Yaansisalluwwiinka Qortumuwwa

Taꞌa hunjaannexxi lassatixxi huje uurritaaki haanote?

Yesuusi: “Tinni Mootummatixxi gammachchiissaaxxi odo gosoole duuchchiꞌaa naqaashe kaddaashsha butta duuchchaꞌni lassendaan, okkooꞌni muuxami dagaan” hiyyeen. (Mat. 24:14) Tenne xiqseꞌni, ittan laakkoossa 6 nna 13 keꞌni “muuxama” hitaaxxi hiyya Girketike laagadinni telosi hiyyendaaxxen. Tinni hiyya Seexaniinxi butta Armageedoneti baxxaaxxa muuxamiinxa yanna ifissaaxxen. (Lel. 16:14, 16) Tenneꞌaa gammachchiissaaxxa odo muuxamiinke muuxami qicoꞌni lassa ittin sunfannon. Tinni edo anfeennaxxi hubanno, toggi assendeexxa leellishshaaxxe barachchon.

Edo Lumoxxi Baabiloone, lumoke abarinni baꞌa saffaa wodda gammachchiissaaxxa odo lassatixxa huje uurrinsannoni hinee addantaannan. (Lel. 17:3, 5, 15, 16) Iitta hendaannaki fakkeeniinke orinni “Yihowwa eloxxa fedhii isixxa leellishaaxxi wogga” muddaaki tenne yannaꞌniten hine addantaannaxxeeten (Isa. 61:2) Lumoke abari wodda baꞌnetenaaꞌni gataaki manni, ediseeni Yihowwaa addatemeeke kadeexxa leellishaaken hinenna addantaannan. Baꞌnetenaaꞌni gataaka manna 607 K.I.E.D Iyyerussaalemi baxxee wodda baꞌnetenaaꞌni gateeke Ayhuudootinni fakkeessinaannan. Okkone wodda baꞌnetenaaꞌni gateeki manni, Yihowwaa mageneeffateexxeenna fuggoxxe yaanenaaꞌni bayyateexxeꞌe fayyinaashsha ediseeni beesisi uggemeemmaken. (Hiz. 5:11; 9:4) Tinni hedino Matwoosi 24:14 keꞌni Armaageedonike bagedike muuxami edi darre, manni gammachchiissaaxxa odo laqeꞌe tarkaaffe adhdhatixxa futtii alfa dandeꞌaaxxa leellishaake yaadinni weli qabbaaxxebaan.

Matwoosi 24:14 keꞌni anfeennaxxe hubannoꞌni assendeexxi jijjiirra Leellisha Yohaannisixxa 16:21 keꞌni kaadetike kinjinni fakkaattaaxxe ergaꞌni anfeennaxxa hubannonna tuqqaan. Udumiiꞌni assendeexxi caaldeexxi qoꞌne, tinni lame xiqse weli aaggaaki hittate kaddeexxa caꞌa assite leellishsheen. Hitta? Konne qortumiki hiissichchi ‘manni Mootummatixxa erga laqeꞌe maa assa?’ hiyyaaken. Hawaarya Phawuloosi ‘fayyatike oraꞌni hedheeke’ manniꞌaa gammachchiissaaxxe odoxxi erga “hedhotike foole” kaddexxa borreesseen. Mageniinke naaphiꞌaa kinni ‘reyotike foolixxe’ elobaaxxe odon. (2 Qo. 2:15, 16) Kunni manni Mootummatixxi erga butta insaꞌnexxi fuggoxxe kaddeexxa, Seexani galchaꞌneexxanna ediꞌaa baxxaaxxaa kuldammaxxeꞌe laqa hasabaan.—Yoh. 7:7; 1 Yo. 2:17; 5:19.

Fakkeeniinki kaadetiki kinji “haranga lumoke” kadeexxanna hubatte. Itta hiyyonna lumoke abari wodda lassatixxi huje haranga jabaatati, Yihowwaki summi edi erran caala egeꞌnemaashsha assitaan. (Hiz. 39:7) Lumoxxi Baabiloone baxxeechchi uduma gammachchiissaaxxa odo eloke foolishsha uudaaki manni hedhaa? Hedha dandeꞌaan. Dedha Yihowwaxxi Naqaashe heddo woggaaꞌa dhariinxi adde baxxaaxxa hasootaꞌni turteexxa erga qalli hinaaxxi yookiin barantaaxxi hexxaan.

Tennee yaane hubatateꞌe, Yihowwa Tomme Qooma Gibitseke bogaꞌni ibiseexxa yanna kaddeexxa yaane qalliyye. Yihowwa “Gibitseke magenuwwaꞌni murtetixxa tarkaaffe” adhdheechchi uduma, Israꞌeeloota kadebaaki “baci makemeeki ardi” Israꞌeelike ardinni welti higeemman. (Zts. 12:12, 37, 38) Kunni manni Yihowwabaa higeeki Tommi Qoomi ibaaxxa Muuse haasoꞌeexxi yaane kaddeeꞌnaa uudeexxeete kada gophpheebaan.

Lumoxxi Baabiloone baxxeechchi uduma Yihowwabaa higaaki huuni manjinna okkone wodda buttateꞌni hexxaaxxe Kirsitoosixxe dayyuwwaa eloxxa yaane assatixxa bado alfaan. (Mat. 25:34-36, 40) Kaddomaleꞌe, gedhebo hiyyeme murteessematixxi futtiiꞌi, buttateꞌni gateeki hariiremeeki manni iimateꞌni badhaasa adhdhoꞌaa meꞌaa wodda yookiin Armageedoniki bagedi safateꞌe shiixxooxxi yanna gattaa wodda uurritaan.

Tinni anfeennaxxe hubannoꞌni toggi assendeexxi yaane Yihowwaxxa jaalalanna mararte baꞌlisse leellishshaan. Eeti, Isi “duuchchiniingi aadde aagoꞌaate maleꞌe, ayyinna baꞌoꞌaa hasaꞌnebaan.”—2 Ph. 3:9.