Duuchchiingi Qora Dandeꞌaaka Mitte Sholla Qortuma

Meerinna miniinki anni iseki Joonia heꞌnaꞌneeki, Filpeensike boginaaꞌni dageeke heddi manniꞌa gammachchiissaaxxa odo kula dandeennaake bogaꞌniten. Koroniinxa yanna, Meeri ise hexxaꞌneeke bogaꞌni calla kaddebaangi wele bogaꞌninna hedhaꞌneeka manna Maxaafa Qullichcha barsiisseen. Iitta assa dandeetteeki hittate?

Meeri Maxaafa Qullichcha barisiissaammaka manna, “Maxaafa Qullichcha barata hasaꞌneeki egendeetteki manji hedhee?” hitaꞌni qortaamman. Hedheexxa kullaa wodda isenni afensiinsaashsha qortaamman. Kunni sholla qortumi eloxxa gumma afeen. Mayee? Buutotinna Mageniinxe Qaaleꞌa saadino afeeki manni, barateexxa yaane mini hado ifikee yookiin jaaluwwakee kulatixxa halcha afeen. Konnee qortuma qora maa laꞌo affeemmaꞌa?

Meeri barsiissaammaxxi Jazimiin, Maxaafa Qullichcha barata hasaꞌneeka shoole haarooka manjo Meerinni afensiisseen. Konne manni giddo Maxaafa Qullichcha barata yoꞌoshsha eetaammaxxi, Kirsitiini hiyyendaammaxxi hexxemman, isenna barattaꞌneexxa yaane eeteemmaxxeꞌe Meeri isee torbateꞌni lamele barsiissoꞌa qorteemman. Meeri Kirsitiinii Maxaafa Qullichcha barata hasaꞌneeki egendeeki manji hedheexxa qortee woddi Kirsitiini, “Eeti hedheen, jaaluwwa anxa atini afensiisannon” hiteen. Heenoxxe torba giddo Kirsitiini, Maxaafa Qullichcha barata hassaꞌneexxa shoole jaaluwwa isexxa Meerinni afensiisseen. Okkonneechchi udumanna, Kirsitiini wele jaaluwwa isexxinni Meerii afensisseen. Jaaluwwa tinninna kinni Kirsitiinishanni jaaluwwa ifixxa Meerinni afensiisseen.

Kirsitiini Filpeensi hexxeexxi maate isexxinna Maxaafa Qullichcha barattoꞌaa hasseemman. Tenneꞌa Andiriya heyyendaꞌneexxe belto isexxeꞌni kuldeen. Andiriya keꞌitokeꞌni, Yihowwaxxa Naqaashe, haarooxxe addeshsha, Yesuusiꞌni addattaꞌnebaashshanna Dullatte Kako calla laꞌoonfattaꞌneeshsha assitee heddaamman. Kaddomaleꞌe, Mitte barra baratteechchi uduma Yihowwaxxe Naqaasheꞌaa affeemmaxxi uushsho dedhake kaddeexxa hubatteen. Ise haarooxxa yaane Maxaafa Qullichchakenaaꞌni barattaa wodda duuchcha, “Maxaafi Qullichchi iitta hiyyaꞌnee qicoꞌni tinni yaane dhugaaten” hitaꞌne gammaddaꞌni haasoottaamman.

Udumiiꞌni, Andiriya lame jaaluwwa isexxanna isenni hujjaꞌneexxa manjo Meerinni afensiisseeꞌnaa insaꞌnenna barachcho sanfeen. Meeri egeꞌna gophphoolenna ille affaꞌnebaaxxi Andiriyaxxi adaada Anjeela, ise barattaa wodda caqassaꞌnemman. Barra mitte Anjeela maxaafa Qullichcha barata hassaammaxxeꞌe Meerinni welti afensiissaashsha Andiriyaa qorteen. Anjeelanna barattaꞌneexxa yaane yoꞌoshsha eeteemman. Mitte agenji giddo heddo xiqse sammoteꞌni abiddeemman, ittanni torbateꞌni shoolele baratatee hasseemman! Andiriya gargaartaaꞌnaaꞌa, Anjeela Zuumeti duuchchinii wodda gubaꞌe hordofa saffeen.

Meeri, Kirsitiinii barsiissaa wodda Kirsitiiniki miniinki anni Joshuwa udumiiꞌni mammaremaꞌneexxa uuddeexxi, insaꞌnenni welti barata hasaꞌneexxa qorteen. Joshuwanna, “hitinaꞌneexxa yaane caqasonnaa calla hasannen, mitte qortumanna anee qortoxxeꞌe, qortottole waalee fulannon” hiyyeen. Onde daqiiqi giddo Kirsitiini irra heddo qortumuwwa qoreen, ittan Maxaafi Qullichchiinxa mariꞌe ittin sufatee haseen.

Meeri qorteeki kunni shollaki qortumi Maxaafa Qullichcha barata hasaaka heddo manna affaashsha gargaareen. Konneeri giddiiꞌni heddo manna, wele dayyuwwaa barsiissaashsha uuteen. Gargariti hedheeke shoole bogi giddo Meeri 28 manji Maxaafi Qullichchiinxa barachcho safaashsha assiteen.

Tenne hedhotixxe barannoꞌni iimiiꞌni uundeennaxxi Maxaafa Qullichcha barattaammaxxi Jazimiini, Wocabajje 2021 woggaꞌni cuuphendeen. Kirsitiini Ella 2022 woggaꞌni cuuphendeen, maate isexxibaanna Filpeensiꞌa higgeen. Lame Kirsitiini, Meerini afensiisseemmaxxi jaaluwwa isexxinna cuuphendeꞌeen. Anjeela Heenooke agenjuwwi uduma cuuphendeexxi taꞌa duuchchii woddixxe qajeelisanjo kaddeꞌe ergatemateꞌni hexxeen. Kirsitiinaki miniinki anni Joshuwanna belto insaꞌnexxi Andiriya ittani heddi manni Maxaafa Qullichcha barata ittin sufeen.

Keꞌitiinke dhibbeesso baroꞌni gammachchiissaaxxi odo mini hadixxenna jaalluwwiinxe oddoꞌni wiinamiki baꞌlattaꞌni meꞌiteemman. (Yoh. 1:41, 42a; Huj. 10:24, 27, 48; 16:25-33) Maxaafa Qullichcha barsiissaateka manjo yookiin wele dhugaatee eloxxa uushsho afeeka manjo, “Maxaafa Qullichcha barata hasaꞌneeki egendeeteki manji hedhee?” hite qorteettelenaꞌa? Konne duuchchiingi manji qora dandeꞌaake shollake qortumixxe buutonni hitteeki manji Maxaafa Qullichcha barata safaaxxa ayyete egeꞌne?