¡Kuu nataku tuku ndijaá táʼanní na̱ ni̱xiʼi̱!

Kundáʼví ndiva̱ʼo iniyó ta ndóʼo ndiva̱ʼo iniyó tá ni̱xiʼi̱ iin na̱ táʼanyó. Sa̱ʼá ña̱yóʼo Tu̱ʼun Ndio̱s káchian ña̱ ni̱xiʼi̱na kúúña tátu̱ʼun iin ña̱ xiní iʼvi̱ña (1 Corintios 15:​26). Nuu̱ lección 27, sa̱ ni̱kati̱ʼaní ña̱ Jeová jándíʼina nuu̱ ña̱yóʼo. ¿Jo ndixi koo saʼa̱ na̱ sa̱ ni̱xiʼi̱? Nuu̱ lección yóʼo, kundaa̱ va̱ʼa chááka̱ ininí saʼa̱ inga ña̱ ñúchí ndiva̱ʼo ni̱ka̱ʼa̱n Jeová keena: sa̱ yati ñúʼú Jeová jánátakuna millón ta millón na̱yivi jaá ná kandoyi jii̱na ndijaá táʼa̱n tiempo. ¡Na̱ ni̱xiʼi̱ nataku tukuna kandoyina! ¿Á miía̱ndaa̱ kuu koo ña̱yóʼo? ¿Á natakuna kandoyina indiví o nuu̱ Ñúʼu̱ Ndeʼi̱ yóʼo?

1. ¿Ndíki̱án kúni̱ Jeová keena saʼa̱ ndijaá táʼanyó na̱ ni̱xiʼi̱?

Chí kúu kíivá ini Jeová ña̱ jánátakuna na̱yivi na̱ ni̱xiʼi̱. Job, ni̱sakuura iin ta̱a ni̱sisa ni̱saio fe xíʼín Ndio̱s, sa̱ xíni̱ va̱ʼara ña̱ Ndio̱s o̱nándojó miívána saʼa̱ra tá ná kivira ta kanakaa̱rá “ini Yávi̱ ndi̱i”. Ni̱kachira xíʼín Ndio̱s: “Miíní ná kánaní yuʼu̱ ta yuʼu̱ ná káʼa̱in xíʼínní” (kaʼviní Job 14:​13-​15).

2. ¿Ndiva̱ʼa xíni̱ va̱ʼayó ña̱ na̱ ni̱xiʼi̱ kuu natakuna?

Tá ni̱saio Jesús nuu̱ Ñúʼu̱ Ndeʼi̱ yóʼo, Ndio̱s ni̱xi̱ʼona ndee̱ nuu̱ Jesús jaá ná jánátakuna na̱yivi na̱ ni̱xiʼi̱. Sa̱ʼá ña̱yóʼo Jesús ni̱ja̱nátakuna iin ñáʼa̱ lóʼo̱ 12 kuia̱ janí de̱ʼe iin ñáʼa̱ kuáa̱n (Marcos 5:​41, 42; Lucas 7:​12-​15). Tá ni̱ya̱ʼa kivi̱ Lázaro ta̱ netáʼan va̱ʼa xíʼín Jesús ni̱xiʼi̱vara. Ta, va̱árá sa̱ kumi̱ kivi̱ ña̱ ni̱xiʼi̱ra ta sa̱ ni̱ndu̱xivara, ta kúú ni̱ja̱nátakuña Jesús. Tá ni̱ndiʼi ni̱xika̱taʼvi̱ Jesús nuu̱ Ndio̱s, sa̱va̱ʼa ña̱ ni̱keena kúú ña̱ ni̱sande̱ʼéna yávi̱ ta kúú ni̱ʼi ndiva̱ʼo ni̱ka̱ʼa̱nna ta ni̱kachina: “¡Lázaro, kuaꞌán keta sata̱ véꞌe!”. Ta kúú “ni̱ keta ta̱a ni̱ xiꞌi̱ ñoó”, ¡ta kúú ta̱kúvara! (Juan 11:​43, 44). ¿Ndiki̱ʼoví ni̱kujii̱ ini na̱ netáʼan va̱ʼa ta na̱veʼe Lázaro tá ni̱natakura?

3. ¿Á nataku ndijaá táʼanní na̱ ni̱xiʼi̱?

Tu̱ʼun Ndio̱s káchi ña̱ “dánátaki Ndios na̱ ni̱ xiꞌi̱” (Hechos 24:​15). Na̱yivi na̱ jánátaku Jesús ko̱ ni̱saʼa̱n na̱yóʼo indiví (Juan 3:​13). Ndijaá na̱yóʼo ni̱kujii̱ ndiva̱ʼo inina ña̱ ni̱natakuna ni̱sandoyi tukuna nuu̱ Ñúʼu̱ Ndeʼi̱ yóʼo. Tátu̱ʼun ni̱kuu kivi̱ jaá, nda̱ chááva̱ kúmani̱ ta jánátaku Jesús mil ví millón na̱yivi jaá kandoyi jii̱na nuu̱ Ñúʼu̱ Ndeʼi̱ yóʼo ndijaá táʼa̱n tiempo nuu̱ iin ñuyíví ñúchí káa. Jesús ni̱kachina “ña̱ ndijaá táʼa̱n na̱ ni̱ndu̱xi ini yávi̱”—ña̱ kúni̱ kachi, ña̱ ndijaá táʼa̱n na̱yivi na̱ naku̱ʼun ini Ndio̱s saʼa̱—natakuna, nda̱ ndijaá na̱yivi na̱ ko̱ iinka̱ naku̱ʼun ini saʼa̱ natakuna (Juan 5:​28, 29, TNM, nota).

NÁ KUNDAA̱ VA̱ʼA CHÁÁKA̱ INIYÓ SAʼA̱ TEMA YÓʼO

4. Jesús ni̱naʼa̱na ña̱ kuu jánátakuna na̱ ni̱xiʼi̱

Kundaa̱ ininí saʼa̱ iin ta̱a sa̱netáʼan va̱ʼa xíʼín Jesús sa̱naní Lázaro. Kaʼvindó Juan 11:​14 xíʼín 38-​44, ta kanatúʼúnndó saʼa̱ ña̱ va̱xi yóʼo:

• ¿Ndiva̱ʼa náʼáyó ña̱ Lázaro ni̱xiʼi̱ ndísara? (Kande̱ʼéndó versículo 39).

• Tá Lázaro ni̱saʼa̱nra indiví, ¿á káʼán miíní ña̱ Jesús ni̱keena iin ña̱ mani̱ xiʼi̱nra ña̱ jánátakunara koo tukura Ñúʼu̱ Ndeʼi̱ yóʼo?

Kande̱ʼéndó VIDEO.

VIDEO: Jesús ni̱ja̱nátakuna Lázaro (1:​16)

5. ¡Kuaʼa̱ ndiva̱ʼo kúú na̱yivi nataku!

Kaʼvindó Salmo 37:​29 ta kanatúʼúnndó saʼa̱ ña̱ va̱xi yóʼo:

• ¿Ndeí kandoyi mil ví millón na̱yivi na̱ nataku?

Jesús jánátakuna kuaʼa̱ ndiva̱ʼo na̱yivi; o̱ju̱ú sa̱va̱ʼa na̱ ni̱sakekáʼno Jeová oo̱nni. Kaʼvindó Hechos 24:​15 ta kanatúʼúnndó saʼa̱ ña̱ va̱xi yóʼo:

• Tá ná saa̱ kivi̱ ña̱ natakuna, ¿ndáyoo kúúna kutoó chááka̱ miíní kuniní?

Nákani ininí sa̱ʼá ña̱yóʼo: ña̱ nuu̱ Jesús ko̱ kúúña iin tu̱ndóʼó ña̱ jánátakuna iin na̱ ni̱xiʼi̱, keena tátu̱ʼun ki̱ʼa kee iin tatá jándotona de̱ʼena.

6. Ña̱ nataku ndijaá táʼanní na̱ ni̱xiʼi̱ kuu ki̱ʼoña ta̱ndeé ini nuu̱ní jaá kandatiní ña̱ va̱xi chínuu̱

Ña̱ nakani Tu̱ʼun Ndio̱s saʼa̱ ña̱ ni̱kuu tá ni̱xiʼi̱ de̱ʼe jiʼí Jairo naki̱ʼoña ta̱ndeé ini nuu̱ kuaʼa̱ na̱ kundáʼví ini saʼa̱ táʼanna na̱ ni̱xiʼi̱. Kaʼvindó nuu̱ Tu̱ʼun Ndio̱s saʼa̱ ña̱ miía̱ndaa̱ ndísa ni̱ndoʼo na̱yóʼo va̱xiña nuu̱ Lucas 8:​40-​42 xíʼín 49-​56.

Tá kúmani̱ jánátaku Jesús de̱ʼe jiʼí Jairo, ni̱kachina xíʼínra: “O̱ sa̱ yu̱ꞌóo̱n. Sa̱va̱ꞌa yuꞌu̱ kandeé inóo̱n” (kande̱ʼéndó versículo 50). ¿Ndixi kuu chindeéña miíní ña̱ ndátiní ña̱ nataku na̱ ni̱xiʼi̱...

• ... tá ni̱xiʼi̱ iin na̱ táʼanní?

• ... tá nakaa̱ní nuu̱ iin tu̱ndóʼó nuu̱ kuu kiviní?

Kande̱ʼéndó VIDEO ta kanatúʼúnndó saʼa̱ ña̱ va̱xi yóʼo:

VIDEO: Ña̱ ndátiyó ña̱ nataku na̱ ni̱xiʼi̱ xíʼo ña̱ ndeé koo iniyó (3:​21)

• ¿Ndixi chindeéña ta naki̱ʼoña ta̱ndeé ini nuu̱ tatá Phelicity ña̱ ndátina nataku na̱ ni̱xiʼi̱?

ÑA̱ NI̱KATI̱ʼAYÓ

Tu̱ʼun Ndio̱s káchi ña̱ millón ta millón na̱yivi na̱ ni̱xiʼi̱ natakuna. Jeová kúni̱na ña̱ ná natakuna kandoyina ta ni̱xi̱ʼona ndee̱ nuu̱ Jesús jaá ná jánátakuna na̱ ni̱xiʼi̱.

¿Á naku̱ʼun inión?

• ¿Ndiva̱ʼa xíni̱yó ña̱ Jeová xíʼín Jesús kúni̱ ndiva̱ʼona jánátakuna ndijaá na̱ ni̱xiʼi̱?

• ¿Ndeí kandoyi kuaʼa̱ mil ví millón na̱yivi na̱ nataku: á indiví, o nuu̱ Ñúʼu̱ Ndeʼi̱? ¿Ndiva̱ʼa káʼánní jaá?

• ¿Ndiku̱ú ña̱ xíʼo ta̱ndeé ini nuu̱ miíní ña̱ miía̱ndaa̱ ndísa nataku na̱ táʼanní na̱ ni̱xiʼi̱?

KUU NANDUKÚNÍ JAVAKA̱ ÑA̱ʼA

Kaʼviní saʼa̱ javaka̱ ña̱ʼa kuu chindeé na̱ kundáʼví ini saʼa̱ táʼanna na̱ ni̱xiʼi̱.

“Ña̱ kuu chindeé na̱ kundáʼví ini saʼa̱ táʼanna na̱ ni̱xiʼi̱” (¡Despertad!, núm. 3 2018)

¿Á kuu chindeé Tu̱ʼun Ndio̱s iin na̱ kundáʼví ini saʼa̱ táʼanna na̱ ni̱xiʼi̱?

Tá ni̱xiʼi̱ iin na̱ kúni̱yó (5:​06)

Kande̱ʼéní ndixi kuu chindeéní iin na̱kuálí tá ni̱xiʼi̱ iin na̱ kúni̱na.

Chiya̱ʼvina (2:​07)

¿Á ió na̱ nataku indiví? ¿Á ió na̱ o̱nataku?

“¿Ndíki̱án kúni̱ kachi ña̱ natakuna?” (Artículo nuu̱ jw.org)