Barata Haanonna Uurrise Egeꞌnebeꞌnon

Ilemenneki 1927 woggaꞌni Ameeriki giddo Chikaagoke qachchi bira, Illinoꞌisi hiyyendaaxxe bakkaꞌniten. Hadi anki Jeetaa, Doonii, anee Karlinna Joyi onde oose afeemman. Noꞌo duuchchiingi Yihowwaa woꞌma lubbonni ergatematee murteesseꞌneennan. Jeeta 1943 woggaꞌni Giliyaadike barachchoti mineꞌni langaxxe kutaꞌni yeꞌendeen. Dooni, Karlinna Joyi Niwu Yorke Birukiliine hexxeexxe Beeteleꞌni 1944, 1947 ittan 1951 woggaꞌni yeꞌemmeen. Insaꞌnekinna hadi ankiki eloki fakkeenni, aninna Yihowwaa ergatemannoshsha jajjabeesseen.

MAATE NOꞌOXXI DHUGAA BARATTEE QICO

Anni ankinna ama anxi Maxaafa Qullichcha yaansinsaꞌni, Mageno eenaammaxxeꞌe tinni jaalalanna noꞌo giddo hidda oltitaashsha assineen. Anni anki Awuroppi giddo sannachcha kadeꞌe ergatemeechchi uduma cherchetee afeemmaki ulfinni baꞌeen. Ama anxi isi miniꞌaa nageꞌiki higeexxee gammaddeexxi, “Karli keꞌwe edishshani cherche meno” hiteen. Anni anki “haꞌnoo okkone qicoꞌni geegeessanno maleꞌe ani haꞌnooni welti eꞌyaabeꞌnon” hiyyeen. Isenna “mayekee?” hite qorteen. Isinna iitta hiyyeen “bagediinxa yanna mitte addengi qeesooti ifixxe loliinxe gamoꞌaa golat sannachchuwwa insaꞌnekanna bageduwwa insaꞌneka eebbisaamman. Mageni laminiinxa gamo kiphaamman hiyyotee?”

Udumiiꞌni, ama noꞌoxxi cherche meꞌiteeꞌnaꞌa lame Yihowwaxxi Naqaashe mine noꞌoba daggeen. Insaꞌnenna leellishatika maxaafa diideessaꞌneeka lame kutaka, Maxaafa Qullichcha barantaꞌneeka Ifina hiyyaꞌneeka maxaafa, anna noꞌokee uuneen. Anni noꞌokinna maxaafa konnee yoꞌoshsha eeyyeemman. Ama noꞌoxxi maxaafa konnee uuddeeshshanni yaansisa saffeen. Okkooꞌni mitte barra, loola noꞌokeꞌni maxxansemaꞌneeke gaazexaꞌni Ifina hiyyaake maxaafinni maxaafa Qullichcha barata hasaaki manji barata dandeꞌaaxxa kulaaka yaada uuddeen. Isenna okkoꞌo maratee murteessexxeen. Okkoꞌo gelteeshshanni mtte geercho hula bandeen. Maxaafa leellishshaꞌni, “konnee maxaafa barattinaꞌneeki kabatee? hite qorteen. Geerchotinna “eeti anxe dancha eꞌyi miniꞌaa” hiteen. Itti aandaaxxa torba ama noꞌoxxi oose isexxa duuchchiinxa adhdhite meꞌiteen, okkooꞌni noꞌonna torba torbandeꞌni marraꞌni barantaannan.

Mitti bukkii akeekaammaki dayyi, Yihowwaa mageeneeffataaki manji gammadeeke kadeexxa kulaaka yaada Faaro 144:15 yaansisannoshsha qoreen. Tinni xiqse—1 Ximootwosi 1:11 Yihowwa “gammadiinke Mageno” hitaꞌneexxinna Effesooni 5:1 keꞌni “Yihowwaa fakkaatte” hitaꞌneexxe xiqseshshanni anee jajjabeessiteꞌeen. Anee dadeeke mageniꞌa dandeꞌannoxxa yaane duuchcha asssanna hedhotee hasissaaxxe dhugaaꞌa galateeffata hasissaan hiyyennen.

Noꞌo heꞌnaanneke Chikaagoke qachchaa shiqqaaxxi gubaꞌe afendaaki 32 kiilo meetireke bayyinneꞌniten. Kaddoolennna bukkii marraannan, ittanni anxi Maxaafi Qullichchiinxi egeꞌnanna nophphitaꞌni meꞌiteen. Mitte wodda bukkii akeekaammaki dayyi, Jeeta yaada uutaashsha summa iseka yeꞌeexxa qalli hiyyaannen. Ise haasoottaaꞌnaa caqasaꞌni hiissichchi ‘egeꞌneenenge kadeexxa hubatennen. Aninna anga keꞌisse yaada uwwennen.’ Okkoneechchi uduma gubaꞌetee qophpheefatanna yaada uwwa safennen. Duuchchiinxi iimi darre aninna dayyuwwa anxishshanni manfasiinxe hedhonni nophphaꞌni meꞌennen. 1941 woggaꞌni cuuphemennen.

LUMOLLA BUKKIIꞌNI YIHOWWANAAꞌNI BARATA

Giddiiꞌninni Kileviland Ohayo 1942 woggaꞌni afeemmeennaxxa lumoxxa bukkiiꞌi qalliyyannon. Konne prograama Yuunaytide Isitetise giddo 50 saxxaaxxe bakkaꞌni hedheeki manni hordofeeki bilbilikitemman. Hadi noꞌoki bukkii assendaꞌneexxe bakka bira dayyuwwa qophpheessiteexxe dunkaaneꞌni wele maaten hedhemman. Langaki buttatiki bagedi eebbaꞌni meꞌeemmaxxee Yihowwaxxe Naqaasheꞌni moronsha jabaattaꞌn meteemman. Mitte hashsha heenooki dayyuwwi kaamole uurrissaꞌni kaanpheti gadhiꞌaa kaamoletixxa baatire xassaaꞌnaa uudennen. Kunni dayyuwwi kaamole giddo hedheꞌe kaanpheti giddo hedhemmaka dayyuwwa heqqatee weli aageemmaken. Dayyuwwa miidhatee dagaaka manjo anfoole, baatire alba isikeꞌni xassinaꞌni kilaakise gannoꞌaatemman. Wele dayyuwwanna rakke marte insaꞌnee gargaara dandeettaamman. ‘Yihowwaki ardi duuchchinii garinni qophpheeffateeke’ kadeexxa uudennen!’ Tennenaaꞌni kexxeexxa raankebeꞌnongi nageꞌiki diiphennen, noꞌoꞌninna gelteexxi mitte rakko hexxemmabaan.

Heddo wogga uduma, bukkii ettenee hedanno wodda, ama anxi okkone wodda yaaddemabaaxxanna sodaatteemabaaxxa qalli hiyyennen. Isenna Yihowwaꞌninna orga isixxeꞌni qalbe mittenni addatteemman. Iseka eloka fakkeenna haanonna dedhaaꞌnon.

Lumoxxe bukkiꞌa heenooxxi yanna hexxeeꞌnaa ama anxi duuchchi woddixxe qajeellisanjo kaddeemman. Tenneꞌa isenna woꞌma yannaxxe ergachchoki haasoꞌi shiqaa wodda miꞌlachchoti hordoffaamman. Hadiꞌaa higateꞌni heꞌneeꞌnaa isenna: “qajeellisanjo kadeꞌe ergatema ittin sufonnaa hasaannen, kaddomaleꞌe mini giddo huje aneꞌni birasaxxaammaxxeꞌe ittin sufa dandeꞌaabeꞌnon” hiteen. Isee gargaarannoshsha qorteen. Noꞌonna ishshi hinennen, isenna diidhanto indebeꞌno edi darre noꞌo duuchchiingi mitte yookiin lame kuta caꞌa assinannoshsha ajajjeen. Noꞌo barachcho menennechchi uduma, ise seeriki mini giissemeexxa uudde kexxeꞌe ergachcho fuldaan. Ise huje bira-saxxeexxe manjomman, kaddomaleꞌe oosse isexxa ijjenda deete egendebaan. Barachchotike minenaaꞌni dhiyaanakee baxxeꞌaa hinganno wodda ise duuchchinii wodda mine hexxaamman. Mitte mitte wodda barachchotike minenaaꞌi hingennechchi uduma, isenni welti ergachcho fullaannan. Tinninna qajeellisanjo kadate hiyyo maa hiyyote kaddeexxa egenannoshsha grgaarteen.

WOꞌMA YANNAXXA ERGACHCHO SAFA

Qajeellisanjo kadeꞌe ergatema safenneki 16 woggaꞌni hedheeten. Anni anki okkone qicoꞌni Yihowwaxxe Naqaashe kadanna gophoole, ani assaannaxxa yaane yoꞌoshsha eeyyaamman. Hashsha mitte maxaafa Qullichcha barsiisannoka manjo afatee jabaxxa yaane assonnolenna, afa dandeꞌebeꞌnoxxa isoꞌni haasoꞌennen. Shiixxora hekki hiyyennexxi, “Aninni welt Maxaafa Qullichcha barata hassaate?” hiyyennen. Isinna shiixxo qico hede keꞌeexxi, “ishshi eloxxen” hiyyeen. Gammachchiissaaxxa taakkaxxi Maxaafi Qullichchiinxi baratto anxi anna aningemman. Tinni aniꞌaa gargariti hexxeexxe yaanemman!

Qoꞌninsaannaki maxaafi “Dhugaa Haꞌnoꞌo Qullo Fulchitaan” hiyyaꞌneekemman. Qoꞌninsaꞌni menannoshshanni anni anki worba barattonna barsiisanjo kadannoshsha anee gargaarateꞌni hedheexxa hubatennen. Fakkeennakeꞌe, mitte hashsha deero mitte yaansinsennechcchi uduma: “Maxaafi hiyyaꞌneexxa yaane egeꞌneennen. Kaddomaleꞌe maxaafi kunni hiyyaꞌneexxi yaane dhugaate kaddeexxa ati hitta egendette?” hiyyeen. Konnee yaada qophpheessedheennabaan, tenneꞌa iitta hiyyennen, “Tinni yaane dhugaate kaddeexxe taꞌa atiꞌa kokeessa dandeꞌaaꞌnon, wele barra qoꞌninsannoxxa yanna konne qortumika hiissichcho hiissannon” hiyyennen. Mariꞌantaannake yaadiꞌaa kaddaaxxa xiqse afennexxi qortuma isika hiissennen. Okkoneechchi uduma Maxaafa Qullichcha barsiisatee adda qophpheeffata safennen. Tinni yaane qoꞌne assinaa qico baratannoshshanna noꞌo laminiingi manfasiinxi hedhonni nophphinannoshsha gargaarteen. Isinna barateexxa yaane hujeteꞌni hosisseexxi 1952 woggaꞌni cuuphemeen.

EGEꞌNA ANXI BAꞌLATTAASHSHA ASSEEKA HAAROOKA HERREGUWWA

Miniiꞌni fulenneki 17 woggaꞌniten. Jeetaa miisoonichcho kaddeen, Dooni kinni Beetele aageen. Laminiingi insaꞌnaa uwwendeexxa huje yoꞌoshsha eenaamman, tinninna kinni anee yoꞌoshsha jajjabeesiteen. Yaane duuchcha Yihowwaꞌni waalennexxi Beetele aagateenna Giliyaadike barachchoti mineꞌni baratatee forme wonshennen. Tennenaaꞌni kexxeexxa 1946 woggaꞌni Beeteleꞌa yeꞌemennen.

Saxxeemmaxxa wogguwwa Beetele giddo gargariti hexxeexxa hujuwwa hujeennen, heddo haarooxxa yaanuwwanna barateennen. Matanga Beetele turennexxe 75 wogguwwa giddo maxaafa maxxansinaa qiconna maallaqa abindaa qico barteennen. Ittanni Beeteleꞌa hasisaaka miya hiranna wele bogiba meꞌaaka miya erginaa qico barateennen. Duuchchiiinxi iimi darre, kuta belo Beetele shiqqaꞌneexxe manfasiinxe barachchuwwanaaꞌni, tinniirinna gorsixxe mageneeffachchonaaꞌninna Maxaafa Qullichchakeꞌni hundeessemeeka haasoꞌuwwinnaaꞌni laꞌo eloxxa alfeennen.

Beeteleꞌa 1947 woggaꞌni dageeke shiixxooke dayyo anke Kaarlinaaꞌninna barachcho alfeennen. Isi worba Maxaafi Qullichchiinxe barattonna barsiisanjomman. Mitte wodda shiqisonnaa uwwemeeka ardiinka haasoꞌa qophpheeffataꞌni isika gargaarsa qoreennan. Haasoꞌa shiqisatee gargaaraaka heddo tarjuwwa bukkasse hitta laꞌoonfatannoxxa mekki hiyyeennexxa Karliꞌni kulennen. Isinna “Joyeli, haasoꞌiinki umu yaadi maachchoke?” hiyye qorati xuullo alfannoshsha gargaareen. Aninna hirbangeꞌni maa hiyyaa haseexxa qalliyyennen. Aninna haasoꞌinke umi yaadinni shiqaaka tarja adhdheꞌe, wele waala hasissaamman. Tinni barachcho ijjenda dedhannoxxebaan.

Beetele gammashshoti hedhateꞌe, gadho fulee ergatematixxe hujeꞌni dandeennennexxa duuchcha assa hasissaan. Tinninna jajjabeesitaaxxa hedhotixxa baranno alfinannoshsha assitaan. Hashsha mitte Niwu Yorkeke qachchaꞌni Bronikis hiyyendaaxxe bakkaꞌni kaddeexxa yaane ijjenda dedhaaꞌnon. Mitti dayyinna ani edi wodda Heqqecatixxa Xellepho nna Dammaqqe! hitaaxxa borreesiluwwa adhdhiteeexxe manjichchoba mine marrennen. Ifi egeꞌninshennexxi, “tenne hashsha Maxaafa Qullichchakenaaꞌni manjo jajjabeessaka yaada kulateꞌni heꞌnennen” hinennen. Isenna “kuldinaꞌneexxi yaane Maxaafi Qullichchiinxe kaddoole miniꞌa eꞌye” hiteen. Noꞌonna Mageniinxa Mootummanna daggaꞌneexxa haarooxxa buttta ifissaaxxa heddo xiqse yaansissennen, ittan mariꞌantennen. Isenna tenne yaaneꞌni yoꞌoshsha gammaddeemmaxxeꞌe, itti aandaaxxe torbaꞌni iseꞌaa shiqaaki manni mariꞌe tenneꞌni afemaashsha assiteen. Udumiiꞌni isenna isexxi maate addatendeexxe Yihowwaxxe ergantoole kandeen.

MINIINXE AMA ANXENAAꞌNI BARATENNEXXA YAANE

Aadhebeꞌnongi 10 wogguwwaa buliitee kadaaka manjo halsaꞌni tureꞌe udumiiꞌni alfennen. Eloxxa miniinxa ama alfannoshsha anee gargaarteexxi yaane maachcho? ‘Aadhennechchi uduma anenaaꞌni heqqendaaxxi yaane maachcho?’ hiyyaꞌni kadhati hedaannan.

Yanke hiyyendaaxxe Isitaadiyeemeꞌni 1953 woggaꞌni assendeexxe, lumoxxe bukkii uduma Meeri Aniyoli hiyyendaaxxe dayyonni afemennen. Isenna Jeeta Giliyaadeke barachcho mineꞌni langeessoxxe kutaꞌni mitteba baranteen. Meerinna dayyo anxi Jeeta miisoonoota kandeꞌe mitte bakkaꞌni ergatemmeen. Meeri gammachchiissaa garinni, Karbeeniyi giddo hexxeexxa hujenna, heddo woggaa Maxaafa Qullichcha barsiissaꞌni turteexxa haasootteen. Weli adda egennenneechchi uduma, weli fakkaataaka manfasiinxe hedhoka herrega anfeennexxa egennennen. Weliꞌaan weli anfeennexxi jaalala nophphitaꞌni meꞌiteen, Wocabajje 1955 woggaꞌni buliiteꞌni eꞌyinennen. Meeri heddo oruwwinni Yihowwa aniꞌa uwweexxe uwwa kaddeexxanna hordonfaaka eloka fakkeenna affeexxa leellishsheꞌeen. Isenna iseꞌa uwwendeexxa heene ergachchotixxa hujenna gammashshoti hujaamman. Bebbedatemman, welekeenna qalbeti heddaamman ittan hedho isexxeꞌni duuchchinii wodda Mageniinxa mootumma edissaamman. (Mat. 6:33) Rogiinxe hujeꞌni sase wogga ergatemennechchi uduma 1958 woggaꞌni Beetele yeꞌemmennen.

Meerinaaꞌni baca yaane barateennen. Fakkeennakeꞌe, buliiteꞌni eꞌyinenneshshanni Maxaafa Qullichchakenaaꞌni 15 laakkoossa yaansisatee mudhdhineennan. Mitte kuta yaansinsennechchi uduma xiqseteꞌni yaada uunannoni ittan hujeteꞌni hosinsannno qico mariꞌantannon. Meeri yoꞌoxxa yanna Giliyaadike barachchoti mineꞌni yookiin miisoonummateꞌni baratteexxa yaane haasoottaamman. Tinni mariꞌe aniꞌa qalbeeffanna uuteꞌeen, ittan elo garinni haasoꞌa shiqisannoshshanna dubarte dayyuwwa elo qicinni jajjabeessannoshsha gargaarteꞌeen.—Fakke. 25:11.

Yoꞌoshsha eeyyaannexxi anxi miniinxi ama Meeri 2013 woggaꞌni rerteen. Isee haarooxxe buttaꞌni uudatee halchaannnen! Okkone qicoꞌni baratatee, Yihowwaꞌni woꞌma qalbeni addata ittin sufatee murteessedheennen. (Fakke. 3:5, 6) Yihowwaki ardi haarooxxe buttaꞌni assaaxxa yaane hedati jabeennanna gammashsho alfaanneen. Tinninna Lumoka Barsiisanjo noꞌokkenaaꞌni haarooxxa yaanuwwa baratanna isoo uuddaaxxa barataten! Isi konne qicoꞌni anee barsiiseexxe yaanuwwa duuchchanna baꞌlunte isixxenni aniꞌa asseexxe yaanuwwaꞌa galteefateꞌe birabeꞌnon.