼviyó nuu̱ Biblia tu̱ʼun ni̱ja̱ndákoo Ndio̱s nuu̱yó, ña̱ netáʼan va̱ʼayó xíʼín Jeová nduu ni̱sísa chááka̱ña va̱árá ko̱ xiníyóna.

2. ¿Ndiva̱ʼa Jeová kúú na̱ kuu kanetáʼan va̱ʼa chááka̱ xíʼínní?

Jeová kúni̱ ndiva̱ʼona miíní. Ta kúni̱na ña̱ jaá kuití ná kujii̱ ininí kooní ta ná nandukúnína tá xiniñúʼúnnína. Kuu chikodó ndó “ndidaá ta̱ndíʼi ini ndóʼo ndó noo̱ ndáʼa̱ Ndios,” dá chi̱ no̱ón kúú na̱ ndíʼi ini saʼa̱ ndo̱ (1 Pedro 5:7). Jeová jaá ió nduuna chindeéñana, ki̱ʼona ta̱ndeé ini ta kunijo̱ʼona na̱ netáʼan va̱ʼa xíʼínna (kaʼviní Salmo 94:18, 19).

3. ¿Ndíki̱án ndáti Jeová kee na̱ netáʼan va̱ʼa xíʼínna?

Jeová kúni̱na ndijaá na̱yivi, jo “netáʼan va̱ʼa chááka̱na xíʼín na̱ kée ña̱ va̱ʼa” (Proverbios 3:32). Jeová ndáti ña̱ na̱yivi netáʼan va̱ʼa xíʼínna ná kéena ña̱ káchi Jeová ña̱ kúú ña̱ va̱ʼa ta ná jándákoona ña̱ kéena ña̱ káchi Jeová kúú ña̱ kini. Ndandikú javana nákani ini ña̱ o̱kandeé miívana saa̱na keena tátu̱ʼun ki̱ʼo ndáti Jeová keena. Jo Jeová va̱ʼa ndiva̱ʼo inina ta nakiʼin va̱ʼana ndijaá na̱ kúni̱ña ta kéndúsana kéena ña̱ nátaʼan inina (Salmo 147:11; Hechos 10:34, 35).

NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO

4. Abrahán sa̱ netáʼan va̱ʼa xíʼín Jeová

Ña̱ nakani Tu̱ʼun Ndio̱s saʼa̱ Abrahán (ta janí naníra Abrán) xíʼo ña̱ kundaa̱ iniyó ña̱ kúni̱ kachi kanetáʼan va̱ʼayó xíʼín Ndio̱s. Kaʼvindó saʼa̱ Abrahán nuu̱ Génesis 12:1-4 ta kanatúʼúnndó saʼa̱ ña̱ va̱xi yóʼo:

• ¿Ndíki̱án ni̱xika̱ Jeová nuu̱ Abrahán?

• ¿Ndíki̱án ni̱kachi Jeová kéena?

• ¿Ndíki̱án ni̱kee Abrahán tá ni̱ndiʼi ni̱saʼnda Jeová chúun nuu̱ra?

5. Ña̱ xíka̱ Jeová nuu̱ na̱ netáʼan va̱ʼa xíʼínna

Nda jaá ndátivayó niʼi̱yó ndá ña̱ʼa nuu̱ na̱ netáʼan va̱ʼa xíʼínyó.

• ¿Ndíki̱án ndáti miíní niʼi̱ní nuu̱ na̱ netáʼan va̱ʼa xíʼínní?

Kaʼvindó 1 Juan 5:3 ta kanatúʼúnndó saʼa̱ ña̱ va̱xi yóʼo:

• ¿Ndíki̱án ndáti Jeová kée na̱ netáʼan va̱ʼa xíʼínna?

Tá kúni̱yó kunijo̱ʼoyó Jeová ndandikú kánian najáma̱yó java ña̱ʼa kéeyó o tátu̱ʼun ió iniyó. Kaʼvindó Isaías 48:17, 18 ta kanatúʼúnndó saʼa̱ ña̱ va̱xi yóʼo:

• ¿Ndiva̱ʼa xíka̱ Jeová nuu̱ na̱ netáʼan va̱ʼa xíʼínna ña̱ najáma̱na miína?

6. Ña̱ kée Jeová xíʼín na̱ netáʼa va̱ʼa xíʼínna

VIDEO: Jeová ni̱kixina ni̱jaka̱kuna yuʼu̱ (3:20)

• ¿Ndíki̱án ni̱kee Jeová jaá ni̱chindeéna ñá ñáʼa̱ ni̱ya̱ʼa nuu̱ video, jaá yáʼaña tu̱ndóʼó ndóʼoña xíʼín ña̱ ko̱va̱ʼa nákani iniñá?

Kaʼvindó Isaías 41:10, 13 ta kanatúʼúnndó saʼa̱ ña̱ va̱xi yóʼo:

• ¿Ndíki̱án káchi Jeová kéena saʼa̱ ndiʼi na̱ netáʼan va̱ʼa xíʼínna?

• ¿Á káʼán miíní ña̱ Jeová kuu kakuu iin na̱ netáʼan va̱ʼa xíʼínyó? Ta ¿ndiva̱ʼa?

7. Tá netáʼan va̱ʼayó xíʼín Jeová ña̱ ndayaʼvi kúú ña̱ káʼa̱nyó xíʼínna

Tá ndatúʼúnyó xíʼín na̱ netáʼan va̱ʼa xíʼínyó jaá ni̱sísa ña̱ netáʼan va̱ʼayó xíʼínna. Kaʼvindó Salmo 86:6, 11 ta kanatúʼúnndó saʼa̱ ña̱ va̱xi yóʼo:

• ¿Ndixi kéeyó jaá kanatúʼúnyó xíʼín Jeová?

• ¿Ndixi kée Jeová jaá ndatúʼúnna xíʼínyó?

ÑA̱ NI̱KATI̱ʼAYÓ

Jeová kúni̱na kanetáʼan va̱ʼaní xíʼínna ta chindeéna miíní jaá kuyati chááka̱ní nuu̱na.

¿Á naku̱ʼun inión?

• ¿Ndixi kée Jeová jaá chindeéna na̱ netáʼan va̱ʼa xíʼínna?

• ¿Ndiva̱ʼa káchi Jeová ña̱ na̱ netáʼan va̱ʼa xíʼínna kánian najáma̱na miína?

• ¿Á káʼán miíní ña̱ kuaʼa̱ ndiva̱ʼo ña̱ʼa xíka̱ Jeová nuu̱ na̱ netáʼan va̱ʼa xíʼínna? ¿Ndiva̱ʼa nákani ininí jaá?

KUU NANDUKÚNÍ JAVAKA̱ ÑA̱ʼA

¿Ndiku̱ú ña̱ va̱ʼa niʼi̱ní ña̱ kanetáʼan va̱ʼaní xíʼín Ndio̱s?

“Iin ña̱ ndayaʼvi ndiva̱ʼo kúú ña̱, kanaʼáyó Jeová” (La Atalaya, 15 de febrero de 2003)

Kati̱ʼaní kanetáʼan va̱ʼaní xíʼín Ndio̱s.

“¿Ndixi kéei jaá kanetáʼan va̱ʼai xíʼín Ndio̱s?” (Lo que los jóvenes preguntan. Respuestas prácticas [volumen 2], capítulo 35)

Kundaa̱ ininí ndiva̱ʼa iin ñá ñáʼa̱ káchi ña̱ ni̱sanetáʼan va̱ʼaña xíʼín Jeová ni̱jaka̱kuña.

“¡Yuʼu̱ ko̱ kúni̱ kivi!” (La Atalaya, núm. 1 2017)

Kunijo̱ʼoní tátu̱ʼun nakani java na̱kuálí tátu̱ʼun nákani inina saʼa̱ Jeová.

¿Ndíki̱án kúni̱ kachi ña̱ kanetáʼan va̱ʼayó xíʼín Ndio̱s?