LECCIÓN 12
¿Ndiku̱ú ña̱ kuu chindeé miíní jaá o̱jándákooní ña̱ jákuáʼaní Tu̱ʼun Ndio̱s?
Ña̱ jákuáʼayó Tu̱ʼun Ndio̱s kúúña tátu̱ʼun ña̱ kéeyó iin viaje ña̱ kutoóyó kéeyó. Jo ña̱ kuáchi̱vá kúúña. Java íchi̱ kuu ndakatu̱ʼúnyó miíyó á miía̱ndaa̱ kandeéyó jákuáʼayóña. Jo ¿ndiku̱ú ña̱ va̱ʼa niʼi̱yó tá ná ndukundeéyó kéeyóña? ¿Ndíki̱án kuu chindeé miíní jaá o̱jándákooní ña̱ va̱árá yáʼaní tu̱ndóʼó?
1. ¿Ndiku̱ú ña̱ va̱ʼa niʼi̱yó tá ná jákuáʼayó Tu̱ʼun Ndio̱s?
“Chi̱ to̱ʼon takí kúú to̱ʼon Ndios, ta to̱ʼon ndakí nda̱ʼo kíán” (Hebreos 4:12). Tu̱ʼun Ndio̱s kúú iin libro ña̱ ndayaʼvi ndiva̱ʼo ta nuu̱ñá va̱xi ña̱ nákani ini Ndio̱s ta janí káʼa̱nña ndixi kuu ini Ndio̱s xíʼín miíní. O̱ju̱ú siva̱ʼa chindeéña miíní kati̱ʼa chááka̱ní saʼa̱ Ndio̱s janí chindeéña ka̱xiní ña̱ va̱ʼa keení, ta janí ki̱ʼa ña̱ kandeé ininí ña̱ koo chínuu̱. Jo ña̱ kúni̱ʼi chááka̱ kían ña̱ Biblia kuu chideéán miíní jaá kanetáʼan va̱ʼaní xíʼín Jeová. Tá iin iin jákuáʼaníña sonóní, ña̱ ndee̱ ii̱ Ndio̱s chindeéan miíní jaá najáma̱ní ta niʼi̱ní ña̱ va̱ʼa.
2. ¿Ndiva̱ʼa ña̱ kúni̱ʼi kían ña̱ nákuniyó ña̱ ndaa̱ va̱xi nuu̱ Tu̱ʼun Ndio̱s kúú ña̱ ndayaʼvi ndiva̱ʼo?
Ña̱ ndaa̱ jánaʼa̱ Tu̱ʼun Ndio̱s kían tátu̱ʼun iin tesoro ña̱ ndayaʼvi ndiva̱ʼo. Sa̱ʼá ña̱yóʼo mií Tu̱ʼun Ndio̱s káchi xíʼínyó: “Kuiin ña̱ ndaa̱ ta o̱xi̱komiívaún ña̱” (Proverbios 23:23). Ta jaá ñuʼu iniyó ña̱ ndayaʼvi kúú ña̱ ndaa̱ ña̱ va̱xi nuu̱ Tu̱ʼun Ndio̱s, jaá ndíʼi iniyó jákuáʼayó va̱árá kuu ndóʼoyó tu̱ndóʼó (kaʼviní Proverbios 2:4, 5).
3. ¿Ndíki̱án kée Jeová saʼa̱ miíní jaá o̱jándákooní ña̱ jákuáʼaní?
Jeová kúú na̱ Ni̱kava̱ʼa nditáʼa̱n ña̱ʼa xíʼín ndee̱ ió nuu̱na ta kúni̱na kanetáʼan va̱ʼana xíʼínní, náʼá va̱ʼana miíní ta kúni̱na chindeéna miíní jaá ná kundaa̱ chááka̱ ininí saʼa̱na. Ndio̱s kuu ki̱ʼona nuu̱ndó ña̱ “kóni̱ ndó kee ndó ña̱ kóni̱ na̱, ta xíʼo taʼani na ña̱ kándéé ndó kee ndóa̱n” (kaʼviní Filipenses 2:13). Sa̱ʼá ña̱yóʼo, tá ndandikú xiniñúʼúnní ña̱ kutoóní jákuáʼaní o kéení ña̱ kati̱ʼaní kuaʼa̱nní Ndio̱s janí chindeéña jaá kéeníña. Ta janí, tá xiniñúʼúnní ndee̱ jaá yáʼaní java tu̱ndóʼó o ña̱ kéendava̱ʼana xíʼínní, janí ió nduu Ndio̱s chindeéñana. O̱jándákooní kaka̱taʼvi̱ní nuu̱ Jeová ña̱ ná chindeéna miíní kakaní kuʼu̱nní xíʼín ña̱ jákuáʼaní Tu̱ʼun Ndio̱s (1 Tesalonicenses 5:17).
NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO
Ná kande̱ʼéyó ndíki̱án kuu kéení jaá o̱jándákooní ña̱ jákuáʼaní Tu̱ʼun Ndio̱s va̱árá inganá ko̱ kúni̱na ná jákuáʼaní o va̱árá ió kuaʼa̱ chúun kéení. Tá ni̱ndiʼi jaá ná kande̱ʼéyó ndíki̱án kée Jeová jaá chindeéna miíní kakaní kuʼu̱nní chínuu̱.
4. Koo ininí ña̱ jákuáʼaní Tu̱ʼun Ndio̱s ná kakuu ña̱ ndayaʼvi chááka̱ nuu̱ní
Ndakána kuaʼa̱ ña̱ʼa ketein nuu̱yó jaá taváyó tiempo jákuáʼayó Tu̱ʼun Ndio̱s. ¿Ndíki̱án kuu kéení? Kaʼvindó Filipenses 1:10, TNM ta kanatúʼúnndó saʼa̱ ña̱ va̱xi yóʼo:
Nuu̱ miíní, ¿“ndíki̱án ndayaʼvi chááka̱”?
¿Ndíki̱án kuu keení jaá ña̱ jákuáʼaní Tu̱ʼun Ndio̱s ná kakuu ña̱ kúú nu̱ú nuu̱ní?
Tá ná jákutuní iin ña̱ʼa xíʼín ñu̱tí ta káʼánní taání java yuu̱, ta yuu̱ o̱kétaka̱ ke̱eña̱.
Jo, tá xinañúʼúka̱ ná taání yuu̱, tá ni̱ndiʼi kétavá ke̱e ndiʼi ñu̱tí. Ki̱ʼa janí, tá xinañúʼúka̱ ná kéení ña̱ “ndayaʼvi chááka̱”, jaávi kando̱o taʼani tiempo ní kéení javaka̱ ña̱ʼa.
Ña̱ jákuáʼayó Tu̱ʼun Ndio̱s ki̱ʼo ña̱ kujii̱ iniyó, jáchi̱ saa̱yó kanaʼáyó Ndio̱s ta kekáʼnoyóna. Kaʼvindó Mateo 5:3 ta kanatúʼúnndó saʼa̱ ña̱ va̱xi yóʼo:
Tá ña̱ jákuáʼa Tu̱ʼun Ndio̱s ná kakuu ña̱ kúú nu̱ú nuu̱yó, ¿ndiku̱ú ña̱va̱ʼa niʼi̱yó?
5. O̱jándákooní ña̱ jákuáʼaní Tu̱ʼun Ndio̱s va̱árá ko̱ nátaʼan ini javaka̱na
Ndandikú javana kúni̱na jánándiko̱na ininí jaá jándákooní ña̱ jákuáʼaní Tu̱ʼun Ndio̱s. Kande̱ʼéní ña̱ ni̱ndoʼo Francesco. Kande̱ʼéndó VIDEO ta kanatúʼúnndó saʼa̱ ña̱ va̱xi yóʼo:
¿Ndixi ni̱kee na̱veʼe xíʼín na̱ netáʼan va̱ʼa xíʼín Francesco tá ni̱kachira ña̱ jákuáʼara Tu̱ʼun Ndio̱s?
¿Ndiva̱ʼa ña̱ va̱ʼa ni̱sakuuña ña̱ ko̱ ni̱ja̱ndákoora ña̱ jákuáʼara?
Kaʼvindó 2 Timoteo 2:24, 25 ta kanatúʼúnndó saʼa̱ ña̱ va̱xi yóʼo:
¿Ndixi káʼán na̱veʼení xíʼín na̱ netáʼan va̱ʼa xíʼínní saʼa̱ ña̱ jákuáʼaní?
Tátu̱ʼun káchi versículo yóʼo, ¿ndixi keení tá javana ko̱ nátaʼan inina ña̱ jákuáʼaní Tu̱ʼun Ndio̱s? Ta ¿ndiva̱ʼa?
6. Kandeé ininí ña̱ Jeová chindeéna miíní
Tá va̱ʼa chááka̱ ná kanetáʼan va̱ʼayó xíʼín Ndio̱s, ta kutoó chááka̱yó ki̱ʼoyó ña̱ kujii̱ inina. Va̱árá jaá, ndandikú kée kuáchi̱ña nuu̱yó najáma̱yó miíyó ta keeyó tátu̱ʼun ki̱ʼo saʼndá Jeová chúun. Tá ndandikú ndóʼoní ña̱yóʼo, o̱nákani ininí, jáchi̱ mií Jeová chindeéna miíní. Kande̱ʼéndó VIDEO ta kanatúʼúnndó saʼa̱ ña̱ va̱xi yóʼo:
Tátu̱ʼun ni̱xiniyó video, ¿ndíki̱án ni̱kee Jim jaá ni̱keera ña̱ kúni̱ Jeová?
¿Ndiku̱ú ña̱ kutoó chááka̱ní xiníní tátu̱ʼun ki̱ʼo ni̱ndoʼora?
Kaʼvindó Hebreos 11:6, TNM ta kanatúʼúnndó saʼa̱ ña̱ va̱xi yóʼo:
¿Ndíki̱án ki̱ʼo Jeová nuu̱ “na̱ ndíʼi ini nándukú ñá”, ña̱ kúni̱ kachi, na̱ ndukundeé kéena ña̱ kúni̱na?
¿Ndixi káʼánní kuu ini Jeová tá ndéʼéna ña̱ ndukundeéní jákuáʼaní Tu̱ʼun Ndio̱s?
ÑA̱ NDAKATU̱ʼÚN JAVAKA̱NA: “¿Ta miíní ndá chúun jákuáʼaní Tu̱ʼun Ndio̱s?”.
¿Ndixi kachiní?
ÑA̱ NI̱KATI̱ʼAYÓ
Va̱árá ña̱ jákuáʼaní Tu̱ʼun Ndio̱s kúú iin ña̱ kuáchi̱, jo ña̱yóʼo chindeéña miíní niʼi̱ní ña̱ kujii̱ ininí ndijaá tiempo. Tá jaá kuití ná kandeé ininí Jeová, miíná naki̱ʼo kuaʼa̱ ña̱ va̱ʼa nuu̱ní.
¿Á naku̱ʼun inión?
¿Ndiva̱ʼa káʼánní ña̱ ndayaʼvi ndiva̱ʼo kúú ña̱ ndaa̱ ña̱ va̱xi nuu̱ Tu̱ʼun Ndio̱s?
Viti ña̱ ni̱kundaa̱ iniyó “ndíki̱án ndayaʼvi chááka̱”, kánian kéeyó, ta ¿ndíki̱án kánian kée miíní?
¿Ndiva̱ʼa kánian kaka̱ní nuu̱ Jeová ná chindeéna miíní jaá o̱jándákooní jákuáʼaní Tu̱ʼun Ndio̱s?
KUU NANDUKÚNÍ JAVAKA̱ ÑA̱ʼA
Kande̱ʼéní komi̱ ña̱ʼa chindeé kuaʼa̱ na̱yivi jaá va̱ʼa kuchúunna̱ tiempo na̱.
“Ndixi kéeyó jaá va̱ʼa kuchúunyó tiempo yó” (¡Despertad!, febrero de 2014)
Iin ñáʼa̱ ni̱kutoóñá kéeñá ña̱ kúni̱ Ndio̱s, jo yíi̱ñá ko̱ kundaa̱ ndiʼi ini ta̱yóʼo ndíki̱án kúni̱ ñáʼa̱ yóʼo niʼi̱ñá. Kande̱ʼéní ndixi ni̱chindeé Jeová ñáʼa̱ yóʼo.
Jeová xíʼona ndee̱yó jaá ki̱ʼondeé iniyó tá yáʼayó tu̱ndóʼó (5:05)
Kande̱ʼéní ndixi ña̱ndeé ni̱saio ini iin ñáʼa̱ ni̱chindeéña yíi̱ñá.
Java íchi̱ káʼa̱n kuáchi̱na saʼa̱ na̱ testigo Jeová ña̱ saʼndá táʼanna na̱veʼe. Jo ¿á ña̱ ndaa̱ kúú ña̱yóʼo?
“¿Á saʼndá táʼan na̱ testigo Jeová na̱veʼe o jánakitáʼan va̱ʼañana?” (Artículo nuu̱ jw.org)