Yihowwa Ateꞌn Gammadaꞌneexxa Addata Dandeetattoki Hittate?

1. Mitte mitte Yihowwaxxi ergantoole maa hiyyaake yaadinni rakkattoꞌaa dandeetta?

YIHOWWA arda isike duuchchiingeꞌn gammadaꞌneexxa egeꞌna hittatta gammachchiissaaxxe yaane! Maxaafi Qullichchi: “Yihowwa arda isikeꞌn gammadaan” hiyyaan. (Faaro 149:4) Kaddomaleꞌe, mitti mitti manni adde woxati, ‘Yihowwa aneꞌn gammadaꞌnee?’ hiyye hedaaxxi hexxaan. Maxaafi Qullichchi borreessemeemmaka barro heddo addatendeexxi Yihowwaxxi mageneeffatoole, iitta hedheeke yaadinni mekki hitaammmaxxi yanna hexxemman.—1 Samu. 1:6-10; Iyyo. 29:2, 4; Faaro 51:11.

2. Yihowwa gammadaꞌneeki ayyeꞌnite?

² Maxaafi Qullichchi, Yihowwa qullichcha kadebaange manjoꞌninni gammadaaxxa haasoꞌaan. Mayee? Yesuusi Kirsitoosiꞌn adde anfeennexxa hujet leellinshaannaxxeenna cuuphemmeennaxxeeten. (Yoha. 3:16) Konne orinni cubbo hunjeennexxe, aadde aangeennexxenna Mageniinxa fedhiiꞌi muuxateꞌe kako aangeennexxa manji edo leellinshannon. (Huje 2:38; 3:19) Yihowwa isinni welt anfeennexxa mittunte jabeessedhatee tenneꞌe tarkaaffuwwa adhdhinanno wodda noꞌoꞌn gammadaan. Ifi isiꞌa mudhdhatee aangeennexxa kako heqqedhatee dandeennennexxa duuchcha assinaanne qicoꞌn noꞌoꞌn gammadaan, ittan isike jaaluwwishsha assee uudaan.—Faaro 25:14.

3. Tenne qoꞌneꞌn mariꞌe assinaanneki hoone sase qortumaꞌnite?

³ Mitti mitti manni Mageni insaꞌneꞌn gammadaꞌnebaashsha asse hedaꞌneeki mayeete kada dandeetta? Yihowwa noꞌoꞌn gammadaꞌneexxa leellishaꞌneeki hittate? Ittan, mitti Kirsitaani Mageni isoꞌn gammadaꞌneexxa afeexxa adde, jabeessedha dandeꞌaaki hittate?

MITTI MITTI MANNI MAGENI INSAꞌNEꞌNI GAMMADAꞌNEBAASHSHA ASSE HEDAꞌNEEKI MAYEETE KADA KANDEETTA?

4-5. Ifi tuffatatixxi hedino hexxoolenna heene yaane addata dandeennanno?

⁴ Noꞌo giddiiꞌn heddi oosummandenaaꞌn sanfe ifi tuffatatike yaadinni woꞌlaancho abixxinaanneken. (Faaro 88:15) Edireen hiyyemaaki mitti dayyi: “Duuchchii wodda ifi laꞌo afebeꞌnoke manjishsha assee uudaannan. Oosumma hedhennaxxa yanna Genneteteꞌn hedhatee kadabeꞌnoke manjo kadeennexxa addatonnolenna, hadi anki Genneteteꞌn hedhaashsha kadhataannaxxa qalli hiyyaannen.” Kirsitaana kadebaaki hadi nosseeki Tooni iitta hiyyeen: “Hadi anki aneꞌe eeyyaꞌneexxa yookiin aneꞌn gammadaꞌneexxa ijjenda haasoꞌe egeꞌnebaan. Tinninna insaꞌnee gammachchiissaaxxa mitte yaanenna asseebeꞌnoshsha asse hedannoshsha assiteen.”

⁵ Ifi laꞌo afebaake manjishsha assine hendannoshsha assaaki yaadi sammo noꞌoxxibaa dagaa wodda, Yihowwa ifiꞌaan ifibaaꞌa noꞌoꞌo harkessedheexxa qalli hiyya dandeennannon. (Yoha. 6:44) Isi noꞌo uuda dandeennabeꞌnoxxa noꞌo giddo hexxeexxa eloxxa yaane uudaan ittan qalbe noꞌoxxa egeꞌneꞌeen. (1 Samu. 16:7; 2 Zeena 6:30) Tenneꞌa isi noꞌo fiixxa manna kandeennexxa haasoꞌaa wodda addata dandeenannon.—1 Yohaannisi 3:19, 20.

6. Phawuloosi edo hujeexxe cubbonaaꞌn kexxeexxa isoꞌn laqendaammaxxi yaane maachcho?

⁶ Dhugaa barantebeꞌnochchi edi darre mitte mitte assinennexxi yaane taꞌi qicoꞌn ifi balleessanjiinsha assine hendannoshsha assitaan. (1 Pheex. 4:3) Yihowwaꞌa qeerraaxxe yannaa addatenshat ergatemaꞌn tureeke Kirsitaananna kadoole gonphe ifixxinni wolaancho abixxaaxxi hedhanna dandeettaan. Mitte mitte yanna Yihowwa atiꞌa gattoowwaal hiyyeebaashsha fakkaattaꞌnee? Iittate kaddoolee addatendeexxi Yihowwaxxi ergantoolena iitta hexxeexxe hedinon woꞌlaancho abixxitaꞌneexxa egeꞌna dayyeessitaan. Fakkeennakeꞌe, hawaariya Phawuloosi gonphe ifixxa hedaamma wodda yaadaamman. (Roome 7:24) Dhugaaten, hawaariya Phawuloosi cubbo hujeexxa aadde aageexxi cuuphemeemma manjon. Kaddoolenna, ‘hawaariyaate duuchchinaaꞌn jala hedheexxanna’ cubbaaleeeyyetenaaꞌn “taakkake” kadeeshsha haasoꞌeen.—1 Qoro. 15:9; 1 Ximo. 1:15.

7. Edo hunjennexxa cubbo uuddaaxxa heene yaane qalli hiyya hasissa?

⁷ Iimatiki Anni noꞌoki cubbo hunjennexxee aadde aangonnole noꞌa gattowwaal hiyyaaxxa kako aageen. (Faaro 86:5) Tenneꞌaa, hunjennexxe cubboꞌaa qalbe giddixxenni yaandaannexxe kaddoole, Yihowwa qaale isixxeꞌni noꞌaa gattowwaal hiyyaaxxa haasoꞌeeke yaadaꞌni addata dandeenannon.—Qola. 2:13.

8-9. Yihowwaꞌa gammachchiisa dandeettaaxxa yaane ijjenda assa dandeenabeꞌnon hitaaxxa hedino injifata dandeenannoki hittate?

⁸ Noꞌo duuchchiingi Yihowwaꞌa ergatematee dandeenennexxa duuchcha assa hansaannen. Kaddomaleꞌe, isi edo eeyyemmannoshsha assitaaxxa yaane ijjenda assa dandeenabeꞌnochcho noꞌoꞌn fakkaattoꞌa dandeettaan. Emaanda hiyyendaaxxi dayyo iitta hiteen: “Yihowwaꞌa fiixate kaddeexxa yaane uwwate hiyya, duuchchi wodda caaldeexxa yaane assaten hiyyee hedaannan. Duuchchii wodda assa dandeꞌannoxxi iimi darre hexxeexxa yaane ifinaaꞌn heeqqaannan. Hedennexxa yaane assa dandeꞌa gophanno wodda, ani ifiꞌn yaadaanneshshan Yihowwanna aneꞌn yaadaꞌneechcho fakkaattaꞌnemman.”

⁹ Yihowwaꞌa gammachchiisatee hasissaaxxa yaane ijjenda assa dandeennabeꞌnon hitaaxxa hedino injifata dandeennannoki hittate? Yihowwa yaane baꞌlise uudaꞌneeke Mageno kadeexxa qalli hiyye. Isi hunna noꞌoxxi iimi darre hexxeexxa yaane assinonna ijjenda hasabaan. Hunna noꞌoxxi dandeettaaxxa yaane duuchcha assinaane qicoꞌn assinaannexxa yaane lummisee uudaan. Maxaafi Qullichchi giddo, woꞌma hedhonni Yihowwaꞌa ergatemeeke mannika fakkeenna qalli hiyye. Fakkeennake Phawuloosi qalli hiyye. Jabaxxa hinaaffe afeemmaxxee heddo wogguwwaꞌa qeerraaka oruwwa meꞌeen ittan heddo gubaꞌuwwanna orgeesseen. Kaddomaleꞌe, hedheeki jeeji ergachchotixxe hujeꞌn assoꞌa hasaꞌneexxa yaane assabbaashsha kuteexxeꞌe, Yihowwa isoꞌn gammadaamabaan hiyyotee? Waawwot. Isinna dandeꞌaaxxa yaane duuchcha assa ittin sufeemmaxxee Yihowwa isoꞌo eebbeseen. (Huje 28:30, 31) Iittan noꞌonna Yihowwaꞌa uwwa dandeennannoxxi yaane yanna yanna jijjiirendaaxxi hexxaan. Isi miꞌlachcho assaꞌneeki mitte yaane assinaannexxe buutoꞌniten. Yihowwa noꞌoꞌn gammadaꞌneexxa leellisheeka mitte mitte oruwwa uundo.

YIHOWWA NOꞌOꞌN GAMMADAꞌNEEXXA LEELLISHEEKI HITTATE?

10. Yihowwa noꞌoꞌn gammadaꞌneexxa “laqa” dandeennannoki hittate? (Yohaannisi 16:27)

¹⁰ Maxaafi Qullichchii darreeꞌn. Yihowwa isoꞌo eeyyaꞌneeke mannaꞌn gammadaꞌneexxanna insaꞌneꞌe eeyyaꞌneexxa leellishoꞌaa hasaꞌneen. Maxaafi Qullichchi, Yihowwa, Belto isika Yesuusi eeyyaꞌneexxanna isoꞌn gammadaꞌneexxa lamele haasoꞌeexxa kulaan. (Mat. 3:17; 17:5) Ateenna iittan Yihowwa eeyyaꞌneexxa haasoꞌaa hassaate? Yihowwa ateꞌe eeyyaꞌneexxa iimatenaaꞌn hafuuriki haasoꞌabaan, tenneꞌa irra isi noꞌoꞌo haasossaꞌneeki Maxaafi Qullichchini darreeꞌniten. Yihowwa noꞌoꞌni gammadaꞌneexxa haasoꞌeeka hafuura laqa dandeennannoki, Yesuusi haasoꞌeexxa yaane Wengeeletenaaꞌn yaansinsanno woddan. (Yohaannisi 16:27 yaansis.) Yesuusi Anni isikixxa ayyunte caꞌa hiyyeke garinni calalasseen. Tenneꞌa, Yesuusi qulliyye kaddebaaxxa hordofooleeyye isixxa, eeyyaꞌneexxa haasoꞌeeka yaada yaansinsanno wodda, konnee yaada Yihowwa noꞌoꞌa haasoꞌeekishsha assine heda dandeennannon.—Yohaannisi 15:9, 15.

11. Rakko noꞌoꞌn geltaꞌneexxi, Yihowwa noꞌoꞌn gammadaꞌnebaaxxa leellishshabaan hinaanneki mayeete? (Yaꞌiqoobi 1:12)

¹¹ Assaꞌneexxe yaane darreeꞌn. Yihowwa noꞌoꞌo gargaarateꞌe yoꞌoshsha hasaꞌneen, tenneenna assaꞌneeki noꞌa hasissaaxxa yaane qophpheessatiten. Qullichcha Iyyoobishshan, mitte mitte yanna rakko noꞌoꞌn geltoꞌaa waalaaxxi yanna hedha dandeettaan. (Iyyo. 1:8-11) Abari noꞌoꞌn geya, Mageni noꞌoꞌn gammadaꞌnebaaxxa leellishshaaxxe yaanebaan. Tenneꞌa irra, Magenokeꞌe anfeennexxi jaalala hitte qico jabaxxe kaddeexxanna isoꞌn hittee qico addantaannexxa kokeessinannoshsha ora banaan. (Yaꞌiqoobi 1:12 yaansis.) Isi noꞌoꞌo rakkoteꞌn ossinannoshsha gargaaraa wodda noꞌoꞌo eeyyaꞌneexxanna kiphaꞌneexxa uuda dandeennannon.

12. Dimitirixxe hedhotixxe barannonaaꞌn maa barachcho alfa dandeennanno?

¹² Eezhiya hedhaꞌneeke Dimitiri hiyyemaake dayyoꞌn maachchi geyeexxa uundo. Isinna hujaammaxxa huje gopheechchinni uduma heddi aganjiꞌa wele huje alfa dandeꞌebaan. Tenneꞌa qeerraaxxa yanna ergachchoteꞌn saꞌissati Yihowwaꞌn addataꞌneexxa leellishatee murtessedheen. Heddo agenjiꞌaa huje halsaꞌni turoolenna alfa dandeꞌebaan. Okkooꞌni, jabaxxa dhibo dhibemeexxi maꞌnatenaaꞌn keꞌa dandeꞌa gopheen. Eloke miniinke annanna eloke oosetike anna kadeebaashsha heda safeen, ittan Yihowwa isoꞌn gammadaꞌneexxanna mamaamman. Mitte hashsha belto isixxi Isayaasi 30:15 keꞌn: “Raankitinebaangi addatine hedhat jabara kaddineexxa leellishshinaan” hitaꞌneexxa xiqise woraqatakeꞌn maxxansiteen. Isenna maꞌnatike kasaꞌni uggiteexxi, “Anna ankee elobaaxxi yaane qalbe atixxibaa daggaa wodda, tenne xiqse qalli hiyyi” hiteen. Yihowwaka galata, Dimitiri mini hadi isiki sagale, seemmanna galaaxxa bakka gopheebaaxxa hubateen. Isinna “ani assa hasissaaxxi yaane raankebeꞌnong Mageno ankeꞌn addata ittin sufatemman” hiyyeen. Iitta hexxeexxi rakko ateꞌninna geltoole, Yihowwa ateꞌe karkarsaaxxanna ossitattoshsha gargaaraaxxa addata dandeetatton.

13. Yihowwa noꞌoꞌn gammadaꞌneexxa leellishaaki ayyi darreeꞌnite kada dandeetta? Hitta?

¹³ Addetike jaaluwwi darreeꞌn. Yihowwa, noꞌoꞌn gammadaꞌneexxa leellishaꞌneeki weli ori, noꞌoke addetike dayyuwwi darreeꞌniten. Fakkeennakeꞌe, noꞌaa hasissaaxxe yannaꞌn jajjabeessaaka yaada haasoonnaashsha assatite kada dandeettaan. Eezhiya hexxaꞌneexxe mitte dayyoꞌn jabaxxi yaaddo gelteemmaxxa yanna tenne yaane uuddeen. Isenna huje affeemmaxxa gophpheen, ittan jaba qicinni dhibendeen. Okkooꞌn iseki miniinki anni jabaxxa cubbo hujeexxi geerchummatenaaꞌn dirreen. Isenna iitta hiteen “Tinni yaane duuchcha aneꞌn geltaꞌneeki mayeete kaddeexxa egeꞌna dandeꞌa gophennen.” Ittan lebbeexxi, “Tinni yaane aneꞌni gelteeki dedha fuggoxxa yaane hujeeꞌnaaꞌa, Yihowwa aneꞌni gammada gopheexxeeten hiyye hedennen” hiteen. Tinni dayyo noꞌoxxi, Yihowwa iseꞌni gammadaꞌneexxa iseꞌa kekeessoꞌaa kadhatteen. Yihowwa iseꞌn gammadaꞌneexxa kokeesseeki hittate? Iitta hiteen, “Gubaꞌetixxi geedhe Yihowwa taꞌaanna aneꞌe eeyyaꞌneexxa qalli hiyyannoshsha gargaarteen.” Okkoneechchi uduma, Yihowwa taꞌanna iseꞌe gargaaroꞌa kadhatteen. “Eettene barraꞌninni gubaꞌeteꞌn hexxeexxi dayyuwwa bukki hite borreeessiteexxa daddaabbe aniꞌa uuteen.” Iittanna hiteen, “Konne jajjabeessaaka yaada yaansisanno wodda, Yihowwa kadha anxa laqqeechcho aneꞌni fakkaatteen.” Dhugaaten, Yihowwa heddo yanna noꞌoꞌo eeyyaꞌneexxa leellishaaki weli manji haasoꞌaake eloke yaadi darreeꞌniten.—Faaro 10:17.

14. Yihowwa noꞌoꞌn gammadaꞌneexxa leellisheeki weli ori hoonte?

¹⁴ Ittan, Yihowwa noꞌoꞌni gammadaꞌneexxa leellishaꞌneeki, hasissaaxxe yannaꞌn addetiki jaaluwwi noꞌaꞌa gorsa uwwaashsha assatiten. Fakkeennakeꞌe, taakkake dhibbeesso baroꞌn, Yihowwa manfasiinxe akeetten hawwaariya Phawuloosi 14 daddaabbe addetike jaaluwwiꞌa borreessaashsha asseen. Tinni daddaabbuwwa jabaxxenna kaddoole jaalalatika gorsa abiddeexxemman. Yihowwa Phawuloosi konne gorsa daddaabbeteꞌn borreessaashsha akeekeeki mayeete? Yihowwa jaalalatike Anna kademmaxxee, ‘eeyyaꞌneexxa oose’ isixxa xixaan.” (Fakke. 3:11, 12) Tenneꞌa Maxaafa Qullichchakeꞌn hundeessemeeki gorsi uwwemaa wodda, Yihowwa noꞌoꞌn yaadeexxa leellishaake beesisishsha kadebaang, isi noꞌoꞌn gammadaꞌneexxa leellishaake beesisishsha assine heda hasissaan. (Ibra. 12:6) Yihowwa noꞌoꞌn gammadaꞌneexxa leellishshaaxxi wele yaane heente?

YIHOWWA NOꞌOꞌN GAMMADAꞌNEEXXA LEELLISHAAKA WELE ORA

15. Yihowwa manfasa qullichcha isika uwwaꞌneeki ayyiꞌaate? Tinni noꞌoꞌo jajjabeessa dandeettaaki mayeete?

¹⁵ Yihowwa isi eeyyaake manjiꞌa manfasa qullichcha uwwaan. (Mat. 12:18) Ifi iitta hine qorro, ‘Hedho anxeꞌn Mageniinke manfasixxe gummaka adaba leellisha dandeꞌeene?’ Yihowwa egendetechchi uduma ossuntetiki adabi atiki hitta hedhe? Yihowwake qullichchi manfasixxa gumma leellishshettexxe qixxeꞌn, Yihowwa ateꞌn gammadaꞌneexxa adda kokeessa dandeetatton!—“Manfasiinxa Gummuwwa” hitaꞌneexxa kollo uudi.

16. Yihowwa, gammachchiissaaxxa odo lassateꞌe laꞌoonfataꞌneeki ayyee manna? Tinni maachchi ateꞌn laqemaashsha assita? (1 Teselonqe 2:4)

¹⁶ Yihowwa isi eeyyaake manniꞌa gammachchiissaaxxa odo kulatixxa maganne uwween. (1 Teselonqe 2:4 yaansis.) Jaasiliini, hiyyendaaxxi dayyo, welekeꞌe dhugaa lassatenaaꞌn alfiteexxa laꞌo hubatte. Mitte barra, Jaasiliini qaajjibbootte mudde diiphokenaaꞌn kexxeen. Isenna iitta hiteen, “mitte yaane assa dandeꞌabeꞌnoxxenna laꞌo afebeꞌnoxxe manjoshsha aneꞌn laqendeen. Qajeellisanjo kadeennaxxeꞌe, itti barra ergachcho fulaannaxxe barramman. Tenneꞌa kadhatennexxi ergachcho fulennen.” Eettene gorsa Jaasiliini, Maxaafa Qullichcha barata hassaꞌneexxe Meeri hiyyendaaxxa mitte eloxxa manjoni afendeen. Heenooke agenji uduma, Meeri, Jaasiliini hula isexxa gangandaa wodda Mageni iseꞌe gargaaraashsha kadhatateꞌn hexxemmaxxa haasooteen. Tenne yaane hedati Jaasilini iitta hiteen, “Yihowwa ‘ateꞌn gammadaanen hiyye haasoꞌeechcho aneꞌn fakkaatteen.’” Duuchchi manji kullaannexxe yaaneꞌa qajeelto uushsho afebaaxxi egeꞌnendeexxen. Kaddomaleꞌe, Yihowwa welekeꞌe tenne gammachchiissaaxxa odo kulatee dandeennennexxa duuchcha assinanno wodda, gammadaaxxa addata dandeenannon.

17. Wodo uuddaaxxa Viiki haasooteeke yaadanaaꞌn maa barachcho alfa dandeennanno? (Faaro 5:12)

¹⁷ Yihowwa isi eeyyaaki manni wodotenaaꞌn laꞌo alfaashsha asseen. (1 Ximo. 2:5, 6) Kaddomaleꞌe, wodoteꞌn adde anfoonnolenna ittan cuuphemmoonnolenna qalbe noꞌoxxi Yihowwa noꞌoꞌn gammadaꞌneexxa addata gophphaꞌnoolena? Sammo noꞌoxxeꞌn dagaaka yaada duuchcha addata hasissabaan, ittan Yihowwaꞌn addata hasissaaxxa qalli hino. Isi wodoteꞌn addataaka manna qulliyyetishsha asse uudaꞌneexxe kaddaa wodda ittan insaꞌnee eebbisateꞌe kako aageen. (Faaro 5:12 yaansis; Roome 3:26) Wodoteꞌn alalcha Viikiꞌi gargaarteen. Mitte barra adda wodoteꞌn heddeechchini kayyiꞌa: “Ani Yihowwaꞌa, atixxi jaalala aniꞌa geltaaxxebaan, ‘belt atikiki tolchinna cubbo anxa buqaakebaan hiyye hedeennashshatemman’ kaddoolenna Yihowwa qeerraaxxe yannaꞌa ossunteti aneꞌe baꞌedhaꞌn turreexxa hubatennen.” Isenna wodotixxe uwwaꞌn alalchat Yihowwa iseꞌe eeyyaꞌneexxa addata saffeen. Noꞌonna Viikishshani Yihowwa noꞌoꞌo eeyyaꞌneexxanna noꞌoꞌn gammadaꞌneexxa egeꞌna dandeennannon.

18. Iimatika Anna noꞌoka eeyya ittin ediꞌa sunfonnole heene yaane kokiinke kandano?

¹⁸ Tenne qoꞌneꞌn barantennexxa yaane hujeteꞌn hosisa haꞌurtaaxxa yanna adde wonxannoxxinna Yihowwa noꞌoꞌn gammadaꞌnebaashsha assine hendannoxxi yanna hedha dandeettaan. Haꞌnooꞌninna iitta hedheeki jeeji geyeexxenna kaddoole, Yihowwa ‘isoꞌo eeyyaake mannaꞌn’ gammadaaxxa qalli hiyye. (Yaꞌiqo. 1:12) Tenneꞌa Yihowwabaꞌa shiqqe, ittan haꞌnooꞌn isi gammadaꞌneexxa qalli hiyyateꞌe woꞌlaanne. Yihowwa ‘noꞌo duuchchiingenaaꞌn bayyateeke kadeebaaxxa’ duuchchii wodda qalliyye.—Huje 17:27.