HAFUURA ADHDHA 11
Maxaafa Qullichcha Yaansissatto Wodda Caaldeexxa Laꞌo Alfa Dandeettattoki Hittate?
Mitte lumoxxa huje hujatee heddeꞌe safa sodattee egendette? Dedha huje tennee shollisate hitatto wodda shiixxisse shiixxisse saffattoxxinna hexxaan. Maxaafa Qullichcha yaansisanna konne jeejinni weli fakkaattaaxxe yaanen. Dedha, ‘Habaaꞌni yaansisa safanno?’ hitaꞌni heddattoxxi hexxaan. Tenne barachchoꞌni Maxaafa Qullichcha gammashshoti yaansissattoshshanna qoꞌnissattoshsha gargaaraaka mitte mitte shollaka oruwwa uundannon.
1. Maxaafa Qullichcha barra barrandeꞌni yaansisa hasisseeki mayeete?
Maxaafa Qullichcha yookiin ‘seera Yihowwaka’ barra barrandeꞌn yaansisaki manji, gammaashshotikenna yaane duuchchi isiꞌaa qabbeeke kadaan. (Faaro 1:1-3 yaansis.) Yaansisa safateꞌe, barra barrandeꞌni heenooka daqiiqa yaansisatee woꞌlaan. Mageniinxa qaale egendaꞌni metattoshshani, gammaashshoti yaansisatixxi halcha lebbaꞌni metaan.
2. Maxaafa Qullichcha yaansissatto wodda laꞌo alfitattoshsha atee gargaartaaxxi yaane maachcho?
Maxaafa Qullichchakenaaꞌni caaldeexxa laꞌo alfatee, yaansinsaannexxa yaane hekki hinaꞌni heda hasissaan. Ittan yaansinsaannexxa yaane ‘alalcha’ hasissaan. (Iyyaasu 1:8, lekkatibaꞌika qallassanjo) Yaansissatto wodda ifi iitta hite qori: ‘Tinni yaane Yihowwaa uuddaaxxa maa barsiissa? Tennee yaane hedho anxeꞌni hujeteꞌni hosisa dandeꞌannoki hittate? Tennee xiqse wele manjo gargaaratee laꞌoonfata dandeꞌannoki hittate?’
3. Maxaafa Qullichcha yaansissattoxxa yanna alfatee maa assa hasissa?
Maxaafa Qullichcha yaansissattoxxa yanna gophphee egendete? Yanna gophphaatteki ateen callabaan. ‘Yanna atixxa elo qicinni laꞌoonfatatee’ woꞌlaan. (Effesooni 5:16) Tenne assa dandeettattoki barra barrandeꞌni Maxaafa Qullichcha yaansissattoka Progiraama fulchedhatiten. Mitti mitti manni Maxaafa Qullichcha yaansisaꞌneeki gorsaten. Weli kinni barrumme dhiyaaniinxa yanna yaansisaaki hedhaan. Hashsha diiphii edi darre yaansisaakinna hedhaan. Ataꞌaa yaansisatee eldaaxi yanna heente?
BAꞌLAXXA QOꞌNE
Maxaafa Qullichcha yaansissatto wodda gammashshoti yaansissattoshsha gargaartaaxxa yaanuwwa uundannon. Barachchotenaaꞌni caaldeexxa laꞌo alfatee hitta qophpheessexxattoxxa uundannon.
Edo inde egennebeꞌnoxxa sagale laanginni xeꞌmifantaꞌni menannashshan, Maxaafa Qullichchanna gammachchiisaake garinni yaansisa dandeennannon
4.Maxaafa Qullichcha gammashshoti yaansisa dandeettattoki hittate?
Maxaafa Qullichcha yaansisa safa haꞌura dandeettaan. Kaddomaleꞌe, inde egennebeꞌnoxxa sagale higge higgeeni indanno wodda xeꞌmifantaꞌn meꞌinannashshanni, Maxaafa Qullichcha yaansisatee anfeennexxi ‘halchanna’ ittini lebbaꞌni meꞌitaan. 1 Pheexiroosi 2:2 yaansisse, okkooꞌni qortumuwwakeꞌn mariꞌatte:
Maxaafa Qullichcha barra barrandeꞌni yaansisa, yaansisatixxi halcha lebbaashsha assitaachcho fakkaattaꞌnee?
Mitti mitti manni Maxaafa Qullichcha gammashshoti yaansisa safee qico hubatate VIIDIYO uudde, Okkooꞌni buttiiꞌni hedheeke qortumuwwaꞌni mariꞌatte.
Viidiyoteꞌn uuddettexxi dargaggeeyye heene haꞌurtaaxxa yaane injiffattee?
Maxaafa Qullichcha barra barrandeꞌni yaansisatee fulcheꞌneeke herregaꞌni gennaashsha gargaarteexxi yaane maachcho?
Maxaafa Qullichcha gammashshoti yaansisatee maa assinee?
Yaansisa saffattoshsha gargaaraaka gorsuwwa:
Addachchiissaaxxa shollake laagadini qophpheessendeexxa Maxaafi Qullichchiinxa tika laꞌoonfat. Laagadi atikinni afemaꞌnoole; Haarooxxe Buttaxxa Tika laꞌoonfat.
Eetattoxxe Maxaafi Qullichchiinxe kutanaaꞌni yaansisa safi. “Maxaafa Qullichcha yaansisa safi” hitaꞌneexxa kollo uudi.
Yaansissettexxe kutaꞌni beesisa uggi. Konne Maxaafaꞌni afendaaxxa “Yaansissetteke Maxaafaꞌni Beesisa Uggi” hitaꞌneexxa kollo laꞌoonfat.
JW Library® Appilikeeshine Laꞌoonfat. Tennee appilikeeshine laꞌoonfatteꞌe, hexxettexxe bakka duuchchaꞌni, bilbiliki yookiin wele miyuwwinni Maxaafa Qullichcha yaansisa yookiin oodiyo caqasa dandeettatton.
Haarooxxe Buttaxxe Tikaꞌni afemaake Leba tarjaꞌni hedheeki kaartuwwi, kollo ittan hiyyuwwatixxi tika gammashshoti yaansissatoshsha gargaartaan.
5. Maxaafa Qullichcha qoꞌnisatee qophpheefat
Faaro 119:34 yaansisse, okkooꞌni qortumakeꞌni mariꞌatte:
Maxaafa Qullichcha yaansisati edi darre, yookiin tenne mariꞌantaannexxe Maxaafi Qullichchiinxe barachchoꞌaa qophpheefatati edi darre kadhata hasisseeki mayeete?
Tenne assinaannexxe mariꞌenaaꞌni caaldeexxa laꞌo alfa dandeettattoki hittate? Konne maxaafaꞌni hexxeexxa barachchuwwa qophpheeffattatto wodda buttiiꞌni hexxeexxa akeette hordofi:’
“Baꞌlaxxa Qoꞌne” hitaꞌneexxe beddo iimi gama, hedheeka keꞌitiinka deeruwwa yaansis.
Deeri giddo afendaaxxa xiqse yaansis, ittan barattaattexxe yaanenni xiqse afendaa qico hedi.
Qortumakee hiissichcho kaddaaxxe hiyyaꞌni yookiin daaloꞌni beesisa uggi; iitta assa barsiisanji atikinni sholla qicinni mariꞌattattoshsha gargaartaan.
Tennee egendeettaꞌa?
Yihowwxxi Naqaashe konneechchi edi darre gargariti hexxeexxa Maxaafi Qullichchiinxa tika laꞌoonfattaamman. Kaddomaleꞌe, Haarooxxe Buttaxxe Maxaafi Qullichchiinxe Tikaa lumoxxa saadino affeen, buutotinna tinni tika toggittetenna gargaadhdhatee shollaxxen, ittan Mageniinka deettichcha summa laꞌoonfattaꞌneexxen. “Yihowwxxi Naqaashshe Ifika Maxaafa Qullichcha Affee?” Hiyyaꞌneeka webisayiteteꞌni fuleeka yaada uudi
MITTI MITTI MANNI IITTA HIYYAAN: “Maxaafa Qullichcha ofoꞌle yaansisa jabaxxe hujen. Ani kinni isiꞌaa kaddaaxxa hunnanna yanna afebeꞌnon.”
Ati maa hitaatte?
BUKKASSA
Maxaafa Qullichakenaaꞌni caaldeexxa laꞌo alfatee, yaansissattoka progiraama fulchedhi, yaansissaattexxa yaane gargaadhdhitattoshsha Yihowwa gargaaroꞌaa kadhat, ittan Maxaafi Qullichchiinxe barachchoꞌaa qophpheeffat.
Hige Qalliyya
Maxaafa Qullichchakenaaꞌni caaldeexxa laꞌo alfatee gargaartaaxxi yaane maachcho?
Maxaafa Qullichcha yaansisateenna qoꞌnisatee atiꞌaa eldaaxxi yanna heente?
Maxaafa Qullichchakenaaꞌni mariꞌaantaannexxe mariꞌeꞌaa edisse qophpheeffata hasisseeki mayeete?
FIRFIRSI
Maxaafa Qullichcha yaansissatto wodda caaldeexxa laꞌo alfitattoshsha atee gargaartaaxxa mitte mitte yaanuwwa firfirsi.
“Maxaafa Qullichcha Gammachchiisaa Garinni Yaansisa” (Heqqecatixxa Xellepho Laakko. 1 2017)
Maxaafa Qullichcha yaansisatee gargaaraaka sase ora.
Maxaafa Qullichcha Gammachchiisaa garinni yaansinsaa qico qoꞌnis.
Maxaafa Qullichcha qeerraaxxe yannaaꞌa yaansiseeke mannanaaꞌni mitte mitte gorsa qodhdhi.