Dhugaatike Jaalo Kada Dandeettattoki Hittate?

RAKKO ateꞌni gelteeꞌnaa qofi gatteetteshsha labbee egendee? Heꞌnaanneki adde wonxannoshshanna qofi ganteenneshsha hendannoshsha assaake, ‘dandeꞌe hedhatee haranga haꞌuraake gargariti hedheeke bari’ giddoten. (2Xi. 3:1) Kaddomaleꞌe, hedho noꞌoxxeꞌni futti hitaaxxa rakko qofitti faachcheefata hasissabaan. Maxaafi Qullichchi “rakkotixxe barraaꞌa” dhugaatika jaalo afa laꞌo affeexxa haasoꞌaan.—Fak. 17:17.

DHUGAATIKI JAALI GARGAARAA QICO

Hawaarya Phawuloosi isinni mammaremaammake jaaluwwinaaꞌni laꞌo alfeꞌeen. (Qol. 4:7-11) Roome usurriinke mineꞌni hedhemmaxa yanna isi huja dandeꞌammabaaxa hujuwwa, jaaluwwi isiki hujaamman. Fakkennakeꞌe, Afrodiixu Filphisiyuusi hexxeemmaxxi dayyuwwa, ergiteexxa yaanuwwa isiꞌa geesiseemman. (Flp. 4:18) Tikiqoosi kinni Phawuloosixxa daaddabbe heddo gubaꞌuwwaa iyyemaraamman. (Qol. 4:7) Phawuloosi mine isikeꞌni usuremoolenna yookiin usurriinke mineꞌni qofitti gatoolenna jaaluwwi isikike gargaarsinni ergatenshatixxa huje huja dandeꞌeemman. Ati dhugaatike jaalo kada dandeettattoki hittate?

Techchixxe yannaꞌni hedheeki fakkeenninna, dhugaatiki jaali laꞌo afeexxa leellishaan. Isipeenike bogaꞌni gargariti hexxeexxe qajellisanjo kadde ergatendaꞌneexxe Elzaabeeti hiyyendaxxe dayyoꞌaa, dhugaatixxe jaalo kaddeexxa leellishsheexxa mitte dayyo uundo. Elzaabeetixxi ama fayyabaake kanseretike dhukkubinni abidendeexxa egenneexxa yanna, dayyo tinni heddo jajjabeesitaaxxa Maxaafi Qullichchiinxa Xiqse iseꞌa ergitaamman. Elzaabeeti “Tinni erga” “qofitti gateenneshsha aneꞌni labbebaangi, duuchchinii wodda rakko tenneꞌni jabaate ossannoshsha hunna aniꞌaa uuteen” hiteen.—Fak. 18:24.

Addetiki jaaluwwi noꞌoki ergatensha fulaashshanna gubaꞌe dagaashsha jajjabeessati jaalunte noꞌoxxi jabaattaashsha assa dandeennannon. Fakkeennakeꞌe cindeexxi dayyuwwa gubaꞌe daggaashsha, ergatensha fuldaashsha gargaara dandeettattoki ori hedhee? Iitta assitaattexxe kaddoole weliꞌan weli jajjabeessa dandeettinaan. (Rom. 1:12) Kaddomaleꞌe mitti mitti Krsitaani miniiꞌni fula dandeꞌabaaki hedhaan. Insaꞌnaa dhugatike jaaluwwa kada dandeennannoki hittate?

MINIIꞌNI FULA DANDEꞌABAAKE MANJIꞌAA DHUGAATIKE JAALO KADA

Mitti mitti addetiki jaaluwwi dhibotenaaꞌni yookiin weli jeejuwwinaaꞌni kexxeexxa gubaꞌe mara dandeꞌabaaki hedheen. Kanseretike dhukkubinni abidemeeka Deevidika fakkeenna uundo. Isinna jaane agenjinaaꞌni saxxaaxxe yannaꞌa keemoteraaphphi hiyyendaaxxe ciꞌlonni ciꞌloomemaꞌni tureen. Deevidi ciꞌloteꞌni hedhemmaxxa yanna isinna isixxi miniinxi ama Liidiya gubaꞌe hordonfaammaki zuumetitemman.

Gubaꞌetixxi jaaluwwa insaꞌnexxi insaꞌnee gargaarteeki hittate? Bukkiitike Galmi giddo hexxemmaxxi jaaluwwa insaꞌnexxi, bukkiiti uduma duuchchinii wodda Deevidiinna Liidiyaa haasoossatee woꞌlaandaamman. Ittanni Deevidinna Liidiya yaada uunaaxxa yanna addetixxi jaaluwwa insaꞌnexxi jajjabeessitaaxxa erga borreessitaꞌni ergitaamman. Tinni yaane insaꞌnaa maa laꞌo affeemmaꞌa? Deevidiꞌninna Liidiyaꞌni qofitti ganteeshsha adda laqendaammabaan.

Miniiꞌni fula dandeꞌabaaki manji noꞌonni welti ergatensha fulaashsha gargaara dandeennanno? Heenoonxa yaane assati iitta hedheeka manjo deeneebeꞌnoxxa leellisha dandeennannon. (Fak. 3:27) Daddaabbe borreessitaꞌni yookiini bilbiliki insaꞌnenni welti lassitattoka progiraama fulchitteettelenaꞌa? Miniiꞌni fula dandeꞌabaaki manni bobbaꞌiinxa bukkii zuumetinna hordofaashsha assa dandeennannon. Deevidinna Liidiya gubaꞌe iitta hexxeexxa qophphe assiteexxe yoꞌoshsha gammandeen. Deevidi “lassatixxe gollo noꞌoxxenni heꞌne harumaaxxa mariꞌenna kadha laqandi noꞌaa lumoke jabeenna uuteen” hiyyeen. Ittan lebendaaxxa, sodaachchissaaxxi yaane hedha gophphoole, jeeji uwwedhaꞌneexxe kaddoole miniiꞌni fula dandeꞌabaake manjiba mine marteꞌe, Maxaafa Qullichcha barsiissaatteka manjo yanna yanna isinni barsiisa dandeettato?

Miniiꞌni fula dandeettabaaxxe dayyuwwa noꞌoxxinni hunjanno woddanna insaꞌneka eloka adabuwwa uundanno wodda insaꞌnenni welti anfeennexxi jaalunte jabaattaꞌni metaan. Fakkennakeꞌe, iitta hedheeke dayyuwwinni ergatenshateꞌni hexxatto woddanna mitti manjixxa qalbe tuqatee Qaale mageniinxa elo garinni laꞌoonfattaaꞌnaa uundanno wodda edi irra konne manjinni shiqqaꞌni metatton. Addetiki jaaluwwi atiki manfasiinxe hdhoꞌaa assaꞌneexxa yaane kiphphatto wodda jaaluwwa lephphitaꞌni metatton.—2Qo. 6:13.

Phawuloosi rakkoteꞌni hedhemmaxxa yanna Tiito isinni welti hedhemmaxxeꞌe jajjabaateemman. (2Qo. 7:5-7) Kunni raagi rakkoteꞌni hedhemmake manniꞌaa, mararraannexxa leellishati dayyeessa calla kaddebaangi insaꞌneenni welti hedhatinna dandeennennexxa yaane assati insaꞌnee kipha hasissaaxxa qalli assaan.—1Yo. 3:18.

SHORRICHCHIINXA YANNA DHUGAATIKE JAALO KADA

Ruusiyi giddo hexxeexxi dayyuwwa noꞌoxxi, weliꞌaan weli kiphati eloka fakkeenna leellishateꞌni hexxeen. Sergekanna miniinxe ama isixxika Taatiyaanaka fakkeenna uundo. Poolise hassaꞌneexxa yaane alfate mine insaꞌneka fedenshteꞌe, insaꞌnee qortumakee adhdhite meꞌiteechchi uduma, Taatiyaanaa edinse wocci assineemmaxxeꞌe miniꞌaa higgeen. Serge iitta hiyyeen: “Taatiyaan miniꞌaa higgeeshshanni mitte worba dayyo isee uudatee hirbangeꞌni mine marteen. Heddo jaaluwwa noꞌoxxi daggeexxi mine noꞌoka edo hedhemmashsha assite giissiteen.”

Serge ittini lebeexxi iitta hiyyeen, “Insaꞌneeꞌe Fakkeenna 17:17 keꞌni, ‘dhugaatiki jaali duuchchinii wodda jaalaltichchaken, rakkotixxe barraaꞌa ilemeeke dayyon’ hiyyaꞌneeke yaadinni fakkeessannon. Tinni xiqse ifixxe hunna callinni ossa dandeꞌannabaaxxe shorrichchiinxe yannaꞌni aniꞌaa lumoxxa laꞌo affeen. Yihowwa sodaꞌa belo aninni welti uurritaaxxa jaaluwwa aniꞌa qophpheesseen.”a

Haꞌuraaki jeejuwwi noꞌoꞌni geyaaxxa yanna duuchcha noꞌoo gargaaraaki jaaluwwi hasisaan. Konne jaaluwwiki gargaarsi lumoke abari wodda irraan caala noꞌaa hasisaan. Tenneꞌa taꞌanni dhugaatike jaalo kadatee dandeennannoxxa yaane duuchcha assino!—1Ph. 4:7, 8.