¿Ndíki̱án ndóʼo na̱ ni̱xiʼi̱?

¿Á ió iin na̱ táʼanní ni̱xiʼi̱? Tá tein ndóʼo ininí, á ndakatu̱ʼúnní miíní “¿Ndíki̱án ndóʼo na̱ ni̱xiʼi̱? ¿Á nandióko̱oi kuni tukui ndijaá na̱ táʼain na̱ ni̱xiʼi̱?”. Nuu̱ lección yóʼo xíʼín nuu̱ inga ña̱ va̱xi kundaa̱ iniyó saʼa̱ respuesta xíʼo Tu̱ʼun Ndio̱s ta naki̱ʼoña ta̱ndeé ini nuu̱yó.

1. ¿Ndíki̱án ndóʼo na̱ ni̱xiʼi̱?

Jesús ni̱kachina ña̱ tá xiʼi̱yó kúúña tátu̱ʼun tá kíxi̱ naáyó. ¿Ndiva̱ʼa kuu káchiyó ña̱ tá xiʼi̱yó kúúña tátu̱ʼun tá kíxi̱ naáyó? Tá iin na̱yivi kíxi̱ naána, ko̱ náʼá miívána ña̱ kuu nuu̱ nakaa̱na. Tá ni̱xiʼi̱ iin na̱yivi, ko̱ íʼvika̱na ta ni ko̱ ndóʼoka̱na ta ni iin túʼúnka̱ ña̱ʼa ko̱ náʼána. Tu̱ʼun Ndio̱s káchi “na̱ ni̱xiʼi̱ ko̱ miíka̱vá ña̱ʼa xíni̱na” (kaʼviní Eclesiastés 9:5).

2. ¿Ndixi chindeéña miíyó ña̱ ni̱kundaa̱ iniyó ña̱ ndaa̱ saʼa̱ na̱ ni̱xiʼi̱?

Kuaʼa̱ na̱yivi yu̱ʼúna kivina ta yu̱ʼúna xinína na̱ ni̱xiʼi̱. Tá miíní ndóʼoní ña̱yóʼo, ña̱ káʼa̱n Tu̱ʼun Ndio̱s saʼa̱ na̱ ni̱xiʼi̱ chindeéña miíní koo va̱ʼa ininí. Jesús ni̱kachi: “Saa̱ndó kundaa̱ inindó ña̱ ndaa̱ ta miía̱ndaa̱ kakuundó libre” (Juan 8:​32, TNM). Nája̱ma tátu̱ʼun jánaʼa̱ java religión xíʼín tátu̱ʼun káʼa̱n Tu̱ʼun Ndio̱s, nuu̱ Biblia ko̱ káʼa̱nña ña̱ ió iin xían nuu̱ ndóyi ánima̱ na̱ ni̱xiʼi̱, ña̱ xíkanuu ivá ánima̱na tá ni̱xiʼi̱na. Sa̱ʼá ña̱yóʼo ko̱ iin miíva ndóʼo ini tá sa̱ ni̱xiʼi̱na. Tátu̱ʼun na̱ ni̱xiʼi̱ ko̱ ña̱ʼa miíka̱va náʼána, ta o̱kúuka̱ keena tu̱ndóʼó xíʼínyó. Ta sa̱ʼá ña̱yóʼo ko̱ xiniñúʼúnka̱yó na̱kuatiyó saʼa̱na o ki̱ʼoyó ña̱ʼa nuu̱na.

Java na̱yivi káchi ña̱ kuu ndatúʼúnna xíʼín na̱ sa̱ ni̱xiʼi̱ jo ko̱ iin kuu kee ña̱yóʼo. Tátu̱ʼun ni̱xiniyó, na̱ ni̱xiʼi̱ “ko̱ miíka̱vá ña̱ʼa xíni̱na”. Kuu káʼánna ña̱ káʼa̱nna xíʼín táʼanna na̱ ni̱xiʼi̱ jo ña̱ ndaa̱ kían ña̱ demonio va káʼa̱n xíʼínna ta kéeña miíña kúúña na̱ ni̱xiʼi̱. Ña̱ ni̱kundaa̱ iniyó ña̱ ndaa̱ saʼa̱ na̱ ni̱xiʼi̱ chindeéña miíyó jaá o̱kéendava̱ʼa demonio xíʼínyó. Jeová káʼa̱nna xíʼínyó ña̱ ná o̱kuchúunyó ña̱ demonio jaá káʼa̱nyó xíʼín táʼanyó na̱ ni̱xiʼi̱ jáchi̱ ña̱yóʼo kuu játi̱víñayó (kaʼviní Deuteronomio 18:​10-​12).

3. Ña̱ miía̱ndaa̱ ndísa ndóʼoyó tá ni̱xiʼi̱yó

Inííkúú ñuyíví sa̱jíin sa̱jíin káʼánna saʼa̱ ña̱ ndóʼoyó tá ni̱xiʼi̱yó. Jo, o̱ju̱ú ndijaá tátu̱ʼun káʼánna kúú ña̱ ndaa̱.

• ¿Ndixi káʼánna saʼa̱ na̱ ni̱xiʼi̱ nuu̱ ió miíní?

VIDEO: ¿Ndíki̱án ndóʼo na̱ ni̱xiʼi̱? (iin táʼvi) (1:​19)

Kaʼvindó Eclesiastés 3:​20 ta kanatúʼúndó saʼa̱ ña̱ va̱xi yóʼo:

• Tátu̱ʼun káchi versículo yóʼo, ¿ndíki̱án ndóʼo na̱yivi ni̱xiʼi̱?

• Tá xiʼi̱ iin na̱yivi, ¿á xíkanuu ivá ánima̱na o espíritu na inga xían?

Tu̱ʼun Ndio̱s nakani saʼa̱ ña̱ ni̱kuu tá ni̱xiʼi̱ Lázaro, iin ta̱a sa̱netáʼan va̱ʼa xíʼín Jesús. ¿Ndíki̱án ni̱ndoʼo Lázaro káchi Jesús? Kaʼvindó Juan 11:​11-​14 ta kanatúʼúndó saʼa̱ ña̱ va̱xi yóʼo:

• Tátu̱ʼun, ¿ndíki̱án kúú ña̱ ni̱xiʼi̱ káchi Jesús?

• ¿Ndíki̱án kundaa̱ iniyó xíʼín tátu̱ʼun ni̱ja̱naʼa̱ Jesús?

• ¿Ndixi xiníní á ña̱ ndaa̱ kúú ña̱ jánaʼa̱ Tu̱ʼun Ndio̱s saʼa̱ ña̱ ndóʼoyó tá xiʼi̱yó?

4. Ña̱ ndaa̱ saʼa̱ na̱ ni̱xiʼi̱ jáka̱kuñayó nuu̱ ña̱to̱ʼón

Tá kati̱ʼayó ña̱ ndaa̱ saʼa̱ ña̱ ndóʼo na̱ ni̱xiʼi̱, ko̱ yu̱ʼúka̱yó na̱ ni̱xiʼi̱. Kaʼvindó Eclesiastés 9:​10 ta kanatúʼúnndó saʼa̱ ña̱ va̱xi yóʼo:

• ¿Á kuu kéendava̱ʼa na̱ ni̱xiʼi̱ xíʼínyó?

Tá kundaa̱ iniyó ña̱ ndaa̱ jánaʼa̱ Tu̱ʼun Ndio̱s ta ko̱ kandísaka̱yó ña̱ káʼán na̱yivi saʼa̱ na̱ ni̱xiʼi̱, ndiʼivá ña̱ yu̱ʼúyó ña̱ keena tu̱ndóʼó xíʼínyó ta janí ko̱ kekáʼnoka̱yó na̱ ni̱xiʼi̱. Kaʼvindó Isaías 8:​19 xíʼín Apocalipsis 4:​11, TNM ta kanatúʼúnndó saʼa̱ ña̱ va̱xi yóʼo:

• ¿Ndixi káʼán miíní kuu ini Jeová tá iin na̱yivi kekáʼnona na̱ ni̱xiʼi̱ o káʼánna ña̱ kuu chindeéña na̱ ni̱xiʼi̱?

5. Ña̱ ndaa̱ saʼa̱ na̱ ni̱xiʼi̱ naki̱ʼoña ta̱ndeé ini nuu̱yó

Jánaʼa̱na nuu̱ kuaʼa̱ na̱yivi ña̱, tá ni̱xiʼi̱na, jaá kuaʼa̱nna ndóʼo inina saʼa̱ ndijaá kua̱chi kini ni̱keena tá ni̱sataku̱na. Jo ña̱ va̱ʼa kúú ña̱ kundaa̱ iniyó ña̱ ko̱ iin miívá ndóʼo ini tá sa̱ ni̱xiʼi̱na, ni na̱ ni̱sakee kua̱chi kini ndiva̱ʼo. Kaʼvindó Romanos 6:7 ta kanatúʼúndó saʼa̱ ña̱ va̱xi yóʼo:

• Tátu̱ʼun káchi Tu̱ʼun Ndio̱s, tá ni̱xiʼi̱yó sa̱ ni̱ka̱kuvayó nuu̱ ndijaá kua̱chi ni̱keeyó. Sa̱ʼá ña̱yóʼo, ¿á káʼánní ña̱ na̱ ni̱xiʼi̱ ndóʼo inina jaá chíya̱ʼvina saʼa̱ kua̱chi ni̱keena tá sata̱?

Tá náʼáyó tátu̱ʼun ki̱ʼo ió ini Jeová kundaa̱ va̱ʼa iniyó ña̱ o̱kéendava̱ʼana xíʼín na̱ ni̱xiʼi̱. Kaʼvindó Deuteronomio 32:4 xíʼín 1 Juan 4:8, ta kanatúʼúndó saʼa̱ ña̱ va̱xi yóʼo:

• Iin Ndio̱s tátu̱ʼun nakani versículo yóʼo saʼa̱, ¿á kéendava̱ʼana xíʼín iin na̱yivi ni̱xiʼi̱?

• ¿Á káʼán miíní ña̱ kati̱ʼayó ña̱ ndaa̱ saʼa̱ na̱ ni̱xiʼi̱ xíʼoña ta̱ndeé ini nuu̱yó? Ta ¿ndiva̱ʼa?

ÑA̱ NI̱KATI̱ʼAYÓ

Tá ni̱xiʼi̱ iin na̱yivi, ni̱ndiʼiva ña̱ táku̱na. Ko̱ ndóʼoka̱ inina ta ni o̱keeka̱na tu̱ndóʼó xíʼínyó.

¿Á naku̱ʼun inión?

• ¿Ndíki̱án ndóʼo na̱ ni̱xiʼi̱?

• ¿Ndiva̱ʼa ña̱ ndaa̱ saʼa̱ na̱ ni̱xiʼi̱ jáka̱kuñayó nuu̱ ña̱to̱ʼón?

• ¿Ndiva̱ʼa naki̱ʼoña ta̱ndeé ini nuu̱yó ña̱ kundaa̱ iniyó ña̱ ndaa̱ saʼa̱ na̱ ni̱xiʼi̱?

KUU NANDUKÚNÍ JAVAKA̱ ÑA̱ʼA

Kundaa̱ ininí ndíki̱án kúni̱ kachi tu̱ʼun káʼa̱n xíʼínna alma nuu̱ Tu̱ʼun Ndio̱s.

“¿Ndíki̱án kúú alma?” (Artículo nuu̱ jw.org)

Kande̱ʼéní á Ndio̱s kéendava̱ʼana xíʼín na̱yivi indayá.

¿Á indayá kúú nuu̱ jándóʼo Ndio̱s ini na̱yivi? (3:​07)

¿Á kánian yu̱ʼúyó na̱ ni̱xiʼi̱?

Espíritu na̱ ni̱xiʼi̱... ¿á kuu chindeéñayó?, ¿o kéenda va̱ʼaña xíʼínyó? ¿Á miía̱ndaa̱, ióña? (Folleto)

Kundaa̱ ininí saʼa̱ iin ta̱a ni̱niʼi̱ ta̱ndeé ini tá ni̱kundaa̱ inira ña̱ ndaa̱ saʼa̱ na̱ ni̱xiʼi̱.

“Ni̱nataʼan ndiva̱ʼo ini ña̱ ndaa̱ káʼa̱n Tu̱ʼun Ndio̱s” (La Atalaya, 1 de febrero de 2015)