Shookaameette Manjo Kaddonnolenna Miisoonichcho Kadeꞌe Ergatema Dandeꞌeennen

Ilemenneki 1951 woggaꞌni Ositiriya, Veena hiyyendaaxxe bakkaꞌniten. Hadi ankinna Katooliketixxa adde hordofaammaken. Shookaamette kadonnolenna Magenokeꞌni addataannani, ittan duuchchinii wodda isibaa kadhataannan. Anni anki Yihowwaxxe Naqaashenni Maxaafa Qullichcha barata safaa wodda ani sallane woggamman. Ama anxinna addanna turtebaangi isinni welti barata saffeen.

Addanna turrebeꞌnongi Veena, Dubiling hiyyendaaxxa Gubaꞌe mara sanfennen. Noꞌonna mini hadinni bukki hineꞌe heddo yaane welti hunjaannan. Maxaafa Qullichcha yaansinsaannan ittan qoꞌninsaannan, gubaꞌe marraannan, lumolla bukkii hexxaa wodda marraꞌni gargaarraannan. Osummanni hedheꞌe Yihowwaa jabaxxa jaalala afannoshsha anni anki anee gargaareen. Matanga anni ankixxi kadha aninna dayyo anxi qajeellisanoole kandannoshshatemman. Kaddomaleꞌe, ani qajaallisanjo kada hasaannabaan.

WOꞌMA YANNAXXA ERGATENSHA SAFENNE QICO

Cuuphemenneki 1965 woggaꞌni, 14 woggaꞌni hedheetemman. Kaddoolenna, egeꞌnebeꞌnoke manji biraa shiqe haasoossa aneꞌni haꞌurtaamman. Heddo yanna wele manjonaaꞌni jala hedhenneshsha asse ifi hedaannan, ittan wele dargaggeeyyenna anee eetoꞌaa hasaannan. Tenneꞌaa cupheme addanna turebeꞌnongi Yihowwaa mageneeffataꞌnebaake manninni jaaloomennen. Insaꞌneꞌni hedha eeyyonnolenna, Yihowwaxxe Naqaashe kadebaake manjinni qeerraaxxa yanna saꞌissaannaxxeꞌe, wodani anee nageꞌa kutaamman. Kaddomaleꞌe, insaꞌnenaaꞌni gargariti higatixxa hunna afeennabaan. Anee gargaarteexxi yaane maachcho?

Eettene yanna 16 woggaxxi Doroti hiyyendaaxxi belto gubaꞌe noꞌoxxibaa daggeen. Ise manjiinba mine mine martaꞌni lassatee affeemmaxxi hinaaffe manbeꞌa hiyyannoshsha assiteen. Ani woggati shiixxoora isenaaꞌni saꞌaannan, kaddoolenna ani ergatenshateꞌni bebbedatemmabaan. Iitta hiyye hedennen: ‘Hadi anki Yihowwaxxe Naqaasheni, Dorotike hadonaaꞌni dhugaati giddo hedheengi hedhebaan. Ise hexxaꞌneeki dhibendaꞌneexxe amanniten, kaddolenna duuchchinii wodda ergatensha fuldaꞌneen!’ Iseki fakkeenni Yihowwaa caaldeexxa yaane assannoshsha tirtirseen. Harumaaxxe yanna giddo Dorotinna ani edinsennexxi kiphallo qajeellisano, okkoꞌni duuchchi woddixxe qajeellisano kandennenn. Doroti ergatenshatee affeemmaxxi halcha aneenna dammassiteen. Isenna taakkaxxe yaannaaꞌa manjo Maxaafa Qullichcha barsiisa safannoshsha gargaarteen. Yannati uduma manjiinba mine mareꞌe, orakeꞌni ittan wele bakkaꞌni manjo haasoossa shollexxaꞌni meꞌiteen.

Duuchchi woddixxe qajeellisanjo kadennexxe taakkaxxe woggaꞌni, Ositiriyichchi, Henzi hiyyemaꞌneeki mitti dayyi gubaꞌe noꞌoxxibaa dageen. Isinna dhugaa laqeeki Kanaada hedhaꞌneeka Yihowwaxxe Naqaashe kadeeka dayyo isika uudoꞌaa mareemmaxxe yannan. Henzi gubaꞌe noꞌoxxibaa dageeki gargariti hedheeke qajeellisanjo kadeeten. Dageeshshanni isoo eeyyeennan. Isi miisonummati ergatematee hasaamman, ani kinni hasaannabaan. Tenneꞌaa keꞌitokeꞌni isoo eeyyaannexxa isi egeꞌnoꞌaa haseennabaan. Udumiiꞌni Henzinna ani weli uuxxeꞌne buliiteꞌni eꞌyinennen, okkooꞌni qajeellisano kandeꞌe Ositiriya welt ergatemmaannan.

MIISOONUMMATIXXE ERGATENSHAKA HERREGA

Henzi miisonichcho kadatee afeexxa halcha duuchchinii wodda aneꞌni haasoꞌaamman. Isi anee hunnati tirtirsaammabaan, tenne irra “Oose afa gonpheennaxxeꞌe, ergatenshatixxe hujeꞌni caaldeexxa yaane Yihowwaa assa dandeennaaꞌno?” hiyyaꞌni anee tirtirsaaka qortuma qoraamman. Shookaameette manjo kadennaxxeꞌe, miisonummatixxa ergatensha sodaataannan. Qajeellisanjo kadeꞌe ergatemaannolenna, miisoonummatixxi ergatensha aneꞌni haꞌurtaachcho fakkaattaamman. Kaddoolenna Henzi ossunteti miisoonota kadatika herrega adda hedannoshsha asseen. Ittan sodaꞌa ifixxeꞌni miꞌlachcho assati irra manjo gargaarteꞌni miꞌlachcho assannoshsha jajjabeesseen. Gorsi isiki anee yoꞌoshsha gargaareen.

Laanginni miisonummatixxe hujexxi yorte lebbaꞌni meteen. Tenneꞌaa Giliyaade baratatee kuꞌlinennen. Kaddomaleꞌe, dame beero edisennexxi Ingilizuffatika laagada adda baratannoshsha jajjebeessiteen. Sase woggaaꞌa Ingilizuffa barataꞌni turennechchi uduma, keekkantebeꞌnongi Ositiriya, Salziburgi hiyyendaaxxe bakkaꞌni Yugozilaaviyixxe gubaꞌeꞌni dhaabemmennen. Ettenne bakkaꞌni mitte wogga rogiinxe hujeꞌni saꞌissinennexxinni mitteba torbaane wogga ergatenshateꞌni turreennen. Serbo Kiroshiyiinki laagadi haꞌuraammakenna kadoole Maxaafa Qullichcha barsiinsaanneki heddi manni hedhemman.

Okkooꞌni 1979 woggaꞌni “hafuura adhdhatee” Bulgaariya menannoshsha dame beero qorteen. Ettenne bakkaꞌni lassatixxi huje hujendabaashsha mootumma kutteemman. Tenneꞌaa hafuura adhdhateꞌni heꞌnennaxxa yanna mitte manjoꞌninna lassineeꞌnon. Kaddoolenna Sofiya hiyyemaꞌneeke lumo qachchaꞌni hexxaꞌneexxe onde dayyuwwaaꞌa shiixaramma borreessiluwwa shoꞌne aaꞌne menennen. Ani yoꞌoshsha sodaateennan, kaddoolenna Yihowwa anee gargaareen. Dayyuwwa tinni usurendaaxxa egendaꞌninni affeexxa gammashshonna jabeenna uudanno wodda Yihowwaxxi orga fedheexxa yaane assannoshsha qortoole dandeꞌennexxa duuchcha assannoshsha aniꞌaa jabeenna uuteen.

Shiixxooxxe yanna uduma higgeeni Giliyaade baratateꞌe kuꞌlinennen. Tenne yannaꞌni kinni yeꞌemmennen. Yunayitidi Istetise hedheeke barachchotike mineꞌni Ingilizuffati barantaannechcho fakkaatteemman. Kaddomaleꞌe, Sadaasa 1981 woggaꞌni orga Jermeene, Wisbaadeni hexxeexxe dame beeroꞌni Giliyaadixxi barachcho uwwendaashsha assiteemman. Tenneꞌaa noꞌaa sholledhaake Jermeenetike laagadinni barachcho hordonfennen. Dhaabemmaanneki habateta?

LOLI BIRA SAꞌEEKE BOGAꞌNI ERGATEMA

Dhaabeemmeennaki Keeniyatemman! Kaddomaleꞌe, Keniyixxi dame beero Ugaanda ergatema dandeennannoxxa qorteen. Tomme wogganaaꞌni caaldaaxxe yannaaꞌa, sannachchiinki akeekisanji Idi Aminiki Ugaandixxa mootumma galchateꞌni hedhemman. Itti aandaaxxe wogguwwaꞌni isixxi miiccamiinxi galcha kumuwwiki lakkoꞌemaaka manna shilteen, ittan miiloonuwwati laakkoꞌemaaki manni rakkoteꞌni ibaashsha assiteen. Okkooꞌni 1979 woggaꞌni Ugaandiinxi mootumma higgeen ibbeen. Loli bira saꞌeeke bogibaa meꞌatee sodaataannaki mayeete kaddeexxi egeꞌnendeexxen. Kaddoolenna Giliyaadiki barachchoti mini Yihowwaꞌni addantannoshsha barsiiseꞌeen. Tenneꞌaa okkone bogibaa ishshi hine menennen.

Ugaandi bogaꞌni hedhemmaki jeeji hedhondee sodaachchisaakemman. Mootumma wodeꞌe, korrontenna wele hasissaaxxa yaane shiqisa dandeettaammabaan. Okkone bogaꞌni bilbili hujaammabaan. Giddiiꞌninni hashshunte manji weliꞌaan weli tokkosaamman, ittan saammaamman. Bogi hashsheeꞌnaa mine ifikeꞌni hedheeki manji duuchchi, insaꞌnee dange saammabaashshanna shinnabaashsha Mageniinbaa kadhataamman. Tinni rakkonna hexxoole loolakeꞌni hexxemmaxxe dayyuwwaxxi adde jabaxxemman!

Aninna Henzi 1982 woggaꞌni Ugaandiinke lumoke qachchibaa Kampaalaa menennen. Keꞌitiinke onde agenjiꞌaa Saaminna Kirsitiina Waꞌisiwa hiyyemaake arenna aroꞌiba onde oose insaꞌnexxinninna shoole hadi insaꞌnekinni welti heꞌnaannan. Dayyi Saaminna dayyo Waꞌisiwwa ittan maate insaꞌnexxi heddo yanna barrateꞌni mittele calla indaamman, insaꞌne anfeexxe heenooxxe yaanenaaꞌni welekee uunaamman. Waꞌisiwanni heꞌnennaxxa yanna miisoonummatixxe ergatensha noꞌoxxee kaddaaxxa heddo yaane baranteennen. Fakkeennakeꞌe, shiixxooke wodiꞌinni biso ansheꞌnaa qiconna biso ansheꞌnemmake wodiꞌinni fooleꞌii mine caꞌa assinaa qico barateennen. Henzinna Ani 1983 woggaꞌni Kampaala nageellitte bakkaꞌni heꞌnannoka mine alfinennen.

Ergtenshatixxe hujeꞌni yoꞌooshsha gammandeennan. Mitte agenjoꞌni calla 4,000 iimi darre hexxeexxa borreessile manjokee uunennaxxa qalli hiyyaannen! Manni dhugaatee eloxxa uushsho afeemman. Mageno ulfeessaammani, ittan Maxaafa Qullichcha uuddaaxxa hasoꞌa hasaamman. Henzinna Ani duuchchinii wodda 10 kenaaꞌni 15 geyaaka manna qifi qofinni Maxaafa Qullichcha barsiinsaannan. Ittan barsiinsaannake mannanaaꞌni heddo yaane baranteennen. Fakkeennakeꞌe, torba torbandeꞌni lekkati gubaꞌe dangaꞌnoolenna koꞌwinenne hinaammabaan, ittan duuchchinii wodda alba insaꞌnekeꞌni gammashsho leellitaamman.

Ugaandi giddo 1985 kenaaꞌni 1986 wogga qicoꞌni lame sannachchiinxi gamo weliꞌaan weli lolendaamman. Heddo yanna lumollamma loliinka imaana kaꞌliteexxa oose uundaannan. Insaꞌne sannachcha kande ora saꞌaaka manna fattanshaamman. Eettene yanna dhugaa laqa hasaꞌneeka manna hansanno wodda qalbeeffanna anfannoshshanna qalbe noꞌoxxi raankitabaashsha Yihowwa gargaaroꞌaa kadhantaannan. Yihowwanna kadha noꞌoxxa laqeen. Mageniinxe Mootummaxxa erga laqa hasaꞌneeke manjinni afemmanno wodda sodaꞌa deenaannan.

Gadhike boganaaꞌni dageeke manniꞌaanna dhugaa kula yoꞌoshsha eenaannan. Fakkeennakeꞌe, Tatarsitaani (Oddichcha Ruusiya) hinaaxxe bakkanaaꞌni dageeka Muratinna Dilbaari Ibatuliini hiyyemaake miniinka annanna miniinxa ama Maxaafa Qullichcha barsiinseennan. Murati ciꞌlotike ogeessamman. Insaꞌne laminiingi cuuphemmeexxi taꞌa Yihowwaaꞌa addatenshati ergatemateꞌni heꞌneen. Udumiiꞌni Yukireeneeꞌni daggeexxe ifi shiꞌwatee hassaammaxxe Tatijaana Vileysika hiyyendaaxxe manjoni afemennen. Tatijaana cuuphendeechchi uduma Yukireeniꞌaa higgeexxi borro noꞌoxxa tikatixxa huje hujjeꞌeen.a

WELE BOGAꞌNI MIISOONOOTA KADE ERGATEMA

Henzinna ani 1991 woggaꞌni hafuura adhdhateꞌe Ositiriya meneeꞌnaaꞌa looliinxi dame beero Bulgaariyaa menannoshsha daddaabbe borreessiteen. Borotike Awuroppaꞌni kominisitetixxi galcha ibbeechchi uduma Bulgaariyi giddo Yihowwaxxe Naqaashexxi huje seeriinxa eetii alfiteen. Iimiiꞌni haasoꞌennashshanni, huje noꞌoxxi konne bogaꞌni kutendeemmaxxeꞌe borreessiluwwa shoꞌnaꞌni eꞌyinshaannan. Taꞌa kinni lassinonnaa ergemmeenneki tenne bakkabaaten.

Dame beero, Ugaandaa hingebeꞌnongi okkooꞌninni Bulgaariyaa menannoshsha ajajjeemman. Tenneꞌaa miisoonoota kande ergatemmaannaxxe bakkaꞌni hedhemmaka miya hinge adhdhinebeꞌnongi yookiin jaaluwwa noꞌoka nageꞌiki hedhdhe hinebeꞌnongi Jermeenexxe Beetelebaa menennen. Kaamoletinna daggeexxi Bulgaariyaa noꞌoo adhdhite meteen. Sofiya 20 baꞌlisanoole hexxeexxe mitte golloꞌni dhaabemmennen.

Bulgaariya edo egennebeꞌnoxxi heddo rakko noꞌoꞌni futti hiteen. Taakkaxxa okkone bogika laagada egenneennabaan. Langaba Bulgaariyiinke laagadinni hexxemmaxxi borreessile Bari bariinxe Hedhobaa Akeekkaaxxa Dhugaa hitaaxxenna Maxaafi Qullichchiinka Raaga Baratannoka Maxaafa hitaaxxa callamman. Ittani Maxaafa Qullichcha barataaka manjonna afa noꞌoꞌni haꞌurteemman. Tinni rakkuwwa duuchcha hexxoolenna, hinaaffe affeexxi Yihowwaxxi Naqaashe insaꞌne heenoke laakkossanna kandoole jabaante lassinaamman. Bulgaariyiinxi Ortoodekisetixxi adde noꞌoxxa lassatixxa huje eeyya gophpheemmaxxeꞌe noꞌoꞌni shorichcho geesisa saffeen

Bulgaariyiinxi mootumma, Yihowwaxxe Naqaashexxa adde 1994 woggaꞌni seeri beloxxe adde hiteꞌeen. Tennenaaꞌni kexxeexxa manni noꞌoo fuggoxxa adde hordonfaanneke mannishsha uudaamman. Mitti mitti dayyuwwi usuremeemman. Miidiyuwwi, Yihowwaxxi Naqaashe oose munde adhdhitaabaashsha assitaꞌni shiltaꞌneeshshanna insaꞌnexxe addeki manni ifi shiꞌwaashsha barisiisaꞌneesha haasoꞌaꞌni elobaaka dhara facaasaamman. Fule lassandee yaane noꞌoꞌni yoꞌoshsha haꞌurteemman. Heddo yanna futti hinannoki manji noꞌoꞌni cancaꞌnemman, polise yeꞌaꞌnemman, ittan noꞌoꞌni darbataamman. Bogi konnebaa borreessiluwwa eꞌyisha dandeessissaaxxe yaanemmabaan. Ittan bukkiitee kadaaka galma kireeffata haꞌurtittetemman. Matanga mitte lumoxxe bukkiiꞌni heꞌneeꞌnaa poolise daggeexxi uurrisseemman. Manji noꞌoo xaraarrenda gibaamman. Kunni manni Maxaafa Qullichcha barata hasaammake Ugaandi bogike ardinaaꞌni haranga gargariti hedheeken! Adde wonxabeꞌnoshsha noꞌoo gargaarteexxi yaane maachcho?

Loolakeꞌni hedheeke dayyuwwinninna dayyuwwanni mittoomati gammashsho alfinennen. Insaꞌnenna dhugaa egenneexxe gammandaamman ittan noꞌo assinaanneke gargaarsiꞌaanna saadino anfeemman. Duuchchiingi dayyuwwi mittunteti weli gargaaraꞌni hedhaamman. Fedheexxi hujenna uwwendoole Manjo gagaarateꞌni miꞌlachcho assinaannole gammandeenneke kada dandeennannoxxa insaꞌnenaaꞌni baranteennen.

Heenooxxe wogga uduma jeeji jijjiiremeen. Orga noꞌoxxi 1998 woggaꞌni higgeeni seeriinxa eeti alfiteen, ittan Bulgaariyiinke laagadinni heddo borreessiluwwa tikendeen. Okkooꞌni 2004 woggaꞌni haarooxxi ijaarendeexxi dame beero eebbisendeen. Taꞌixxe yannaꞌni Bulgaariyi bogaꞌni 57 gubaꞌenna 2,953 baꞌlisanoole hexxeen. Tenne saxxeexxe ergatenshatixxe woggaꞌni, 6,475 manji Qalliitike Ayyaaniꞌaa bukki hiyyeen. Qachcha Sofiyikeꞌni edo onde dayyuwwa calla hexxemman, taꞌa kinni sallane gubaꞌe hexxeen! Noꞌo “Shiixxooke kadeeki kuma” kadaaꞌnaa uundeennen.—Isa. 60:22.

IFIXXE RAKKONNI WIXIXXI HIYYA

Qeerraaxxe yannaa turteexxa fayyuntetixxa rakko afeennen. Saxxeexxa wogguwwa dokiteere heddo ciꞌnachuwwa bisi anki giddo affeen. Mitti ciꞌnachi hedheeki umi giddoten. Ciꞌnachchi darshaꞌni meꞌabaashsha cerereti ciꞌloomemeennen. Hinde mareeꞌnaa dokiteere umi giddiiꞌni ciꞌnachcha dare fulchatee 12 saate turteen. Fowwi hiyyanno qicoꞌni Hindetixxe dame beeroꞌni turrennechchi uduma Bulgaariyaa hingennen.

Ittani Henzinna hadokenaaꞌni tare saꞌaaka Hantigiteen hinaake dhukkubinni abidemeen. Isinna takkaarro adhdhateꞌe, haasoꞌateenna biso ifika haseeshsha leꞌmisatee rakkataamman. Dhibo jabaattaꞌni metaashshanni gargaarsi anki belo mitte yaane assa dandeꞌa gopheen. Mitte mitte yanna, yaane hunna anxi iimi darre hexxeechcho labaammaxxeꞌe yaadaannan. Kaddomaleꞌe, Boobi hinaaki mitti dargaggeessi dayyi Henzi isinni welti lassaashsha adhdhe meꞌaamman. Boobi, Henzi seeri belo haasoꞌaa wodda biso lelemisaa wodda manji anee maa hiyya hiyyaꞌni shookaammabaan. Ani Henzii, gargaara dandeꞌabeꞌnoxxa yanna Boobi duuchchinii wodda isoo gargaaraamman. Tenne aadaꞌni oose ila gonphonnolenna Boobii Yihowwa noꞌaa uwweeke beltishsha uundaannan!—Mar. 10:29, 30.

Henzi kanseretixxa dhibonna afeemman. Yaadissaaxxa eeyyaanneki miniinki anni anki 2015 woggaꞌni reyoti anenaaꞌni gargariti higeen. Henzixxe reyonaaꞌni kexxeexxa qofitti gateenechcho aneꞌni labbeen, ittan isi reyeenxa addata aneꞌni haꞌurteen. Qalbe anxeꞌni kinni isi hedhondinni hedheen! (Luq. 20:38) Duuchchinii wodda isika eloka haasoꞌanna gorsa qalli hiyyaannen. Isinni welti addatenshati ergatemmennexxe yannaaꞌa galateeffataannen.

GARGAARSA ISIKEE YIHOWWAA GALATEEFFATAANNEN

Yihowwa heddo rakkoꞌni jabaate ossannoshsha gargaareꞌeen. Shooko injifatennexxi manjo gargaarannoxxe misoonichcho kadannoshshanna gargaareꞌeen. (2 Xi. 1:7) Galata Yihowwaka aninna anxi lumoxxi dayyo taꞌa woꞌma yannaxxe ergatenshaꞌni heꞌnennen. Isenna iseki miniinki anni Awuroppi giddo Serbiya hiyyendaaxxe bakkaꞌni rogiinxe hujeꞌni heꞌneen. Anni ankixxi kadha hiissichcho alfiteꞌeen!

Maxaafi Qullichchiinxi qoꞌne giddika nageꞌa alfannoshsha assiteꞌeen. Rakkotixxa yanna Yesuusishsha “jabaate kadhata” hasissaaxxa barateennen. (Luq. 22:44) Yihowwa kadha anxa hiisseeki mitti ori Sofiya, Nadazhiidixxe gubaꞌeꞌni hexxeexxi jaaluwwa anxi leellishaꞌneexxe jaalalaninna shaqute darreeꞌniten. Insaꞌnenni bukki hiyye geebannoshsha yeꞌnaamman, ittan aniꞌaa saadino anfeexxa duuchchinii wodda leellinshaamman. Tinni yaane dhugaatixxa gammashsho alfannoshsha assiteen.

Duuchchinii wodda reyotenaaꞌni keꞌatika tasfa hedaannen. Anni ankinna ama anxi reefi buliiteꞌni fullemma woddishsha danchoommeꞌe mini noꞌoki edo uurrineꞌe, dayyo anxi sagale raꞌissitaꞌni, Henzi kinni fadhachchi isiki bira uurreeꞌnaa sammo anxeꞌni leellinaꞌneen. Tinni hedino qalbe anxenaaꞌni elobaaxxi hedino fugussendaashshanna Yihowwaa galateeffatannoxxe yaanenni woꞌmitaashsha assiteꞌeen.

Hedho ifixxeꞌni miꞌlachcho assanna ediꞌaa hexxeexxa yaane heda, Faaro 27:13, 14 keꞌni Daawiti “Hedho afeeke mannixxe buttaꞌni Yihowwaaxxa elle uudannonni hitaaxxa adde afa gopheennele silaati maa kadannaꞌa! Yihowwaa adde assedhi, worba kadi, qalbe atixxinna jabaattowwaali. Eeti, Yihowwaa adde assedhi” hiyyeeke yaadaꞌni qalbe mitteni addataannen.