Hooddebexxongi Cuuphemi

1. Cuuphemmannoshsha assittaaxxi mitte mitte elolla buutuwwa heente?

DUUCHCHIINXA eloxxa yaanuwa ittan hedhotanna atiꞌaa uwweeka Mageno Yihowwaa ettaatte? Isoo etaattexa leellisha hassaate? Iitta assitattoki mitti ori ifi isiꞌaa mudhdhatinna mudhdhiteettexxa wodeꞌekeꞌni cuuphende leellishatiten. Tinni tarkaaffe Yihowwaxxe maatexxe una kaddattoshsha assitaan. Tennenaaꞌn kexxeexxa isi atike Annanna jaalo kadeꞌe, atee akeekan ittan karkarsaan. (Far. 73:24; Isa. 43:1, 2.) Ifi isiꞌaa mudhdhittatto woddanna cuuphendatto wodda bari-bariinxe hedhoka tasfanna alfitatton.—1 Ph. 3:21.

2. Tenne qoꞌneꞌni uundaannexxi yaane maachcho?

² Cuuphendabexxoshsha atee udumiꞌaa harkissaꞌneexxi yaane hexxee? Iitta hexxeexxi yaane, futti hitaꞌneeki ateꞌni callabaan. Taꞌixxe yannaꞌni baci manni cuuphema dandeꞌeeki adabikinna hedinoti jijjiiremeexxeeten. Taꞌa kunni manni Yihowwaaꞌa gammashshotinna hinaaffeti ergatemateꞌni hedheen. Keꞌitiinke dhibbeesso baroꞌni cuuphemeemmake mitte mitte mannanaaꞌn maa barachcho alfa dandeettatto? Insaꞌneꞌni gelteemmaxxa mitte mitte rakkuwwanna insaꞌneke fakkeennanaaꞌni maa barantannoxxa meen uundo.

SAAMRAWOOTI CUUPHEMEEN

3. Mitti mitti Saamrawooti cuuphemabaashsha gufo kada dandeettammaxxi yaanuwwa heentemma?

³ Yesuusike baroꞌni Saamrawoota hiyyendaaxi addetixi gollo hexxemman. Insaꞌnenna heꞌnaammaki Yihuudiiꞌni middi darreeꞌni afemaake Seekeemike qachchike qarqaraꞌninna Semaarya hiyendaaxxe bakkaꞌniten. Saamrawooti cuupheemeba edi darre, Mageniinxe Qaalexxa geeltaaxxa egeꞌna afa hasissaamman. Samrawooti Mageniinxe Qaale hiyye addataammaki, Dadatike maxaafanaaꞌni Zedaagimi qicoꞌni hedheeke keꞌitiinke onde maxaafuwwa callamman. Ittan Iyyaasuka maxaafanna addata gonphaammabaan. Kaddoolenna, Mageni Zedaagimi 18:18, 19 keꞌni, haasoꞌeexxe hundaayyeshsha Mesihchi dagaan hineꞌe heqqeꞌnaamman. (Yoh. 4:25) Saamrawooti cuuphemateꞌe, Yesuusi Mesihcho kadeexa addata hasissaamman. “Heddi Saamrawooti” isoꞌni addateemman. (Yoh. 4:39) Weli kinni, Saamrawootiinxenna Ayhuudootiinxe oddoꞌni hidda oltiteexxa weli gibatixxa hedino injifata hasissaamman.—Luq. 9:52-54.

4. Ergantooletixxa Huje 8:5, 6, 14 xxe hundaayyeshsha, mitti mitti Saamrawooti Filphoosi kuleexxa erga laqe maa asse?

⁴ Saamrawooti cuuphemaashsha gargaarteexxi yaane Maachcho? Wengeelaawichchi Filphoosi “Kirsitoosii insaaꞌnaa lasseexxa” yanna mitti mitti Saamrawooti “Qaale Mageniinxa addate adhdheen” (Ergantooletixxa Huje 8:5, 6, 14 yaansis.) Filphoosi Yihuudixxe gosake manjo kaddoolenna, isoo caqasa ginbeemmabaan. Dedha Pentaatuketeꞌni Mageni gamisabaake kadeexxa kuldaaxxa xiqse qalliyya gonpheebaan. (Zed. 10:17-19) “Duuchchinii wodda” Kirsitoosii uuddaaxxa, “Fiilphoosi haasoꞌeexxa yaane” qalbe mitten hordonfaamman. Insaꞌnenna Filphoosii Mageni gargaarateꞌni hedheexxa leellishaaka tarja hubanteemman. Filphoosi dhibemeeka fayyisatinna durriisa fulchati heddo maso hujaamman.—Huj. 8:7.

5. Samrawootakenaaꞌni maa barachcho alfa dandeennanno?

⁵ Saamrawootiinxenna Ayhuudotiinxe oddoꞌni hexxeexxi weli gibatixxi hedino, yookiin egeꞌnatixxi heenoꞌma, silaati Saamrawooti, Filphoosi kulaꞌneexxa yaane lanqabaashsha assa dandeettamman. Kaddoolenna, tinni yaane insaꞌnaa gufo kaddoꞌa waallebaan. Samrawooti Filphoosi barsiisaꞌneexxi yaane dhugaatixxe kaddeexxa kokeechchi uduma cuuphematee hoodeemmabaan. Maaxafi Quullichchi “Mageniinxa Mootummanna Yesuusi Kirsitoosike summixxa gammachchiissaaxxa odo laallabateꞌni hedhemmaka Filphoosii addanteexxa yanna labballinna dubarte cuuphema sanfeen” hiyyaan. (Huj. 8:12) Mageniinxi Qaale dhugaate kaddeexxanna Yihowwaxxi Naqaashe wele manjo jibbatixxa hedino injifatte, dhugaatike Kirsitaanike beesisa kaddeexxa dhugaatixxa jaalala weliꞌaan weli leellishshatee woꞌlaandaꞌneexxa kokkeette? (Yoh. 13:35) Tenneꞌaa Yihowwa atee eebbisaaxxa addatte shenunteti tarkaaffe adhdhi.

6. Ruubenike fakkeennanaaꞌni laꞌo alfa dandeettattoki hittate?

⁶ Ruubeni nophpheeki, Jermeene Yihowwaxxe Naqqashe kaddexxe maate giddon. Kaddomaleꞌe, qeeꞌlumma hedhemma wodda Yihowwa hedheenxa mamaamman. Yihowwa hedheexxa addatashsha isoo gargaarteexxi yaane maachcho? Egeꞌnatixxa hanqo afeexxa hubateexxi adda baratatee murteessedheen. Isinna iitta hiyyeen; “Ifixxa qoꞌne assanno wodda dhugaanna dhara kaddeexxa yaane gar-gari hiisse egeꞌna hasisseemman.” Laaniinxe jijjiirraxxe barachchoꞌni higge higgeeni qoꞌne assa hasisseemman. Atiꞌaa Hedaꞌneeki Dadatiki Anni Hedhee?(Ingilizuffati) hiyyaꞌneeka maxaafa yaansiseen. Kunni maxaafinna Ruubeni Magenokeꞌni afeexxi adde jabaattaashsha gargaareen. Isinna hedaꞌni: ‘Dhugaandini Yihowwa hedheen!’ hiyyeen. Ruubeni Yihowwaxxe Naqaashexxa illitte beero dooyyeexxa yanna, manbeꞌa assitaaxxa mittunte afeeka butta duuchchike dayyuwwatike maabariꞌaa afeexxi saadino lebbeen. Ruubeni Jermeeniꞌa higeexxi, 17 woggaꞌni cuuphemeen. Barattettexxa yaane mandaattole, borreessiluwwa noꞌoxxa qoꞌnisati mama qalbe atixxi giddiiꞌni fuggussi. “Dhugaatixxe egeꞌnanni” yookiin toggitte egeꞌnanni mama injifata dandeettatton. (Eff. 4:13, 14) Ittan wele bogaꞌni hedheeke Yihowwake ardixxe oddoꞌni hexxeexxa jaalalanna mittunte laqqatto wodda tinni yaane ati hexxettexxe gubaꞌeꞌni hexxeexxa koki. Iitta assitaattexxe kaddoole, butta duuchchike dayyuwwatike maabariꞌaa affeettexxi saadino lebbaꞌni meꞌitaan.

XERSEESIKE BOGI MANJI SAꞌOOLI CUUPHEMEEN

7. Saꞌooli heene hedino toggi assedha hasissaammaꞌa?

⁷ Xerseesi bogike Saꞌoolika fakkeenna uundo. Isi Ayhuudootiinka seera adda barateemmakenna insaꞌnexxe oddoꞌni adda egeꞌnemaꞌni meꞌaammake manjomman. (Gel. 1:13, 14 , Flp. 3:5) Heddi Ayhuudooti Kirsitaana waakkatooleeyyetishsha uudaammaxxa yanna Saꞌooli aare bubbi hiyye Kirsitaana shorraamman. Isoꞌni Mageniinxa fedhii assaꞌneechcho labbeemman. (Huj. 8:3; 9:1, 2; 26:9-11) Saꞌooli, Yesuusii addate adhdhateenna cuupheme Kirstaana kadateꞌe, shorrichchi isoꞌni geyaaxxa addata hasissaamman.

8. (a) Saꞌooli cuuphemaashsha gargaarteexxi yaane maachcho? (b) Ergantooletixxa Huje 22:12-16 qicoꞌni ifisendeeshsha, Hananiya, Saꞌoolii gargaareeki hittate? (Fakketanna uudi.)

⁸ Saꞌooli cuuphemaashsha gargaarteexxi yaane maachcho? Ulfaateeki Gootti Yesuusi, Saꞌooliꞌni leelleexxa yanna Saꞌoolixxi ille jabake ifininaaꞌni kexxeexxa afa dandeettebaan. (Huj. 9:3-9) Sase barraaꞌa tsoomeexxa yanna isoꞌni gelteexxe yaaneꞌni alalcheexxi mansiissaaxxe yaanebaan. Phawuloosi, Yesuusi Mesihcho kadeexxanna isixxe hordofoolexxi adde dhugaatixxe kaddeexxa kokeen. Saꞌooli tenne yanna, Isxifaanoosixxe reyoꞌni anga isixxi hexxemmaxxeꞌe yaada gopheebaan! (Huj. 22:20) Sase barra uduma, Hananiya hiyyemaaki hordofeessi, baꞌlunteti Saꞌoolibaa shiqeen. Ille isixxinna affaashsha asseen. Ittan turebaangi cuuphemaashsha jajjabeesseen. (Ergantooletixxa Huje 22:12-16 yaansis.) Saꞌooli ifi heeshshi asse gargaarsa konnee adhdheexxi haarooxxe hedhoka ora meꞌa safeen.—(Huj. 9:17, 18)

9. Saꞌoolinaaꞌni maa barachcho alfa dandeettatto?

⁹ Saꞌoolinaaꞌni barantannoxxi yaanuwwa hexxeen. Silaati Saꞌoolii, holla yookiin manjiinxi sodaꞌa cuuphemabaashsha assa dandeettamman. Kaddomaleꞌe, tinni yaanuwwa isoo udumiꞌaa hiissitebaan. Saꞌooli, Kirsitoosii addate adhdheechchi uduma ifi heshshi asseexxi edo meꞌaammake oranaaꞌni higeen. (Huj. 26:14, 19) Saꞌooli shorrichchi isoꞌni geyaaxxa egeꞌnoolenna, Kirsitaana kadatee mudhdheemman. (Huj. 9:15, 16; 20:22, 23) Cuuphemeechchi udumanna gargariti hexxeexxe rakko giddo, Yihowwa isoo gargaaraaxxa isoꞌni addata ittin sufeemman. (2 Qo. 4:7-10) Cuuphende Yihowwaxxe Naqaashe kadatto wodda addetixxi hega uushsho yookiin rakko ateꞌni geltaaxxi hexxaan, kaddoolenna atee gargaaraaka anna affeetten. Duuchchinii wodda Mageni Yihowwanna Kirsitoosi atee gargaarraaxxa addat.—Flp. 4:13.

10. Aanake fakkeennanaaꞌni laꞌo alfa dandeettattoki hittate?

¹⁰ Aana nophphiteeki Borotike Awuroppaꞌni mitte Kurdootiinxxe maate giddon. Aana, ama isexxi cuuphendeechchi uduma, anna iseka qorteexxi 9 waggaꞌni Maxaafa Qullichcha barata saffeen. Kaddomaleꞌe, Aanaxxe maatenni bukki hiyye hedhaammaki hadi duuchchi tenne yaaneꞌni gammadeemmabaan. Aada insaꞌnexxeꞌni mitti manji insaꞌneke edike annuwwixxa adde waaloole fira salphiseeshsha uundaamman. Aana 12 wogga gelteexxi cuuphema hassaammaxxeꞌe anna qorteen. Isinna ise tennee murte murteessedhatee hasseeki ‘ifiꞌaande moo manji tirtirseexxeete’ hitaaxxa yaane egeꞌna haseemman. Isenna “Ani Yihowwaa Eeyyaannen” hite hiissiteen. Anni isekinna cuuphendaashsha ishshi hiyyeen. Aananna cuuphendeechchi uduma firi iseki isee jibbaamman, ittan miicaamman. Hadi iseki giddiiꞌni mitti iseeꞌe: “Yihowwaxxe Naaqashe kaddettexxi manniiꞌni, adaba baxxe sigaara wuliilchitaꞌni metetele woyyan” hiyyen. Aana konnee miccama dandeetteeki hittate? Isenna “Yihowwa anee jabaatannoshsha gergaareen, ama anxinna anni anki anee yoꞌoshsha kinphamman” hiteen. Aana hedho isexxeꞌni Yihowwaxxa gargaarsiinxa anga uuddaaxxa yanna duuchcha qallassanjokeꞌni borreessitaamman. Isenna borressiteemmaxxa yaane mitte mitte yanna uuddaamaxxeꞌe Yihowwa iseeꞌe hitte qico gargaaraꞌneexxa deetebaan. Shorrichchi aneꞌni geyaani hite sodaattaattole Yihowwa ateenna gargaaraaxxa qalliyyi.—Ibr. 13:6.

QORNELEWOOSI CUUPHEMEEN

11. Qornelewoosi cuuphemabaashsha gufo kada dandeettammaxxi yaane maachcho?

¹¹ Qornelewoosike fakkennanaaꞌninna eloxxa barrachcho alfinannon. Isinna “dhibbii soorreessamman” yookiin Roomika 100 sannachcha akeekaammake manjon. (Huj. 10:1 lqj.) Tennenaaꞌni kexxexxa, ardiinxenna sannachchuwwiinxe oddoꞌni lumoxxa bakka afeeke manjo kada gopheebaan. Isinna “rakkichcha gargaaraammake manjomman.” (Huj. 10:2) Yihowwa hawaarya Pheexiroosi konne manjiꞌaa gammachchiissaaxxa odo kulaashsha ergeen. Qornelewoosi afeemmaxxi baalle cuuphemabaashsha kuttee?

12. Qornelewoosi cuuphemaashsha gargaarteexxi yaane maachcho?

¹² Qornelewoosi cuuphemaashsha gargaarteexxi yaane maachcho? Isi “mini haddo isike duuchchinni Magenokee hedhaammakenna Mageno sodaataammake manjo” kadeexxa Maxaafi Qullichchi haasoꞌaan. Ittan Qornelewoosi duuchchinii wodda Mageniinbaa kadhataamman. (Huj. 10:2) Pheexiroosi Qornelewoosiꞌaa gammachchiissaaxxa erga kuleexxa yanna, isinna isiki mini hadi Kirsitoosi addateen, ittan hirbangeꞌni cuuphemmeen. (Huj. 10:47, 48) Qornelewoosi mini hadi isikinni Yihowwaa mageneeffatateꞌe isonaaꞌni heqqendaaxxa yaane duuchcha assateeꞌe fedhiitikemman.—Iya. 24:15; Huj. 10:24, 33.

13. Qornelewoosinaaꞌni maa barattatto?

¹³ Qornelewoosi Saꞌoolishshanni baalle afeeke manjo kadeemmaxxeꞌe, silaati tinni yaane Kirsitaana kadabaashsha gufo kada dandeettamman. Kaddomaleꞌe, tinni yaane isoꞌni gufo kaddebaan. Cuuphematee hedho atixxeꞌni haranga lumoxxa jijjiirra assa hasissaꞌne? Iittate kaddoole, Yihowwa gargaarsanjo atike kaddaan. Isi Maxaafi Qullichchiinke hundaayyeti seerishsha isiꞌaa ergatemateꞌe murteessexxaattexxa murte eebbisaan.

14. Suyooshike fakkennanaaꞌni laꞌo alfa dandeettattoki hittate?

¹⁴ Jappaane hedhaaꞌneeki Suyooshi hujaꞌneexxe hujeꞌni mitte mitte yaane toggi assa hasisseemman. Isinna abeba giissinaa qico barsiinsaake Ikinoobo hiyyemaake barachchotike minike sooreessike gargaarsanjomman. Sooreessichchi isiki oodhishsha hexxeeba maraꞌni Budisitetike addetike seersha abeba giissaamman. Isi dhaqqababaaxxa yanna tennee yaane, isoo tukkeesse hujaammaki Suyooshiten. Kaddomaleꞌe, Suyooshi tennee addeke seeruwwiꞌaa assaꞌneexxa yaanuwwa waala gophoole, cuuphemabaaxxa egeꞌneen. Isinna langaxxa Budisitetixxi adde assitaꞌneexxe yaaneꞌni anga ugga gophatee murteessedheen. (2 Qo. 6:15, 16) Suyooshi tennee yaane uuddaaxxa sooreessichchokeꞌni kuleen. Tennenaaꞌn kexxeexxa Suyooshi adde assitaꞌneexxe yaaneꞌni giddo eꞌyebaang huje isixxa huja ittin sufeen. Maxaafa Qullichcha barata safeexxe mitte wogga uduma cuuphemeen.a Hujjaattexxe hujeni Mageno gammachchiisatee hitatto wodda toggi assa hasissaaxxi yaane hexxoole, Yihowwa atiꞌaanna maate atixxeꞌe hasissaaxxa yaane qophpheessaaxxa addat.—Far. 127:2; Mat. 6:33.

QORONTOOSI HEDHAAMMAKI MANNI CUUPHEMEEN

15. Qorontoosi hedhaammaki manni cuuphemabaashsha gufo kada dandeettammaxxi yaane maachcho?

¹⁵ Bireke baroꞌni Qorontoosike bogiki ardi sara saxxeexxe maallaqiinxe eeyyaninna adaba baꞌneti egeꞌnemeemmaken. Heddi okko hedhaammaki manni hordofaammaxxi hedho Mageni eeyyaaxxemmabaan. Kaddomaleꞌe, konne qachchi giddo hedhaꞌneeki manni Yihowwaa ergatema safa, haranga haꞌurtaaxxe yaanemman. Kaddoolenna, Hawaarya Phawuloosi konne qachchiba mareꞌe Kirsitoosi uuddaaxxa gammachchiissaaxxa odo lasseexxa yanna “erga tennee laqeeki heddi Qorontoosi hedhaammaki manninna addate cuuphema safeen.” (Huj. 18:7-11) Okkooꞌni Gootti Yesuusi Kirsitooisi, Hawaarya Phawuloosiꞌni leellishshati: “Konne qachchaꞌni heddo manna afeennen” hiyyeen. Phawuloosi tenne bakkaꞌni mitte wogganna gamisa yanna lassaꞌni tureen.

16. Mitti mitti Qorontoosi hedhaammaki manni, cuuphemabaashsha gufo kaddaammaxxa yaane injifate saꞌaashsha gargaarteexxi yaane maachcho? (2 Qorontoosi 10:4, 5)

¹⁶ Qorontoosi hedhaammaka manna cuuphemaashsha gargaarteexxi yaane maachcho? (2 Qorontoosi 10:4, 5 yaansis.) Insaꞌnenna Qaale Mageniinxenninna manfasi qullichchiinke gargaarsinni, hedho insaꞌnexxeꞌni jabaxxa jjijjiirra assa dandeenneꞌeen. (Ib. 4:12) Kirsitoosi uuddaaxxa gammachchiissaaxxa odo laqe addateemmaki Qorontoosi hedhaammaki manni, machche moora, ittan labbaki labbakenni assaaxxe maaliinxe afensha fakkaattaaxxe elobaaxxe yaanuwwanaaꞌni bayyata dandeꞌeen.—1 Qo. 6:9-11.b

17. Qorontoosi hedhaammake manninaaꞌni maa barachcho alfitatto?

¹⁷ Qorontoosi hedhaammaki mitti mitti manni, insaꞌnee giddo hosse galdeexxa fuggoxxa aada injifata, hasissaaxxe kaddoolenna Kirsitaana kada haranga haꞌurtaaxxe yaaneshsha asse hedeemmabaaxxa qalliyyi. Insaꞌnenna bari bariinxe hedhobaa akeekaake cuꞌmake oribaa eꞌyatee jabaxxa woꞌlaancho assineꞌeen. (Mat. 7:13, 14) Atinna cuuphematee elobaaka adaba, yookiin edo hujjaattaxxa fuggoxxa huje waalatee woꞌlaanateꞌni hexxette? Iittate kaddoole, lola konneꞌaa anga uutoxxe! Elobaxxa yaane halchatixxa yorte injifata dandeettattoshsha, Yihowwa manfasa isikenni gargaaraashsha kadhat.

18. Moonikake fakkeennanaaꞌni laꞌo alfa dandeettattoki hittate?

¹⁸ Jorjiya hexxaꞌneexxi Moonika cuuphenshatee hitaa wodda elobaaka haasoꞌaanna Mageni gammadabaaxxa dayyeeffachcho waalatee jabaxxa yaane assiteen. Iitta hiteen: “Dargaggummateꞌni hedhenna wodda aniꞌaa hunna uutaammaxxi kadhatemman. Yihowwa isoo gammachchiissaaxxa yaane assonnaa hasaanexxa egeꞌneemman. Isinna duuchchinii wodda gargaaraamman ittan akeekamman.” Moonikanna 16 woggaꞌni cuuphendeen. Yihowwaa gammachchiisaake garinni ergatemateꞌe, waaldotaa hassaattexxi elobaaxxi yaanuwwa hexxee? Jijjiirra assitattoshsha isi hunna atiꞌaa uwwoꞌaa kadhata ittin sufi, Yihowwanna baꞌlunteti manfasa isika atiꞌaa uwwaan.—Yoh. 3:34.

ADDE ATIXXI KOOBUWWA LEꞌMISA DANDEETTAAN

19. Kooba fakkaattaaxxe gufuwwanaaꞌni saꞌa dandeettattoshsha atee gargaartaxxi yaane maachcho? (Fakketanna uudi.)

¹⁹ Yihowwa atee eeyyaꞌneexxanna isixxe maatexxe una kaddottaa hasaꞌneexxa addat. Tenneꞌa cuuphendabexxoshsha assitaaxxi hiini yaanenna ateꞌni futti hitoole sodaattoxxe. Yesuusi isinni hexxemmaxxa hordofooleeyye: “Senaaficetixxe gumma qicixxa adde affinoole, tennee kooba kabaaꞌni kexxe okkoꞌa meꞌi, hitinoole meꞌitaan haꞌnoo dhibbaaxxi yaanenna hexxabaan” hiyyeen. (Mat. 17:20) Okko hedhemmaki manni Yesuusinni welt tureeki heenoxxe wogguwwaan calla kaddeemmaxxeꞌe, adde insaꞌneexxi taꞌanna jabata hasissaamman. Kaddomaleꞌe, insaꞌne adde geltaa qicoꞌni jabeesseꞌneexxe kaddoole kooba fakkaattaaxxa rakkoo leꞌmisa dandeennaashsha Yihowwa insaꞌnee gargaaraaxxa Yesuusi kokeesseen. Atinna iitta assitattoshsha Yihowwa gargaaraan!

20. Tenne qoꞌneꞌni kulemeeki keꞌitiinke dhibbeesso barkinna techchixxe yannake Kirsitaanki fakkeenni maa assitattoshsha dammassee?

²⁰ Cuuphendabexxoshsha atee kuttaꞌneexxi gufo kaddaaxxi yaanuwwa ora atikeꞌni hexxeexxa hubattottole turtebexxongi ora atikenaaꞌni isee hoyyatee tarkaaffuwwa adhdhi. Keꞌitiinke dhibbeesso barikinna techchixxe yannake Kirsitaaniki fakkeenni atee dayyeessaan, ittan jajjabeessaan. Insaꞌneeki fakkeenni ifi Yihowwaa mudhdhitattoshshanna cuupheendattoshsha jajjabeessaan ittan tirtrissaan. Tinni murte, murteessexxattoxxe murte duuchchanaaꞌn gargariti hexxeexxen!