Manjo Gorsinaa Qico

1. Wele gorsa hasissaaki ayyete? Ifisi.

MANJO gorsa ateꞌe gammachchiissaa? Mitti mitti manji manjo gorsa yoꞌoshsha eeyyaan. Weli kinni manjo gorsa hoodaan yookiin sodaataan. Eenenna jibbinonnolenna noꞌo duuchchiingi wele manjo gorsatixxa maganne anfeennen. Mayee? Buutotinna Yesuusi dhugaatixxi hordofoole isixxi welekenaaꞌni gargari higge egeꞌnendaaki, weliꞌaan weli leellishshaaxxe jaalalannite kaddeexxa haasoꞌeen. (Yoh. 13:35) Ittan jaalala anfeennexxa leellinshannoki mitti ori, dayyuwwa noꞌoxxee gorsi hasisaaxxa yanna gorsatiten. Maxaafi Qullichchi “eloxxi jaalunte” ‘qajeellichchi gorsinni’ nophphitaaxxa haasoꞌaan.—Fak. 27:9.

2. Geedhe maa assa hasissa? Mayee? (“Torbatixxe Oddoxxe Bukkiiꞌni Gorsa” hitaꞌneexxa kollonna uudi)

² Giddiiꞌninni gubaꞌetixxi geedhe manjo elo qicinni gorsinaaki hittate kaddeexxa egeꞌna hasissaan. Yihowwa, Yesuusi darrenni kunni manni gubaꞌe karkarsaashsha baalloonseen. (1 Ph. 5:2, 3) Insaꞌne iitta assinaaki mitti ori, gubaꞌe giddo haasoꞌa shiqinsaa wodda Maxaafa Qullichchakeꞌni hundeessemeeka gorsa uwwatiten. Insaꞌne mitte mitten manjo ittan gubaꞌe giddiiꞌni miliqeeka manjo gorsa hasissaan. Geedhe ittan noꞌo duuchchiingi elo-qicinni manjo gorsa dandeennannoki hittate?

3. (a) Eloke gorsallo kada dandeennannoki hittate? (Isayaasi 9:6; “Manjo Gorsitinaa Wodda Yesuusii Fakkaatte” hitaꞌneexxa kollonna uudi) (b) Tenne qoꞌneꞌni mariꞌantaannexxi yaane maachcho?

³ Eloke gorsallo kadateꞌe Maxaafi Qullichchi giddo kulemeeke mannika fakkeenna giddiiꞌninni Yesuusika fakkeenna, qoꞌnisati heddo yaane barantannon. Buutotinna isiꞌaa “Manbeꞌii Gorsallo” hiyyemaaki summi uwwemeen. (Isayaasi 9:6 yaansis.) Tenne qoꞌneꞌni manji noꞌoo gorsa qoraa woddanna qorrebaangi gorsinannoxxa yanna maa assa dandeennannoxxa mariꞌantannon. Hasissaaxxe yannaꞌninna hasisaake orinni gorsa laꞌo affeeki hittate kaddeexxanna uundannon.

MANJI NOꞌOO GORSA QORAA WODDA

4-5. Mitti manji gorsa noꞌoo qoraa wodda edinse hoone qortuma ifi qora hasissa? Fakkeenniki kuli.

⁴ Mitti manji noꞌoo gorsa qoraa wodda edinse maa assinanno? Gammandennexxi okkonee manjo hirbangeꞌni gargaaratee hansannoxxi hexxaan. Kaddomaleꞌe, edinsennexxi ‘Kunni manji gorsa anee qoreexxi yaane egeꞌneennexxe?’ hine ifi qora hasissaan. Mitte mitte yanna gorsa qoreeka manjo gargaarrannoki eloki ori, isi gorsa qoraꞌneexxa yaane noꞌo irra egeꞌneeke manjibaa akeekatiten.

⁵ Konnee fakkeenna uudde. Fakkeennakeꞌe mitti atiki jaali jaba qicinni dhibemee hino. Isinna dhibo isixxee kaddaaxxa ciꞌlo qoꞌnisa safeexxa haasoꞌeexxi, dhibo isixxee kaddaaxxi eloxxi ciꞌlo heenete kaddeexxa ati maa hitaattexxa qoreen. Eloxxe ciꞌlo hite mellitattoxxi hexxoolenna ciꞌlotixxa barachcho baratteebexxon, ittan leenjo adhdhiteebexxon. Iitta hexxeexxi yaane futti hitaa wodda jaalo atika gargaartattoki eloki ori ciꞌlotixxa barachcho barateeka manjo afaashsha gargaaratiten.

6. Manji noꞌoo gorsa qoraa wodda hiissichcho hiissinebeꞌno edi darre maa assa eloxxe?

⁶ Mitti manji noꞌoo gorsa qoreexxi yaane egenneennexxe kaddoolenna, noꞌoo qoreexxe yaaneꞌaa hiissichcho hiissinebeꞌnongi heenoxxa yanna hekki hiyya eloxxen. Mayee? Fakkeenna 15:28 “qullichchi manjixxi qalbe hiissichcho hiissitebaa edi darre heddaan” hiyyaan. Hiissichcho egennoonnolenaꞌa? Kaddoolenna qoꞌne assatee, kadhatateenna hedateꞌe heenooxxi yanna hasissaaxxi hexxaan. Okkooꞌni hiissichchi noꞌoki Yihowwa ettene yaaneꞌaa afeexxe uushshonni qixxoꞌaake kadeexxa irran caala koka dandeennannon. Wabeekichcho Naataanika fakkeenna hubatte.

7. Naataanike fakkeennanaaꞌni maa baratteete?

⁷ Mootichchi Daawiti, wabeekichcho Naataaniꞌni mageneeffachchotika mine Yihowwaa ijaaroꞌaa hasaꞌneexxa haasoꞌeemman. Naataani, Daawiti mine ijaaraashsha rakkeexxi jajjabeessen. Kaddomaleꞌe, Naataani, Yihowwa maa hiyyaaxxa laqateꞌe yanna hasissaamman. Mayee? Buutotinna Yihowwa, Daawiti mageneeffachchotika mine isiꞌaa ijaarashsha hasaammabaan. (1 Ze. 17:1-4) Konne fakkeennanaaꞌni, manji noꞌoo gorsa qoraa wodda ‘haasoꞌatee udumiꞌneenneke’ kada beekkumake kaddeexxa barantannon.—Yaq. 1:19.

8. Manjo gorsinanno wodda xexxeꞌata hasissaaxxi wele buuto heente?

⁸ Manjo gorsinanno wodda xexxeꞌata hasissaaxxa wele buuto uundo: Mitte manjo gorsineeꞌnaa ikki manji gorsa noꞌoka laqeꞌe fuggoxxe yaaneꞌni iboole noꞌonna aallatema gattabaan. Tenneꞌaa manjo gorsinebeꞌno edi darre xexxeꞌachchoti heda eloxxen.

QORREBAANGI GORSINANNO WODDA

9. Geedhe mitte manjo gorsitebaa edi darre heene yaane koka hasissa? (Gelaatiya 6:1)

⁹ Geedhe mitte mitte yanna “fuggoke oraꞌni” meꞌitaaxxa dayyuwwa gorsa hasissaan. (Gelaatiya 6:1 yaansis.) Qoꞌnetee qophpheessemeeki Maxaafi Qullichchi, kunni manji “jabaxxa cubbo hujanna gophoole, elobaake oraꞌni meꞌateꞌni hedheeke manjon” hiyyaan. Geedhetiki herregi, kunni manji bari bariinxe hedhoke oraꞌni meꞌa ittin sufaashsha gargaaraten. (Yaq. 5:19, 20) Gorsi insaꞌneki gummatike kadaashsha, Geedhe gorsatee heddeeki manji fuggoke oraꞌni meꞌaꞌneexxa edisse koka hasissaan. Yihowwa noꞌo duuchchiingi wodani ifikenni akeekemme murte murteesseꞌnannoshsha eetii uwween. (Rom. 14:1-4) Mitti dayyi fuggoke oraꞌni meꞌaꞌneexxa geedhe hubattoole konnee dayyo gorsitaaki hittate?

10-12. Geedhe qorrebaangi gorsitaa wodda maa assa hasissa? Fakkeenniki kuli. (Fakketanna uudi.)

¹⁰ Geedhe mitti manji qorebaangi gorsitaaxxi yanna hexxaan. Tinni kinni shollaxxe yaanebaan. Hitta? Hawaarya Phawuloosi mitti manji fuggoke oraꞌni meꞌaꞌneenxa egeꞌna gophaaxxa haasoꞌeen. Tenneꞌaa geedhe fuggoke oraꞌni meꞌaꞌneeki manji gorsa insaꞌneka laqaashsha edisseen qophpheessa hasissaan.

¹¹ Mitte manjo qorebaangi gorsa, mitti haqichchi bagoke buttinaꞌni nophphaa karkarsatishshaten. Mitti wiisalli gumma kaasebaa edi darre buttini shaqqaashsha koꞌaan. Kunni shaqqeeki buttini sanne kaasatee uwwedhaan. Okkooꞌni gumma kaasaan. Muuxamakeꞌni kaaseexxi gumma nophphitaashsha wodeꞌe haꞌwisaan. Weli fakkaattaanxa, mitti geerchi manji isoo qorebaangi gorsaaxxa yanna, ikki manji gorsa isika laqaashsha hundaayye giissedha eloxxen. Fakkeennakeꞌe, geerchi okkone dayyiꞌaa eldaaxxa yanna uudeexxi, isiꞌaa qalbe giddixxen hedaꞌneexxa haasoꞌeechchi uduma, isoo uuddaaxxa haasoossoꞌaa hasaꞌneexxi yaane hexxeexxa kulaan. Mitti geerchi jaalalanna mararte afeeke kadoole gorsa isika adhdha welekeꞌni okkone qico haꞌurtabaan.

¹² Geerchi kunni haasoossaaxxa yanna huuni manjinna dedha hujaaxxanna mitte mitte yanna gorsi hasisaaxxa haasoꞌati qalbe isixxa shaqqisa ittin sufa dandeꞌaan. (Rom. 3:23) Laqatee gammachchiisaake haasoꞌinninna ulfinniki, dayyi kunni fuggoke oraꞌni meꞌaꞌneexxa toggichcha kadeeke orinni Maxaafa Qullichchakenaaꞌni leellishaan. Dayyi kunni balleessa hujeexxa addateechchi uduma, fuggoke oranaaꞌni higatee maa assa hasissaaxxa harumaa qicinni haasoꞌati gubaꞌetiki geerchi “sanne kaasaan.” Muuxamakeꞌni dayyo konnee galateeffatatinna isinni welti kadhatati gumma kaasemmaxxeꞌni wodeꞌe “haꞌwisaan.”—Yaq. 5:15.

13. Geedhe mitte manjo gorsitaa wodda gorsi okkone manjoꞌni aageexxa egendaaki hittate?

¹³ Mitte mitte yanna gorsinaꞌneeki manji isoo gorsinaꞌneexxi yaane maachcho kaddeexxa hubatabaaxxi hexxaan. Iitta hexxeexxi yaane kaddaa wodda mitti geerchi maa assa dandeꞌa? Kunni manji isi gorsaꞌneexxa yaane hubateexxa kokateꞌe maliki qortuma qora dandeꞌaan. (Mek. 12:11) Gubaꞌetiki geerchi qortumiinke hiissichchonaaꞌni gorsemaꞌneeki manji isi gorsaꞌneexxi yaane maachcho kaddeexxa hubateexxanna hubateebaaxxa egeꞌnaan.

HASISSAAXXE YANNAꞌNINNA HASISAAKE ORINNI GORSA

14. Aarranno wodda manjo gorsa hasissaa? Diideesi.

¹⁴ Noꞌo duuchchiingi qulliyye kada gonpheennaxxeꞌe wele manjo aarsitaaxxa yaane assinannoxxi yookiin haasoonnannoxxi hexxaan. (Qol. 3:13) Qaale Mageniinxinna mitte mitte yanna assinannoxxenna haasoonnannoxxe yaanenni weliꞌaan weli hifachchiinsannoxxi hexxaaxxa haasoottaan. (Eff. 4:26) Kaddomaleꞌe, aarranno wodda manjo gorsatee muddama hasissabaan. Mayee? Buutotinna “manjiinxi mufe Mageniinxi qulluma muuxendaashsha assitabaan.” (Yaq. 1:20) Arrennexxi manjo gorsinaanno wodda, irraan caala yaane yoxxaꞌni metaashsha assinannoxxi hexxaan. Iitta hiyyo noꞌoo aarseeke manjoꞌni hedinonna yaada noꞌoka ijjenda ifisa dandeenaaꞌnon hiyyotebaan. Kaddomaleꞌe, gorsinaanneke manjinni adda weli aaga dandeennannoki miirranno qicoꞌni heqqinonnoleten. Iyyoobii elo qicinni gorsaammake Eelihuke fakkeennanaaꞌni alfinannoxxa barachcho uundo.

15. Eelihuke fakkeennanaaꞌni maa barantanno? (Fakketanna uudi.)

¹⁵ Iyyobi dhariki isoo jajjabeessaammaki manni summa balleessaaꞌnaa faachchefataamma wodda, Elihu, Iyyoobi hiyyaꞌneexxa yaane heddo barraaꞌa laqaꞌni tureen. Eelihu Iyyoobii yoꞌoshsha eeyyeen. Kaddomaleꞌe, Iyyoobi seeri belo Yihowwaa aallataaꞌnaanna miketi iimi darre ifiꞌni miꞌlachcho assaaꞌnaa Elihu uudeexxi yoꞌoshsha aareen. Kaddoolenna Eelihu, Iyyoobii gorseeki aare saxxaa qicoꞌni heqqeexxi, shaqquntetinna ulfinnikiten. (Iyo. 32:2; 33:1-7) Eelihuke fakkeennanaaꞌni eloxxa barachcho alfinannon: Gorsi noꞌoki eloke kadaaki hasissaaxxe yannaꞌninna hasisaake orinni—ulfinnikinna jaalalati gorsinonnoleten.—Mek. 3:1, 7.

WELE GORSANNA GORSA ADHDHA ITTIN SUFFE

16. Faaro 32:8 kenaaꞌni maa barattinee?

¹⁶ Tenne qoꞌnexxi illitte xiqse ‘Yihowwa ille isixxa noꞌoꞌni ugge noꞌoo gorsaaxxa’ haasoottaan. (Faaro 32:8 yaansis.) Tinninna isi noꞌoo kuta belo gargaaratee hasaꞌneexxa leellishshaan. Isi noꞌoo gorsa calla kaddebaangi gorsa isika hujeteꞌni hosinsannoshshanna gargaaraan. Noꞌonna fakkeenna isika hordofa dandeennannon. Wele manjo gorsinanno wodda Yihowwashshanni ille noꞌoxxa okkone manjoꞌni ugganna yaane isiꞌaa qabbaashsha gargaarateꞌe dandeennennexxa yaane duuchcha assinannon.

17. Maxaafa Qullichchakeꞌni hundeessemeeki geedhetiki toggichchi gorsi maa leellisha? Diideessi. (Isayaasi 32:1, 2)

¹⁷ Tinni yanna edi irraan caala wele gorsinannoxxenna eloka gorsa qodhdhinannoxxen. (2 Xi. 3:1) Maxaafa Qullichchakeꞌni hundeessemeeki geedhetiki toggichchi gorsi ‘wodiꞌi hedhebaaxxe bakkaꞌni yaaꞌammake wodiꞌishshate’ kadeexxa leellishaan. (Isayaasi 32:1, 2 yaansis.) Noꞌo Laqatee hansaannexxa yaane egeꞌneeki, kaddomaleꞌe noꞌo laqa hasissaaxxa yaane noꞌaa kulaaki jaaluwwi “birreti giissineeke miyi hana hexxeexxa worqetixxa appile” uwweeshshaten. (Fak. 25:11) Tenneꞌaa noꞌo duuchchiingi wele gorsinannokanna eloka gorsa adhdhinannoka beekumma nossedha hasissaan.